muslim.uz
Хушхабар: Ўзбекистонда янги масжид очилди! Янги масжид яшил ҳудудда!
Ўзбекистондаги масжидлар сони яна биттага кўпайди. Сурхондарё вилоятининг олис Музработ туманида “Дўстмуҳаммад бобо” жоме масжиди давлат рўйхатидан ўтказилиб, ўз фаолиятини бошлади.
Шу кунларда халқимизнинг дилини бироз хира қилган вирус сабаб кўпчилик қаторида музработликлар ҳам таскинга, хушхабарга муштоқ эдилар. Аллоҳ таолонинг инояти ила 8 июндан диний ташкилотлар фаолиятига қайта рухсат берилиши арафасида, жорий йилнинг 5 июнь куни, Музработ туманида янги масжидга давлат рўйхатидан ўтказилганлиги ҳақида адлия бошқармасидан гувоҳнома тақдим этилди.
180 мингга яқин аҳолига эга Музработ туманида шу кунга қадар 1 та масжид фаолият юритар эди. У ҳам бўлса туман марказидан салкам 20 километр узоқликда жойлашган бўлиб, аҳолининг кўп қисми жамоат намозларини адо этиш учун узоқ масофада жойлашган масжидга қатнар эди. Бу, албатта кўпчиликка қийинчилик туғдирар, айниқса кексалар учун мушкул ҳолат бўлиб, “туманимиз марказида ҳам бир масжид бўлса эди”, дея эзгу ният билан яшарди.
Ниҳоят бу борада қилинган саъй-ҳаракатлар, уринишлар натижа берди. Аҳолининг мурожаатлари инобатга олиниб, маҳаллий ҳокимлик томонидан масжид қурилиши учун “Янги ҳаёт” маҳалласи ҳудудидан ер ажратилди.
Ўтган икки ярим йилдан зиёд вақт давомида, халқ ҳашари йўли билан бу жойда замон талабларига жавоб берадиган, намозхонлар учун қулай шароитларга эга, 1500 кишилик сиғимли жоме масжид бунёд этилди. Масжидга мамлакатимиздаги кўплаб қориларнинг, хусусан, Сурхондарё ва Қашқадарё воҳасидаги минглаб толиби илмларнинг табаррук устози бўлган воҳалик олим, марҳум Дўстмуҳаммад оҳун домланинг номи қўйилди.
Мазкур масжид, том маънода маърифат масканидек қад ростлаган. Хонақоҳ шарқ услубидаги замонавий кўринишда бунёд этилган бўлиб, сержило, иссиқ воҳа тафтини намоён этади. Масжид гумбазининг ички томонида Қуръони каримнинг ибодатга даъват этувчи оятлари битилган.
Меҳроб эса оловранг сиёҳлар билан куфий ва сулс ҳатларида Аллоҳ таолога ҳамд ва Пайғамбар алайҳиссаломга саловат, шунингдек, ояти карималар билан безатилган.
Хонақоҳ ёнида замонавий шаклда таҳоратхона бунёд этилган.
Масжид ҳовлисига туташ қилиб, боғ ва гулзор ҳамда автотураргоҳ бунёд этилган.
Хуллас, мазкур масжид мамлакатмизнинг энг олис туманларидан бири саналмиш Музработ аҳли учун чексиз қувонч ва бахтга сабаб бўлувчи маскан бўлди.
Марказ аҳолисининг севинчи чексиз. Тиллари-ю диллари шукронада, дуода. Кўп йиллик армонлар бугун барҳам топди. Энди уларнинг ҳам ўз масжидлари бор. Туман марказида ҳам азон баралла янграйди. Бу азон ҳудуд аҳолиси учун нажот чақириғи, маърифат, тарбия, илоҳий раҳматнинг даъвати бўлади, инша Аллоҳ. Зеро масжидлардан Аллоҳ таолонинг раҳмат нурлари таралиб туради. Ибодат, маърифат, биродарлик маскани бўлиб, мусулмонлар эътиқодини мустаҳкамлашга, ахлоқининг гўзаллашишига, ёмонликлардан узоқда бўлишига сабаб бўлади.
Шу билан Ўзбекистондаги масжидлар сони 2068 тага, Сурхондарё вилоятида эса 113 тага етди.
Эслатиб ўтамиз, жорий йилнинг 8 июнь, душанба кунидан бошлаб, “яшил” ҳудудларда масжидлар ўз фаолиятини карантин талабларига амал қилган ҳолда бошлайди. Санитария-эпидемиологик осойишталик агентлиги тақдим этган рўйхатга кўра, Музработ тумани ҳам “ЯШИЛ” ҳудуд тоифасига киради.
