Ўзбекистон Республикаси Президентининг дин масалалари бўйича давлат маслаҳатчиси Р. Қосимов, Вазирлар Маҳкамаси ҳузуридаги Дин ишлар бўйича қўмита раиси А.Аҳмедов ва Ўзбекистон мусулмонлари идораси раиси, муфтий Усмонхон Алимов ҳазратлари 3-5 март кунлари Самарқандда “Имом Абу Мансур Мотуридий ва мотуридия таълимоти: ўтмиш ва бугун” мавзусида халқаро анжуманининг шўъба йиғилишлари бўлиб ўтадиган Имом Бухорий халқаро илмий-тадқиқот маркази ҳамда Ҳадис илми мактабида бўлдилар. Ташриф жараёнида дастлаб Имом Бухорий ҳазратларининг қабрлари зиёрат қилиниб, тиловат ва дуолар қилинди.
Мажмуанинг анжуманга тайёргарлиги билан танишувдан сўнг меҳмонлар Ҳадис илми мактаби устоз ва талабалари билан учрашди. Бугунги кунда мактаб талабаларига сабоқ бераётган жаҳонга машҳур “Ал-Азҳар” университети Магистратура бўлимининг “Усулуд дин” кафедраси мудири, Ҳадис илми фанлари доктори, профессор Доктор Маҳмуд Абдуллоҳ Абдурраҳмон Абдулҳалим ҳамда “Ал-Азҳар” университети “Араб тили” факультети “Балоғат ва мунозара илми” кафедраси мудири, Балоғат ва мунозара фанлари доктори, профессор Доктор Aли Саад Aли Саадлар билан суҳбатлашдилар.
ЎМИ Самарқанд вилоят вакиллиги ахборот хизмати
