Устоз Аюбхон домла Сўпиев ва Абдулқодир қори Аҳмедов билан суҳбат

Тошкент шаҳар Олмазор туманида жойлашган “Имом Термизий” жоме масжиди бўлиб, 1876 йилда шу маҳаллада яшаб ўтган сувоқчи Исмоил ота ташаббускорлигида маҳаллий масжид сифатида, маҳалла аҳолисининг ҳашар йўли билан қурилган, иккита кичик тоқилик хонақоҳдан иборат бўлган. Ўша даврда ушбу маҳалла мўғул кўча деб номлангани сабабли, масжид ҳам “Мўғул кўча” масжиди номи билан юритилган, халқ тилида эса “Тахтапул” масжиди деб танилган. Совет ҳукмронлиги даврида масжид бир неча муддат беркитилиб, фаолияти тўхтатилган. 1945 йиллардан муфтий Эшон Бобохон ҳазратларининг саъй-ҳаракатлари билан қайта фаолият юрита бошлаган.

1990 йилда мамлакатимизда буюк ватандошимиз, ислом оламидаги машҳур муҳаддис Имом ат-Термизий таваллудининг 1200 йиллиги нишонланди. Шу муносабат билан масжиднинг номи ўзгартирилиб, “Мўғўл кўча”  масжиди ўрнига “Имом ат-Термизий” жоме масжиди деб номланди.

2017 йил 21 апрель кунида Ўзбекистон Республикаси Президенти Шавкат Мирзиёев пойтахтимизда амалга оширилаётган бунёдкорлик ишлари, ижтимоий-иқтисодий лойиҳалар билан танишиш, халқ билан мулоқот қилиш мақсадида Тошкент шаҳрининг Олмазор туманида бўлиб, “Имом Термизий” жоме масжидига ҳам ташриф буюриб, уламолар ва нуронийлар билан суҳбатлашди.

Ушбу суҳбатда Шавкат Мирзиёев буюк аллома бобомиз номидаги “Имом Термизий” жоме масжидини тубдан қайта қуриш, атрофларини гўзал масканга айлантириш юзасидан муҳим кўрсатма ва топшириқлар берди. Шу муносабат билан 22 апрель куни ушбу масжидда мутасадди ташкилотлар раҳбарлари, уламолар ва нуроний отахонлар иштирокида тадбир ўтказилди, эҳсон дастурхони ёзилди. Муқаддам ушбу масжидда хизмат қилиб ўтган Яҳё қори дода, устоз Салоҳиддин Муҳиддин домла каби уламолар хотирланди. Қуръони карим тиловат қилинди.

Ушбу тадбирда нутқ сўзлаган марҳум муфтий Усмонхон Алимов ҳазратлари қайта қурилиши бошланаётган ушбу жоме масжид мўмин-мусулмонларга узоқ йиллар давомида хизмат кўрсатадиган муборак масканга айланишини, халқимиз фаровонлиги, динимиз равнақини, мамлакатимиз ривожини сўраб, дуо қилдилар.

Таъкидлаш жоизки, қурилиш ишларига энг моҳир уста ва муҳандислар жалб этилган. Бундай эзгу ишга ҳисса қўшиш истагидаги қурувчилар ўз маҳоратларини кўрсатиб, бор куч-ғайрат билан меҳнат қилишди. Зеро, масжид қуриш, уни обод этишнинг савоби улуғ экани Ислом манбаларида баён қилинган. Пайғамбаримиз соллаллоҳу алайҳи ва саллам бундай марҳамат қилганлар: “Ким Аллоҳнинг розилигини истаб, масжид қурса, Аллоҳ унга жаннатда қаср барпо қилади” (Имом Бухорий ривояти).

2017 йил 19 июль куни эса,  Ўзбекистон мусулмонлари идораси раиси, муфтий Усмонхон Алимов бошчиликларида ушбу жомега биринчи ғишт қўйилди.

Қисқа вақт ичида барча замон талабларига жавоб бера оладиган ҳамда янги қиёфада қад ростлаган гўзал масжид 2018 йилнинг 16 май куни мўмин-мусулмонлар учун фойдаланишга топширилди.

Масжидда мўмин-мусулмонлар ибодат қилиши учун барча шарт-шароитлар яратилган. Унинг хонақоҳи 1800 кишига мўлжалланган.

Масжид икки қаватдан иборат бўлиб, асосий хонақоҳ ва ички айвон ҳамда ертўла қисмидан иборат. Масжидда кутубхона, ошхона ва бир қанча маъмурий хоналар мавжуд.

Масжид меҳроби жуда ҳам кўркам, нақшинкор бўлиб, унга Қуръони каримдаги “ал-Балад” сураси ёзилган. Масжид гумбази ҳам қадимий накшинкор услуб билан безатилган бўлиб, унга эса Қуръони каримдаги “ал-Фажр” сураси ёзилган.

