Саволларга Ўзбекистон мусулмонлари идораси Фатво ҳайъати жавоб беради.

Савол: Ассалом алайкум! Агар банда куфр сўзни айтса кофир ёки муртад бўладими? Диндан чиққан бўладими? Кейин тавба қилса, қабул бўлмайдими? Уларнинг тавбалари қабул қилинмайди деб эшитганман. Ширк кечирилмайди деб эшитганман. Фақат Аллоҳ кечиришини умид қилиш керак дейишади. Юқоридаги гуноҳ ҳам шу қатордами. Қуръонда аниқ кечирилмайди дейилганку. Ширкдан ташқари қолган ҳамма гуноҳлар ғар-ғара келмагунича кечирилади дейилганку. Нега Аллоҳ аниқ кечирмайман деганда умид қилиш керак дейсизлар. Умрининг oхиригача тавба қилиб, ибодатда, яхши амаллар билан ўтқазсаю, қабул бўлмасачи. Гапларим учун узр сўрайман. Менда умид қолмади. Лекин Пайғамбаримиз Муҳаммад с.а.в. ҳадисларида «Қалбида заррача иймони бор киши Жаннатга киради» деб марҳамат қилганларку. Қилган гуноҳи учун дўзаҳда жазоланиб кейин кечирилади дейилганку. Бу ҳадис юқоридаги гуноҳларни қилган бандаларга тегишли эмасми. Домлалар маърузаларда жуда қаттиқ гапиришади. Бундай гуноҳларни қилган бандалар энди нима қилса қилаверсин. Раҳмат

Жавоб: Ва алайкум ассалом. Агар тавба қилса Аллоҳ таоло тавбаларни қабул қилгувчи зот, албатта қабул бўлади. Ширкдан бошқа гуноҳлар тавбасиз ҳам кечирилади. Ширк гуноҳи эса тавбасиз кечирилмайди. Сиз ҳаргиз ноумид бўлманг.  

Савол: Ассалому алайкум устозлар Намоз ўқийдиган жойда катта ойна турган бўлса одамни ўзини акси кўриниб турган ҳолатда намоз ўқийверса бўладими?

Жавоб: Ва алайум ассалом. Бошқа жойда ўқиш керак.

Савол: Ассаламу алайкум! Ота-она қиз фарзандини турмушга узатганидан кейин ундан молиявий ёрдам ёки ҳадялар кутиши жоизми ва қиз фарзанднинг ота олдидаги бурчлари ва фарзларини айтиб берсангиз илтимос?!!! 

Жавоб: Ва алайкум ассалом! Қизини турмушга узатгач, агар ота-она камбағал, муҳтож бўлиб, қиз ўзининг шахсий (эриники бўлмаган) мулки бўлса ва ота-онанинг бошқа ўғил фарзанди бўлмаса ёки ўғил фарзанди ҳам фақир бўлса, албатта, қиз ота-онасига моддий ёрдам бериб, таъминлаши керак. Акс ҳолда гуноҳкор бўлади. Агар ота-она муҳтож бўлмаса, қизидан ҳеч қандай моддий ёрдам кутмаслиги керак. Ҳадя бу ихтиёрий нарса, кутадими, кутмайдими, қиз хоҳласа қилади, бўлмаса йўқ. Лекин имкони бор ўғил-қизлар ота-она ва яқинларига ҳадя улашиб туришлари катта савобли ишдир. Моддий ёрдамга муҳтож бўлмаган ота-онани қиз фарзандлари ҳам турмуш ўртоғи рухсати билан кўп куттирмаган ҳолда бир ҳафта-икки ҳафтада бир зиёрат қилиб туриши керак. Албатта, бу эрини уйи билан ота-онасининг уйи оралиқ масофаси яқин кишиларга оид гап. Узоқ бўлса, шароитга қараб, телефон орқали тез-тез ҳол сўраб, имкон топиши билан келиб зиёрат қилиб туриши керак. Сизга бу мавзуда Шайх Муҳаммад Содиқ Муҳаммад Юсуф раҳимаҳуллоҳнинг “Яхшилик ва силаи раҳм” номли китобини ўқиб олишни тавсия қиламиз. 

Барча жавобларга ўтиш тугмаси.

