Тошкент ислом институти 4-курс талабаси Фозил қори Акромов, 1-курс талабалари Сайдуллоҳ қори Солижонов ва Сирожиддин қори Жалилов 30 пора Қуръони каримни бир кунда, бир ўтиришда ёддан ўқиб берди.

Қуръони каримни ўқиш жараёнини Таҳфизул Қуръон кафедраси ўқитувчилари Жаҳонгир қори Неъматов, Зафар қори Маҳмудов, Абдулбосит қори Қобилов, Яҳё қори Абдураҳмонов, Жаҳонгир қори Рўзиев, Исломхон қори Убайдуллаев, Адҳам қори Юсупов, Содиқжон қори Қурбонов ва бошқа устоз ҳамда талабалар кузатиб бордилар.

Хатм якунида Таҳфизул Қуръон кафедраси мудири Жаҳонгир қори Неъматов Олий Маъҳадда анъанага айланаётган ушбу тадбирнинг аҳамияти тўғрисида маълумот берди.

Фозил қори, Сайдуллоҳ қори, Сирожиддин қори ҳамда уларнинг устозларига ТИИ ректори Уйғун домла Ғафуров ташаккурлар билдириб, мана шундай етук қориларни етиштириб чиқаришда ғайрат ва шижоат тилади. Таҳфизул Қуръон кафедраси ўқитувчиси, Шайх Зайниддин жоме масжиди имом-хатиби Яҳё домла Абдураҳмонов ҳам сўзга чиқиб, қорилардаги ва уларнинг устозларидаги шижоат ва ҳимматга Алоҳдан барака сўради, бу каби меҳнатлар икки дунёда улкан ажру мукофотларга эриштиришини таъкидлади.

ТИИ ректори Уйғун домла Ғафуров, Ўқув ишлари бўйича проректор Ёқубжон Бухарбаев, Ёшлар масалалари ва маънавий-маърифий ишлар бўйича проректор Умиджон Ходжаев, “Қуръони карим ва тажвид” ўқув курси бўлими бошлиғи Жаҳонгир қори Рўзиев, Тафҳизул Қуръон кафедраси мудири Жаҳонгир қори Неъматов, кафедра ўқитувчилари Яҳё қори Абдураҳмонов, Аҳмадхон қори Рашидов, Зафар қори Маҳмудов, Исломхон қори Убайдуллаев, Абдулбосит қори Қобилов, Адҳам қори Юсупов, Содиқжон қори Қурбонов ва барча иштирокчилар биргаликда Қуръони карим хатми дуоси баробарида қори устозлар ҳамда Фозил қори, Сирожиддин қори, Сайдуллоҳ қори ҳақига дуолар қилдилар, Аллоҳдан юртимизга хайр-барака ва офият сўрадилар.

Фозил қорига ректор Уйғун домла Ғафуров, Сирожиддин қорига, проректор Умиджон домла Ходжаев, Сайдуллоҳ қорига проректор Ёқубжон домла Бухарбаев Олий маъҳад жамоаси номидан 3 та ноутбукни ҳадя сифатида топширди.

Шунингдек, қориларни тадқирлаш мақсадида Қуръон мухлислари сифатида “Vip brand” кийим дўкони томонидан тақдим қилинган ваучерларни Яҳё домла Абдураҳмонов қориларга топширди. Қорилар ҳамда ота-оналари мазкур дўкон филиалларига исталган вақтда ташриф буюриб, ўзларига мос кийимларни танлаб олишлари мумкин бўлади. Чунки фарзандларни қори бўлиб етишишида устозлар билан бир қаторда ота-оналарнинг ихлоси ва ҳиммати биринчи ўринда туради. Албатта, қориларнинг ота-оналар ҳам мукофотларга энг лойиқ инсонлардир.

Таҳфизул Қуръон кафедраси қори устозларининг тинимсиз меҳнатлари эвазига Тошкент ислом институтида Қуръони каримни бир кунда тўлиқ ўқиб бериш анъанага айланди. Айни пайтгача Қуръони каримни бир кунда ўқиб берган қори талабалар сони 30 нафарга етди.