Демак, 8 июндан бошлаб “Дўстмуҳаммад бобо” масжидида ҳам санитар талаблар асосида илк намозлар адо этилади.
Аллоҳ таолодан янги бунёд этилган Ўзининг байтини мусулмонлар учун хайрли, то қиёматгача азон овозлари янграб турувчи маскан бўлмоғини тилаб қоламиз!
Музработликларни эса байтуллоҳ билан муборакбот этамиз!
Ўзбекистон мусулмонлари идораси Матбуот хизмати
ЎМИ матбуот хизмати
Муфтий ҳазратлари: Қишлоқдаги масжидларимиз шукуҳидан диллар яйрайди
Охирги йилларда юртимизда олиб борилаётган ислоҳот ва ўзгаришларкўлами етмаган соҳа қолмади. Шу жумладан, диний-маърифий соҳада ҳам талайгина ишлар амалга оширилмоқда. Бугун нафақат марказий ҳудудлардаги, балки чекка қишлоқлардаги масжидларимиз ҳам янги қиёфа касб этмоқда.
Фарғона тумани “Оқбилол” қишлоғида жойлашган “Абу Бакр Сиддиқ” жоме масжидининг дастлабки биноси қурилганига тахминан бир асрдан ошган эди. Ўша пайт шароитидан келиб чиқиб қурилган масжид бинолари анчагина нураб қолган, шу сабабдан ибодатга келадиган намозхонлар баъзи ноқулайликларга дуч келаётганди.
Сўнгги икки йил давомида олиб борилган саъй-ҳаракат натижасида қишлоқда кўркам масжид бунёд этилди. Аввалги бинода 200 нафар киши ибодат қилган бўлса, янги қурилган масжиднинг хонақоҳ ва ер тўла қисмида бир вақтнинг ўзида 1500 нафар намозхон ибодатини адо этиши мумкин.
Фарғона вилояти бош имом-хатиби Убайдуллоҳ домла Абдуллаев ҳамроҳлигида Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедовлар Оқбилол қишлоғидаги “Абу Бакр Сиддиқ” жоме масжидида олиб борилган ишлар билан танишдилар.
Муфтий ҳазратлари масжидда оддийгина қишлоқ шароитида ихлосманд юртдошларимиз томонидан олиб борилган ишларни юқори баҳолаб, масжид фаоллари ва жамоаси ҳаққига дуо қилдилар.
Ўзбекистон мусулмонлари идораси Матбуот хизмати
Намозга хушёр бўлинг!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ибн Умар розияллоҳу анҳудан ривоят қилинади:
«Набий соллаллоҳу алайҳи васаллам:
«Намознинг аввалги вақти Аллоҳнинг розилигидир. Охирги вақти Аллоҳнинг афвидир», дедилар».
Термизий ривоят қилган.
Шарҳ: Демак, Аллоҳнинг розилигини топаман, деган одам намозни аввалги вақтида ўқиши керак. Ноилож қолганда охирги вақтида ўқиш афв тариқасидаги рухсатдир.
Хулоса
1. Беш вақт намознинг ҳар бирини ўз вақтида ўқиш фарз. Буни унутмайлик.
2. Ҳар бир намознинг аввалги ва охирги вақти ичида, яъни ўша маълум чегараланган вақтда ўқиган одамгина намознинг фарзини адо этган бўлади.
3. Аллоҳ таоло бандаларига меҳрибонлигидан намозларнинг вақтини бемалол қилиб қўйибди.
4. Намозларнинг вақти табиий омиллар, яъни тонг отиши, қуёшнинг чиқиши, қиёмдан оғиши ёки ботишига қараб белгиланганлиги.
5. Намозларнинг вақти чегарадан чиқмай, турли ҳадисларда турлича айтилганлиги шароитга қараб, турлича ижтиҳод қилишга йўл очганлиги.
6. Бир мавзу бўйича ҳамма ҳадисларни яхшилаб ўрганиб чиқмасдан туриб, бир ҳукмни чиқариш дуруст эмаслиги.
Ушбу ҳадислардан битта, иккита ёки учтасини ўрганиб туриб, ҳақиқат мана шу, бошқаси нотўғри, дейишимиз мутлақо хато бўлар эди.
