Аллоҳ таоло Қуръони Каримда шундай деган:

وَإِذَا مَرِضْتُ فَهُوَ يَشْفِينِ

“Бемор бўлганимда менга шифо берадиган ҳам Унинг Ўзи” (Шуаро сураси, 80-оят).

Баъзи одамлар “Табиб шифо берди, тузатди” дейишади. Бу нотўғри. Лекин ҳақиқат – шифо Ёлғиз Аллоҳнинг қўлидадир. Табиб муолажа қилади, холос. Гоҳида бемор табибнинг қўлида шифо топади. Гоҳида табиб муолажада хатога йўл қўяди ва беморнинг ўлимига сабаб бўлади.

Аллоҳ субҳанаҳу ва таоло ҳар бир касалликнинг шифосини яратган. Шунинг учун баъзида янги иш бошлаган ёш табиб ўзини турли катта табибларга кўрсатган, табиблар унинг касаллигига тўғри ташхис қўёлмаган беморга тўғри рецепт ёзиб беради. Мана шундай пайтларда одамлар ҳайрон бўлишади ва “Албатта, билим юртини яқинда тамомлаган бу табиб устозларидан кўра билимлироқ” дейишади.

Биз айтамизки, бу нотўғри фикр. Устоз қатъий равишда шогирдидан илмлироқ. Ахир табобатни шогирдга у ўргатган. Лекин Аллоҳ субҳанаҳу ва таоло қайси касалликка қачон шифо бўлишини тақдирга ёзиб қўйган.

Янги иш бошлаган табиб беморни муолажа қилишни бошлаганда, Аллоҳ таоло ўша касалликнинг шифосини унга билдиради. Кейин табиб ўша билим асосида рецепт ёзиб бериб, беморни муолажа қилади, бемор эса тузалади.

Бу гаплардан “Албатта, Аллоҳнинг Ўзи шифо берар экан, биз тузалиш чорасини кўрмай ўтираверишимиз керак экан” деган маъно чиқмайди. Аллоҳ таоло бу дунёда бизга сабабларни ушлашимизни буюрган. Ана ундан кейин сабабларнинг натижаси борасида Аллоҳ таолонинг Ўзига таваккул қиламиз.

Шайх Шаъровий раҳимаҳуллоҳнинг “Ал-адилла ал-мааддийя ала вужудиллаҳ” номли асаридан Нозимжон Иминжонов таржимаси

ЎМИ Матбуот хизмати

Аллоҳ таоло Қуръони Каримда шундай деган:

وَالَّذِي هُوَ يُطْعِمُنِي وَيَسْقِينِ

“Ва мени таомлантирадиган ва суғорадиган ҳам Унинг Ўзи” (Шуаро сураси, 79-оят).

Аллоҳ таоло ичимлик ва таомни инсоннинг яшаши учун сабаб қилиб қўйди. Лекин бу сабаб асл эмас. Аслида инсонга ҳаёт берган, тўқлик, қониш ҳиссини ато этган Аллоҳнинг Ўзидир.

Ҳар қандай ўсимликдаги уруғни Аллоҳ яратган, ўсимлик хусусиятларини ўша уруққа Аллоҳ жойлаган. Уруғни Аллоҳ яратган, уруғ экиладиган ерни Аллоҳ яратган, ўша уруғдан униб чиққан маҳсулотга озуқа бўлиш хусусиятини Аллоҳ берган.

Инсон уруғни ерга экади. Мана шу жараёндаги илм, куч-қувват, иқтидорни унга Аллоҳ берган.

Пишган мевани узиш, буғдойни ўриш қувватини, илмини, иқтидорини, тегирмон ишлаб чиқариш, ўша тегирмонда буғдойни янчиб ун қилиш, ундан хамир қориш, хамирни нон қилиб ёпиш маърифатини, нонга тўйдирувчилик хусусиятини, ноннинг танада ҳазм бўлиш жараёнини, инсонга ўша нондан манфаат етиш ҳолатини Аллоҳ берган, Аллоҳ ато қилган. Шундай қилиб, инсонни таомлантирган ҳам, суғорган ҳам, унинг танасида тўйиш, қониш ҳиссини пайдо қилган ҳам Аллоҳнинг Ўзидир.

Инсон уруғни ерга экиб, унинг униб-ўсишига керакли бўлган барча чораларни кўради. Лекин уруғ Аллоҳ хоҳласагина, У изн берсагина униб чиқади. Агар Аллоҳ ўша уруғнинг унишини хоҳламаса, унга изн бермаса, инсон ерга ҳар қанча ишлов бермасин, энг кучли дориларни, ўғитларни солмасин, уруғнинг энг яхши навини экмасин, сувини вақтида бермасин, барибир, ўша уруғ униб-ўсмайди.

Агар Аллоҳ хоҳламаса, еган нонимиз, ичган сувимиз танамиздан чиқиб кетмайди. Натижада, биз узоқ яшамасдан ҳалок бўламиз.

