Ziyo studiyasi

Manba: “O‘zbekiston” telekanali

Жорий йилнинг 14 сентябрь куни “Ўзбекистон Республикаси Президентининг 2023 йил 8 майдаги “Янги таҳрирдаги Ўзбекистон Республикаси Конституциясини амалга ошириш бўйича биринчи навбатдаги чора-тадбирлар тўғрисида”ги Фармонининг ижросини таъминлаш мақсадида Дин ишлари бўйича қўмита ходимлари учун семинар ўтказилди.

Семинардан кўзланган мақсад Қўмитада фаолият олиб бораётган ходимларнинг ҳуқуқий билимларини ошириш ва янги таҳрирдаги Конституциянинг мазмун-моҳиятини тўлиқ очиб беришдан иборат.

Экспертлар томонидан Бош Қомусимизга киритилган энг муҳим ўзгартишлар ҳақида батафсил маълумот берилди.

Хусусан, янги таҳрирдаги Конституцияда инсон, унинг ҳаёти, эркинлиги, шаъни, қадр-қиммати олий қадрият ҳисобланиб, инсонпарвар демократик давлатни, очиқ ва адолатли жамиятни барпо этишга қаратилган нормаларнинг белгиланганлиги ва бошқа муҳим масалалар тўғрисида атрофлича тушунчалар берди.

Семинар савол-жавобларга бой тарзда, очиқ мулоқот шаклида ўтди.

Дин ишлари бўйича қўмита
Ахборот хизмати

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Кимки мақтовларнинг энг чиройлиси билан Аллоҳни мақтайман, деб қасам ичса,

لاَ أُحْصِي ثَنَاءً عَلَيكَ أَنْتَ كَمَا أَثْنَيتَ عَلَى نَفْسِكَ

«Лаа уҳсий санаан ъалайка анта кама аснайта ъала нафсика» деб айтиши билан қасамини бажарган бўлади.
Баъзилар:

فَلَكَ الحَمْدُ حَتَّى تَرْضَى

«Фалакалҳамду ҳатто тарзо» (Рози бўлгунингча Сенга ҳамд бўлсин), дейилган гапни зиёда қилишган.

Абу Наср Таммор Муҳаммад ибн Назр роҳимаҳуллоҳдан ривоят қилиб келтиришларича, Одам алайҳиссалом:
«Эй раббим, касби корим мени машғул қилиб қўйди. Менга бир нарса ўргатгинки ана шу ҳамма ҳамд ва тасбиҳларни ўз ичига олсин», дедилар. Шунда Аллоҳ таоло у зотга ваҳий қилиб: «Эй Одам қачон тонг оттирсанг уч марта ва кеч киргизсанг уч марта «Алҳамду лиллаҳи роббил ъаламийна ҳамдан йувафий ниъамаҳу ва йукафиъу мазийдаҳу» деб айт, мана шу ҳамд ва тасбиҳларни ҳаммасини ўз ичига олгандир», деб айтди.

Ҳижрий 1445 йил Рабиул аввал – Мавлиди шариф ойининг биринчи куни фалакий ҳисоб-китобга кўра, 2023 йил 16 сентябрь, шанба кунига тўғри келмоқда.

Маълумки, Ҳазрати Пайғамбаримиз Муҳаммад соллаллоҳу алайҳи васаллам ушбу ойда таваллуд топганлар. Ушбу фазилатли ой барчамизга муборак бўлсин!

Расулуллоҳ соллаллоҳу алайҳи васаллам қачон янги чиққан ойни кўрсалар қуйидагича дуо қилар эдилар:

"اللَّهُمَّ أَهِلَّهُ عَلَيْنَا بِالْيُمْنِ وَالْإِيمَانِ وَالسَّلَامَةِ وَالْإِسْلَامِ رَبِّي وَرَبُّكَ اللهُ"

Ўқилиши: "Аллоҳумма аҳиллаҳу алайна билюмни вал иймани, вас-салаамати вал-Ислами, Роббий ва Роббукаллоҳ”.

Маъноси: "Аллоҳим! Бу ойни бизларга барака ва имон, саломатлик ва Ислом ойи қилгин! Эй, ҳилол, менинг ҳам, сенинг ҳам Роббинг Аллоҳдир!".

Ўзбекистон мусулмонлари идораси
Матбуот хизмати

Жорий йилнинг 13-14 сентябр кунлари Россиянинг Санкт-Петербург шаҳрида икки йилда бир марта ўтказиладиган “Замонавий дунёда диний қадриятлар” номли II-халқаро диний форум бўлиб ўтмоқда.

Халқаро форумда Яқин Шарқ, Форс кўрфази минтақаси, Африка, МДҲ давлатларининг диний ташкилот вакиллари ва Россиянинг турли ҳудудларидан уч юзга яқин соҳа мутахассислари иштирок этди.

Шунингдек, бу йилги форумни нафақат илоҳиётшунослар, балки кўплаб олий ўқув юртлари ўқитувчилари, дипломатик ваколатхоналари раҳбарлари, миллий-маданий автономиялар ва турли миллат диаспора раҳбарлари, олимлар ва экспертлар, сиёсий арбоблар ҳамда форумга катта қизиқиш билдирган 200 нафар талаба ҳам онлайн тарзда кузатиб борди.

Халқаро анжуманда Ўзбекистон мусулмонлари идораси раисининг ўринбосари Уйғун домла Ғофуров ҳам иштирок этди.

Форум доирасида илмий ва диний мулоқотлар ташкил этилди. Унда диний таълимотларнинг асосий мақсади тинчлик, илм ва маърифат тарқатиш экани таъкидланди.

Шунингдек, ўзаро алоқаларни яхшилаш, зўравонликнинг ҳар қандай кўринишини қабул қилмаслик, диний ва маънавий-ахлоқий муаммоларни назорат қилиш муҳимлиги ҳам қайд этилди. Халқаро анжуман давомида анъанавий динлар ўртасидаги муносабатларни яхшилаш, муаммоларни аниқлаш, дунёдаги этник-диний вазиятни уйғунлаштириш механизмларини яратиш, экстремизмга қарши курашиш лойиҳаларини ишлаб чиқиш масалалари муҳокама этилди.

Форум якунида муҳокама этилган мавзулар юзасидан амалий чора-тадбирлар кўришга келишиб олинди.

Ўзбекистон мусулмонлари идораси
Матбуот хизмати