2017 йил 22 январь куни Ўзбекистон ҳаж делегацияси ҳаж ва умра мавсумларини намунали ташкил этиш доирасида жорий йилда ўзбекистонлик зиёратчилар учун ҳаж мавсумида ажратилиши кўзда тутилган Макка шаҳридаги “Аброж ал-Ҳидоя” ва умра мавсумида хизмат кўрсатадиган“Аброж ал-Кисва” меҳмонхоналарини кўздан кечиришди.

Замонавий ва барча қулайликларга эга “ Аброж ал-Кисва ” меҳмонхонаси жорий умра мавсумида юртимиз зиёратчиларига хизмат кўрсатиши белгиланди. Ушбу меҳмонхона Масжидул ҳарамдан 600 метр масофада жойлашган бўлиб, юртдошларимиз ибодатларини Байтуллоҳда адо этишга қулай имконият ҳосил қилиш мақсадида танланди.

Делегация аъзолари “ Аброж ал-Кисва ”меҳмонхонасидаги шарт-шароитлар, ошхона-ресторан ва тиббий бўлим билан яқиндан танишишди ҳамда ўзбекистонлик зиёратчилар учун хизматлар сифатини янада ошириш юзасидан тегишли кўрсатмалар беришди.

Шунингдек, делегация аъзолари 2017 йилги Ҳаж мавсумида ҳожиларимизга хизмат кўрсатиши кўзда тутилган “Аброж ал-Ҳидоя” меҳмонхонасининг иш фаолияти билан ҳам яқиндан танишишди.

Эслатиб ўтамиз, янги қуриб битказилган “Аброж ал-Ҳидоя” меҳмонхонаси 2016 йилги Ҳаж мавсумида, биринчи бўлиб, юртимиз ҳожиларига хизмат кўрсатган эди.

“Ҳаж – 2016” мавсумида Макка шаҳридаги “Аброж ал-Ҳидоя” меҳмонхонаси томонидан тақдим этилган хизматлардан юртимиз ҳожилари жуда ҳам мамнун бўлишган. Ушбу меҳмонхона қулайликлари ҳақида гапирганда, аввало, барча хоналар тўрт кишилик қилиб тайёрлангани, ҳар бир хонада ювиниш хонаси мавжудлиги, совуткич, музлаткич, стол-стул, журнал столи, телефон, телевизор ва замонавий мебеллар билан жиҳозланганини таъкидлаш керак.

Яна шуни айтиш керакки, меҳмонхона ошхонасида бир пайтда 2200 киши таомланиши учун мўлжалланган ўринлар ҳозирланган. Шунингдек, тиббиёт маркази, ишчи гуруҳи штаби, мажлислар зали ҳамда 2000 киши сиғадиган эркак ва аёллар намозхонасига алоҳида жойлар ажратилган. Шунингдек, меҳмонхонада ҳар бири 20 кишилик бўлган 21 та лифт мунтазам ишлайди.

Меҳмонхонанинг яна бир қулайлиги шуки, битта асосий йўл бўйлаб “Ҳарами шариф” масжидига бориш мумкин. Шунингдек, меҳмонхона Мино водийси ҳудудига яқин жойлашгани сабабли зиёратчиларни у ерга олиб чиқиш ва қайтариб олиб келишда кўп енгилликлар бўлди.

Хавфсизлик нуқтаи назардан ҳам меҳмонхона яхши қурилган. Меҳмонхона атрофидан серқатнов, катта йўл трассаси бўлмагани сабабли ҳожилар эркин ҳаракат қилиши мумкин. Меҳмонхона раҳбарлари ва ишчи-хизматчилари ҳожиларимизга юқори даражада хизмат кўрсатганларини алоҳида қайд этиш керак.

Ўзбекистон мусулмонлари идораси

ахборот хизмати

2017 йил 30 январдан 3 февралга қадар, Канададаги Режина университетида “Исломни танитиш ҳафталиги” тадбири ўтказилади. Ушбу ҳафталик доирасида ўтказиладиган тадбирларда, Режина, Алберта ва Саскачуан университетларидан иқтидорли талабалар ўз маърузалари билан иштирок этишади.

Тадбир ташкилотчиларидан бири Мунир Усмоннинг айтишича, мазкур ҳафталикни ташкил этишдан кўзланган асосий мақсад – Ислом динининг мусаффолиги, дин ниқоби остида амалга оширилаётган бузғунчиликларнинг моҳияти, хусусан, аҳоли онгида ислом тўғрисида шаклланиб қолган нотўғри тушунчаларга барҳам бериш ҳисобланади.

                                                   Халқаро алоқалар бўлими

Ислом динида илгари сурилган ота-онага, фарзандларга, қўни-қўшниларига ғамхўрлик қилиш ва кўмакка муҳтож кишиларга ёрдам кўрсатиш каби таълимотлар – инсонийлик қадрияти ҳисобланади.

