وعن أنس رضي الله عنه قال : قال رسول الله صلى الله عليه و سلم :  لا يؤمن أحدكم حتى أكون أحب إليه من والده وولده والناس أجمعين                                     

Анас розияллоҳу анҳу айтадилар: Расулуллоҳ соллаллоҳу алайҳи васаллам дедилар: “Сизлардан бирортангизнинг иймони мен унга ота-онаси фарзанди ва барча инсонлардан ҳам кўра суюклироқ бўлмагунимга қадар комил бўлмайди.” Муттафақун алайҳ.

Ушбу ҳадиси шарифнинг ровийси Анас ибн Молик р.а.дирлар. У зотнинг кунялари Абу Ҳамзадир. “Ҳамза” сўзи бир ўсимликнинг номи бўлиб, Анас р.а. уни ҳуш кўрганлари туфайли шу ном билан аталганлар. У зот ўн йил давомида Пайғамбаримизнинг хизматларида бўладилар. Оналарининг исми Умму Сулайм р.а. Набий алайҳиссалом у кишининг ҳақларига тўрт дуони қилганлар: умрига, фарзандларига, ризқига барака ва гуноҳларнинг кечирилиши. Мана шу дуонинг баракаси ўлароқ у зот ҳаётлари давомида унинг ижобатини кўрадилар.

Ҳадиси шарифда Пайғамбар алайҳиссалом у зотнинг ўзларига уммат томонидан бўладиган муҳаббатни баён қилмоқдалар. Яъни, бирор кишининг иймони Набий алайҳиссаломга бутун борлиғи билан муҳаббат қўймагунига қадар комил бўлмайди. Ҳатто ўз ота-онаси, фарзандлари ва бошқа барча инсонларга бўлган муҳаббатдан устун бўлиши зарур. Ваҳоланки, муҳаббат қалбнинг иши бўлса, киши унга ўз ихтиёри билан молик бўлолмайди. Бу ўринда киши ўзини ўз ихтиёрида бўлмаган нарсага мажбурлаш лозим келмайдими, деган савол юзага келса, унга шундай жавоб берилади: муҳаббат аслида икки хил бўлади: табиий ва ақлий. Табиий муҳаббат инсоннинг ихтиёрисиз, ўзи ҳам билмаган ҳолда бир инсонга боғланиб, уни яхши кўриб қолишидир. Ақлий муҳаббат эса, бир инсоннинг камолоти ва етуклиги ҳақида тафаккур қилгандан сўнг ўша шахс ва зотга нисбатан қалбда муҳаббат пайдо бўлади. Бу худди аччиқ дорининг шифоси борлигини билиб, ўзи ихтиёр қилиб истеъмол қилишга ўхшайди. Шу сабабдан ҳам ҳадиси шарифда таржиҳ берилаётган муҳаббат бу – ақлий муҳаббат саналади.

Баъзи уламолар бу ердаги муҳаббат табиий муҳаббат дедилар. Чунки, муҳаббатнинг сабаблари топилган вақтда, ўз-ўзидан табиий муҳаббат юзага келиши мумкин. Демак, муҳаббат пайдо бўлишининг сабаблари ҳусн, саҳоват, комиллик экан. Бу сабаблар эса Расулуллоҳ соллаллоҳу алайҳи васалламда энг мукаммал даражада мавжуд эди. Аллома Дархос р.а. айтадиларки: “Пайғамбар алайҳиссаломнинг ҳуснлари бемисл бўлган ва у зотнинг гўзалликлари ёнларида ҳозир бўлган инсонларга ҳам акс берарди. Шу туфайли у зотни сўраб келган аъробийлар дарҳол у зотни таний олмаган.” У зотнинг саҳоватлари ҳам бениҳоя кенг бўлган. Билол р.а.га келган инсоннинг қўлини қуруқ қайтармасликка, қарз олиб бўлсада унга бирор нарса бериб жўнатишга амр қилганлар. Шу туфайли Пайғамбар алайҳиссаломда муҳаббатнинг барча сабаблари мукаммал тарзда топилиши туфайли табиий муҳаббат ҳам ҳосил бўлар экан.

Бошқа ривоятларда Умар р.а. Пайғамбар алайҳиссаломга бўлган муҳаббатлари ўз нафсларидан кейинги ўринда эканини айтганларида, у зот ҳатто ўз нафсига бўлган муҳаббатдан ҳам устун муҳаббатда бўлишларини айтадилар. Шундан кейин Умар р.а. ўз нафсларидан ҳам кўра Пайғамбаримиз Муҳаммад Мустафо соллаллоҳу алайҳи васалламга муҳаббатлироқ бўладилар. Бу ҳолат эса, нафақат Умар р.а. балки, бутун уммати Муҳаммадияга тегишли бўлган ишдир. 

