Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Бундан олти йил аввал, 2015 йил, 10 март куни етук аллома, фазилатли шайх Муҳаммад Содиқ Муҳаммад Юсуф раҳимаҳуллоҳ бу фоний дунёдан боқий дунёга рихлат қилганлар.

Шу боис, Аҳмад Муҳаммаднинг «Ҳилол» журнали 8-сонида чоп этилган «Шайх Муҳаммад Содиқ «феномени» мақоласи асосида у зотни ёдга олмоқ, ҳаёт йўллари, ибрат ва ўрнаклари ҳамда буюк меҳнатларини хотирламоқни истадик.

Устоз 2000 йили ватанга қайтганидан сўнг диний илмларни ривожлантириш, халқимизни Ислом асослари билан таништириш йўлидаги самарали ижодни давом эттирдилар. У кишининг «Тафсири Ҳилол», «Ҳадис ва Ҳаёт» асарлари кирмаган хонадон юртимизда қолмади ҳисоб.

«Иймон», «Тасаввуф ҳақида тасаввур», «Ихтилофлар ҳақида», «Дин насиҳатдир», «Шоядки тақводор бўлсак», «Поклик иймондандир», «Сунний ақийдалар», «Кифоя», «Одоблар хазинаси», «Руҳий тарбия», «Бахтиёр оила», «Ижтимоий одоблар», «Зикр аҳлидан сўранг» каби юздан ортиқ китоблари мусулмонларнинг том маънодаги маънавий мулкига айланди. Ҳазратнинг китоблари ёшларни маърифатли қилишда, уларга диний тарбия асосида таълим беришда бебаҳо қўлланма вазифасини бажарди, жамиятда жаҳолат ва ихтилофларга барҳам беришда дастуриламал бўлди.

У киши бошчилигида амалга оширилган «Олтин силсила» туркумидаги тўққиз буюк муҳаддис жамлаган ҳадисларни ўзбек тилига ўгириш, изоҳлар ёзиш ва тўплам ҳолида нашр этиш ҳадис илми борасидаги улкан илмий тадқиқотлардан бўлди.

Шайх ҳазратларининг ўнлаб китоблари рус, қозоқ, қирғиз ва бошқа тилларга ўгирилган. У кишининг илмий-маърифий асарлари ҳатто хорижий давлатлардаги ўқувчиларнинг ҳам қўлига бориб етди. Бундан ташқари интернет тармоғида Шайх раҳбарликларида ташкил этилган islom.uz портали доирасида ўнлаб веб-сайтлар ишлаб турибди.

Шунингдек, шайх ҳазратлари бош бўлиб ташкил қилган, у кишининг фарзандлари Исмоил Муҳаммад Содиқ бошқараётган «Ҳилол-нашр» нашриёт-матбаа мажмуаси бугунги кунда мамлакатимиздаги етакчи нашриётларидан бирига айланди.

Шайх Муҳаммад Содиқ Муҳаммад Юсуф раҳимаҳуллоҳ ўткир ақл-заковати, етук илми, суннатга мувофиқ гўзал ахлоқи ва беназир ҳаёт тарзи, диний маърифат тарқатиш йўлидаги буюк хизматлари билан нафақат Ўзбекистон ёки собиқ Иттифоқ, балки бутун дунёда танилди, жаҳон илм аҳли томонидан тан олинди. 

У кишининг Бутунжаҳон Ислом Робитасининг таъсис мажлиси, Бутунжаҳон мусулмон уламолари кенгаши, Бутунжаҳон Ислом уюшмаси, Бутунжаҳон Тасаввуф уюшмаси, Бутунжаҳон Мусулмон халқлар бошқарувининг Бош котибияти, Бутунжаҳон Даъват уюшмаси, Маккаи Мукаррамадаги Бутунжаҳон мутафаккир уламолари йиғинининг ижроия қўмитаси, Бутунжаҳон Масжидлар уюшмаси, Иорданиядаги Оли Байт муассасасига қарашли Исломий фикрлар академияси каби ўнлаб нуфузли Ислом ташкилотлари ва муассасаларининг аъзоси этиб сайланганининг ўзиёқ фикримизга далил бўла олади.

