muslim.uz
Америкалик мутахассислар туризмни ривожлантиришга ёрдам беради
АҚШнинг Смитсон институти экспертлари Ўзбекистондаги туризм саноати ҳолатини ўрганиб, унинг кейинги ривожланишига доир тавсиялар беришади. Туризмни ривожлантириш давлат қўмитаси матбуот анжуманида шу ҳақида хабар берилган эди.
Мутахассислар асосий эътиборни Тошкент ва Хивага қаратишади. Улар бу ерларда қатор илмий-тадқиқот ишларини олиб боришади ва кўрсатилган шаҳарлардаги туристик инфратузилмани яхшилашга доир тавсияларни тайёрлашади. Мазкур лойиҳа Европа тикланиш ва тараққиёт банки (ЕТТБ) томонидан молиялаштирилади.
Институт делегацияси 15 январга қадар Маданият вазирлиги, Иқтисодиёт вазирлиги, Ташқи ишлар вазирлиги, Хусусий туристик агентликлар ассоциацияси, музейлар ва таълим муассасаларида учрашувлар ўтказади.
Смитсон институти таълим ва илмий тадқиқот тизимида фаолият юритади, унинг таркибидаги музей комплекси эса дунёдаги энг йирик экспонатлар, музей қимматбаҳо буюмлари ва артефактлар сақланувчи жой ҳисобланади.
Институт Ўзбекистоннинг кутубхоналари билан узвий алоқалар ўрнатган. 2011 йилдан бошлаб республикага қатор экспертлар ва тадқиқотчиларнинг ташрифи амалга оширилган ва санъат, меъморчилик ҳамда қадимий қўлёзмаларни сақлаш ва қайта тиклашга доир тавсиялар берилган.
Маълумотларга кўра, Смитсон институти музейлар сақловчисида Ўзбекистоннинг маданий ва цивилизацион мероси билан боғлиқ 1500дан ортиқ артефакт ва экспонат мавжуд. Бу объектлар институтнинг Осиё санъати музейларида намойиш этилади.
ЎМИ Матбуот хизмати
Малайзия ва Индонезия зиёратчилари Ҳаждан олдин Ўзбекистонга келади
15 январь куни Ўзбекистон Миллий матбуот марказида “Ўзбекистонда туризмни ривожлантириш истиқболлари ва унинг мамлакат иқтисодиётидаги аҳамияти” мавзусида матбуот анжумани ташкил этилди. Президент матбуот хизмати томонидан ташкил этилган навбатдаги Пресс Ҳоллда Туризмни ривожлантириш қўмитаси раиси Азиз Абдуҳакимов соҳа олдида турган режалар ҳақида маълумот бериб, журналистларнинг саволларига жавоб қайтарди. Бу ҳақда “kun.uz” нашри маълумот берди.
Қўмита раисининг маълум қилишича, Малайзия ва Индонезия зиёратчилари Ҳаждан олдин Ўзбекистонга келиши учун тўғридан-тўғри авиарейс ташкил этилади.
“Ўзбекистонда “Зиёрат туризми” ривожлантирилади. Бунда Малайзия ва Индонезия сайёҳларини жалб этиш мумкин.
Масалан, Малайзияда ҳозирда ҳажга бориш навбатини 42 йил кутишга тўғри келади. Индонезияда эса ўрта ҳисобда ойига 100 мингга яқин киши Туркия орқали Умрага қатнамоқда.
Ўзбекистон улар учун транзит вазифасини ўташи мумкин. Бизда ушбу икки давлат аҳолиси учун ҳам муқаддас бўлган Ал-Бухорий, Ал-Мотуридий зиёратгоҳлари бор. Бизнинг тариқатимиз ҳам улар учун маъқул келади.
Шундан келиб чиқиб, Малайзия ва Индонезия ҳожилари Маккага бориш йўлида Ўзбекистонда бир ҳафта вақтни ўтказиши мумкин.