Аллоҳ таоло Қуръони каримда бундай марҳамат қилади: «Эй имон келтирганлар! Ўз қўл меҳнатингиз ва Биз сизлар учун ердан чиқарган нарсаларнинг яхшиларидан эҳсон қилингиз! Ўзингиз фақат кўзингизни чирт юмибгина оладиган даражадаги ёмон нарсаларни (эҳсон қилишга) танламангиз! Шунингдек, билингизки, албатта, Аллоҳ ғаний ва мақтовга лойиқ Зотдир» (Бақара, 267).

Шундай экан, аҳли оиласи, қариндошлари, қўни-қўшниси, маҳалласидаги кам таъминланган оилалар, боқувчисини йўқотган фуқаролар ва ёлғиз кексаларга қўлидан келганича хайр-эҳсон қилиши, шунингдек, “Меҳрибонлик“, “Мурувват” ва “Саховат” уйларига ҳам моддий ёрдамлар кўрсатиши ҳар бир мўмин-мусулмоннинг инсоний бурчидир. Бу бурчни бажариш билан улуғ ажр-савобларга ҳам эришади.

Бугунги кунда Ўзбекистон мусулмонлари идораси тизимидаги масжид имом-хатиблари томонидан кўплаб хайрли ишлар амалга оширилмоқда. Жумладан, Ватан ҳимоячилари куни ҳамда Ўзбекистон Республикаси Қуролли Кучларининг 25 йиллик байрами муносабати билан ЎМИ тизимидаги масжидлар имом-хатиблари маҳалла фуқаролар йиғини фаоллари ҳамкорлигида ҳомийларни жалб қилган ҳолда “Саховат” ва “Мурувват” уйларида, маҳаллаларда истиқомат қилаётган иккинчи жаҳон уруши қатнашчилари, хизмат бурчини бажариш вақтида ҳалок бўлган харбий хизматчилар оилалари ва меҳнат фахрийлари ҳолларидан хабар олиниб, кийим-кечак, озиқ-овқат, уй жиҳозларидан иборат моддий хайриялар ва байрам совғалари улашилган эди.

Шу каби хайрия тадбирлари жойларда мунтазам давом этмоқда. Жумладан, 2017 йил 16 январь куни Қашқадарё вилояти Ғузор туманидаги “Ҳазрати Мирижанда” масжиди томонидан ҳомийларни жалб қилган ҳолда маҳалладаги ногирон, боқувчисини йўқотган, кам таъминланган оилаларга озиқ-овқат маҳсулотлари тарқатилиб, моддий ёрдам кўрсатилди.

17 январь куни Тошкент шаҳар Чилонзор тумани “Бўта бува” жоме масжиди маъмурияти ва Чилонзор тумани "Бешқўрғон" маҳалла фуқаролари йиғини ташаббуси билан маҳаллада истиқомат қилувчи 30 нафар уруш ва меҳнат фахрийлари, кекса отахонлар учун эҳсон дастурхони ёзилиб, байрам совғалари улашилди.

18 январь куни Самарқанд шаҳрида жойлашган “Намозгоҳ” жоме масжиди ва бир қатор ҳомийлар 9-сонли Меҳрибонлик уйининг 70 нафар тарбияланувчиларига эҳсон дастурхони ташкил этилди.

19 январь куни Тошкент шаҳридаги “Бўрижар” жоме масжиди имом-хатиби Ҳ. Абдукаримов ташаббуси билан ҳомийларни жалб этган ҳолда Чилонзор тумани Катта Қозиробод маҳалласи, Яккатут маҳалласи, Шайхонтоҳур тумани Ц-27 даҳасида истиқомат қилувчи кам таъминланган, ёрдамга муҳтож ва боқувчисини йўқотган 30 нафардан зиёд оилалар ҳолидан хабар олиниб, уларга озиқ-овқат маҳсулотлари тарқатилди.

Ўзбекистон мусулмонлари идораси

Масжидлар бўлими

Жорий 2017 йил “Халқ билан мулоқот ва инсон манфаатлари йили” деб эълон қилингани муносабати билан режа асосида жойлардаги масжидлар, уларнинг ҳолати ва имом-хатиблар фаолияти билан яқиндан танишиш, ўзаро тажриба алмашишни ташкил қилиш мақсадида 2017 йил 17 январь куни  ЎМИ Хоразм вилоят вакили Хайрулла Абдуллаев бошчилигида вилоятдаги шаҳар ва туман бош имом-хатиблари Қўшкўпир туманига ташриф буюришди.

Ташриф мобайнида тумандаги “Аз-Замахшарий”, “Қутбиддин бобо”, “Ибн Ямин бобо”, “Шайх Абдулло” ва “Нур Азиз бобо” масжидлари фаолияти ўрганиб чиқилди. Унда масжидларнинг умумий аҳволи, жумладан биноси, таҳоратҳона ва ёрдамчи бинолари, санитария-гигиена, ёнғин хавфсизлиги масалалари, масжидларнинг иш юритиш ва бухгалтерия ҳужжатлари юритилишига эътибор қаратилди.

Ўрганиш натижалари юзасидан туман марказий масжидида йиғилиш ўтказилиб, аниқланган камчиликлар, уларни бартараф этиш чоралари ва муддатлари бўйича масъул ходимларга топшириқ ва тавсиялар берилди.