У Саудия Арабистони, Ўрдун (Иордания) ва Покистондаги бир қатор дорилфунунларнинг фахрий профессори этиб сайланган. Бундан ташқари, у жаҳоннинг турли мамлакатларида ўтган халқаро илмий конференция, анжуман, қурултойлар ишида ҳам фаол иштирок этиб, ҳозирги пайтда Ислом дини ва мусулмонлар олдида турган долзарб муаммолар ва уларнинг ечимлари ҳақида мазмундор маърузалар қилган эди.

У жаҳондаги машҳур Ислом уламолари билан яқин дўст эди, улар билан мунтазам мулоқот қилар, мусулмонларнинг ҳозирги муаммоларини биргаликда муҳокама қилар, фикрий ва ақлий жиҳатдан ўшалар билан бемалол тенглаша оларди. Суриялик атоқли олим шайх Муҳаммад Саид Рамазон Бутий, Бутунжаҳон мусулмон уламолари кенгашининг раиси доктор Юсуф Қарзовий, шу кенгаш Бош котиби доктор Алий Муҳйиддин Қорадоғий, бир неча Ислом фиқҳи академиялари аъзоси доктор Ваҳба Мустафо Зуҳайлий, атоқли ҳанафий фақиҳлардан Муҳаммад Тақий Усмоний, мавританиялик шайх Абдуллоҳ ибн Байя, Шинқитий каби жаҳондаги етакчи уламолар шайх Муҳаммад Содиқнинг ҳамфикр, ҳаммаслак дўстлари эди.

Шайх Муҳаммад Содиқ Муҳаммад Юсуф ҳозирги замондаги ҳақиқий мусулмон олимининг ноёб намунасидир. У шариат илмларини, ижтимоий фанларни чуқур билгани, бой ҳаёт тажрибасига эга бўлгани учун муаммолар туғилган пайтда исломий меъёрларни қўллай биларди.

Муҳаммад Содиқ Муҳаммад Юсуф ҳақиқий олим эди. У билимларни эгаллабгина қолмай, балки унга қатъий амал ҳам қилар эди. У ўзи ишонгани ва таълим бергани каби яшар, яшагани каби ишонар ва таълим берар эди. Шунинг учун унинг сўзлари ҳар бир қалбга етиб борарди. У Ислом сари талпинган ҳар бир инсонни эътиборсиз қолдирмас, иши тўлиб-тошиб ётганига қарамай, унга насиҳат қилиш, алоҳида мактуб ёзиб, уни руҳлантиришга имкон топа оларди. У шу тариқа миллионлаб одамлар қалбида иймон чироқларини ёқа олди, минглаб одамларни ҳидоят сари чорлади. 

Ҳазратдаги вақтни ўта қизғаниш ва соатларни эмас, ҳатто дақиқаларни бефойда ўтказмаслик, инсонни бойлиги, мансаби, шуҳратига қараб эмас, Аллоҳга ихлоси ва муҳаббати учун қадрлаш, ҳар қандай бало ва муаммолар қаршисида довдираб қолмай, «Иншааллоҳ, яхши бўлади», деб хотиржам туриш, бирон кишининг кўнглини оғритмай, озор бермай муомала қилиш фақат у кишигагина хос фазилатлар эди.

«Кўпчилик унинг хизматида бўлаётган киши улуғмас, ўзи кўпчиликнинг хизматида бўлган улуғдир», деган ҳикматли гап бор. Шайх ҳазратнинг ҳаёт йўлларига, Ислом умматининг манфаати йўлида қилган хайрли ишларига холис назар ташлайдиган бўлсак, битта олимнинг мусулмонлар учун қилган хизмати ниҳоятда салмоқли бўлганини сезиш унча қийин эмас. Бугун у кишидан кейин шуни ҳеч иккиланмай айтиш мумкинки, Шайх ҳазратлари қисқагина фаолиятлари давомида унча-мунча жамоалар қилишга улгурмайдиган катта илмий ишларни, тарғиб ва таълим, насиҳат ваъз-иршодларини амалга ошириб кетдилар. 

У кишининг китоблари кирмаган, ваъз-насиҳатлари янграмаган бирорта ўзбек хонадони қолмади ҳисоб. У киши тарқатган илмлардан бебаҳра қолган деярли биронта мусулмонни учратиш қийин.