Муҳаммадий қори Эргашев 

Aҳмаджон қори жоме масжиди имом-хатиби

Aқл қўйдир, нафс бўри, иймон эса чўпон. Aгар иймон кучли бўлмаса, нафс ақлни ейди.

Завқ ва орзулар зинапояга ўхшайди. Зиналар ўтириб, дам олишга мослашмаган. Умрни шу зиналарда беҳуда ўтказмаслик учун ғофилликдан тез уйғонган ва ҳаётнинг моҳиятини тўғри англаб етган одам нақадар бахтли!

Жалолиддин Румий

***

Кимки бир кўнгли бузуғнинг хотирин шод айлагай,
Онча борким, Каъба вайрон бўлса, обод айлагай.

Алишер Навоий

***

Модомики, доноларча жавоб беришларини хоҳлар экансан – доноларча савол бер.

Гёте

***

Пайғамбаримиз Муҳаммад Мустафо алайҳиссаломнинг тутган йўлларини маҳкам тутдим, бахту саодатим ҳам, нажотим ҳам шу йўлдир!

Ҳақиқат ва адолат билан тўғри сиёсат юргизмаган ҳар бир раҳбар ва бошлиқ қаттиқ азоб-уқубат ва балога гирифтор бўлур.

Маҳмуд аз-Замахшарий

***

Ҳиссиёт руҳиятга энг қаттиқ таъсир этувчи омил ва уни ҳаракатга солишда ақлдан кўра кучлироқдир.

Инсон токи ўзини майда гап, ўчакиш, жанжал, шикоят, норозилик, оҳу воҳлардан озод қилолмас экан, у ифлос ва пастлик табиатидан халос бўлолмайди.

Абу Али ибн Сино

Ҳамма дунёни ўзгартиришга ҳаракат қилади, лекин ҳеч ким ўзини ўзгартириш ҳақида ўйламайди.

Лев Толстой

Манбалар асосида Саидаброр Умаров тайёрлади

Оламларга Раҳмат Пайғамбар қилиб, Аллоҳ таоло томонидан юборилган, залолатдан ҳидоятни фарқини бизларга билдирган, ваҳий қилинган Қуръони каримдан таълим берган, шафоатидан барча мўмину мўминалар умидвор бўлган ё Расулаллоҳ соллаллоҳу алайҳи ва саллам, ич-ичимдан, юрагимнинг туб-тубидан сизга бўлган муҳаббатим сабаб бу муҳаббатни қалбимга солган Аллоҳ таолога ҳамд айтиб, ё Расулаллоҳ, сизни соғиндим!

Аллоҳ таоло берган синовли мусибат кунларда ўзимга сабр сўраб, Аллоҳнинг раҳматидан умидвор бўлдим. Шоядки мусибатлар сабабидан Аллоҳ таоло мени гуноҳларимни мағфират қилса, ёинки даражотларимни кўпайтирса!

Дардларимни ота-онамга айтолмайман. Дардлаша олмайман. Улар бу дунёдан рихлат қилишган. Мен уларни фақат дуо билан ёдга оламан холос. Уларнинг ҳоллари Аллоҳ таолодан ўзгага аён эмас. Агар тирик бўлишса, дардларимни эшитар, юпанч берар эдилар. Афсус, буни энди иложи йўқ.

Мусибат ва сирларингни бир сирдошга айтасан, у сенга ачинади, юпатгандай бўлади. Лекин бундан не фойда? Ўз сиринг ичингда турганида сир, минг яқин бўлган дўстингга айтганингда эса у сир бўлмай қолади, очилиб фош бўлади. Шунинг учун Қуръон тиловат қилиб, ўзимга юпанч оламан.

Сиз билан худди мени кўриб турганингиздек тасаввур қилиб, сизга салавот, салом айтиб, дардларимни сизга тўкаман. Ё Расулаллоҳ. Шунда яна сизни соғинаман. Гар кўрмасам-да, ўзингиз айтганингиздек, салому салавотларимни эшитиб, алик оляпсиз-ку, деб яна сизни соғинавераман.

