muslim.uz

السبت, 04 نيسان/أبريل 2020 00:00

Ўмон элчиси: Ўзбекистонда COVID-19 пандемиясига қарши чора-тадбирлар муҳим ва самарали

Глобал аҳамият касб этаётган коронавирус пандемияси дунёнинг 200 дан зиёд мамлакатларини қамраб олди. Бугун ушбу вирусга қарши давлатлар нафақат ички чора-тадбирларни амалга оширмоқда, балки икки ва кўп томонлама ҳамкорлик асосида масалага биргаликда ечим топишга интилмоқда.
Ўмон Султонлигининг Ўзбекистондаги Фавқулодда ва мухтор элчиси Аҳмад Саид Ал Катири «Дунё» АА мухбирига берган интервьюсида юртимизда ушбу эпидемияга қарши кураш мақсадида амалга оширилаётган ишлар ҳақида фикр билдирди.
– Коронавирус пандемияси дунёнинг ўзаро боғлиқлиги, ҳеч бир мамлакат глобал муаммони якка ўзи ҳал қила олмаслигини яққол кўрсатди. Ушбу умумий муаммони бартараф этиш учун барчамиз бирдамлик руҳида ҳаракат қилишимиз керак.
Ўзбекистон коронавирус тарқалишининг олдини олиш учун қатъий чоралар кўриб, тадбирларни изчиллик асосида амалга оширишга қаратилган назорат стратегиясини ишлаб чиқди. Қабул қилинган баъзи тартиблар инсонлар учун бироз ноқулайликлар келтириши мумкиндир. Аммо ушбу юқумли вирус тарқалишининг олдини олиш учун шу каби тадбирлар жуда зарур. Ўз навбатида, таъкидлаш жоиз, ушбу чоралар нафақат Ўзбекистон, балки дунёнинг бошқа мамлакатлари томонидан ҳам амалга оширилмоқда.
Ишончим комилки, тегишли глобал ҳаракатлар ушбу пандемияни бартараф эта олади. Айни пайтда эса ўзбек халқи карантин тадбирларига яхши риоя қилишларини намойиш этишмоқда.
Фурсатдан фойдаланиб, Ўзбекистон раҳбарияти ва халқига мустаҳкам соғлиқ ва фаровонлик тилайман.

Ўзбекистон мусулмонлар идораси матбуот хизмати

Published in Ўзбекистон янгиликлари

السبت, 04 نيسان/أبريل 2020 00:00

Сурдо таржимонларига юксак мукофот муборак

Ўзбекистон мусулмонлари идораси ташаббуси билан имконияти чекланган юртдошларимиз учун 2018 йилдан буён Республикамиз вилоятлари марказий масжидларида сурдо таржимаси асосидаги суҳбатлар ва жума мавъизалари олиб борилмоқда.
Бундан кўзланган мақсад имконияти чекланган кишилар орасида диний муҳитни соғломлаштириш, уларнинг динимизни ўрганишга бўлган эҳтиёжини таъминлаш, Ислом динининг инсонпарвар ғояларини тарғиб қилиш орқали ёт ғояларга барҳам бериш, шунингдек, ногиронлиги бўлган шахсларнинг ижтимоий фаоллигини ошириш, уларни тушкунликдан асраш ва жамиятда фуқаролар тенглигини таъминлаш саналади.
Ушбу тадбирлар эшитиш ва нутқида камчилиги бўлган инсонлар алдамчи ғоялар таъсирига тушиб қолмаслиги, турли секталарга кириб кетмаслиги, уларнинг оилавий, маиший ва ижтимоий муаммоларни ҳал қилишда муҳим аҳамият касб этади. Бу борада сурдо таржимонларнинг меҳнати алоҳида аҳамиятга эга.
Куни кеча ана шу суҳбатларни сурдо тилига таржима қилувчи – Рустам Бердиев ва Ойдин Худойбергановага “Ўзбекистон Республикаси халқ таълими аълочиси” кўкрак нишони топширилди. Бу юртимизда сурдо таржимонларга кўрсатилаётган улкан эътибор намунаси бўлди.
Аллоҳ таоло сурдо таржимонларимизга юксак мукофотни муборак қилсин, қилаётган хайрли ишларига улкан ажру савоблар ато этсин!