У кишини нафақат юртимизда, собиқ Иттифоқдаги бошқа ўлкаларда, ҳатто хорижий мамлакатларда ҳам танишар, ҳурмат қилишар, беҳисоб китобларини ўқишар, мавъизаларини тинглашар эди. Шайх ҳазратлари Ислом илмларининг деярли барча соҳаларида китоблар ёзган, мусулмонларнинг барча саволларига жавоб бера оладиган мужаддид олим эди.

У киши асримизнинг том маънодаги буюк олими эди. Бернард Шоу деган инглиз ёзувчисининг «Майда одамлар ичида ҳам буюклари бор, улуғ одамлар ичида ҳам буюклари бор» деган сўзи бор. Шайх Муҳаммад Содиқ кўпчиликнинг хизматига ҳамиша шай, улуғ одамларнинг ҳам буюкларидан эди.

У Мовароуннаҳр халқларининг чинакам диний раҳнамоси, пири муршиди, насиҳатгўйи эди. У кишининг шиори барча китобларида нақш қилинганидай, «Аҳли сунна ва жамоа мазҳаби асосида пок ақида ва мусаффо Исломга интилиш, Қуръон ва Суннатни ўрганиб, унга амал қилиш, исломий маърифат таратиш, салафи солиҳ – улуғ мужтаҳидларга эргашиш, кенгбағирлик ва биродарлик руҳини таратиш, диний саводсизликни тугатиш, ихтилоф ва фирқачиликка барҳам бериш, мутаассиблик ва бидъат-хурофотларни йўқотиш» эди.

Шайх Муҳаммад Содиқ Муҳаммад Юсуф умр бўйи ана шу шиорига содиқ қолди, Аллоҳ розилигини топиш ниятида, дин ғамида фидойилик кўрсатиб яшади.

Аллоҳ таоло у зотни Ўзининг раҳмати, авфи ва карами билан чулғаб олсин, абадий масканларини жаннат боғлари ичра қилсин!

Бобур Аҳмад тайёрлади.

Манба: islom.uz 11.03.2020.

«Ҳилол» журнали 8-сони.

9 март куни Ўзбекистон Республикаси Бош вазирининг ўринбосари – инвестициялар ва ташқи савдо вазири С.Умурзоқовнинг Ислом тараққиёт банки (ИТБ) Бош котиби Гассан ал-Баба билан учрашуви бўлиб ўтди. Унда 2021 йилда Ўзбекистонда ИТБ Бошқарувчилар кенгашининг 46- йиллик йиғилишини ўтказишга тайёргарлик кўриш билан боғлиқ қатор масалалар муҳокама қилинди.

Учрашувда тайёргарлик ишларининг ҳозирги ҳолати, ИТБ ҳамда Ўзбекистон вазирлик ва идораларининг вакилларидан иборат Ташкилий қўмита ва тегишли ишчи гуруҳлар фаолияти кўриб чиқилди.

Халқаро медиа ва оммавий ахборот воситаларида бўлажак учрашувни кенг ёритишга бағишланган “роуд-шоу” ўтказиш учун банк раҳбарияти шу йил май ойида ИТБ президенти Бандар Ҳажарнинг Ўзбекистонга ташрифини ташкил этиш истиқболларини кўриб чиқаётгани ҳақида маълум қилинди.

Тошкентда бўлиб ўтадиган ИТБ Бошқарувчилар кенгашининг мазкур йиғилишида банкка аъзо 57 мамлакат, халқаро ташкилотлар ва молия институтлари, хорижий ишбилармон доиралар ва оммавий ахборот воситаларининг 2 мингга яқин вакили иштирок этиши кутилмоқда. Тадбир Ўзбекистонда амалга оширилаётган ижтимоий-иқтисодий ислоҳотларга кенг жамоатчилик эътиборини жалб этиш, шунингдек, Ўзбекистон Республикаси ижтимоий-иқтисодий сиёсатининг энг муҳим ташаббуслари ИТБ томонидан қўллаб-қувватланишини кенгайтириш ҳамда Ўзбекистонда банкнинг инвестиция портфелини оширишни назарда тутган ҳолда, ИТБ билан ҳамкорлик кўламини кенгайтиришга имкон яратади.