Кўп иш олиб боришимиз керак. Ташриф буюрувчилар учун шароитлар яратилиши лозим. Бунинг учун бизнинг қўмитамиз томонидан тегишли стандартлар ишлаб чиқилиб, 2018 йилдан бошлаб меҳмонхоналарнинг 10 фоиз хонасида Қуръони карим китоби бўлиши, 30 фоиз хонасида қиблани кўрсатувчи белгилар қўйилиши керак.
Бундан ташқари, улар учун кўплаб турларни яратишимиз керак. Бу борада бизнинг туристик операторларимиз Малайзия ва Индонезия компаниялари билан ҳамкорлик ўрнатмоқда. Менимча, февраль-март ойларидан бошлаб тўғридан-тўғри Жакарта-Самарқанд-Жидда авиарейси ҳам йўлга қўйилади. Бу эса юқорида айтилган режалар амалга оширилишига имкон яратади.
Зиёрат туризми ҳақида гапирганда фақатгина мусулмон давлатлардан келувчи сайёҳлар ҳақида ўйлашимиз керак эмас. Исроилдан Жануби-Шарқий Осиё мамлакатларига саёҳат қилаётгани минглаб исроилликлар Ўзбекистон аэропортларидан транзит сифатида фойдаланмоқда. Ҳозирги кунда икки мингга яқин сайёҳ транзит қилиб Ўзбекистондан ўтмоқда, лекин улардан бирортаси бу ерда вақтини ўтказмайди. Бу оқимни 10 мингтага ошириш учун исроилликларга қисқа муддатли визалар бериб, транзит вақтида улар Ўзбекистонда камида 3 кун қолиши учун ишлар олиб борилмоқда.
Ўзбекистон жанубидаги Сурхондарё вилоятида буддизмга алоқадор кўплаб обидалари бор. Шунинг учун, ҳозирги кунда Япония, Корея, Хитой давлатларидан катта қизиқиш билдиришмоқда ва бир неча лойиҳаларни амалга ошириш кўзда тутилмоқда. Бунинг учун, у ердаги обидаларни ва меҳмонхоналарни тартибга келтиришимиз керак”, деган Азиз Абдуҳакимов.
ЎМИ Матбуот хизмати
Матбуот ва ахборот агентлиги янги лойиҳа ҳақида эълон қилди
Матбуот ва ахборот агентлиги Ўзбекистонда туғилиб, камол топган ва ислом дини ривожига, шунингдек, бутун башарият маънавий камолотига улкан ҳисса қўшган буюк бобокалонларимиз, хусусан, ҳадис илмининг султони Имом ал -Бухорий, Имом ат-Термизий, Абдухолиқ Ғиждувоний, Баҳовуддин Нақшбанд, Имом Мотуридий, Абул Муин Насафий каби улуғ зотларнинг ўлмас илмий-маърифий мероси, ибратли ҳаётини ва уларнинг инсон сифатидаги бадиий мукаммал образларини ҳаққоний гавдалантирувчи романларнинг яратилишига ҳисса қўшиш, муқаддас ислом динининг асл моҳиятини, унинг ривожида бобокалонларимизнинг улкан хизматларини аҳоли, айниқса, ёшлар орасида кенг ёритиш, шу билан бирга, адибларимиз, исломшунос олимлар ҳамда ёш тадқиқотчиларимизни маънавий ва моддий жиҳатдан қўллаб-қувватлаш мақсадида “Ислом цивилизациясининг буюк алломалари” мавзуида бадиий асарлар яратиш бўйича ижтимоий буюртмалар лойиҳасини эълон қилди.
