Маҳзун кўнгилларга бир дам бўлсада илиқлик бахшида этмоқлик, меҳр-мурувват, эътиборга муҳтож кишиларга саҳоват кўрсатишлик қанчалар шарафли тадбир эканлигини яхши биламиз. Агар бундай амаллар савоблар 70 баробаргача кўпайтирилиб берилгувчи улуғ Рамазон ойи ва Ҳайит айёмларида бажарилса нур устига аъло нур бўлади.  Ушбу муборак ойда Тошкент шаҳридаги масжидлар имом-хатиблари ташаббуси билан ҳомийлар кўмагида шаҳримиздаги “Меҳрибонлик”, “Мурувват”, “Саҳоват” уйлари, меҳнат фахрийлари, нуроний кексалар, имконияти чекланган кишилар, шунингдек кам таъминланган, ёрдамга, меҳр-муруватга муҳтож кишилар ҳолидан хабар олиниб, моддий ва маънавий эътибор кўрсатилмоқда. Алоҳида таъкидлаш жоизки, улуғ айёмда пойтахтимиздаги масжидлар томонидан жами 200 дан ортиқ ногиронлар аравачалари муҳтож кишиларга топширилди.

Аллоҳ таоло Қуръони Каримда: “Яхшиликда мусобақалашинглар” дея марҳамат қилган. Рамазон савобли амалларни қилиш учун мусобақа ойидир десак муболаға бўлмайди. Албатта бунда илоҳий кўрсатмалардан чиқмаслик талаб этилган. Имом Бухорий ривоят қилган, Салмон Форисий розияллоҳу анҳудан келтирилган ҳадисда Набий соллаллоҳу алайҳи васаллам: “Рамазон ойи меҳр-мурувват улашиладиган (ёрдамга муҳтожлар ҳолидан хабар оладиган, уларнинг қалбига хурсандчилик киришига сабаб бўладиган) мавсуми эканлигини” айтганлар. Бу динимзнинг одоби ва бугунги кунда муқаддас ислом динининг мусаффо фитратидир. Кўрсатилган меҳр-мурувватлардан мамнун бўлганлар, Рамазон ва Ҳайит айёмларини қутлуғ бўлишини сўраб, юртимиз ободлиги, халқимиз фаровонлигини, қолаверса, бу какби хайрли амалларга ҳиссалари қўшилган барча кишилар ҳаққига дуои хайрлар қилишди.

Пекин университети қошидаги Жэньминь тадқиқот марказининг маълум қилишича, Хитойда Ислом динига эътиқод қилувчиларнинг сони ортиб бормоқда. Хитойдаги жами мусулмонларнинг 22,4%ини 30 ёшгача бўлганлар ташкил этади. Шунингдек, тадқиқот марказининг кузатувига кўра, Рамазон рўзасини тутувчиларнинг сони ҳам тобора ортиб бормоқда.

Ҳозирда мамлакат аҳолисининг 1,8 %ини ташкил этувчи 23,3 млнга яқин мусулмон истиқомат қилмоқда. “Pew Research Center” тадқиқот марказининг таҳлилларига кўра, 2030 йилга келиб Ислом динига эътиқод қилувчиларнинг сони 30 млндан орттиши кутилмоқда. 

Даврон НУРМУҲАММАД

Рамазон ойи давомида Россия Федерация шаҳарларида таровеҳ намозларини ўқиб бериш учун юртимиздан жўнаб кетган қориларимиз хатми Қуръонларни зўр иштиёқ билан давом эттирмоқдалар.

Куни кеча вакилларимиз таровеҳ намозларини адо этиб бераётган масжидларда жума намозларини ўқиб бердилар. Қориларимиз жума маърузаларида Рамазон ойининг фазилатлари, Рамазон рўзаси ҳақида Қуръон ва ҳадисларда келтирилган оят ҳамда ҳадислар асосида тўхталиб ўтдилар. Шунингдек, маъруза давомида мусулмонларнинг турли бузғунчи оқимлар гирдобига тушиб қолмасликлари, бунинг учун амалга ошириш лозим бўлган ишлар ҳақида айтиб ўтдилар.

Жума намозларида фақат эркаклар йиғилишини инобатга олиб, жума намозидан сўнг аёллар учун алоҳида йиғилиш ўтказилиб, уларни ҳозирги глобаллашув ва таҳликавий даврда ёшлар ва аёлларни турли нотўғри ақидавий  ҳуружлардан сақланишлари ҳақида гапириб ўтилди. Бунда уларга Ўзбекистон мусулмонлари идораси нашрларидан бўлган “ИШИД фитнаси” китоби яхши қўлланма бўлиб хизмат қилмоқда.

Ўзбекистон мусулмонлари идораси

Халқаро алоқалар бўлими

Ҳаж ва умра вазири Доктор Муҳаммад Солиҳ бин Тоҳир Бинтин умра зиёратчиларига кўрсатилаётган хизматлар савиясини янада оширишни назорат қилиш мақсадида Мадинаи Мунавварадаги “Масжидун Набавий” ҳудудидаги Ҳаж ва умра вазирлигига қарашли йўл-йўриқ кўрсатиш марказларига ташриф буюрди.

Вазир Бинтин Рамазон мувсумида умра зиёратчиларининг ибодатларини осон ва қулай бажаришларида кўрсатилаётган хизматлар савиясини янада ошириш ҳамда муборак Рамазон мавсумида “Масжидун Набавий”даги ҳудудий кузатув қўмиталари фаолиятини фаоллаштириш лозимлигини таъкидлади. 

Халқаро алоқалар бўлими ходими

Илёс АҲМЕДОВ

тайёрлади.