Тошкент ислом институти 4-курс талабаси Асадуллоҳ қори Нуриддинов Имом Ҳафснинг Осим ибн Абун Нажуддан қилган ривояти Шотибия йўли орқали Пайғамбаримиз соллаллоҳу алайҳи васалламга боғланган санади билан ижоза олди.

Ижозани Қуръон қироати бўйича ижоза соҳиби, кафедра мудири Жаҳонгир қори Неъматов берди.

Маълумот учун, 2015 йилда Тошкент Ислом институти тарихида аёл-қизлар ўртасида илк бор Гулруҳ Кенжабек Қуръони каримни бир кунда, бир ўтиришда 16 соат мобайнида тўлиқ ўқиб берган эди. Гулруҳ Кенжабек 2014 йили ўтказилган Республика Қуръон мусобақасининг ҳифз йўналиши ғолибаси ҳисобланади. Шунингдек, Робия Нажмиддинова ва Фотима Абдуллаев ҳам Гулруҳ каби Аллоҳнинг каломини юқоридаги услубда ўқиб берган эди. Йигитлардан эса «Таҳфизул Қуръон» кафедраси талабалари Адҳам қори Отахонов ва Фатҳуллоҳ қори Дадаев ҳам муқаддам Қуръони каримни ёддан тўлиқ ўқиб, устозлар кўригидан ўтказиб олган эди.

Эслатиб ўтамиз, Ўтган йил Тошкент ислом институти 4-курс талабаси Ҳикматуллоҳ Рўзалиев ўттиз пора Қуръони каримни бир кунда, бир ўтиришда 10 соат мобайнида ёддан ўқиб бергани ҳақида хабар берган эдик.

Маълумот ўрнида: Қуръони каримда 114 та сура, 6 236 та оят ва тахминан 1 015 030 нуқта, белги, 323 670 ҳарф ва 77 934 та сўз бор. Қуръон саҳифаланишига кўра 30 пора (жуз, қисм)дан иборат бўлиб, мусҳафнинг ҳар 10 вароғи бир пора ҳисобланади.

Ўзбекистон мусулмонлари идораси матбуот хизмати

Чирчиқ шаҳридаги “Марказий” жоме масжидида жисмоний имконияти чекланган инсонлар учун “Сиз бизга кераксиз!” шиори остида тадбир ўтказилди. Унда Ўзбекистон мусулмонлари идораси мутахассиси М.Абубакирова, Тошкент шаҳар тарғибот гуруҳи раҳбари Д.Аҳмедова, имом-хатиблар, отинойилар, уч нафар сурдо таржимони ва 175 нафар жисмоний имконияти чекланган юртдошларимиз қатнашди.

Тадбирни Чирчиқ шаҳар бош имом-хатиби Обиджон домла Мирҳамидов кириш сўзи билан очиб берди.

– Бугун мамлакатимизда жисмоний имконияти чекланган фуқароларга эътибор ҳар қачонгидан ҳам кучайган, – дейди Ўзбекистон мусулмонлари идораси мутахассиси Мунира Абубакирова. – Айниқса, уларни турли ёт ғоялардан ҳимоялаш долзарб аҳамият касб этмоқда. Шундан келиб чиқиб, бундай юртошларимизга меҳр қўлларимизни чўзиб, уларнинг маънавиятини юксалтириш, маърифатини оширишга интиляпмиз.

Тошкент шаҳар тарғибот гуруҳи раҳбари Д.Аҳмедова жисмоний имконияти чекланган фуқароларнинг ҳуқуқлари ва қонуний манфаатлари нималардан иборат экани, улар уй-жой, пенсия, соғлиқни сақлаш масалаларида қайси ташкилотларга қандай мурожаат қилиши кераклиги ҳақида тушунчалар берди.

Тадбирда имконияти чекланганларга “Сиз бизга кераксиз!” видеоролиги намойиш этилди.

Йиғилиш сўнгида имконияти чекланганларга “Вақф” хайрия жамоат фонди Тошкент вилояти филиали томонидан озиқ-овқат маҳсулотлари тарқатилди.