Шунинг учун ҳар бир нарсада ҳам бир ёки икки-уч ҳадисни ўқиб олиб, ҳукм чиқаришга шошилмаслик керак. Уни Қуръон оятларига, бошқа ҳадисларга солиштириш, айтилиш сабабларини атрофлича ўрганиш керак бўлади. Уламоларимиз бу нарсаларнинг ҳаммасини чуқур ва батафсил ўрганиб қўйганлар. Улардан фойдалансак, ўзимизга осон бўлади.
«Ҳадис ва ҳаёт» китобидан
Манба: islom.uz
Муфтий ҳазратлари ўз фаолиятини бошлайдиган масжидларга ташриф қилдилар
Бугун, 5 июнь куни Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов Фарғона вилоятига ташрифлари давомида шу йил 8 июндан ўз иш фаолиятини бошлайдиган масжидлар фаолияти билан яқиндан танишдилар.
Ташриф давомида Фарғона шаҳридаги “Уммул Қуро” жоме масжидида олиб борилаётган ишлар кўздан кечирилди.
Муфтий ҳазратлари масжид имом-хатиби Холмурод Мамажонов билан суҳбат қилиб, Фарғона вилояти "яшил" ҳудуд тоифасига кириши шу ерда истиқомат қилувчи мўмин-мусулмонларнинг бахти-қувончи экани, бунга шукр қилиш лозимлигини таъкидладилар. Шу билан бирга, фаолияти йўлга қўйилаётган масжидларда санитария-эпидемиологик қоидаларга риоя қилиш ҳамда карантин шароитида ибодатларни адо этиш учун берилган кўрсатма ва тавсияларга амал қилиш муҳимлигини алоҳида қайд этдилар.
Муфтий ҳазратлари суҳбат якунида масжид ходимлари ва жамоаси ҳаққига ҳамда юртимиз тинчлиги, халқимиз фаровонлиги ва динимиз равнақини сўраб дуолар қилдилар.
Ўзбекистон мусулмонлари идораси Матбуот хизмати
Оламга муҳаббат билан боқ!
Аллоҳ азза ва жалла инсонларга икки кўз ато қилди. Бу кўз билан боқишда икки ҳил назар бор, бири " Муҳаббат назари ", иккинчиси эса " Нафрат назари". Бири инсонни олийжаноблик ва икки дунё бахти- саодатига, ҳаётда ором билан яшашга эга қилади, бири инсонни разиллик ва икки дунёда бадбахт бўлишига, ҳаётда ғариб, ҳор ва ташвишлик ҳолатда яшашга эга қилади.
Инсонлар орасида бутун оламга, ўсимликлар, ҳайвонотлар ва инсонларга фақат муҳаббат назари билан боқувчилар бор. Мунча ҳам буларни қалблари мусаффо, мунча ҳам буларни қалблари кенг! Булар Аллоҳни раҳмати ва марҳамати тушишига сазовор инсонлардир. Одам алайҳис салом ва фарзандлари ер юзида қароргоҳ топган вақтдан бери мухаббат назари билан боқувчиларни Павардигори олам Ўзини раҳмати, ҳидояти билан азиз мукаррам қилган.
Аввалда Одам алайҳис саломни икки фарзандидан бири Ҳобил муҳаббат ва ихлос ила энг сара бойлигидан қилди ва ўз инисига мухаббат билан назар ташлади, насихат қилди. Иниси Қобил эса борлиққа нафрат билан назар қилди, қурбонлиги қобул бўлмади. Нафрати туфайли иниси Хобилни ўлдирди, ҳор бўлиб иниси жасадини нима қиларини билмай ташвиш билан қанча кўтариб юрди ва қиёматгача бўладиган қотилликдан улуш оладиган бадбахтга айланди.
Сулаймон (алайҳиссалом) Сабаъ маликаси Билқисни имонга даъват этиб, унга бир мактуб юборди. Шу пайтгача бутпараст бўлган малика мактубни ўқигач: “Эй азиз инсонлар! Менга шараф тўла бир мактуб келди. Бу мактуб Сулаймон пайғамбарнинг мактубидир. У Меҳрибон ва Раҳмли Оллоҳнинг номи билан бошланади”, деди ва мактубга муҳаббат билан назар қилди. Бундай эҳтиромни баъзи олимлар: “Малика ҳазрати Сулаймоннинг мактубига ҳурмат кўрсатиб уни қадрлагани учун ҳам имонга эришди”, деб шарҳлашган эди.
Пайғамбаримиз соллаллоҳу алайҳис саломни мактубларига форс подшоҳи Кисро нафрат билан қараб, уни йиртиб ташлади ва Аллох азза ва жалла уни жазолади ва мулкини парча- парча қилиб юборди.