Агар еган нонимиз, ичган сувимиз танамизда ҳазм бўлмай, ошқозонда бутунича тураверса, бунда ҳам узоқ яшолмаймиз.

Аллоҳ таоло инсон танасининг таом ва ичимликка эҳтиёжи бўлганда, шу эҳтиёжни қондириш вақти келганининг сигнали сифатида очиқиш, чанқаш ҳиссини берган. Инсон шу нарсани ҳис қилгач, овқатланишга, ичимлик ичишга уринади. Таомни еб бўлгач, ичимликни ичиб бўлгач, танасида тўйиш ҳисси пайдо бўлади. Шу ҳисни берган ҳам Аллоҳдир. Ҳеч қачон таомнинг ўзида тўйдириш, ичимликнинг ўзида қондириш хусусияти бўлмайди. Балки улар инсонда тўйиш-қониш ҳислари пайдо бўлишига сабаб бўладилар, холос. Таом ва шаробни яратган ҳам, уларни озуқа қилиб берган ҳам, инсонда тўйиш-қониш ҳислари пайдо бўлишига уларни сабаб қилган ҳам Аллоҳнинг Ўзидир.

Бизларни едириб тўйдирган, ичириб қондирган, мусулмон қилиб яратган Аллоҳ таолога чексиз ҳамду санолар бўлсин!

Шайх Муҳаммад Мутаваллий

Шаъровий раҳимаҳуллоҳнинг

“Ал-Адилла ал-мааддийя ала вужудиллаҳ”

номли асари асосида Нозимжон Иминжонов тайёрлади

ЎМИ Матбуот хизмати

14 апрель куни Ўзбекистон мусулмонлари идорасида “Ўзбекистон – диний маърифат ва қадриятлар юрти” мавзусида дин соҳасида юртимизда амалга оширилаётган ислоҳотларга бағишланган матбуот анжумани бўлиб ўтди.
Дин ишлари бўйича қўмита томонидан ташкил этилган ушбу тадбирда Ўзбекистон мусулмонлари идораси, Ўзбекистондаги ислом цивилизацияси маркази, Ўзбекистон ислом академияси, Имом Бухорий халқаро илмий-тадқиқот маркази, Имом Термизий халқаро илмий-тадқиқот маркази, илмий мактаблар раҳбар ходимлари ва оммавий ахборот воситалари вакиллари иштирок этди.
Анжуманда мамлакатимизда диний соҳада олиб борилаётган ислоҳотлар ҳамда диний таълим йўналишида амалга оширилаётган ижобий ишлар юзасидан маълумотлар берилди. Сўзга чиққан нотиқлар бугунги кунда халқимизнинг имон-эътиқодини мустаҳкамлаш, диний саводхонлигини ошириш, Ислом таълимотини кенг тарғиб этиш, ёшларни дину диёнатли қилиб тарбиялаш ва жаҳолатга қарши маърифат билан курашиш йўлида олиб борилаётган ишлар ҳақида фикр билдирдилар.

Матбуот анжумани ҳақида кейинроқ батафсил маълумот берамиз.

Ўзбекистон мусулмонлари идораси Матбуот хизмати

Германиядаги Оснабрюк университети жорий йилнинг 20 сентябрь куни “Таълим ва исломшунослик соҳасидаги янги кўрсатмалар” мавзусидаги илмий анжуманни ташкиллаштиришини маълум қилди.

Ушбу анжуманни ўтказишга Оснабрюк университети қошидаги Ислом шариати муассасаси бош бўлади ва  у уч кун давом этади.

Анжуманни ўтказишдан Ислом тарихи ва меросининг янги талқинларига (изоҳли таржималари) доир янги йўриқномаларни ишлаб чиқиш ҳамда бу борада турли соҳалардаги етук мутахассислар иштирокидаги мулоқотни уюштириш учун муносиб вақт белгилаш мақсад қилинган.

 Анжуман давомида бир қатор мавзулар, жумладан, Қуръон карим маъноларининг изоҳли таржималари, ҳадисшунослик, диний таълимнинг психологияга боғлиқлиги, Исломда ҳуқуқий мафкура ва Ислом шариатига оид мавзулар муҳокама қилиниши кўзда тутилган.

ЎМИ Матбуот хизмати

Ўзбекистон Суперлигасининг 8-тур беллашувларининг вақти аниқ бўлди ва улар «Спорт» телеканалининг ҳафталик дастурига киритилди. Бу ҳақда "tribuna.uz" хабар тарқатди.

Манба берган хабарга кўра, ўйинларнинг барчаси иш вақтидан сўнг бошланади.

25 апрелдан бошлаб эса вақтлар ярим соатга сурилади. ПФЛ, шунингдек, яқинлашиб келаётган Рамазон ойида ҳам вақтлар масаласига ўзгартириш киритишни режалаштирган. Бунда рўзадорларнинг оғиз очиш вақти ва бошқа масалаларга эътибор қаратиш кўзда тутилгани маълум қилинди.

ЎМИ Матбуот хизмати