Мўминлар доимо синовда, умр ўткинчи. Дунё ғилдираги айланаверади. Умримиз тобора охират сари яқинлашяпти. Аллоҳ таолодан қолган умримни имонда, Исломда, соғ-саломатликда ўтишини сўраб, дуо қиламан. Соғинган кишимни, сизни ё Расулаллоҳ, Қиёматда кўришни, шафоатингизга муяссар бўлишни Яратгандан сўраб, дуо қиламан. То Қиёматда сизнинг шафоатингизни олмагунимча сизни соғинавераман, ё Расулаллоҳ, соғинавераман.

Соллаллоҳу алайҳи ва саллам. Аллоҳумма солли ва саллим ва барик алайҳ.

Ё Рабби! Сендан сўраганим:

Қалбимдан фақат Ўзингга бўлган муҳаббатимни зиёда қил!

Расулуллоҳ соллаллоҳу алайҳи ва салламга бўлган муҳаббатимни зиёда қил!

Соғинчимга иложни фақатгина Расулуллоҳ соллаллоҳу алайҳи ва салламни кўрганимдагина қонишини, Сизга бўлган соғинчим шундай ҳолатдагина босилишини Аллоҳ таолодан сўрайман.

Инсоннинг бошига мусибат, ташвишлар, ҳаёт қийинчиликлари, яқинлардан айрилиш, кўнглига ёлғизлик заҳқумлари чўкканида фақатгина унга юпанч, ёлғиз паноҳ, ёлғиз таскинлик бўлади. Мана шу таскинлик ва юпанчни Аллоҳ таоло Каломини ўқиб, тиловат қилганимда топдим. Шу Каломни бизларга сиз етказгансиз, ё Расулаллоҳ! Шунинг учун сизни соғинавераман. Қиёматда сиз билан учрашиши насиб қилсин.

Ё Расулаллоҳ, Сизни соғиндим...

Умму Муслима

Ислом цивилизацияси марказининг қурилиши қандай босқичда? Бу марказ юртимиз, халқимиз учун қанчалик аҳамиятли? Марказ бунёд этилгач, Эски шаҳар қай даражада ўзгаради?

بسم الله الرحمن الرحيم

اَلْحَمْدُ للهِ الَّذِي تَكَرَّمَ عَلَى الْعَالَمِيْنَ بِدِيْنِ الْإِسْلاَمْ، وَجَعَلَ السَّمَاحَةَ فِيْهِ مَنْهَجًا لِلْأَنَامْ، وَالصَّلاَةُ وَالسَّلاَمَ عَلَى سَيِّدِنَا مُحَمَّدٍ الَّذِي بَيَّنَ الْأَحْكَامْ وَعَلَى آلِهِ وَصَحْبِهِ أجْمَعِينَ، أَمَّا بَعْدُ

ИСЛОМДА ДИНИЙ БАҒРИКЕНГЛИК ВА ҲАМЖИҲАТЛИК МАСАЛАСИ   

Муҳтарам жамоат! Инсоният тарихига назар ташласак, қайси жамиятларда аҳиллик, биродарлик, ўзаро ҳамжиҳатлик жорий бўлса, тараққиёт, равнақ ва эл осойишталиги-ю халқ фаровонлиги ҳукм сурган. Аксинча, қай бир жамиятда муросасизлик, ўзаро хусумат кучайса, бундай жамиятларда уруш ва можаролар авж олган, юрт вайрон, эл пароканда бўлган.

Шукрлар бўлсинки, халқимизнинг қон-қонига миллатлараро тотувлик ва диний бағрикенглик сингиб, айни пайтда юртимизда 130 дан зиёд турли миллат ва элатларга мансуб кишилар ўзаро ҳурмат, дўстлик ва ҳамжиҳатликда тинч-тотув яшаб келмоқдалар.

Маълумки, Исломда  миллат ажратиш йўқ. Кишиларни миллатига қараб ажратиш жоҳиллик ва илмсизлик ҳисобланади. Чунки саҳобаи киромларнинг ҳам ораларида турли миллатга мансуб зотлар бор эдилар. Масалан, машҳур саҳобаи киромлардан Салмони Форсий разияллоҳу анҳу форс, Билол Ҳабаший разияллоҳу анҳу ҳабаш миллатига мансуб бўлганлар. Суҳайб Румий разияллоҳу анҳу эса, румлик бўлганлар.