ЎМИ Матбуот хизмати

MP3MUSLIM.UZ

ЎМИ Матбуот хизмати

Аллоҳ субҳанаҳу ва таоло Шуаро сурасида шундай деган:

الَّذِي خَلَقَنِي فَهُوَ يَهْدِينِ وَالَّذِي هُوَ يُطْعِمُنِي وَيَسْقِينِ وَإِذَا مَرِضْتُ فَهُوَ يَشْفِينِ وَالَّذِي يُمِيتُنِي ثُمَّ يُحْيِينِ

“У мени яратган зотдир. Бас, мени ҳидоят қилади ҳам Унинг Ўзи. Ва мени таомлантирадиган ва суғорадиган ҳам Унинг Ўзи. Бемор бўлганимда менга шифо берадиган ҳам Унинг Ўзи. Мени ўлдирадиган, сўнгра тирилтирадиган ҳам Унинг Ўзи (78-81-оятлар).

Агар биз ушбу оятда келган нарсалар ҳақида ўйлаб кўрсак, унда эъжоз (мўъжиза, ақлни лол қолдирувчи жиҳат) қисқа жумлалар билан берилганига гувоҳ бўламиз.

Яратиш масаласи Аллоҳ таолонинг Ўзига хосдир. Махлуқлар эса ожиздир. Ҳеч бир кимса бирор нарса яратишга қодирлигини даъво қила олмайди. Лекин ўлим масаласига келсак, бу ўринда бироз тортишув бор.

Аллоҳ таоло Қуръони Каримда шундай деган:

أَلَمْ تَرَ إِلَى الَّذِي حَآجَّ إِبْرَاهِيمَ فِي رِبِّهِ أَنْ آتَاهُ اللّهُ الْمُلْكَ إِذْ قَالَ إِبْرَاهِيمُ رَبِّيَ الَّذِي يُحْيِـي وَيُمِيتُ قَالَ أَنَا أُحْيِـي وَأُمِيتُ قَالَ إِبْرَاهِيمُ فَإِنَّ اللّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ فَبُهِتَ الَّذِي كَفَرَ وَاللّهُ لاَ يَهْدِي الْقَوْمَ الظَّالِمِينَ

“Аллоҳ подшоҳлик бериб қўйгани сабабидан Иброҳим билан Роббиси ҳақида ҳужжат талашганни билмадингми? Иброҳим: “Менинг Роббиим тирилтиради ва ўлдиради”, деганда, у: “Мен тирилтираман ва ўлдираман”, деди. Иброҳим: “Албатта, Аллоҳ қуёшни Машриқдан чиқаради, бас, сен уни Мағрибдан чиқаргин-чи”, деди. Бас, куфр келтирган лол қолди. Ва Аллоҳ золим қавмларни ҳидоятга солмас”. (Ушбу ояти карима Иброҳим алайҳиссалом билан у кишининг даврларида ўтган бир ҳукмдор подшоҳнинг тортишувини ҳикоя қилади.) (Бақара сураси, 258-оят).

Бу оят Иброҳим алайҳиссалом билан Аллоҳ подшоҳлик берган кимса (Намруд) ўртасидаги суҳбатни ҳикоя қиляпти. Иброҳим алайҳиссалом унга “Роббим тирилтиради ва ўлдиради” деганларида, у кимса кибрга кетди ва “Мен ҳам тирилтираман ва ўлдираман” деб даъво қилди. Кейин бир одамни олдига чақиртирди. Уни қатл қилишга буйруқ берди ва “У энди ўлувчидир” деди. Кейин ўша одамни кечирди ва “Энди уни тирилтирдим, яъни яшашига қўйиб бердим” деди.

Биз айтамизки, баъзи одамлар қатл билан мавт (ўлим)нинг фарқини тушунишмайди.

Қатл – инсон жасадини бузиш, уни руҳнинг қолишига яроқсиз ҳолга келтиришдир. Шу билан руҳ у ерда қололмайди, чиқиб кетади.