Қуръонда энг кўп зикр қилинган Мусо (алайҳис салом) ва Фиръавн қиссаси фақат ибрат учундир. Мусо алайҳис салом Фиръавнга Аллохни ҳидояти билан яшаб, туғён қилмаслик ва инсонларни ўзига сиғинтирмасликка ва абадий азобдан ҳалос бўлишга чорлаган пайтда у нафрат назари билан қаради ва ўзини мулки ва ҳукмронлигига таҳдид деб уйлади. Товламачилик ва ёлғончилик билан инсонларни алдаб бойлик ортиришга мубтало бўлган коҳинларни сўзига кирди. Аллохни хидоятга чорловчи элчисини сеҳргарликда гумон қилиб барча сеҳргарлар билан тўқнашувга чақирди. Сеҳр санъатлари билан фахрланган, Фиръавнни хузурида азиз бўлишга ваъда олган сеҳргарлар Аллоҳни Расулига муҳаббат назари билан қараб, эҳтиром билан арқонлари ташлашга изн сўрадилар. Ҳар вақтики Мусо алайҳис саломни мўъжизаларини кўрганларида Мусо ва Ҳорунни Роббисига иймон келтирдик деб саждага бордилар. Уламолар айтдиларки; анашу Аллоҳни Расулига муҳаббат ва эҳтиромлари учун Аллоҳ азза ва жалла уларга бутун дунёдан устун бўлган тенгсиз иймон бериб, жаннатда олий даражотларга эга бўлувчилардан қилди. Фиръавн бўлса нафрат назари сабаб Аллоҳни азобига дучор булди. Қиёматгача зулм ва ҳудбинлик тимсоли бўлиб лаънатланди. Қиёматда эса ўзига ўхшаш золимларга бош бўлиб дўзахга етакловчи бўлди.
Тарихда мисоллар жуда кўпдир унга,
Фақат ибрат ила қарамоқ лозим бунга,
Афсус ғафлат ила ғурур ғолибдир унда,
Бир авлод олдинни ҳам кўрмайди шунда
"Муҳаббат назари " инсондаги бебаҳо хислат ва ҳамма яхшиликни калити. Бу табиатан туғма бўлиб, Аллоҳ азалда берган фазли бўлади. Буни Аллоҳ Ўзи хоҳланган кишисига беради. Ёки банда касб қилиб топади. Бу эса Аллоҳга ва Расулига бўлган муҳаббати ва иймони тақозосидан ҳосил бўлади. Бутун борлиққа “Раббимни махлуқи ва унинг сифатларини кўргазмаси”, деб қарайди. Расулуллоҳ соллаллоҳу алайҳис саломдан намуна олиб у зотни сўзларини татбиқ қилади. Бу йўлда энг яхши дастмояси у зотнинг бу сўзлари бўлади: Абу Ҳурайра р.адан ривоят қилинади, Росулуллоҳ соллаллоҳу алайҳи ва саллам айтдиларки: "Гумондан сақланинглар бас албатта гумон сўзларни энг ёлғонидир, сўз суриштирманглар, айғоқчилик қилманглар, бир-бирингизга гап отишманглар, ҳасад қилишманглар, бир-бирингизни ёмон кўришманглар, бир - бирингизга орқа ўгиришманглар ва эй Аллоҳни бандалари биродар бўлинглар." Бир ривоятда " ва рақобатлашманглар". Муттафақун алайҳ.
Аллоҳ азза ва жалланинг бир сифати "Саттор"дир. Бу Аллоҳ бандаларни айбларини беркитувчидир, токи бандалар дунёда бир - бирларига муҳаббат назари билан ҳаёт кечиришсин. Ҳатто қутби замон валий бўлса хам уй ичидаги бандани гуноҳини каромат билан ҳам билдирмайди, яхшилиги бўлса билдиради. Валийларни беркитиб қўяди токи ҳар бир киши ўзидан бошқани валий билиб муҳаббат қилиб яшасин. Субҳаналлоҳ бандаларни бир - бирига муҳаббат билан яшамоқлигини ирода қилган зот.
Аллоҳумма бизларни оламга муҳаббат назари билан боқиб ўзингни раҳматинг ва марҳаматинг билан ҳузур қилиб динингда истиқоматда ҳаёт кечиришимизни муяссар қил, охиратда нажот топувчилардан қилгин!
ТИИ “Таҳфизул Қуръон” кафедраси ўқитувчи-стажёри,
ЎзХИА 1-босқич магистранти Қурбанов С
Янгиликлар