Ижтимоий буюртмалар бўйича яратиладиган ижодий ишлар учун қуйидаги талаблар кўзда тутилган:
– муқаддас ислом динининг софлигини таъминлаш, унинг ривожи ва маънавий қадрини юксалтиришда ўзларининг ўчмас номларини қолдирган буюк бобокалонларимиз – ҳадис илмининг султони Имом ал-Бухорий, Имом ат- Термизий, Абдухолиқ Ғиждувоний, Баҳовиддин Нақшбанд, Имом Мотуридий, Абул Муин Насафий каби улуғ зотларнинг ўлмас илмий-маърифий мероси, ибратли ҳаётини ва уларнинг инсон сифатидаги бадиий мукаммал образларини юксак бадиий воситалар билан акс эттирувчи романлар яратиш;
– буюк алломаларимизнинг бадиий тимсолларини яратиш билан бирга ислом динининг бугунги жаҳон ҳамжамиятидаги ўрнининг муҳимлиги, инсониятни ташвишга солаётган глобал муаммоларни ҳал этишда исломий бағрикенглик ғояларининг аҳамиятини очиб бериш;
– ислом ҳар соҳада меъёр ва мувозанатга риоя қилувчи дин экани, унинг моҳияти – инсонга ғамхўрлик, бағрикенглик, ҳукмлари – адолат, воқелиги –халқпарварлик, зоҳири – илғор маданият экани;
– ислом оламида кечаётган мураккаб ижимоий-сиёсий жараёнларнинг асл мазмун ва моҳияти, келиб чиқиши ва оқибатларини теран таҳлил этувчи ҳамда турли ғаразли ва бугунги террорчилик ҳолатларини ислом дини билан боғлаётган бузғунчи кучларга қарши курашга чорловчи;
– ислом тинчлик дини экани ва у моҳиятан терроризмга мутлақо зидлиги, миллий тарбиянинг шарқона хусусияти, диний таълим тизимидаги ўзига хос тамойилларни очиб берувчи;
– дунёнинг турли бурчакларида содир бўлаётган бузғунчилик ва хунрезликлар исломдан эмаслигини тарихимиздаги алломалар ҳаётидан келтирилган турли воқеалар, вазиятларга муносабатлар асосида далиллаб берадиган;
– ўз даврида буюк бобокалонларимизнинг диний мутаассиблик, адашган оқимларнинг пуч даъволарига берган раддиялари, динимиз таълимотларини нотўғри талқин қилувчиларга жавобларини бугунги кун билан боғлаган ҳолда қизиқарли талқин этувчи;
– муқаддас динимизнинг асл моҳиятини англаш – айрим ёшларнинг ислом ниқобидаги бузғунчи ғоялар, экстремизм, терроризм гирдобига кириб, бузғунчи ғояларга алданиб қолишига қарши курашишида ўта муҳим омил экани;
– ислом дини бағрикенглик тамойиллари билан ҳамиша халқлар ўртасида дўстлик, тинчлик-тотувлик ва ҳамкорликка чақириб келганини, ҳар қандай фитна ва урушларга барҳам берганини бадиий образлар воситасида очиб берадиган асарлар яратиш шулар жумласидандир.
Буюртма берилган китоблар Агентлик тизимидаги нашриётлар қошида таниқли адиблар, исломшунослар, диний арбоблар ҳамда тарихчи олимлардан иборат нуфузли ҳайъат томонидан баҳоланиб, нашриётларнинг ижтимоий грантлари асосида чоп этилади ва муаллифларга белгиланган тартибда қалам ҳақи берилади.
Нашриётлар ва муаллифлар ўртасида тузиладиган шартномада ижтимоий грантлар асосида яратиладиган китоб учун қалам ҳақининг маълум қисмини олдиндан тўлаш ҳам кўзда тутилади.
Лойиҳада иштирок этишни хоҳловчилар диққатига!
Ижтимоий буюртмалар лойиҳасининг ташкилий ва ижодий жиҳатлари юзасидан Агентлик тизимидаги нашриётларга бевосита мурожаат қилишингиз ҳамда улар билан олдиндан шартнома тузиш тартибида лойиҳани бажаришга киришишингиз мумкин!
Агентлик тизимидаги нашриёт-матбаа ижодий уйларининг манзиллари:
- “Ўзбекистон” НМИУ – 100011, Тошкент, Навоий кўчаси, 30-уй.