Ўзбекистон мусулмонлари идораси Матбуот хизмати

Published in Ўзбекистон янгиликлари

الجمعة, 03 نيسان/أبريل 2020 00:00

Ўзбекистондан касаллик кўтарилишини сўраб Байтуллоҳда дуо қилинди

Ўзбекистон мусулмонлари идорасининг “Ҳаж” ва “Умра” сафарлари бўйича Саудия Арабистонидаги ҳамкор “ал-Ҳидоя” ширкати вакиллари Маккаи мукаррамадаги Ҳарами шарифда инсоният бошига келган бу хасталикни даф бўлишини сўраб, Ҳақ таолога ёлвориб қуйидаги дуо ўқидилар:
– Эй Аллоҳ, биз нуқсонга йўл қўйганлармиз, Сен эса Каримсан. Биз гуноҳкорлармиз, Сен эса Ҳалимсан. Биз Сенга муҳтожмиз, Сен эса биздан Беҳожат Зотсан. Сен Поксан.
Эй Аллоҳ, афвинг билан хатоларимизни кечиргин. Ғазабинг ила бизни азобламагин.
Эй Аллоҳ, бизни раҳматингга олгин. Зеро, Сен биз бандаларинга Раҳмлисан. Эй оламларнинг Робби, бизни азобламагин. Ваҳоланки, Сен бизни азоблашга Қодирсан.
Эй Аллоҳ, агар ушбу вабо бизнинг содир этган гуноҳларимиз, хатоларимиз ёки қилган зулмларимиз, адо этмаган фарзларимиз, ўқимаган нафлларимиз, йўл қўйган камчиликларимиз, номаҳрамга қараб қўйганимиз сабабли келган бўлса, биз ҳамма гуноҳларимиздан Сенга тавба қилувчилармиз, эй Роббимиз. Бизнинг тавбаларимизни қабул айлагин ва Ўзингга гўзал ҳолатда қайтаргин, эй Робб. Жонимизни, Сен биздан рози бўлиб турганингда олгин, эй Роҳман.
Эй Аллоҳ, эй бирор нарсага "Бўл!" деб, ўша ишни бўлдирувчи Зот, ЛАА ИЛААҲА ИЛЛАЛЛОҲ калимаси, Сенинг барча гўзал исмларинг ва уларнинг азамати ҳурматидан Ўзингнинг куч-қувватинг, қудратинг ила шарафли Каъбага, Ҳарам Уйингга ва Набиййинг соллаллоҳу алайҳи васалламнинг масжидларига зиёратчию умрачиларни қайтаргин!
Эй Аллоҳ, вабони, балони ва барча касалликларни хоссатан икки покиза, ҳарам шаҳардан ва омматан барча мусулмонларнинг мамлакатларидан кўтаргин, эй оламларнинг Робби!
Эй Аллоҳ Икки Ҳарам ходими подшоҳ Салмон бин Абдулазиз Ол Сауд ва у зотнинг ишончли валиаҳди амир Муҳаммад бин Салмонни ўз паноҳингда асра, уларни Икки Ҳарам хизматида бардавом айла, бу хизматларини яхши амаллари дафтарига ёзгин, эй оламлар Парвардигори!
Эй Аллоҳ, Ўзинг Ўзбекистон Президенти Шавкат Мирзиёев ва у кишининг атрофидагиларга, шунингдек, мамлакат муфтийсига, халқига ва ҳожи-умрачиларга қилаётган хизматларига муваффақият ато этгин!
Эй Аллоҳ, “Ҳидоя” халқаро ширкати мутасаддиларига, жумладан, маслаҳатчи Шайх Солиҳ Баҳвайний ва биродари Усома Тошкандийнинг Ўзингнинг меҳмонларинг ва умрачилар хизматидаги самарали фаолиятларига муваффақият ато этгин! Эй Аллоҳ, уларнинг хайрли амалларини даргоҳингда қабул айлагин!
Эй Аллоҳ, Набиййимиз, Ҳабибимиз Муҳаммад соллаллоҳу алайҳи васалламга дунёю охиратда салавот-салом ва баракотларингни нозил қилгин!
Эй Аллоҳ, биз ушбу дуони қилдик, ижобат этиш Сендандир. Биз ҳаракат қилиб, сабабларни ушлаймиз ва Ўзингга таваккул этамиз. Охирги дуоимиз оламларнинг Робби Аллоҳга ҳамд бўлсин!