Исломда барча миллат ва элатларнинг тенг ҳуқуқлилиги, мукаррамлик фақат тақвода экани ҳақида Қуръони каримда шундай марҳамат қилинади:

يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ

إِنَّ اللَّهَ عَلِيمٌ خَبِيرٌ

   (سُورَةُ الحُجُرَاتِ/13)

яъни: “Эй инсонлар! Дарҳақиқат, Биз сизларни бир эркак (Одам) ва бир аёл (Ҳавво)дан яратдик ҳамда бир-бирларингиз билан танишишингиз учун сизларни (турли-туман) халқлар ва қабила (элат)лар қилиб қўйдик. Албатта, Аллоҳ наздида (энг азизу) мукаррамроғингиз тақводорроғингиздир. Албатта, Аллоҳ билувчи ва хабардор зотдир” (Ҳужурот сураси, 13-оят).

Демак, биз қайси миллат ва элат вакили бўлишимиздан қатъий назар бир ота-онанинг фарзандлари эканмиз. Мана шу нарсани эсимиздан чиқармаслигимиз лозим.

Суюкли Пайғамбаримиз саллаллоҳу алайҳи васаллам бағрикенгликда ҳам барчага намуна бўлганлар. Қуйида У зотнинг муборак тарихларидан бағрикенгликларига оид баъзи маълумотларни келтирамиз:

• Имом Бухорий ва Имом Муслим келтирган ривоятга кўра, бир яҳудий аёл Расулуллоҳга заҳар солинган қўй гўшти берди. Аёл бу ишини тан олиб, қилмишига иқрор бўлганидан кейин Расуллуллоҳ алайҳиссалом қасос олишга қодир бўла туриб уни кечириб юбордилар. Чунки У зот алайҳиссалом ўзлари учун ўч олмасдилар.
• Уҳуд кунида олд тишлари синиб, юзлари қонга беланди, бу ҳолат саҳобаи киромларга жуда оғир ботди. Ҳатто айримлари: “Уларни дуоибад қилсангиз-чи?” дейишгача бордилар. Шунда У зот:

"إِنَّ اللهَ لَمْ يَبْعَثْنِي طَعَّانًا وَلاَ لَعَّانًا، وَلَكِنْ بَعَثَنِي دَاعِيًا وَرَحْمَةً اَللَّهُمَّ اهْدِ قَوْمِي فَإِنَّهُمْ لاَ يَعْلَمُونَ"

(رواه الإمامُ البيهقي)

яъни: “Мен лаънатловчи қилиб эмас, даъват этувчи ва раҳмат қилиб юборилганман. Ё Аллоҳ! Уларни тўғри йўлга бошла, албатта улар билмайдилар”, –  дедилар (Имом Байҳақий ривоятлари).

Бағрикенгликни қаранкки, шунча озор берган одамлар ҳаққига дуои хайр қиляптилар. Ваҳоланки, дуолари ижобат эди. Нимани сўрасалар Аллоҳ берадиган Зот эдилар.

• Пайғамбаримиз саллаллоҳу алайҳи ва салламнинг олдиларидан жаноза ўтиб қолди. Шунда У зот ўринларидан турдилар. Атрофдагилар бу яҳудий кишининг жанозаси деб айтишди. Шунда Расулуллоҳ саллоллоҳу алайҳи ва саллам:

"أَليسَتْ نَفْسًا"  (رواهُ الإمامُ مسلمٌ  عَن سهل بن حنيف وقيس بن سعد رَضِيَ اللهُ عنهُما).

яъни:  “У инсон эмасми?!” дедилар (Имом Муслим ривоятлари).

    Демак, биз инсонлик ҳурмати сабабли барча билан яхши муносабатда бўлишимиз керак бўлади.

• Расулуллоҳ вафотларидан олдин бир ғайридиндан буғдойни қарзга олиб, гаровга совутларини берганлар. Аслида Расулулллоҳ алайҳиссалом саҳобаи киромлардан ҳам буғдойни сўрасалар бўлар эди. Улар бир пасда муҳайё қилишар эди. Чунки саҳобаи киромлар “Жонимиз фидо, Эй Расулуллоҳ!” – деб турар эдилар. Расулуллоҳнинг мана шу муомалаларини ўзи ҳам биз умматларга катта дарс бўлган. Бир жамиятда, бир маҳаллада нафас олиб турганимиздан кейин, ўзга дин вакиллари билан яхши муомала ва муносабатда бўлишимизга ишора қилганлар.

