Россиянинг барчага машҳур бўлган «Жить здорово!» (Яхши яшаш!) кўрсатуви бошловчиси Елена Малишева ўз чиқишларининг бирида телетомошабинларга қарата ҳожатхона қоғозларидан фойдаланишдан воз кечишни тавсия қилди. Бу ҳақда muslim.kz нашри хабар берди.

Малишеванинг фикрича, бундай воситалардан фойдаланиш нотўғри ҳамда салбий оқибатларга олиб боради. Бунинг ўрнига сув билан мустаҳаб қилиш (ювиш)ни тавсия этган.

Бошловчининг фикрини иммунолог Андрей Продеус ҳам қўллаб-қувватлаган. Мутахассиснинг таъкидлашича, қоғоздан фойдаланиш микрожароҳатларга сабаб бўлиши ва бунинг оқибатида йиринглаш келиб чиқиши мумкинлигини айтган. Елена Малишева ушбу анъанадан Шарқ халқлари фойдаланиб келишини мисол сифатида келтириб ўтган.

Ўзбекистон мусулмонлари идораси Матбуот хизмати

Уламоларимиз вақтни ғанимат билишга, китобларда кўрган ёки хаёлларига келган фойдали фикрларни дарҳол ёзиб қўйишга ҳарис эдилар. Улар бу ишни ҳатто тунда ҳам амалга оширардилар.

Имом Бухорий раҳимаҳуллоҳ хаёлларига келган фойдали фикрларни ёзиб қўйиш учун тунда кўп уйғонардилар. Шогирдлари Фирабрий раҳимаҳуллоҳ шундай деган: “Бир куни кечқурун Муҳаммад ибн Исмоилнинг уйларида эдим. У киши тун давомида ўн саккиз марта ўрниларидан туриб, чироқни ёқиб, бирор фикрни ўйлаб, кейин уни ёзиб қўйганларини санадим”.

*****

Имом Шофеий раҳимаҳуллоҳнинг соҳиблари Ҳумайдий у киши билан Мисрдалигида бўлган воқеани ҳикоя қилади. Ўшанда Ҳумайдий кечаси ташқарига чиққанда, Шофеий раҳимаҳуллоҳнинг хоналаридаги чироқлари ёниқ турганини кўриб, деразадан қараса, қоғоз ва қалам турган экан. Воқеани ровийнинг ўзи давом эттиради: “Нима қиляпсиз, эй Абу Абдуллоҳ?” деб сўрадим. Шунда имом: “Бир ҳадис ёки бир масъаланинг маъноси ҳақида ўйладим. Кейин зеҳнимдан кетиб қолишидан қўрқиб, чироқни ёқишларини буюрдим-да, ўша фикрни ёзиб қўйдим” деб жавоб бердилар”.

*****

Ибн Аббор Ҳофиз “Мўъжаму асҳабис Садафий” китобида аллома Абул Қосим ибн Вард Тамимийнинг таржимаи ҳоли баёнида шундай деган: “У киши бирор китобни кўриб қолсалар, уни вароқлаб, юқоридан пастга кўз югуртириб, агар бирор фойдали нарсани топсалар, ёнларидаги вароққа кўчириб қўярдилар. Ҳатто шу тарзда бутун бир мавзуни жамлардилар”.

*****

Ибн Ҳажар раҳимаҳуллоҳ “Ал-Баҳрул муҳийт” ва бошқа асарлар соҳиби бўлмиш Имом Заркаший раҳимаҳуллоҳнинг таржимаи ҳолини баён қилаётганларида мана буларни зикр қилганлар: “У киши (Заркаший) китоблар бозорига бориб, китобфуруш дўкони олдида тўхтаб, кун бўйи ўша ердаги китобларни мутолаа қилиб, ўзларини қизиқтирган бирор жойи чиқиб қолса, уни ёнларидаги қоғозга қайд этиб, кейин ўша қоғоздаги маълумотни ўз асарларига иқтибос тарзида киритар эдилар”.

Али ибн Муҳаммад Имроннинг “Ал-Мушаввиқ илал қироати ва талаби илми” китобидан Нозимжон Ҳошимжон таржимаси

Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Набий соллаллоҳу алайҳи васалламдан соқол қўйиш ва узун кўйлак кийишни олдик, аммо у зот соллаллоҳу алайҳи васалламнинг адолатларини, ҳалимликларини, кечиримлиликларини ва гўзал хулқларини унутдик.

Доктор Мустафо Маҳмуд

*****

Бир шахснинг совуққон, асабийлашмайдиган, бепарво эканини кўрсанг, билгинки, у оғриқу изтироблари кўплигидан карахт ҳолатга тушиб қолган.

“Тарих муҳрлаган сўзлар”

*****

Ортга ўгирилиб вақтингни зое қилма! Чунки сен у тарафга ҳеч қачон юрмайсан!

“Тарих муҳрлаган сўзлар”

*****

Темир ишлатилмаса, занглайди.

Сув ҳаракатланиб турмаса, айнийди.

Худди шунингдек, фикр юритилмаса, ақл ҳам шу аҳволга тушади.

