muslim.uz
Нишонга урилган гаплар: «Кетаман» деб таҳдид қилганнинг қулоғига «Йўлни биласизми ёки кўрсатиб қўяйми?» деб айтинг!
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Уч нарсани унутма:
Агар сенга Аллоҳ таолонинг неъмати келса, Алҳамдулиллаҳ дегин!
Агар сенга ризқинг секин келса, Астағфируллоҳ дегин!
Агар сенга бир машаққат етса, Лаа ҳавла ва лаа қуввата иллаа биллааҳ дегин!
“Фикр дурдоналари”
*****
Бир эшик беркилса, бошқаси очилади. Лекин биз узоқ вақт афсус билан берк эшикка тикилиб турамиз-да, очиқ эшикни кўрмаймиз.
“Тарих муҳрлаган сўзлар”
*****
Кўпайтириш жадвалидаги 1 рақамидек бўлинг. Ушбу рақам ёнига катта сон келса ҳам, кичик сон келса ҳам, унга ҳажмидан катта ўлчов, миқдор бермайди.
“Тарих муҳрлаган сўзлар”
*****
Агар ҳақ бўлсанг, асабларингни бошқара оласан. Аммо хато қилган бўлсанг, гапингни ўтказиш учун жароҳат етказувчи сўздан бошқа нарса тополмайсан.
“Тарих муҳрлаган сўзлар”
*****
Агар борлигинг худди йўқлигингдек бир хил бўлса, кетвор!
Нажиб Маҳфуз
*****
Эркаклар зиёфат кунларида эмас, қийинчилик кунларида билинадилар.
Муҳаммад Ғазолий раҳимаҳуллоҳ
*****
Ахлатни муносиб жой (махсус идиш)га ташлай олмайдиган жамиятдан муносиб инсонни муносиб ўринга қўйишини кутма.
“Тарих муҳрлаган сўзлар”
*****
Ўзингга тоғнинг чўққисидан жой изла. Пастда шундоқ ҳам катта тиқилинч.
“Тарих муҳрлаган сўзлар”
*****
Одамларнинг гапи мисоли харсангтошдир. Ё уни устингга кўтариб, белингни синдирасан. Ёки уни оёқларинг остига ташлаб, баланд минора қуриб, ўзинг ҳам юксаласан.
“Фикр дурдоналари”
*****
Жароҳатларнинг энг оғриқлиси танамизда из қолдиргани эмас, балки бирорта инсон кўрмайдиган қалбимизда из қолдирганидир.
“Фикр дурдоналари”
*****
Лабида асал, қалбида гина, адоват бўладиган кишидан эҳтиёт бўл!
“Фикр дурдоналари”
*****
«Кетаман» деб таҳдид қилганнинг қулоғига «Йўлни биласизми ёки кўрсатиб қўяйми?» деб айтинг.
«Фикр дурдоналари»
Интернет материалларидан тўплаб, таржима қилувчи
Нозимжон Иминжонов
Диний идорада хайрия ҳашари ўтказилди
Бугун, 26 январь куни эрта тонгдан мамлакатимизда илк бор умумхалқ экологик хайрия ҳашари бошланди. Шу жумладан Ўзбекистон мусулмонлари идораси ва унинг қуйи тизимидаги ташкилотларда ҳам хайрия ҳашари ташкил этилди.
Ҳашардан тушган маблағлар Орол денгизининг суви қуриган майдонларида ҳимоя ўрмонлари ташкил этиш, минтақада экологик ҳолатни ва аҳолининг яшаш шароитини яхшилаш, кам таъминланган, боқувчисини йўқотган, ижтимоий ҳимояга муҳтож оилаларга моддий ва маънавий ёрдам кўрсатиш ишларига сарфланади.
Президентимизнинг Олий Мажлисга Мурожаатномасида экологик хавфсизлик, сув ва табиий ресурслардан оқилона фойдаланиш эътиборимиз марказида туриши зарурлиги хусусида алоҳида тўхталиб ўтган эди.