Демак, биз суюкли Пайғамбаримизга ҳар қадамда эргашишга ҳаракат қилар эканмиз, бағрикенгликда ҳам У зоти шарифдан ўрнак ва андоза олишимиз даркор. Шундай экан, мўмин-мусулмонлар нафақат бир-бирларига балки, ўзга дин вакиларига ҳам яхши муомала ва муносабатда бўлиб, Ислом динини гўзаллигини намоён қилишлари керак.

Тарихдан маълумки, машҳур тобиъинлардан Умар ибн Абдулазиз раҳматуллоҳи алайҳ адолатда “Иккинчи Умар” деган унвонга сазовор бўлганлар. Бу кишини адолатларини васфлашга тил ожизлик қилади. Бунга тарих гувоҳ. Умар ибн Абдулазиз раҳбарлик давларида Сурия пойтахти Дамашқда бир масжид кенгайтириладиган бўлди. Умар ибн Абдулазиздан олдинги халифа масжидни кенгайтириш учун масжид олдидаги насронийлар ибодатхонасининг бир қисмини қўшиб олиш ҳақида қарор қабул қилган экан. Шу қарорга мувофиқ мусулмонлар насронийлар ибодатхонасини бузиб, масжидга қўшмоқчи бўлди. Шунда, насронийлар томонидан Умар ибн Абдулазизга “Бизни ибодатхонамизнинг бир қисмини бузиб, масжидга қўшиб олишмоқчи, деган маънода шикоят хати келди. Шунда Умар ибн Абдулазиз: “Масжидга қўшиш учун қанча жой бузилган бўлса, шуни қайтариб бериб, бузилган жойни қайта қуриб қўйилсин”, деган маънода жавоб хати ёздилар. Дамашқнинг баъзи уламоларига бу ёқмади. Уларниг вакиллари бу қарордан қайтишни илтимос қилиб келишди. Шунда Умар ибн Абдулазиз: “Яхши келдингиз. Мен қарорда бир нарсани ёзишни унутибман. Шуни ёзишимга туртки бўлдингиз, унутган нарсам: қайтариб берадиган куннинг санасини ёзмапман”, – деб, қарорни янгилаб ва мустаҳкамроқ қилиб юбордилар.

Демак, динимиз кўрсатмаларига кўра, бошқа дин вакилларининг ибодатхоналарига тажовуз қилиш йўқ.

Азизлар! Бағрикенглик ва ўзгалар билан яхши муомала ва муносабатда бўлишнинг ҳикмати шуки, халқни бирлиги, ўзаро тинч-тотув, иттифоқ бўлиб яшаш, зиддият ва ихтилофдан қочишдир. Мана шунда, жуда кўп ютуқ ва турли соҳаларда катта марраларга эришилади. 

Исломда бағрикенг бўлишни бир қанча кўринишлари мавжуд бўлиб, қуйида улардан баъзилари баён қилинади:

1. Ислом динимиз олди-сотти ва қарз талаб қилишда ҳам бағрикенг бўлишга чорлайди. Бу ҳақда Пайғамбаримиз саллаллоҳу алайҳи васаллам шундай деганлар:

"رَحِمَ اللَّهُ رَجُلاً سَمْحًا، إِذا بَاعَ، وإِذا اشْتَرَى، وَإِذا اقْتَضَى"

(رواهُ الإمامُ البخاريُّ عن جابرٍ بن عَبْدِ اللهِ رَضِي اللهُ عنه)

яъни: “Сотганда ҳам, олганда ҳам, қарзни талаб қилганда ҳам бағрикенг бўлган кишини Аллоҳ таоло раҳм қилсин!” (Имом Бухорий ривоятлари).

2. Ислом динимиз қийналган кимсадаги ҳақни кечишда бағрикенг бўлишга тарғиб қилади. Бу ҳақда Расулуллоҳ саллаллоҳу алайҳи васаллам шундай марҳамат қилганлар:

"مَنْ سَرَّهُ أَنْ يُنْجِيَهُ اللَّهُ مِنْ كُرَبِ يَوْمِ الْقِيَامَةِ فَلْيُنَفِّسْ عَنْ مُعْسِرٍ أَوْ يَضَعْ عَنْهُ"

(رواهُ الإمامُ مسلمٌ  عَن عَبدِ اللهِ بنِ أبي قَتَادَةَ رَضِيَ اللهُ عنهُ)

яъни: “Аллоҳ таоло Қиёмат кунидаги машаққатлардан қутқариши  кимни хурсанд қилса, камбағал бўлиб қолган қарздордан қарзининг барчасини ёки бир қисмини кечсин!” (Имом Муслим ривоятлари). 