“Тарих муҳрлаган сўзлар”

*****

Одамларнинг ҳақиқатини мусофирликда ёки бошингга ташвиш тушганда биласан.

Абдурроҳман Мунийф

*****

Ҳаётдаги энг хатарли инсонлардан бири каззобдир.

“Тарих муҳрлаган сўзлар”

*****

Хиёнатнинг минг хил тури бор. Лекин уларнинг ичида энг жирканчи ўзини севадиган қилиб кўрсатишдир.

“Тарих муҳрлаган сўзлар”

*****

Сиздан узлат (одамлардан четроқда юриш) ҳақида сўрайдилар. Уларга “Бундай юриш ғийбатдан узоқда туриб роҳатланиш, чақимчиликдан қочиш, тилнинг тойилишларидан қўрғон ва миш-мишлардан узоқлашишдир” деб айтгин!

“Тарих муҳрлаган сўзлар”

*****

Нопокликлар кўпайган замонда поклигингни сақла!

Алдов, хиёнатлар кўпайган замонда вафоингни сақла!

Маҳмадоналик кўпайган замонда сукутингни сақла!

Ахлоқсизлик кўпайган замонда одобингни сақла!

Бузуқликлар кўпайган замонда иффатингни сақла!

“Ховатир роқия журнали”

*****

Ҳар сафар йиқилганимизда бизни кучли қиладиган биргина нарса – барча иш Аллоҳ таолонинг қўлида эканига бўлган ишончимиздир!

“Ховатир роқия журнали”

*****

Юрагингиз сиқилганда йиғлаб ўтирманглар, балки унинг ўрнига Аллоҳ таолога сажда қилинглар!

“Ховатир роқия журнали”

*****

Агар вафо қилиш қўлингдан келмаса, ваъда сўзини тилингга олма!

“Ховатир роқия журнали”

*****

Ер юзида юрган қанчадан қанча кишилар борки, улар осмонда машҳурдирлар.

“Ховатир роқия журнали”

Интернет материалларидан тўплаб, таржима қилувчи

Нозимжон Иминжонов

У етим ўсди. Ўн икки ёшидаёқ отаси вафот этди. Онаси уни ўз қарамоғига олди. Онаизор қўни-қўшниларнинг уйларида ишлар, у ердан ортган овқатларни келтириб фарзандини едирар, одамлардан қолган эски кийимларни топиб ўғлини кийинтирар эди. Ишлаб топган пулининг бир қисми билан уйнинг ижара ҳаққини тўласа, қолган қисмини еб-ичишга ишлатар эди.
Кишилар хонадонида хизмат қилиб ҳолдан тойган она сил касалига мубтало бўлиб ётиб қолди. Ночорлиги сабаб, ҳукумат касалхонасига мурожаат қилишга мажбур бўлди, чунки у ерда беморнинг овқатидан хабар олишар, касалини даволашар эди. Лекин баданини кемираётган дард азоби билан уйда ёлғиз қолган фарзандига чекаётган қайғу азобини бирга кўтаришга қурби етмас, у бир вақтнинг ўзида икки дардни – жисми ва нафсини емираётган азобни бошдан кечираётган эди. У Охират диёрига риҳлат қилди. Бола эса қийинчиликлар гирдобида қолди.
Ўғил ўқишни ташлади ва қурилишда ишлашга мажбур бўлди. У аста-секинлик билан қурувчилик сир-синоатини ўрганди ва ҳеч қанча вақт ўтмай бу касбнинг устасига айланди. Бу орада унинг иқтисодий аҳволи ҳам яхшилана борди.
Улғайиб уйланадиган вақти ҳам келиб қолди. Қурувчиликдаги устозининг ҳузурига бориб, унинг қизини қўлини сўради. Устоз рози бўлгач, тўй бўлиб, келин куёвникига олиб келинди.
Йиллар ўтди. Энди унинг уйи, жуфти ҳалоли, фарзандлари бор эди. У касбининг моҳир устаси, ўз ишида омонатдорлиги, бўйнидаги ишни ихлос билан бажариши билан машҳур эди.
Унинг мижозлари кўп бўлиб, хафтада етти кун ишлар, бирор кун ҳам, балки бир соат ҳам дам олмай ишларди. Чунки у фарзандларини ўзи ёшлигида қийналганидек азоб чекишини истамас, уларни болалик гаштини суриб, олий даргоҳларда илм олишини, келажакда ўқимишли етук инсон бўлишини истарди.

У фарзандлари ва аёлига доимо бир гапни такрорлар эди: "Мен ҳаётимда кўп машаққат чекдим, бундан кейинги ҳаётимда ҳам, Аллоҳнинг изни билан у дунёга риҳлат қилганимдан кейин ҳам роҳат топишни, ортимдан олим, солиҳ фарзандлар қолишини истайман" дер эди.

Ота-онанинг қалбидаги нияти шу: ўзи кўрган қийинчиликларни фарзандлари кўрмаслигини хоҳлайди.

Иброҳим Ҳозимийнинг
ОҚПАДАРЛИК ОҚИБАТЛАРИ китобидан