Европа давлатлари ўртасидаги Қуръони карим мусобақаси Буюк Британиянинг Бирмингҳем шаҳрида бўлиб ўтади. Бу ҳақда IQNA нашрига таяниб Ислом.уз хабар берди.

Мусобақа ташкилотчиси Европа Қуръон вақфи ҳисобланади. Мусобақа эркак ва аёллар ўртасида ўтказилади. Мусобақа шартлари ва иштирокчилар ёшлари қуйидаги тартибда белгиланган:
- 30 ёшгача бўлганлар Қуръони каримни тўлиқ ёд олган ҳолда;
- 25 ёшгача бўлганлар 15 пора;
- 15 ёшгача бўлганлар 3 пора (Мужодала сурасидан Нос сурасигача) бўйича ўзаро куч синашадилар.

Мусобақага Европанинг барча давлатларидан Қуръон ҳофизлари таклиф этилган. Ташкилотчиларнинг айтишларича, тадбирни ташкил этишдан мақсад – Европа қитъасидаги мусулмон жамоалари ўртасида ўзаро ҳамкорликни кучайтириш, ёшлар ўртасида Қуръони каримга бўлган муҳаббатни ошириш ва бошқа эзгу мақсадлар иборат.

Мусобақанинг ярим финали 20 апрель куни, якуний босқичи эса 21 апрель куни Буюк Британиянинг Бирмингҳем шаҳрида бўлиб ўтади.

Ўзбекистон мусулмонлари идораси Матбуот хизмати

Мадина Ислом университети ташаббуси билан Дубай халқаро Қуръон институти 36-китоб ва медиа кўргазмасини ўтказмоқда.

Ал-Аҳрам нашрининг хабарига кўра, кўргазмада Қуръон институти томонидан 7 та янги ном остида Қуръони карим ва Расулуллоҳ саллоллоҳи алайҳи ва салламнинг суннатлари йўналишида олиб борилган тадқиқотлар намуналари намойиш этилмоқда.

Ташкилий қўмита раиси Иброҳим Муҳаммад Бумельенинг маълум қилишича, кўргазмани ташкил қилишдан мақсад устоз ва талабаларни Қуръони карим илмлари, суннат ва шаръий илмлар соҳасидаги сўнгги янгиликлардан хабардор қилишдан иборат. Ислом.уз сайтига кўра кўргазмада турли давлатлардан келган 200 та маданият ташкилотлари ва нашриётлар иштирок этмоқда.

Ўзбекистон мусулмонлари идораси Матбуот хизмати

Ўзбекистон Республикаси Президенти Шавкат Мирзиёев 11 апрель куни Бирлашган Араб Амирликларининг Ҳукумат ва келажак ишлари бўйича вазири Муҳаммад бин Абдуллоҳ ал-Қарқовий бошчилигидаги делегацияни қабул қилди. Бу ҳақда Ўзбекистон Президенти матбуот хизмати хабар берди.

Давлатимиз раҳбари мамлакатимизда бўлиб турган нуфузли делегацияни самимий қутлар экан, Ўзбекистон ва БАА ўртасидаги кўп қиррали муносабатларнинг изчил ривожланиб бораётганига юксак баҳо берди.

Жорий йилнинг март ойида Абу-Даби ва Дубай шаҳарларида бўлиб ўтган олий даражадаги сермаҳсул учрашувлар икки давлат ўртасидаги шерикликни мустаҳкамлаш ва амалий ҳамкорликни кенгайтиришда янги босқични бошлаб бергани қайд этилди.

Ташриф якунида муҳим келишувларга эришилди, жумладан, иқтисодиётнинг турли тармоқларида умумий қиймати 10 миллиард доллардан зиёд истиқболли инвестиция лойиҳалари бўйича салмоқли икки томонлама ҳужжатлар тўплами имзоланди. Уларни тўлиқ амалга ошириш мақсадида мамлакатимизда тегишли “Йўл харитаси” қабул қилинди.

Бугунги суҳбат давомида давлат ташкилотлари, илмий марказлар, етакчи компания ва корхоналар, банк-молия институтлари даражасида фаол мулоқот ва алмашинувларни давом эттириш муҳимлиги таъкидланди.

Ўзбекистон мусулмонлари идораси Матбуот хизмати

ЎМИ Матбуот хизмати