Ўзбекистон мусулмонлари идораси Матбуот хизмати
Ҳашар элнинг иши – юртнинг ободлиги
Ҳашар билан болалик давримиздан танишмиз. Ўша кезларда одамларнинг уйларининг аксари шиферланмагани боис ҳар йили кузда лойсувоқ қилинарди. Ҳашарга қўни-қўшни, қариндош-уруғ, ёшу қари чақириларди. Асосий ишларни ёшлар бажарса-да, офтобшувоқда чой ичиб ўтирган кексалар ҳашарга ўзгача руҳ бағишлаб турганини ҳамма бирдек ҳис қилар эди. Болалар учун эса ҳашар чинакам байрам бўларди. Ҳашар одамларни бир-бирига қалбан яқинлаштирар, ажойиб ҳазил-ҳузуллар кечга қадар давом этарди. Агар ҳашар чоғи йўл устидан бирор киши ўтиб қолгудек бўлса, у баланд овозда “Ҳорманглар!” деб келарди-да, ҳашарга чақирмагани учун уй эгасига дашном берарди, кейин эса резин этикни киясолиб, қўлига кетмон олиб лойга кириб кетарди. Ҳашар сўнгида хонадон соҳибаси қурби етганига қараб ҳашар оши тайёрлар ва ҳеч ким уни эмас, буни пиширибди, дея гина қилмас эди.
Ҳа азизлар, азалдан халқимиз уй қуришлар, йўл солишлар, кўприклар бино қилишлар ва бошқа катта-катта ишларни ҳашар йўли билан бажариб келган. Бугун эса Марказий Осиё жавҳари, пешонамизга битган яккаю ягона денгизимиз – Орол бизнинг ҳашар йўли билан кўмаклашишимизга муҳтож...
Вазирлар Маҳкамасининг умумхалқ экологик хайрия ҳашарини ўтказиш тўғрисидаги фармойишига биноан бугун республика бўйлаб умумхалқ экологик хайрия ҳашари ўтказилмоқда.
Хайрия ҳашарида маҳаллалар, аҳоли пунктлари, кўп қаватли уйлар ва бинолар, ҳовлилар атрофи, гузарлар, хиёбонлар, зиёратгоҳлар ва қабристонлар, ариқлар, кўчалар ва йўлаклар ҳамда болалар майдончалари тартибга келтирилаётир.
Хайрия ҳашаридан тушган маблағлар Орол денгизининг суви қуриган майдонларида ҳимоя ўрмонлари барпо этиш, минтақада экологик ҳолатни ва аҳоли турмуш шароитини яхшилаш, кам таъминланган, боқувчисини йўқотган, ижтимоий ҳимояга муҳтож оилаларга моддий ва маънавий ёрдам кўрсатиш каби тадбирларга сарфланади.
Ана шундай савоби улуғ ҳашарга “Мовароуннаҳр” нашриёти жамоаси ҳам эрта тонгдан келиб қўшилди. Ходимлар экологик ҳашарни ўзларининг аслида ҳам орастагина бўлган хоналарини ёғ тушса ялагудек қилишдан бошладилар. Ундан сўнг эса ҳовлига чиқиб, дарахтларга шакл беришди, уларни оқлашди, тагларини юмшатишди, ҳовлини ва ҳовли атрофини супуриб-сидириб, янги келин тушган ҳовлидек саранжом-саришта қилиб қўйишди. Нашриёт биноси ортида қурилиш ишлари бораётгани сабабли ўша томонга йиғилиб қолган синиқ ғишт парчалари, тўкилган қум-шағалларни ҳам йиғиштириб олиб, чанг-чунглардан тозалаб қўйишди.
Ғайратига ичига сиғмаган ходимлар яна бинога қайтиб кириб, компьютерларини ёқиб ижод, таҳрир, таржимага киришиб кетдилар.
Улардан: “Қизишиб кетдингизми, дейман?” деб сўрасангиз, “Ҳашарга келгандан кейин ишлаш керак-да, ахир Орол фақат бизнинг эмас, фарзандларимизнинг, келажак авлодларимизнинг ҳам денгизи, унинг қуриган қисмининг ўрнида ям-яшил ўрмонзор пайдо бўлса, нафақат, минтақамизда, балки бутун оламда экологик шароит яхшиланади. Бундан эса ҳаммадан ҳам кўп бизнинг минтақамиз, мамлакатимиз аҳолиси фойда кўради. Шундай савобли ишга бош қўшмай бўлар эканми”, дейди ҳашарга бош бўлиб турган бош директор ўринбосари Холмат Атабоев.
