Бухоро вилоятида фаолият юритаётган Мир Араб ўрта махсус ислом билим юрти ва Мир Араб Олий мадрасаси фойдаланиши учун шариф шаҳарнинг Абу Ҳафс Кабир кўчасида жойлашган мактаб-интернат биноси 2017 йилда топширилган эди.
Муҳтарам Президентимиз ташаббуслари билан мазкур диний таълим муассасаларига тақдим этилган ушбу ҳудуд ва биноларда айни кунларда қурилиш-таъмирлаш ишлари жадал давом этмоқда.
Бинолар миллий ва замонавий меъморчилик анъаналарига мос шаклда ҳар томонлама қулай ва шинам қилиш борасида ишлар олиб борилмоқда. Мазкур ҳудудда ўқув биноси билан бир қаторда ёпиқ спорт майдони, сув ҳавзаси, талабалар турар жойи, ошхона ва мударрислар учун алоҳида турар жой мажмуалари ҳам барпо этилмоқда. Мазкур қурилиш-монтаж ишларини 2020 йил сентябрь ойига қадар якунлаш мақсад қилинган.
Шу йил 1 июль куни ушбу қурилиш майдонида карантин талабларига амал қилган ҳолда меҳнат қилаётган қурувчи-муҳандисларнинг ҳолидан хабар олиш ва кўнгилларини шод этиш мақсадида, Мир Араб Олий мадрасаси томонидан ош тарқатилди.
Мир Араб Олий мадрасаси ректори Ҳайдархон домла Йўлдошхўжаев барча ишчи-усталарнинг олиб бораётган машаққатли ва ўз навбатида савобли меҳнатлари учун миннатдорлик изҳор этиб, уларнинг қилаётган ушбу шарафли хизматлари савоби улуғ иш эканини алоҳида таъкидлади.
Якунда Қуръони карим оятлари тиловат қилиниб, юртимиз тараққиёти, халқимиз саодати ва илм-маърифат ривожини тилаб, дуолар қилинди.
Мир Араб олий мадрасаси Матбуот хизмати