Эслатиб ўтамиз, 2014 йилда Тошкент Ислом институти тарихида илк бор Ихтиёр қори Абдураҳманов Қуръони каримни бир кунда, бир ўтиришда тўлиқ ўқиб берган эди. Шунингдек, Илҳом қори Ғофуров, Адҳам қори Отахонов, Фатҳуллоҳ қори Дадаев, Аҳмадуллоҳ қори Ғофуржанов, Ҳикматуллоҳ қори Рўзалиев, Сардорбек қори Жиямуратов, Сирожиддин қори Шодмонов, Азимжон қори Мадаминжонов, Илёсбек қори Шарофиддинов, Нуриллоҳ қори Сайдуллаев, Оятуллоҳ қори Абдуқодиров, Абдуллоҳ қори Комилов, Саидбурхон қори Фазлиддинов, Абдулҳай қори Жўрақулов, Аҳлиддин қори Қурбонов ва Нурисломхўжа қори Умбаров, Убайдуллоҳ қори Ҳабибуллаев, Баҳодир қори Иброҳимов ва Машрабжон қори Абдураззоқхўжаев Қуръони каримни ёддан тўлиқ ўқиб, устозлар кўригидан ўтказиб олган эди.

Шунингдек, аёл-қизлардан Робия Нажмиддинова, Гулруҳ Кенжабек қизи, Мираҳмадова Ҳуснора, Маҳаматханова Мухлиса, Қурбанова Хадича ва Абдуллаев Фотима ҳам Аллоҳнинг каломини юқоридаги услубда ўқиб берган эди.

Маълумот: Қуръони каримда 114 та сура, 6236 та оят ва тахминан 1015030 нуқта, белги, 323670 ҳарф ва 77934 та сўз бор. Қуръон саҳифаланишига кўра 30 пора (жуз, қисм)дан иборат бўлиб, мусҳафнинг ҳар 10 вароғи бир пора ҳисобланади.

ТИИ Таҳфизул Қуръон кафедраси ўқитувчиси

Зафар қори Маҳмудов

Ўзбекистон мусулмонлари идораси Матбуот хизмати

Ўзбекистон мусулмонлари идораси Матбуот хизмати

Ғолиб домла Очилов
Вобкент тумани "Хожа Маҳмуд Анжир Фағнавий" жоме масжиди имом - хатиби

Марокаш подшоҳлигининг Работ шаҳрида Таълим, фан ва маданият масалалари бўйича Ислом ташкилоти (ICESCO)нинг халқаро конференцияси бўлиб ўтмоқда.
Мазкур нуфузли анжуманда Ўзбекистон халқаро ислом академияси ректори Музаффар Комилов ҳам иштирок этмоқда, дея хабар бердиа Aкадемия Aхборот хизмати. Конференция “Мусулмон дунёсида тараққиётнинг стратегик индикаторлари: Билим индикатори модел сифатида” мавзусидаги 1-маслаҳатлашув учрашуви билан ўз ишини бошлади.

Очилиш сессиясида ICESCO Бош директори Салим ал-Маликнинг мурожаати тингланди. Ўз навбатида Муҳаммад ал-Мактум фонди ижрочи директори, профессор Жамал бин Ҳувайреб, ҳамда UNDP бош техник маслаҳатчиси ва билим лойиҳаси директори Хани Турки анжуман иштирокчиларига мурожаат йўлади.

Шундан сўнг “Билим жамиятларини қуриш ва баҳолашни муҳокама этишнинг энг муҳим муаммолари бўйича” сессияси ўтказилди.
Расмий тадбирлардан сўнг Пайғамбаримиз саллаллоҳу алайҳи васалламнинг сийрати ва ислом цивилизацияси халқаро кўргазмаси ва музейига ташриф ташкил этилди.
Таъкидлаш жоизки, ташкилот 1979-йилда ташкил топган бўлиб, бош қароргоҳи Марокаш давлати пойтахти Работ шаҳрида жойлашган. Ташкилот томонидан аъзо давлатлар ўртасида таълим, фан, маданият ва коммуникация соҳаларида ҳамкорликни мустаҳкамлаш, халқлар ҳамда динлар ўртасида дўстона муносабатларни ўрнатишга муҳим эътибор қаратиб келинмоқда. Ислом олами ва дунё тамаддуни ривожида Ўзбекистон Республикасининг ўрни беқиёс бўлгани боис ICESCO ташкилоти билан ўзаро ҳамкорлик алоқалари ривожланиб бормоқда.

Ўзбекистон мусулмонлари идораси матбуот хизмати