Хоноқоҳга кириш учун қўйилган эшиклар ҳам барчаси миллий, нақшинкор эшиклар ўрнатилган. Масжидга кириш қисмининг ўнг ва чап томонида айвонлар бўлиб, улар қадимий, миллий меъморчилик услубида жуда ҳам гўзал тарзда  қурилган.

Шуни ҳам таъкидлаш керакки, масжид таҳоратхонаси юртимиздаги энг тоза ва намуналик таҳоратхона бўлиши билан бир қаторда, бир вақтнинг ўзида бир юз йигирма киши бемалол таҳорат қила олиши билан бошқа таҳоратхоналардан ажралиб туради.

Масжидда аёллар учун ҳам таҳоратхона ҳамда намозхона мавжуд бўлиб, улар учун ҳам барча шарт-шароитлар  мавжуд.

Қолаверса, масжидда ногиронлиги бўлган шахслар учун алоҳида таҳоратхона мавжуд.

Бугунги кунда масжидда кундалик намозларда ўртача 100-200 киши, жума кунлари 1800-2000 киши, ҳайит кунлари эса  2500-3000   нафар атрофида намозхонлар ўз ибодатларини эмин-эркин адо этиб келмоқда.

Ҳозирда масжидда ўндан ортиқ ходимлар мўмин-мусулмон фуқароларимизнинг қўлай шарт-шароитлар яратиш учун фидойилик билан хизмат қилиб, фаолият кўрсатиб келмоқда.

Масжид манзили: Тошкент шаҳар Олмазор тумани, Себзор даҳаси, Қизил кўча 96-уй. Локация манзили: 41.337323,69.252077

ЎМИ Масжидлар билан ишлаш бўлими

Илҳомжон домла Умаржон ўғли

"Мўйи муборак Уккоша" жоме масжиди имом-хатиби

Мисрнинг «Ал-Муватин» ахборот агентлиги веб-сайтида «Ўзбекистон – 2023 йилнинг энг яхши сайёҳлик манзили» сарлавҳали мақола эълон қилинди, деб хабар бермоқда «Дунё» АА мухбири.

Журналист Фотима Бадавий қаламига мансуб мазкур мақолада Ўзбекистоннинг бой маданияти, тарихи, сайёҳлик салоҳияти ва мамлакатнинг 2023 йилга мўлжалланган туризм лойиҳалари ҳақидаги маълумотлар ёритилган.

Нашрда «Lonely Planet» халқаро ноширлик уйи томонидан эълон қилинган рейтингда Марказий Осиё минтақасида Ўзбекистон визасиз кириш ва саёҳат қилиш қулайлиги бўйича энг яхши туристик йўналиш номини олгани, «The Economist» журнали эса Ўзбекистонни сўнгги бир неча йил ичида Марказий Осиёдаги энг бардавом ривожланган давлат дея этироф этгани таъкидланган. «Буларнинг барчаси, шунингдек, азим тарих ва бетакрор маънавий-маърифий мерос мамлакатни етакчи сайёҳлик масканига айлантирмоқда», деб қайд этилган мазкур мақолада.

Нашрда ЮНEСКО Умумжаҳон мероси рўйхатига Бухоро, Самарқанд, Хива ва Шаҳрисабз шаҳарлари киритилгани қайд этилган.
Шунингдек, Ўзбекистонда туризм соҳасини илгари суришда ижтимоий тармоқларнинг муҳим ролига алоҳида эътибор қаратилаётгани таъкидланган.

«Сўнгги йилларда ижтимоий тармоқларда Ўзбекистоннинг энг муҳим сайёҳлик жойлари ҳақида туристлар ўзларининг турли кечинмалари билан ўртоқлашмоқда. USAID жамғармаси ҳам Ўзбекистонни Марказий Осиё минтақасининг энг жозибали ва хавфсиз сайёҳлик йўналиши сифатида тарғиб қилиш учун блогерларни таклиф қилишда ҳамкорлик қилмоқда. Фуд-блогерлар эса ўзбек халқининг миллий таомларини жуда фаол ёритаяпти», деб ёзади Фотима Бадавий.

Ўзбекистон мусулмонлари идораси матбуот хизмати

Бугунги ахборот технологиялари асрида турмушимиз қанча фаровонлашган бўлса, шунча хавф-хатар ҳам кўпайиб боряпти. Олдингидай душманни четдан ахтаришга ҳожат қолмади. Ғанимлар ёнимизда, ҳатто карманларимизда изғиб юрибди. Баъзан кафтдеккина мобил қурилма бизнинг ағёримизга айланиб қолиши ҳеч гап эмас. Бу матоҳ фарзандларимизни ҳам чалғитиб, уларни турли бузуқ ақидаларга бошламоқда.

Пайғамбаримиз соллаллоҳу алайҳи ва саллам: “Ота-она ўз боласига гўзал одобдан афзал нарса бера олмайди», деганлар (Имом Термизий ривояти).
Бошқа бир ҳадисда: «Ҳеч бир ота ўз фарзандига яхши тарбия бериш ва одоб ўргатишдан ортиқ ҳадя қилолмайди», деганлар (Имом Бухорий ривояти).