Ўзбекистон мусулмонлари идораси Матбуот хизмати

Published in Ўзбекистон янгиликлари

الجمعة, 03 نيسان/أبريل 2020 00:00

"Вақф" фонди коронавирусга қарши 190 миллион сўмга яқин маблағ сарфлади

Бугун инсоният мисли кўрилмаган оғир синовни бошдан кечирмоқда. Кўз илғамас хатар барчага бирдек таҳдид солмоқда. Охирги кунларда заминимизда содир бўлаётган ташвишли воқеалар ҳар биримиздан ҳамжиҳатликни, меҳр-мурувватни талаб қилади. Ушбу юқумли касалликка қарши курашиш, унинг давосини топиш бўйича жаҳон ҳамжамияти ўзаро ҳамкорлик қилмоқда. Мамлакатимизда каронавируснинг олдини олиш, уни юқтирган беморларни даволашда тезкор ва самарали чора-тадбирлар амалга оширилмоқда.
Ушбу жараёнга “Вақф” хайрия жамоат фонди ҳам муносиб ҳисса қўшмоқда. Фонд томонидан жорий йил 16 март 2 апрель кунлари ёрдамга муҳтож аҳоли вакилларига жами 190 миллион миллион сўмга яқин хайрия ишлари кўрсатилди. Жумладан, ёрдамга муҳтож аҳоли вакиллари пластик рақамларига (дори-дармон, даволаниш учун) моддий ёрдам ўтказиб берилди; эҳтиёжманд кишиларнинг уйларига озиқ-овқат маҳсулотлари етказиб берилди; маҳалла ва аҳоли гавжум жойларда бепул ниқоблар тарқатилди.
Дарҳақиқат, бугун Қуръони карим ҳамда ҳадиси шарифларда тараннум этилган ва халқимизнинг қону жонига сингиб кетган инсонпарварлик ва меҳр-мурувват каби фазилатларни намойиш этиш палласи келди. Хайр-эҳсон қилиш ва бир-биримизга наф келтириш энг олий инсоний бурчимизга айланди.
Мамлакатимизда вужудга келган мураккаб вазиятда "Вақф" фонди томонидан халқимизнинг эҳтиёжманд тоифаларига кўрсатилаётган инсонпарварлик ёрдамларининг салмоғини оширмоқда, ижтимоий ҳимояга муҳтож қатламларга кўмаклашишни кўпайтирмоқда.
Республика махсус комиссиясининг 2020 йил 1 апрелдаги қарорига асосан, Фондга ёрдам сўраб мурожаат қилган эҳтиёжманд кишилар пластик карталари орқали моддий ёрдам кўрсатилмоқда. Хусусан, 1-2 апрель кунлари 106 нафар кишига дори-дармон, даволаниш ва озиқ-овқат учун 70 миллионга яқин пул маблағлари хайрия тариқасида улашилди. Бу борадаги ишлар юқори суратда жадал давом эттирилмоқда.
Шунингдек, “Вақф” фонди коронавирусга қарши курашни қўллаб-қувватлаш учун таъсис этилган "Меҳр-шафқат ва саломатлик" жамоат фондига асосий ҳисоб рақамидан 50 миллион маблағ сўм ўтказиб берди (закот, фитр-садақаси ва ижтимоий хайрия акцияларидан ташқари маблағлар).
Ҳар қандай синов Аллоҳдан эканини англаган ҳолда ўзаро бирдам, сабру матонатли бўлиб, эзгу ишларни кўпайтирсак, хайрли дуолар қилсак, бошимизга келган мусибатдан тез орада эсон-омон ўтамиз, иншо Аллоҳ.
Фонд коронавирус хасталигига қарши кураш ва ёрдамга муҳтож инсонларни қўллаб-қувватлашда давом этади.

“Вақф” хайрия жамот фонди Матбуот хизмати

Published in Ўзбекистон янгиликлари

الجمعة, 03 نيسان/أبريل 2020 00:00

Кўринмас душман: Дангасалик шайтондандир (3-мақола)

Шайтон нафақат мусулмонларга балки бутун инсониятга ашаддий душмандир. Аллоҳ таоло Қуръони каримда: “Албатта шайтон инсонга очиқ-ойдин душмандир”, дейди. Юсуф 5-оят.

Зотан, шайтоннинг мақсади инсонларни ҳақ йўлдан адаштириш, дунё ишларини зийнатлаб кўрсатиб, охиратни униттиришдир. Шайтон бу ишида фақатгина мухлис бўлган кишиларнигина йўлдан оздиришда ноумид бўлади. Аллоҳ таоло бу борада унинг айтганини қуйидагича баён қилган: “У: “Эй Роббим, мени залолатга кетказганинг сабабидан, албатта, мен уларга ер юзида (гуноҳларни) зийнатлаб кўрсатаман ва албатта, уларнинг ҳаммасини иғво қиламан”. Магар, улардан танланган (мухлис) бандаларингни (адаштира олмасман), деди”. Ҳижр 39-40 оятлар.