“Шунинг билан бирга кам таъминланган, боқувчисини йўқотган оилаларга ҳам фойдамиз тегар экан, ҳашарчи бўлганимиздан ниҳоятда мамнунмиз”, дейди ходима Нилуфар Аблаева.
Ҳашар ана шундай кўтарники руҳда давом этмоқда.
Дамин ЖУМАҚУЛ
Умумхалқ экологик хайрия ҳашари – икки ҳисса савоб дегани
Халқимизнинг минг йилликларга бориб тақалувчи қадимий қадриятларидан бири бу ҳашардир. Аждодларимиз бу анъанани доимо улуғлаганлар. Зеро, динимиз аввало инсониятни покликка, озодаликка чорлайди. Ҳар қандай ибодатлар, савобли амаллар поклик ила бошланади.
Маълумки, бугун 26 январь куни илк бор умумхалқ экологик хайрия ҳашари ўтказилмоқда. Бу нима дегани? Яъни, мазкур ҳашардан тушган маблағлар Орол денгизининг суви қуриган майдонларида ҳимоя ўрмонлари ташкил этиш, минтақада экологик ҳолатни ва аҳолининг яшаш шароитини яхшилаш, кам таъминланган, боқувчисини йўқотган, ижтимоий ҳимояга муҳтож оилаларга моддий ва маънавий ёрдам кўрсатиш ишларига сарфланади. Демак ҳашарда қатнашганлар икки ҳисса савобга бўладилар. Биринчидан, жойларни тозалаб, поклашда иштирок этсалар, иккинчидан, ушбу кун учун иш жойларидан ажратиладиган маошлари юқорида келтирилгандек, тўлиқ ижтимоий ёрдамларга йўналтирилади.
Ҳашар муносабати билан ана шундай уюшқоқлик ишлари диний идора тизимидаги масжидлар, таълим муассасалари, зиёратгоҳлар ва уларга туташ қабристонларда ҳам намунали тарзда ўтказилмоқда. Масжид жамоаси, маҳалла фаоллари уюшқоқлигида, хонақоҳ ва ҳовлилар, атроф қисмлар, экинлар, ариқлар тозалонмоқда. Қабристонлар, қаровсиз қолган жойлар ободонлаштирилиб, тартибга келтирилмоқда.
Ўзбекистон мусулмонлари идораси Масжидлар бўлими
Исириқ кўздан асрамайди!
Араб тилида ширк сўзи «икки нарсани тенглаштириш», «тенгдош қилиш», «шерик қилиш» деган маъноларни билдиради. Унинг шаръий маъноси: Аллоҳ таъолога зоти, феъллари, ибодати ва гўзал исму сифатларида махлуқларни тенгдош қилиш, шерик қилиш тушунилади. Қуръони Каримда ширк ва унинг ўзагидан ясалган сўзлар 34 марта зикр қилинган бўлиб, уларнинг барчасида ушбу гуноҳ қораланган ва ундан қайтарилган.
Шариатимизга кўра, ширк энг оғир зулм, энг қабиҳ жаҳолат ва энг катта гуноҳ саналади. Ундан қайтариш жамики анбиё алайҳимуссаломлар даъватининг асоси ва самовий шариатларнинг мағзидир. Чунки, ҳар бир набий ва расул албатта ўз қавмига: «Эй, қавмим! Аллоҳга сиғинингиз! Сизларга Ундан ўзга илоҳ йўқдир», – дегандир (Аъроф сураси, 59-оят).
Халқимиз орасида баъзи нарсаларни “кўздан асрайди” деган ўй билан турли жойларга илиб қўйиш тез-тез кўзга ташланиб қолади.
Масалан, айримлар қўчқорнинг бош суягини «Кўздан асрайди» деб ҳовлига кириш жойига илиб қўйишади. Агар қўчқорда шундай хусусият бўлганида, у аввало ўзини қассобнинг қўлидан асраган бўларди.
Баъзилар исириқ ёки кўзтиканнинг бир боғини дарвоза четига, ҳовлидаги сўриток устунига, машина салонига осиб қўйишганини кўп кўрамиз. Агар шу ишни “исириқ кўздан асрайди” деган эътиқод билан қилинган бўлса, бу иш ҳаром ва ботилдир.