Набий алайҳиссалом фарзандларига, набираларига, умуман, ёш болаларга жуда эътиборли бўлганлар. У зотнинг тарбияларини олган издошлари, саҳобалар ҳам фарзанд тарбиясида ўша услубни қўллашган.

Биз – болажон миллатмиз. Фарзандларимиз учун ўзимизни ўтга-чўққа урамиз. Тиним билмаймиз. Ўзимиз емасак ҳам уларнинг оғзига тутамиз. Лекин тарбиядаги жуда нозик жиҳатларга боламизнинг қалбига киришга, у билан чинакам дўстлашишга, тиллашишга, диллашишга ҳар доим ҳам интилмаймиз.

Ота фарзанди учун ҳамма нарсани муҳайё қилиб қўяди. Бироқ энг муҳим нарсани унутади. Ҳа, одам боласи учун қорин тўқлигию устбутликнинг ўзи кифоя қилмайди. Унда кўнгил бор. Кўнгил эса доимий эътиборни, меҳрни тусайди. Ҳар бир фарзанд отадан меҳр кўришни хоҳлайди, эътибор хоҳлайди.
Агар биз ўша меҳри бера олмасак, бошқалардан олса, тўғри бўладими? Эртага ўзларини ғаразли мақсадларига йўғрилган, Ватанига, динига ва ота-онасига қарши борадиган миссионер ва турли оқимлардан ота-онасидан ололмаган меҳр-тарбияни олса, бу ҳаммамиз учун фожиа бўлади.

Имом Ғаззолий бундай дейди: “Болалар ота-оналарига берилган бир омонатдир. Боланинг қалби ҳар қандай нақшу тасвирдан холи бир қимматбаҳо гавҳардир. У қандай нақш солинса, қабул қилади, қаёққа букилса, эгилади. Агар яхшиликка ўргатилса, шу билан ўсади ва дунёю охиратда саодатга эришади. Унинг савобига ота-онаси ҳам, ҳар бир муаллиму устозлари ҳам шерик бўладилар. Агар ёмонликка одатлантирилса, ҳайвонлардек ўз ҳолига ташлаб қўйилса, охир-оқибат ҳалок бўлади. Гуноҳи эса унинг тарбияси учун жавобгар бўлганларнинг гарданига тушади”.

Ҳозирги кунда баъзи тоифа ва гуруҳлар манфур мақсадлари йўлида Қуръони карим оятлари, ҳадиси шарифларнинг маъноларини бузиб, ўз ғояларига мослаштиришмоқда. Шунингдек, улар солиҳ аждодларимиз ва ўтган азиз уламоларимиз айтган сўзларни ҳам бутунлай нотўғри талқин қилиб, ўз манфаатлари йўлида фойдаланишмоқда. Масалан, “ҳижрат”, “жиҳод” ва “шаҳид” сўзларини нотўғри талқин қилиб, ёшларимизни чалғитмоқдалар.
Биз ёшларимизга, мўмин-мусулмонларга, Ислом динимиз борасида оз билимга эга бўлган кишиларга юқоридаги сўзларнинг асл маъносини тушунтириб беришимиз лозим. Шунда ёшлар xавф-хатар юқоридаги сўзларда эмас, балки бу сўзларни ниқоб, қурол қилиб олган тоифа, гуруҳ ва адашган жамоаларда эканини англаб олади.

Ўша тоифалар ҳақида Аллоҳ таоло Аъроф сурасининг 179-оятида бундай  марҳамат қилади: «...Уларда қалблар бор, (лекин) улар билан англамайдилар. Уларда кўзлар бор, (лекин) улар билан кўрмайдилар. Уларда қулоқлар бор, (лекин) улар билан эшитмайдилар. Ана ўшалар ҳайвонлар кабидирлар. Балки улар (янада) адашганроқдирлар. Айнан ўшалар ғофиллардир».

Биз фазандларимизни баъзи тоифа ва гуруҳларнинг манфур ғояларига учиб, юртини ташлаб ватангадо бўлиб, юртдошларига қарши бориб, ватан хоини бўлишининг олдини олишимиз шарт.

Хуллас, барча мусулмонлар учун муқаддас тушунчалар ва атамаларни ғаразли мақсад йўлида суиистеъмол қилаётган бузғунчи тоифаларга қарши курашиш, уларнинг сохта даъволарига ўз вақтида асосли раддиялар бериш ҳар биримизнинг энг муҳим вазифамиздир. Агар биз ҳушёрликни бир дам йўқотсак, пайт пойлаб юрган бузғунчилар кирдикорларини бошлашади. Шу боис огоҳ бўлишимиз шарт.

Мансур ЎРОЛОВ,

Тошкент шаҳри “Нўғайқўрғон” жоме масжиди имом-хатиби