Демак, шайтоннинг мақсади: инсонларни барча яхши амлларни бажаришдан ва тўғри йўлдан юришидан тўсиш, қайтаришдир. У бу йўлда турли ҳил усуллардан фойдаланади. Масалан: васваса қилади, ҳаром ишни зийнатлаб кўрсатади, аста секинлик билан ҳаром иш қилишни оддийлаштириб, бу йўлда пешво бўлишга ундайди, қилаётган ишини жиддий қабул қилмасликка ўргатади, ваъдаларни беради, тавба қилишни кечроққа суришга буюради ва Аллоҳнинг раҳимдил эканлигини тез-тез эслатиб туради. Бу борада Қуръони каримда шундай дейилган: “У, (шайтон) уларга ваъда берур ва хомхаёлларга солур. Шайтон уларга ғурурдан бошқа нарсани ваъда қилмас”. Нисо 120-оят.

Шайтонда икки ҳил йўлдан оздириш йўли бор:

Кишининг қалбига кириб, у билан савдолашади. Агар унда заифлик ва сусткашликни топса, дарров унинг ўша заифлик жойидан ушлаб, барча хохишларини пучга чиқариб, уни дангасаликка, ғайратсизликка бошлайди ва бу ишларни қилмагани учун унга сабаблар ва умидлар эшигини очиб беради. Натижада инсон хайрли ишларни қилмай қўйишликка одатланади.
Кишининг қалбига кириб, унда яхши амалларни қилишга харислик, жидду-жаҳд ва қобилятни топса, юқоридаги услубни қўллашликдан умидсизликка тушадида, энди унга барча яхши ишларини кўпроқ қилишга қизиқтиради. Доимо қилаётган ишлари у учун камлик қилишини билдириб туриб, сенинг қобилятинг бундан ҳам кўп иш қилишга етарли дея шошилтиради. Шунинг учун сен бошқаларга қараганда ҳаракатингни кўпайтиришинг керак масалан: ҳамма ухласа ҳам ухламаслигинг, ҳамма ифторлик қилса ҳам ифтор қилмаслигинг, ҳамма бўшашса ҳам бўшашмаслигинг, агар улар юз-қўлларини уч марта ювсалар, сен етти марта ювишинг, агар улар намозга таҳорат қилсалар, сен ғусл қилишинг каби динда ғулувга кетиб, ҳаддидан ошиб, йўқ бўлган ишлар билан машғул қилиб, тўғри йўлдан чиқаради.

Ҳақиқатда аксар инсонлар ушбу шайтоний қармоққа тушиб қоладилар. Бу қармоқдан қутилиб қолиш ёки қутилиб чиқиш учун фақатгина пухта илм ва иймон, у билан курашиш учун қувват ҳамда ўртамиёналикни ушлаш керак бўлади. Аллоҳнинг ўзи бу ишда бизга ёрдамчи бўлсин.

Шунингдек, Пайғамбаримиз соллаллоҳу алайҳи васаллам ушбу ҳадислари билан яна бир дангасалаикнинг белгисига ишора қилганлар: “Аллоҳ таоло акса урувчини яхши кўради, эсновчини эса ёон кўради. Агар бир киши акса урса ва ҳамд айтса, уни эшитган ҳар бир мусулмон акса урганга соғлиқ тилаши лозим бўлади. Эснаш шайтондандир. Уни иложи борича қайтаришлик керак. Агар эснавчи “Ҳаааҳ” деб овоз чиқарса, шайтон унинг устидан кулади”, дедилар.

Бошқа бир ҳадисда: “Эснашлик шайтондандир. Бас агар бирортангиз эснаса, қодир бўлгунича (эснашни) қайтарсин”, деганлар.

Ушбу ҳадислардан келиб чиқиб, акса уришлик кишини фаол, ҳаракатчан, ғайратли ҳамда эпчилилигига ишора қилса, бунинг акси бўлган эснаш эса, дангаса ёки бекорчилигига далолат қилади. Анашу дангаса, секин ҳаракат қилувчи ва бекорчи киши шайтоннинг дўстига айланиб, унга шаҳвоний ишлар чиройли кўринадиган бўлиб қолади.

Бироқ, эснашни инсон яратган эканда, деган фикрдан узоқ бўлиш лозим. Эснашлик шайтондандир дейилишидан мақсад, кўпинча эснашлик дангаса ва ғайратсиз кишидан содир бўлади ва анашу дангаса киши шайтоннинг дўсти бўлади деган маъно чиқади.

Алло таоло барчамизни очиқ-ойдин душманимиз бўлган шайтоннинг найрангу хийлаларидан ўзи асрасин ва шайтонга қарши курашишда бизга Ўзи ёрдамчимиз бўлсин.

“Шайх Зайниддин” жоме масжиди имом-хатиби,

ТИИ ўқитувчиси Абдураҳманов Яҳё Убайдуллоҳ ўғли

Published in Мақолалар