muslim.uz
Енгил, аммо савоби улуғ амаллар
– Абу Барза Асламий айтадилар: Ё Расулуллоҳ! Мени жаннатга киритадиган амалга далолат қилинг, – дедим.
У зот соллаллоҳу алайҳи васаллам: “Одамлар йўлидаги озор берувчи нарсани олиб ташла”, дедилар.
– Абу Ҳурайра розияллоҳу анҳудан ривоят қилинади. Набий соллаллоҳу алайҳи васаллам: “Бир одам йўлда ётган тиконнинг олдидан ўтиб қолди. “Албатта, мана шу тиконни олиб ташлайман, бир мусулмон одамга зарар бермасин”, деди. Шунда унинг гуноҳлари мағфират қилинди”, дедилар.
– Набий соллаллоҳу алайҳи ва саллам: “Қачон икки мусулмон учрашиб, қўл олиб сўрашсалар, Аллоҳга ҳамд ва У зотга истиғфор айтсалар, икковлари мағфират қилинади”, дедилар (Имом Абу Довуд ривояти).
– Кимки қилмишига пушаймон бўлиб, узр сўраган одамни кечириб юборса, унинг хатоларини ҳам Аллоҳ таоло қиёмат куни кечиради.
– Манзилни сўраганга йўл кўрсатиш ҳам яхшиликдир.
– Дўзахдан яримта хурмо садақа қилиб бўлса ҳам сақланинглар! Агар бунга ҳам қодир бўлмасангиз ширин сўз билан сақланинг.
– Ҳалол касбдан чарчаб ухлаган одам гуноҳлари кечирилган ҳолда тунайди.
– Касал кўргани борувчи одам гўё жаннат боғида юргандек бўлади.
– Кимки дуоларим ижобат бўлсин, ташвишларим бошимдан арисин деса, камбағаллар ҳолидан хабар олсин.
– Кимки кўзи ожиз одамни қирқ қадам етаклаган бўлса, унинг жаннатга кириши муқаррардир.
– Садақа сув оловни ўчирганидек хатони (гуноҳни) ўчиради.
Муҳаммад ал-Хоразмий номидаги ихтисослаштирилган мактаб ўқувчиси
Жаҳонгир ШАМСУТДИНОВ
Япон мусулмонлари Ҳажда ўрнак кўрсатишди
Японияликларни бутун дунё ўзининг тартиблилиги, қоидаларга сўзсиз амал қилиши, бошқаларга ўрнак бўлиш жиҳатлари билан билади.
Россия Федерациясида ўтказилган футбол бўйича Жаҳон чемпионатида япониялик футболчиларнинг ва футбол мухлисларининг трибуналар ва кийиниш хоналарида ўзларидан кейин тозалаш ишларини олиб борганлари, майдонни шунчаки тарк этмасдан ўриндиқлар атрофидаги чиқиндиларни тозалаган ҳолда чиққанлари бутун дунё футбол мухлисларининг эътирофига сазовор бўлди. Буни миллиардлаб инсонлар кузатдилар.
Мусулмон аҳоли сони кўпчиликни ташкил этмасада Ислом динига эътиқод қилувчилар ва Японияга ҳалол туризм мақсадида ташриф буюрувчилар сони бугунги кунда ошиб бормоқда.
Ҳаж мавсумида Саудия Арабистонига Аллоҳ таоло буюрган фарзларидан бирини адо этиш учун борган япониялик мусулмон жуфтлик тасвирга олинган видеолавҳа яна миллионлар олқишига сазовор бўлди. Уч кунда қарийб 2 миллион марта кўрилган ушбу лавҳада Ҳаж амалларидан бирини бажариш учун Жаморот водийсига кетаётган кишиларнинг йўлда учраган чиқиндиларни йиғиб бораётганлари ва елим халтани белгиланган жойга қадар олиб кетаётганлари акс этган.
Ушбу видеолавҳа 2017 йилдаги Ҳаж мавсумида тасвирга олинган бўлиши мумкинлиги айтилган.
Ҳаж ибодати давомида гуноҳ қилмаган, фаҳш сўзлар айтмаган ҳожи, онадан янги туғилгандек гуноҳларидан пок бўлади. Абу Ҳурайра (розияллоҳу анҳу)дан ривоят қилинади. Расулуллоҳ (соллаллоҳу алайҳи ва саллам) бундай деганлар:
من حج البيت ولم يرفث ولم يفسق خرج من ذنوبه كيوم ولدته أمه
«Ким Байтуллоҳни ҳаж қилса, (унда) ахлоқсиз сўзларни гапирмаса ва фисқ-фужур ишларни қилмаса, худди онаси уни туққан кундаги каби (барча) гуноҳлардан покланиб қайтади» (Имом Бухорий ва Муслим ривояти).
