Бухородаги “Етти пир” зиёратгоҳи таркибига кирувчи Баҳоуддин Нақшбанд мажмуаси Когон туманининг Қасри Орифон қишлоғида жойлашган.
ЎзА хабарига кўра, Баҳоуддин Нақшбандий маданий мерос объектини барпо этилишига Абдулазизхон ибн Убайдуллохон 1544 йилда асос солган. Абдулазизхон буйруғи билан мозор тартибга солиниб, ансамбл шаклига келтирилган ва 1544-1545 йилларда комплекснинг энг катта биноси – хонақоҳ қурилган.
Мазкур меъморий хонақоҳ маҳобати ва бадиий безаги жиҳатидан жуда ноёб иморат саналади. Мажмуанинг асосий қисмига дахмалар, мақбара, иккита масжид, сакхона, ҳовуз, қудуқ, минора, мадраса ва Абдуллахон хонақоҳи киради. Кейинчалик унинг сафига баланд пештоқ – гумбазли янги дарвозахона, музей, чойхона сингари иморатлар қўшилган.
Мустақиллик йилларида ушбу зиёратгоҳ янада обод этилди, зиёратчилар учун замонавий шароитлар яратилди.

Ўзбекистон мусулмонлари идораси матбуот хизмати