Аллоҳ таоло кўзни ўзига хос нозик қилиб яратган. Кўзнинг ташқи пардаси мугуз парда (шох парда) деб аталади. Бу ниҳоятда шаффофдир.

Тананинг барча ҳужайралари капиллярлар (майда томирлар) орқали озиқланади. Борди-ю, кўзнинг мугуз пардасини ҳам шу услубда озиқлантирилганда, биз борлиқни тўрпарда ортидан кўрган бўлардик. Шунинг учун Аллоҳ таоло бу мугуз пардани ҳулул орқали озиқланадиган қилиб яратди. Ҳулулда кўзнинг мугуз пардасида жойлашган ҳужайра озуқани тўғридан-тўғри ҳаводан олиб, керакли озуқани ўзидаги мембрана орқали ёнидаги ҳужайрага узатади ва шу тарзда барча ҳужайралар озиқлангунича бу жараён давом этади. Мана шундай озиқланиш туфайли мугуз парда шаффофлигича қолади ва тасвир ҳам шаффоф ҳолда кўринади.

Ҳа, биз атрофни шаффоф, тиниқ ҳолда кўришимиз учун Аллоҳ таоло кўзимизнинг мугуз (кўзнинг энг устки шаффоф) пардасини тўғридан-тўғри ҳаводан озиқланадиган қилиб қўйди. 

Кўзнинг тўрпардаси эса ўнта табақадан иборат.

Ҳозирги кундаги энг сўнгги русумдаги рақамли фотокамеранинг бир квадрат миллиметр жойида ўн мингта ёруғликни қабул қилувчи рецепторлар бор. Кўзнинг тўрпардасидаги бир квадрат миллиметр жойида эса бир юз қирқ миллионта ёруғликни қабул қилувчи рецепторлар жойлашган. Бу рецепторлар конуссимон ва таёқча кўринишидадир. Мана шу кўп миқдордаги рецепторлар сабабли инсон кўзи саккиз миллион рангни бир-биридан ажрата олади.   

Инсон Финляндияга борса, у ерда қиш фаслида об-ҳаво минус 69-70 даража паст бўлади. Совуқдан музламаслик учун у устига қалин кийимлар кийиб, бошини ҳам ўраб олади. Оёқларига ҳам қалин этиклар кийиб, қўлини қўлқоп билан совуқдан асрайди. Аммо кўзларини беркита олмайди.

Бундай совуқда кўздан чиқадиган сув дарҳол музлаб, кўз кўрмай қолиши керак эди. Аммо шундай ноқулай об-ҳавода ҳам кўз музлаб қолмайди. Нега? Чунки, Аллоҳ таоло кўзнинг сувига музлашнинг олдини оладиган моддани қўшиб яратган. У Зот Қуръони Каримда шундай марҳамат қилади:

    أَلَمْ نَجْعَل لَّهُ عَيْنَيْنِ

“Биз унга икки кўзни бермадикми?” (Балад сураси, 8-оят).

Инсон биргина шу кўз ҳақида тафаккур қилиши билан Аллоҳ таолонинг санъати, азамати олдида лол бўлиб, бутун танаси қўрқувдан титрайди, иймонининг нури зиёда бўлиб, Унга кўпроқ ибодат қилишга уринади.

Сўзимизга ушбу оят билан хулоса қиламиз:

صُنْعَ اللَّهِ الَّذِي أَتْقَنَ كُلَّ شَيْءٍ

“Бу ҳар бир нарсани пухта қиладиган Аллоҳнинг санъатидир” (Намл сураси, 88-оят).

Муҳаммад Ротиб Набулсийнинг мавъизаларидан

Нозимжон Иминжонов таржимаси

Рамазон хайр-у саховат ойи. Ҳазрати Пайғамбаримиз соллаллоҳу алайҳи ва саллам “Агар умматим Рамазон ойида улар учун қанча фазилатлар борлигини билганларида эди, йилнинг ҳаммасини Рамазон бўлишини ҳохлар эдилар”, - деганлар.
Рамазон ойида қўни-қўшни маҳаллада, қариндошлар орасида ёрдамга муҳтожларга мурувват кўрсатиш, ёрдам қўлини узатиш, қариндошларга силаи раҳм қилиш, беморларни зиёрат қилиш, етимлар бошини силаш билан бўлади.
Муборак Рамазон ойи муносабати билан Қорақалпоғистон Республикаси Нукус туманидаги «Имоматдин эшон» жоме масжиди тарафидан ҳомийларни жалб этган ҳолда мазкур тумандаги «Қыран тов» овул фуқаролари йиғинларида истиқомат қилувчи кам таминланган оилаларга озиқ-овқат маҳсулотлари улашилди.

Сейтниязов Ажинияз,
Нукус тумани «Имоматдин эшон»
жоме масжиди ходими

Қозоғистон Республикаси пойтахти Нурсултон шаҳрида Рамазон ойи муносабати билан намозхонларга қулайлик яратиш мақсадида бепул автобус қатновлари йўлга қўйилди. «Казинформ» ахборот агентлигининг хабарига кўра, таровиҳ намозидан кечки пайт чиққан намозхонлар пойтахт бўйлаб текинга манзилларига етказиб қўйилади.