3. Ислом динимиз ҳатто ёмонлик қилган қариндошга ҳам яхшилик қилишга ва силаи раҳмни узаман деган билан силаи раҳмни боғлаш йўлида бағрикенг бўлишга чақиради. Бу ҳақда шундай ривоят келган:

أَنَّ رَجُلًا قَالَ: يَا رَسُولَ اللَّهِ إِنَّ لِي قَرَابَةً أَصِلـُهُمْ وَيَقْطَعُونِي، وَأُحْسِنُ إِلَيْهِمْ وَيُسِيئونَ إِلَىَّ، وَأَحْلُمُ عَنْهُمْ وَيَجْهَلُونَ عَلَىَّ. فَقَالَ:"لَئِنْ كُنْتَ كَمَا قُلْتَ، فَكَأَنَّمَا تُسِفـُّهُمُ الْمَلَّ، وَلاَ يَزَالُ مَعَكَ مِنَ اللَّهِ ظَهِيرٌ عَلَيْهِمْ مَا دُمْتَ عَلَى ذَلِكَ

  (رواهُ الإمامُ مسلمٌ  عَنْ أبي هريرةَ رضِي اللهُ عنه)

яъни: “Бир киши: “Эй Аллоҳнинг Расули! Менинг қариндошларим бор. Мен уларга силаи раҳм қиламан, улар уни узадилар. Мен уларга яхшилик қиламан, улар менга ёмонлик қиладилар. Мен уларга ҳалимлик қиламан, улар менга жоҳиллик қиладилар”, – деди. Шунда Расулуллоҳ алайҳиссалом: “Агар сиз ўзингиз айтганингиздек бўлсангиз, худди уларга иссиқ кулни едираётгандексиз (яъни, яхшилигингизни муқобилига ёмонлик қилишлари билан катта гуноҳ қилаётган бўладилар). Модомики, шу ҳолда бардавом бўлар экансиз, Аллоҳ томонидан сиз билан бирга уларнинг қаршисига бир ёрдамчи бўлади”, – дедилар” (Имом Муслим ривоятлари). 

Бу ҳадиси шарифда қариндошлар ёмонлик қилсалар ҳам, уларга яхшилик қилишда бардавом бўлишга қаттиқ тарғиб бор.

Хулоса шуки, Ислом бу – бағрикенглик дини. Нафақат мусулмонлар ўзаро, балки ўзга дин вакиллари билан ҳам чиройли муносабатда бўлишга чақиради. Мана шуни биз ўзгаларга кўрсатиб, динимиз нақадар гўзал эканини яна бир бор намоён қилайлик! Афсуски, шуни кўрсата олмаяпмиз. Баъзида бошқа дин вакиллари биз мусулмонларни ҳатти-ҳаракатларимизни кўриб, ҳайрон бўлиб, булар қанақа одамлар экан деб қолишига сабабчи бўляпмиз.

Муҳтарам азизлар! Маълумки, инсон умри тугагач унинг дунёдаги сўнги манзилгоҳи қабр ҳисобланади. Ҳозирда масжидиларимизга туташ қабристонларда жума намозига келиш ёки жума намозини адо этиш асносида қабрларни устидан босиб ўтиш ҳолатлари ҳам кузатилмоқда экан. Бу ачинарли ҳолатдир. Шариатимизда вафот этган кишининг ҳурмати, худди тирик инсоннинг ҳурмати каби қаралади. Шунинг учун мўмин-мусулмон киши қабрларни устини босмасдан, белгиланган йўлакларда юриши лозим. Қабрни устини босиб юриш гуноҳ ҳисобланиб, шариатимизда бундан қайтарилгандир. Пайғамбаримиз саллаллоҳу алайҳи васаллам: “Бирор чўғ ёки қилич устида юришим ёҳуд ковушимни кийиб турган ҳолатимда ямашим мен учун бирор қабрни устида юрганимдан яхшироқдир”, деганлар (Имом Ибн Можа ривоятлари).

 Аллоҳ таоло азиз ва мустақил юртимизда яшаётган барча миллат ва элатларни, тинч-тотув, ўзаро ҳурмат ва эътиборда истиқомат қилишларида мададкор бўлиб, она-Ватанимизни турли бало ва офатлардан ҳифзу ҳимоясида сақласин! Омин! 

Ҳурматли имом-домла! Келаси жума маърузаси “Ҳадислардан ҳукм олишга кимлар ҳақли” ҳақида бўлади, иншааллоҳ.