Баъзи чақалоқларнинг қўлида тумор ва кўзмунчоқларни кўрамиз. Агар онаси ёки бувиси ўша кўзмунчоқларни “кўздан асрайди” деган ақида билан боғлаб қўйган бўлса, бу ҳам ҳаром ва ботил ишдир.
Дарвозага қоқиб қўйиладиган отнинг тақаси ҳақида ҳам шу фикрни айтиш мумкин.
Буларнинг ҳаммаси жоҳиллик, илмсизлик, китоб ўқимаслик, Динни соф ҳолда ўрганишга интилмаслик оқибатидир!
Исириқ асло кўздан асрамайди!
Тумор, кўзмунчоқлар ҳам асло кўздан асрамайди!
Тақа ҳам ҳовлини асло кўздан асрамайди!
Ҳовлини ҳам, гўдакни ҳам, машинани ҳам, уйни ҳам Аллоҳ таолонинг Ўзи асрайди!
Агар инсон юқорида санаб ўтилган исириқ, кўзтикан, кўзмунчоқ, тумор, тақа каби нарсалар ҳақида “Булар кўздан асрайди” деса, қалбида шу гапни тасдиқласа, Аллоҳ асрасин, ширк амални қилган бўлади. Чунки у бу гапи билан “Аллоҳ таолодан ташқари яна фалон нарсаларда ҳам асровчилик қуввати бор” деган ақидани қилган бўлади. Юқорида айтганимиздек, Аллоҳнинг феълларида махлуқларни тенгдош қилиш ширк амалдир. Асраш, паноҳ бериш, қутқариш Аллоҳ таолонинг феълларидандир.
Қабристонга борганда, ўша ердаги маййитлардан ёрдам, фарзанд, бахт сўраш, уларга атаб чироқлар ёқиш, жонлиқлар сўйиш ҳам мутлақо мумкин эмас. Баъзилар дуо қилаётганда “Ота боболаримизнинг руҳлари қўлласин”, “Азиз авлиёлар руҳлари қўлласин” деб юборишади.
Вафот этган кишилар тирикларга ёрдам беришолмайди, аксинча, улар тирикларнинг Қуръон тиловат қилиб, савобини бағишлашига зор бўлиб ётишибди. Барча истаклар, ёрдамлар, мададлар фақат Аллоҳ таолодан сўралади.
Ҳанафий мазҳабидаги мўътабар манбалардан бири «Раддул мухтор» китобида шундай дейилган: «Авом халқ тарафидан ўликларга атаб назр қилиш, Аллоҳнинг дўстлари қабрларига уларга яқин бўлиш мақсадида тангалар ташлаш, шам, чироқлар ёқиш ботил ва ҳаромдир».
Аллоҳ таоло шундай марҳамат қилади: «Аллоҳни қўйиб, қиёмат кунигача ҳам (дуони) мустажоб қила олмайдиганларга илтижо қиладиган кимсадан кўра ким ҳам адашганроқдир?! Ҳолбуки, у (жонсиз бут)лар ўша (мушрик)ларнинг дуоларидан ғофил (бехабар)дирлар» (Аҳқоф сураси, 5-оят).
Шунинг учун ширк деган улкан гуноҳдан сақланишимиз шарт!
Бу борада Ҳақ таоло Ўзининг каломида шундай деган:
«Албатта, Аллоҳ Ўзига ширк келтириш (гуноҳи)ни кечирмагай ва(лекин) ана шундан бошқа (гуноҳлар)ни Ўзи хоҳлаган (банда)ларидан кечирур. Ким Аллоҳга ширк келтирса, демак, у улкан гуноҳни тўқиб чиқарибди» (Нисо сураси, 48-оят).
Пайғамбаримиз соллаллоҳу алайҳи васаллам бизга ширкдан сақланиш борасидаги дуони ўргатганлар. У зот алайҳиссалом «Эй Аллоҳ, биз билиб туриб, сенга ширк келтиришимиздан паноҳ сўраймиз, билмаганимизга истиғфор айтамиз»,– денглар”, деб айтганлар.
Аллоҳ таоло барчамизни ширк ва бошқа гуноҳлардан асрасин!
Эй Аллоҳ, биз билиб туриб, сенга ширк келтиришимиздан паноҳ сўраймиз, билмаганимизга истиғфор айтамиз!
Muslim.uz сайти маълумотлари асосида
Нозимжон Иминжонов тайёрлади
Янгиликлар