Тел.: (0371) 244-87-55, 244-87-20. Факс: (0371) 244-37-81, 244-38-10; - “Ўқитувчи” НМИУ – 100206, Тошкент, Янгишаҳар кўчаси, 1-уй.
Тел.:(0371) 224-10-77, 224-05-49.Факс: (0371) 224-05-61; - Чўлпон номидаги НМИУ – 10011, Тошкент, Навоий кўчаси, 30-уй. Тел.:(0371) 244-10-45. Факс: (0371) 244-58-55;
- “Ўзбекистон Миллий энциклопедияси” Давлат илмий нашриёти – 100011, Тошкент, Навоий кўчаси, 30-уй. Тел.: (0371) 244-34-38, 244-60-75, 244-07-47. Факс: (0371) 244-24-91;
- Ғафур Ғулом номидаги НМИУ – 100128, Тошкент, Лабзак кўчаси, 86-уй. Тел.: (0371) 241-19-28, 241-18-96. Факс: (0371) 241-82-69.
ЎМИ Матбуот хизмати
Ўзбекистон Ҳаж делегацияси Саудия Арабистонига сафарини бошлади
Кеча, 16 январь куни Ўзбекистон Ҳаж делегацияси Саудия Арабистони Подшоҳлигига жўнаб кетди. Саудия Арабистони Подшоҳлиги Ҳаж ишлари вазири Солиҳ Бантин таклифига асосан “Ҳаж–2018” мавсумининг ташкилий ишларини келишиб олиш мақсадида, Вазирлар Маҳкамаси ҳузуридаги Дин ишлари бўйича қўмита раиси ўринбосари Ўткирбек Ҳасанбоев, Ўзбекистон мусулмонлари идораси раиси ўринбосари Иброҳим Иномов, Таълим ва кадрлар тайёрлаш бўлими мудири Жалолиддин Нуриддинов ва Тошкент ислом университети халқаро алоқалар бўлими бошлиғи Ҳамидбек Ҳасановдан иборат делегация кеча Жидда шаҳрига етиб боришди.
Сафар давомида Ўзбекистон ҳаж делегацияси билан Саудия Арабистони Ҳаж ишлари вазирлиги ва мутасадди ташкилотлар ўртасида “Ҳаж–2018” мавсумининг ташкилий ишлари муҳокама қилинади. Шу йўналишларда, Саудия Арабистонининг Макка, Мадина ва Жидда шаҳарларида жорий йил Ҳаж мавсумида Ватанимиз ҳожиларига хизмат қилувчи идоралар ва муассасалар раҳбарлари билан ҳужжатлар имзоланиши режалаштирилган.
Бизни кузатишда давом этинг, ушбу сафар жараёнлари, янгиликлар ва ўзгаришлар ҳақида батафсил ёритиб борамиз.
Ўзбекистон мусулмонлари идораси Матбуот хизмати
Қуръон мусобақаси Сирдарёда давом этади
Қуръон мусобақаси Сирдарёда давом этади
Бугун, 17 январь куни Қуръон мусобақасининг ҳудудий босқичи Сирдарё вилоятида давом этади. Гулистон шаҳридаги “Осиё” кошонасида давом этаётган мусобақа ўзининг энг юқори босқичига кўтарилмоқда. Ушбу ҳудуддаги хушхон ҳофизи каломуллоҳлар, ёқимли қироатлари билан бугун чиқишларини давом эттиришади. Якунда ҳудудий босқичнинг мутлақ ғолиблари эълон қилинади ва уларга тантанали равишда Ўзбекистон мусулмонлари идорасининг дипломи ва қимматбаҳо совғалар топширилади.
Бизни кузатишда давом этинг, ушбу вилоятдаги ҳудудий босқич жараёнлари бир соатдан кейин онлайн ёритиб борилади.
Ўзбекистон мусулмонлари идораси Матбуот хизмати
Янгиликлар