Шунингдек, вилоят вакиллиги мухтасиби У.Маликов сўзга чиқиб, масжид фаолиятига доир ҳужжатларни расмийлаштиришда йўл қўйилган баъзи камчиликлар ва уларни бартараф этиш чоралари тўғрисида фикр-мулоҳаза билдирди.

Қўшкўпир тумани бош имоми-хатиби Музаффар Матяқубов сўзга чиқиб, ушбу ташкил қилинган тадбир туманлар ўртасида маҳорат ва тажриба алмашиш учун зарур эканлигини, ташриф мобайнида билдирилган фикр ва тавсиялар соҳада амалга оширилаётган ишларни янада яхшилаш учун хизмат қилишини таъкидлаб, тадбир қатнашчиларига ўз миннатдорчилигини билдириб, берилган тавсия ва кўрсатмаларни ўз вақтида амалга оширишга ваъда берди. 

Олимжон АДИЛОВ,

Хоразм вилояти вакиллиги ходими

Жума – ҳар бир дақиқаси Аллоҳнинг марҳаматига тўла бўлган кундир. Баъзан биз бу кунни бошқа кунлар сингари оддийгина ўтказамиз, эътиборсизлик қилиб қанчадан-қанча савоблардан бебаҳра қолаётганимизни англамаймиз. Бинобарин, жума куни:

1. Дуолар ижобат бўлади.

Абу Ҳурайра (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам) жума куни дуоларнинг ижобат бўлиши ҳақида: “Бу кунда шундай фурсат борки, мусулмон банда намоз ўқиш учун шу вақтга дуч келади ва Аллоҳдан нимани сўраса, истаганини шубҳасиз беради”, дедилар (Бухорий, Муслим). 

2. Салавотлар Пайғамбаримиз (соллаллоҳу алайҳи ва саллам)га кўрсатилади.

 Пайғамбаримиз (соллаллоҳу алайҳи ва саллам): “Сизлар учун энг хайрли кун – жума кунидир. Шундай экан бу куни менга кўп салавотлар айтинглар, чунки бу кунги салавотлар менга кўрсатилади”, деб айтганлар (Абу Довуд).   

3. Қадамлар остидан нурлар чиқади.

  Ибн Умар (розияллоҳу анҳу)дан ривоят қилинади. Расулуллоҳ (соллаллоҳу алайҳи ва саллам): “Ким «Каҳф» сурасини жума куни ўқиса, қиёмат куни унинг қадами остидан нур чиқиб, осмону фалакни ёритади ва унинг икки жума орасидаги хатолари кечирилади”, деганлар.

4. Масжид сари ташланган ҳар бир қадам нафл рўза ва ибодат қилганга тенгалштирилади.

Авс ибн Авс (розияллоҳу анҳу)дан ривоят қилинади. Расулуллоҳ (соллаллоҳу алайҳи ва саллам): “Кимки жума куни ғусл қилиб,  масжидга яёв борса, жума хутбасини чалғимасдан эшитса ва намоз ўқиса, масжидга сари босиб ўтган ҳар бир қадами учун бир йиллик (нафл) рўза ва (нафл) тунги намознинг ажри берилади”, дедилар. 

5. Гуноҳлар мағфират этилади.

Пайғамбаримиз (соллаллоҳу алайҳи ва саллам): “Кимки ғусл қилиб, покиза кийим кийса ва мушк билан  хушбўйланса, масжидга шошмасдан борса ва имом маърузасини бўлмасдан эшитса ва намоз ўқиса у киши уйга ўтган жумадан бери қилган гуноҳларидан фориғ бўлган ҳолда қайтади”, дедилар.

Бошқа бир ҳадисда эса, “Кимки жума намозидан сўнг, оёғини алмаштирмасдан туриб қуйидаги сураларни 7 мартадан ўқиса: Фотиҳа, Ихлос, Фалақ ва Нос сураларини, Аллоҳ субҳанаҳу ва Таоло унинг аввалги ва охирги гуноҳларини кечиради ва уни мукофотлайди, деганлар.

6. Масжидга барвақт борган туя қурбонлик қилган ажрига ноил бўлади.

Абу Ҳурайра (розияллоҳу анҳу)дан ривоят қилинади. Расулуллоҳ (соллаллоҳу алайҳи ва саллам): “Ким жума куни ғусл қилиб, масжидга эрта борса, битта туя сўйгандек бўлади. Ким иккинчи вақтда борса, худди битта сигир сўйгандек, ким учинчи вақтда борса, худди битта шохдор қўчқор сўйгандек, ким тўртинчи вақтда борса, худди битта товуқ сўйгандек, ким бешинчи вақтда борса, худди бир тухум атагандек бўлади. Имом (минбарга) чиққанда эса фаришталар хутбани эшитишга ҳозир бўладилар”, дедилар (Абу Довуд, Ибн Можа).

Ушбу ҳадислар жума кунининг фазилати ва савоби ҳақида бир эслатмадир. Барчамиз бу куннинг улуғ фазилатларидан тўлиқ баҳраманд бўлайлик.

М. Зуфарова

тайёрлади