«Астана LRT» транспорт хизмати кўрсатувчи корхона "Ҳазрати Султон" масжиди, "Нур Остона" масжиди, "Ирискелди ҳожи" масжиди, "С.Ғилмани" масжиди ва "Оқмасжид" масжидлари йўналишида автобусларни йўлга қўйган.

Ўзбекистон мусулмонлари идораси Матбуот хизмати

Ўзбекистон Республикаси Президенти Шавкат Мирзиёев ҳудудлар иқтисодиёти, аҳоли ҳаёти билан яқиндан танишиш мақсадида 16 май куни Андижон вилоятига жўнаб кетди. Бу ҳақда Президент матбуот хизмати хабар берди.

Ташриф чоғида аввал берилган топшириқлар ижроси, шаҳар ва туманларда амалга оширилаётган бунёдкорлик ишларини кўздан кечириш, янги мақсад ва вазифаларни белгилаш режалаштирилган.

Ўзбекистон мусулмонлари идораси Матбуот хизмати

Ўзбекистон мусулмонлари идораси томонидан 2019 йил 15 май куни Бухородаги Мир Араб олий мадрасасида ўрта махсус ислом таълим муассасалари битирувчилари ўртасида “Ягона олимпиада” танловининг республика босқичи ўтказилиши белгиланди.

Бугун 15 май “Ягона олимпиада” танловининг республика босқичи бошланиб, танлов муносабати билан Мир Араб олий мадрасасига Ўзбекистон мусулмонлари идораси вакиллари, республикамиздаги 9 та ўрта махсус ислом таълим муассасаларидан иштирокчи талабалар, шунингдек, ўқитувчилар ҳамда таълим муассасалари раҳбарлари ташриф буюрди.

Ўзбекистон мусулмонлари идораси тасарруфидаги ўрта махсус ислом билим юртлари битирувчи босқич талабалари ўртасида ўтказиладиган “Ягона олимпиада” танлови Низомига мувофиқ ягона олимпиада иштирокчилари қуйидаги фанлар бўйича синовдан ўтказилди:

1-блок: фиқҳ, ақоид (тест)                                           50 балл

2-блок: араб тили (ижодий имтиҳон)                            30 балл

3-блок: Ўзбекистон тарихи (тест)                                  20 балл.

Ягона олимпиада иштирокчилари синовдан ўтказилиб, танлов ғолиблари қуйидаги тартибда тақдирланди:

I ўринни эгаллаган иштирокчи “Фахриддин ар-Розий” ўрта махсус ислом билим юрти талабаси Эшбоев Шоҳзод Нормаматович
тўлов-контракт асосида олий диний таълим муассасасига конкурссиз ўқишга қабул қилиш ва 1-даражали диплом;

II ўринни эгаллаган иштирокчи “Кўкалдош” ўрта махсус ислом билим юрти талабаси Узоқов Абдулвосид Абдувоҳид ўғли олий диний таълим муассасасига ўқишга кириши учун имтиҳон натижалари бўйича ўзи тўплаган балнинг 25 фоизи миқдорида қўшимча балл қўшиб бериш имтиёзи,
2-даражали диплом ва микротўлқинли печь;

III ўринни эгаллаган иштирокчи “Мир Араб” ўрта махсус ислом билим юрти талабаси Хамидов Абдулбосит Орифжон ўғли олий диний таълим муассасасига ўқишга кириши учун имтиҳон натижалари бўйича ўзи тўплаган 

балнинг 15 фоизи миқдорида қўшимча балл қўшиб бериш имтиёзи,
3-даражали диплом ва чангютгич билан тақдирланди.

Ўрин эгалламаган иштирокчилар 300.000 (уч юз минг) сўм миқдоридаги китоблар тўплами ва фахрий ёрлиқ билан тақдирланди.

Танлов кун тартибида ташрифнинг маданий-маърифий қисми ҳам назарда тутилган бўлиб, унга кўра Мир Араб олий мадрасасига “Ягона олимпиада” танлови муносабати билан ташриф буюрган барча меҳмонларни кўҳна ва навқирон Бухоройи шариф бўйлаб саёҳат қилдириш, шу жумладан, дунёга машҳур “Етти пир” зиёратгоҳларига олиб бориш режалаштирилган.

Зеро, Президентимиз Ш.Мирзиёев ҳам жорий йилнинг 29 март куни Бухородаги “Етти пир”нинг биринчиси ҳисобланадиган Абдухолиқ Ғиждувоний мақбарасини зиёрат қилиш асносида: “Китобда ўқиш бошқа, зиёрат қилиб, юракдан ўтказиб ўрганиш бошқа. Бу жой маърифат маркази бўлиши, одамлар ўзига илм олиб кетиши керак”, деб таъкидлади
ва Абдухолиқ Ғиждувоний мажмуасига имом-хатибларни жалб этиб, уларга алломаларимиз маънавий меросини тўғри ва чуқур ўргатиш, халқимизга етказиш бўйича топшириқлар берди.

Мир Араб олий мадрасаси Матбуот хизмати