Тошкент вилояти вакиллиги
ахборот хизмати

Швейцариядаги йирик сайёҳлик нашрлардан бири - «Imagine Magazin» журналида Ўзбекистон тарихий шаҳарлари ва қадимий обидаларига бағишланган «Ўзбекистон – Буюк ипак йўлидаги орзулар макони» (Usbekistan – Die Traumdestination an der Seidenstraße) сарлавҳали мақола чоп этилди, деб хабар бермоқда «Дунё» АА.

Журналист Урс Хубшер қаламига мансуб ва ранг-баранг фотосуратлар билан безатилган мазкур мақолада аксарият европалик сайёҳлар учун кўп қирралари очилмаган Ўзбекистон, унда Шарқ ва Ғарб маданиятларининг мужассамлиги хорижликлар қизиқишини ўзига жалб этиши баён этилган.

«Ўзбекистон – турли хил маданиятлар кесишган ва янгича саёҳатдан гашт олишга иштиёқманд туристлар учун жозибадор юрт», - деб таъкидланган мақолада.

Ўз навбатида, мақолада шарқона анъаналар, бетакрор табиат ва бой маданиятга эга Ўзбекистонга саёҳат қилиш учун виза лозим эмаслиги, ҳозирги пандемия шароитида эса коронавирусга тест топширган ҳолда юртимизга ташриф буюриш мумкинлиги бўйича маълумот берилган.

«Ўзбекистон асрлар давомида сайёҳлар учун қизиқарли макон бўлиб келмоқда. Иқлимий ўзига хослигини инобатга олиб, мазкур диёрга саёҳат қилиш учун энг қулай давр март ойидан май ойининг охиригача ёки сентябрдан ноябрь ойининг ўртасигача эканини айтиш керак. Ўз навбатида, жорий йилнинг 4 мартидан бошлаб Франкфурт-Майндан Тошкентга тўғридан-тўғри парвозлар қайта тикланди”, - деб ёзади муаллиф.

Мақолада, шунингдек, юртимиз, унинг тарихий аҳамияти, қадимий шаҳарлари ва маданий обидаларининг Буюк ипак йўлидаги «фавқулодда контрастга бой хазина» экани таъкидланиб, ЮНЕСКО ва бошқа халқаро ташкилотларнинг эътирофи ва доимий диққатига сазоворлиги эслатиб ўтилган.

Нашрда Самарқанд шаҳри, унинг бетакрор тарихий ёдгорликлари, Регистон ансамблига алоҳида эътибор қаратилган. «Регистон майдони ўзида учта катта мадрасани бирлаштирган ҳамда Марказий Осиёнинг энг гўзал ва маҳобатли меъморий ансамблидир», деб қайд этилади материалда.

Германиялик журналист, шунингдек, Ўзбекистондаги сайёҳлик йўналишлари ҳақида ҳам маълумотлар бериб, тарихий шаҳарлар билан танишишдан ташқари қишки спорт ёки экстримал туризм учун ҳам кенг имкониятлар яратилганлиги, ўзбек ошхонасининг ажойиблиги тўғрисида маълумотлар тақдим этади.

«Денгиз сатҳидан 2000 метр баландликда жойлашган замонавий тоғ-чанғи масканлари нафақат профессионал спортчиларга, балки ҳаваскорлар учун ҳам кенг имкониятлар тақдим этади... Ўзбек ошхонаси турли такрорланмас таъм билан ҳар қандай хорижликни лол қолдириши аниқ. Бунинг исботи сифатида ушбу диёрнинг овқатлари ва меҳмондўстлиги доимо тан олинишини кўрсатиш мумкин», дейди «Imagine Magazin» журнали.
Ўзбекистонликлар ўзларининг тарих билан мужассамлашган замонавий анъаналаридан фахрланиши, юртимизда хорижлик сайёҳлар учун барча қулайлик ва шарт-шароитлар яратилганлиги, йилдан йилга сайёҳлар сони ортиб бораётгани таъкидланган.

«Шарқ ва Ғарб ўртасида кўприк сифатида сўнгги йилларда Ўзбекистонга ташриф буюрувчилар сони кескин ошди. 2012 йилда мамлакатга 2 миллионга яқин хорижлик сайёҳ келган бўлса 2019 йил якунида ушбу рақам 6,7 миллион кишини ташкил этди», - деб хулоса қилади Урс Хубшер.

Ўзбекистон мусулмонлари идораси матбуот хизмати