Қуйидаги видеолавҳада япониялик зиёратчиларнинг барча мўмин-мусулмонларга ўрнак бўладиган амаллари ҳақида маълумот келтирилган.
https://www.facebook.com/azmiam/videos/10216386064185044/?t=36
ЎМИ Матбуот хизмати
Мазҳабимизга доир ноёб китоб нашрдан чиқди
Қуръони Карим маъноларини илк марта аслиятдан ўзбек тилига таржима қилиб халқимизга тақдим этган шайх Алоуддин Мансур томонидан таржима ва шарҳ қилинаётган ушбу китоб буюк ватандошимиз Алоуддин Косоний тасниф этган ҳанафия мазҳабига оид асарлар ичида энг муфассал, мукаммал ва бошқа мазҳаб эгалари ҳам тан оладиган, далил-ҳужжатлари мустаҳкам, муътабар манба ҳисобланмиш «Бадоеъус саноеъ...» (“Шариат қонунларини тартиблашда гўзал санъатлар”) асаридир.
Ҳар қандай яхшиликнинг асосида турувчи поклик ва динимизнинг устуни, мўминнинг меърожи ҳисобланган намоз ибодатини бутун тафсилотлари билан ёритувчи бу китоб маърифатсевар халқимизга Аллоҳга бандалик илмидан дарс берувчи муҳим қўлланма бўлиб қолади, деган умиддамиз.
Таржимон: Шайх Алоуддин Мансур
Номи:«Бадоеус саноеъ» 1–2-жузлар
ЎМИ Матбуот хизмати
Янги ўқув йилидан бошлаб «Дунё динлари тарихи» фани ҳам ўқитилади
2018 йилнинг 27 июлида Халқ таълими вазирининг “Умумий ўрта таълим мактабларининг 1-11-синфлари учун 2018-2019 ўқув йилига мўлжалланган таянч ўқув режани тасдиқлаш тўғрисида”ги 191-сонли буйруғи қабул қилинди. Бу ҳақда Ўзбекистон Республикаси Халқ таълими вазирлиги матбуот хизмати маълум қилмоқда. Ушбу буйруқ билан умумий ўрта таълим муассасалари учун 2018-2019 ўқув йилига мўлжалланган таянч ўқув режа тасдиқланди.
Халқ таълими вазирининг буйруғига илова қилинган таянч ўқув режасига мувофиқ, 2018-2019 ўқув йили давомида “Тарих“, “Давлат ва ҳуқуқ асослар“, “Одобнома“, “Ватан туйғуси“, “Миллий истиқлол ғояси ва маънавият асослари“ каби ижтимоий фанлар билан бир қаторда “Дунё динлари тарихи“ фани ҳам ўқитилади. Ушбу фан мактабларнинг 9, 10 ва 11-синф ўқувчилари учун ҳафтада 1 соат давомида ўтилади.
Қорақалпоғистон Республикаси Халқ таълими вазирлиги, Тошкент шаҳар ва вилоятлар халқ таълими бошқармалари таянч ўқув режа ва тушунтириш хатида белгиланган вазифалар ижроси 2018-2019 ўқув йили давомида умумтаълим мактабларида тўлиқ бажарилишини таъминлайди.
Мазкур буйруқ қабул қилингани муносабати билан Халқ таълими вазирининг 2017 йил 16 майдаги “Умумий ўрта таълим мактаблари учун 2017-2018 ўқув йилига мўлжалланган таянч ўқув режани тасдиқлаш тўғрисида”ги 165-сонли буйруғи ўз кучини йўқотган деб ҳисобланади.
Манба: azon.uz
Ноёб панда
Қизай лақабли панда дунёдаги ноёб панда ҳисобланади. Гап шундаки, унинг ранглари жигарранг ва оқ кўринишда. Биз пандаларни қора ва оқ рангда кўришга ўрганиб қолганмиз.
Бу панда ҳозир етти ёшда бўлиб, туғилганда рангининг жигарранглиги сабабли онаси ташлаб кетган. Ҳозирда бу жонивор Хитойнинг Тоғли Циньлин деган табиат қўриқхонасида яшамоқда.
Аллоҳ таоло Қуръони каримда шундай деб марҳамат қилади:
وَرَبُّكَ يَخْلُقُ مَا يَشَاءُ وَيَخْتَارُ
“Ва Раббинг хоҳлаганини яратиб, хоҳлаганини ихтиёр қилур” (Қасас сураси, 68-оят).
Интернет материаллари асосида
Нозимжон Иминжонов тайёрлади.
Янгиликлар