Лекин мавт (ўлим) – руҳни жасаддан, уни вайрон қилмай, бузмай чиқаришдир. Шунинг учун Аллоҳ таоло Қуръони Каримда бу иккисининг ўртасини фарқлаб шундай деган:

وَمَا مُحَمَّدٌ إِلاَّ رَسُولٌ قَدْ خَلَتْ مِن قَبْلِهِ الرُّسُلُ أَفَإِن مَّاتَ أَوْ قُتِلَ انقَلَبْتُمْ عَلَى أَعْقَابِكُمْ وَمَن يَنقَلِبْ عَلَىَ عَقِبَيْهِ فَلَن يَضُرَّ اللّهَ شَيْئاً وَسَيَجْزِي اللّهُ الشَّاكِرِينَ

“Муҳаммад ҳам бир Пайғамбар, холос. Ундан аввал ҳам Пайғамбарлар ўтган. Агар у ўлса ёки қатл қилинса, орқангизга қайтасизми?! Кимки орқасига қайтса, Аллоҳга ҳеч зарар келтира олмас. Ва Аллоҳ шукр қилувчиларни мукофотлар”. (Кимки Исломнинг улуғ неъмат эканини тушуниб етса, шукр қилса, яъни, Исломни ўзига ҳаёт йўли қилиб олиб, Аллоҳга бу неъмат учун ҳамду сано айтса, Аллоҳ таоло унга мукофот беради. Уҳуд ғазотида бўлиб ўтган бу ҳодиса ва унинг баёни бўлиб тушган ушбу оят орқали Аллоҳ таоло мусулмонларни Пайгамбар алайҳиссаломнинг шахсларига ортиқча ёпишишдан қайтариб, асосий манбаъга қарашга одатлантиришни хоҳлаган. Мусулмонлар тўғридан-тўғри Аллоҳнинг ўзига мурожаат қилишни ўргансинлар. Улар Аллоҳнинг олдида ўзларини масъул эканликларини сезсинлар.) (Оли Имрон сураси, 144-оят).

Бошқа бир оятда бундай деган:

وَلَئِن مُّتُّمْ أَوْ قُتِلْتُمْ لإِلَى الله تُحْشَرُونَ

“Гарчи ўлсангиз ҳам ёки қатл қилинсангиз ҳам, албатта, Аллоҳ ҳузурида йиғилурсиз” (Оли Имрон сураси, 158-оят).

Демак, ўлимни юзага чиқариш Ягона Аллоҳнинг ишидир. Лекин қатл мавтдан фарқли бўлиб, у Аллоҳнинг бандаларидан бирининг қўли билан содир бўлиши мумкин. Бунда ўша банда кимнидир ўлимига сабабчи бўлади. Мавт эса сабабсиз бўлади. Аллоҳ таолонинг Ўзи ўлдиради. Ҳеч ким ўлимдан қутулиб қололмайди. Чунки, Аллоҳнинг амри барча халқлари устида жорий бўлувчидир. Инсоннинг иши эса жорий бўлмайди.

Шайх Муҳаммад Мутаваллий

Шаъровий раҳимаҳуллоҳнинг

“Ал-Адилла ал-мааддийя ала вужудиллаҳ”

номли асаридан Нозимжон Иминжонов таржимаси

ЎМИ Матбуот хизмати

Қатар музейи раҳбари Шайх Ал Маясса бинти Ҳамад ал Тани хоним жорий йилнинг 10 апрель куни Бирлашган Миллатлар Ташкилотининг Нью-Йоркдаги бош қароргоҳида “Hey Ya: Arab Women in Sport” (“Кетдик: Араб аёллари ва спорт”) номли фото кўргазманинг очилишида иштирок этди.

Ушбу кўргазмада икки халқаро фотосуратчи Бриджит ва Мариан Лакомбеларнинг ишлари намойиш қилинмоқда. Бу ҳақда “thepeninsulaqatar.com” нашри хабар берди.

Кўргазмани ўтказишдан мақсад араб аёлларининг жамиятда ўз ўрнини топишида спортнинг ўрни нақадар юқори эканини намойиш этишдир. Кўргазма ҳар йили 6 апрелда нишонланадиган Спорт тараққиёт ва тинчлик учун халқаро куни муносабати билан ташкил этилган.

Кўргазмадаги фотосуратларда 50 дан зиёд араб аёлларининг Олимпиада ўйинларидаги иштироклари жараёни акс эттирилган.

ЎМИ Матбуот хизмати