Замонамизнинг кўплаб оилаларида ота-оналар билан фарзндлар бир-бирларидан ажралиб қолаётгани янгилик эмас. Ота-оналар куни бўйи ишда бўлишади. Уйга келганда эса ҳордиқ чиқариш баҳонасида фарзандларининг кунлари қандай ўтгани билан қизиқишга эринишади. Болаларга ҳам кўпинча ота-оналарининг иш кунини қандай ўтказганлари, уларнинг кайфиятлари қандайлиги, ишда муваффақиятга эришдиларми ёки аксинчами, қизиғи бўлмайди. Оқибатда, оила аъзолари орасидаги масофа узоқлашиб бораверади.

Ҳозир бундай оилалар кам эмас. Ҳатто баъзи хонадонларнинг тунни ўтказиб кетадиган меҳмонхонага айланиб қолганидан ҳайратда қоласиз. Шундай нарсаларнинг олдини олиш, оиламиз аъзоларини бир-бирларига меҳр-муҳаббатли қилиш ниятида бир тадбир уюштирдим. Унга кўра, ҳар куни катталар ишдан, кичиклар ўқишдан қайтган пайтларида дастурхон атрофида йиғиламиз. Сўнг бир пиёла чой ёки бир финжон қаҳва устида ҳар биримиз кунни қандай ўтказганимиз ҳақида гапириб берамиз. Бир одам гапираётганда қолганлар қулоқ солиб туради. Бир киши нари борса 3 дақиқа гапириши мумкин. Узоғи билан 15-20 дақиқа давом этадиган бу ажиб тадбир сабабли биз бутун оиламизда нима бўлаётгани ҳақида бохабар бўламиз.

Биз бу тадбирни мунтазам йўлга қўйдик ва ундан жуда кўп фойдалар олдик. Бир биримизга нисбатан меҳр оқибатимиз зиёдалашди.

Доктор Абдуллоҳ Муҳаммад Абдулмуътининг
"Фарзанд тарбиясида 700 та сабоқ" китобидан
Ғиёсиддин Ҳабибуллоҳ, Камронбек Ислом таржимаси.

Оптимист одам тунда осмонга қараб ойнинг гўзаллигини кўради.

Пессимист одам эса тунда осмонга қараб зулмат ва қоронғуликдан бошқа нарсани кўра олмайди.

Пессимистлар қўлларидаги имкониятларни қийин дея бой беришади.

Оптимистлар эса қийин вазиятлардан имконият чиқаришади.

Ҳолатингизни, бошингизга тушган савдоларни яхшиликка йўювчан бўлинг. Чунки ҳаётга ёрқин нигоҳ билан боқадиган одам ўзига бошқаларнинг муҳаббатини жалб этади, меҳрини қозонади.

Ҳамма нарсанинг ёмон тарафини ўйлайдиган одам аксинча, одамларнинг муҳаббатини ўзидан итариб юборади.

Набий соллаллоҳу алайҳи васалламга бирор ишдан яхшиликка аломат олиш ёқар эди, шум гумон қилишни эса ёмон кўрардилар.

Чунки ишларнинг ёмон тарафини ўйлаш Аллоҳ таолога ёмон гумон қилиш демакдир, яхши тарафини ўйлаш эса Аллоҳга яхши гумон қилишдир.

Мўминлар Аллоҳ таолога ҳар қандай ҳолатда ҳам яхши гумон қилишга буюрилган.

Умидсизлик қалбингизга ўрнашишига йўл қўйиб берманг. Зеро умидсизлик кўзларни кўр қилади, натижада очиқ эшикларни ҳам, сиз томон узатилган қўлларни ҳам кўролмай қоласиз.

Аллоҳ таоло марҳамат қилади: “Сен менинг тарафимдан: «Эй ўз жонларига исроф (жабр) қилган бандаларим, Аллоҳнинг раҳматидан ноумид бўлманг! Албатта, Аллоҳ барча гуноҳларни мағфират этар. Албатта, унинг Ўзи ўта мағфиратли ва ўта раҳмли Зотдир», деб айт” (Зумар сураси, 53-оят).

Вазиятлар ҳар қанча таранглашса ҳам, ҳар қанча чигаллашса ҳам яхшиликка йўяверинглар. Зеро ғам-қайғулар худди булутларга ўхшайди, йиғилиб-йиғилиб ёмғир ёғдиради.

Яхшиликка йўйиш орқали қийинчиликларрни енгиб ўтишга имкон топа оласиз. Аллоҳга таваккал қилинг, Унгагина суянинг ва яхшилик умидида бўлинг, шунда Уни қаршингизда топасиз!

Ҳаётдаги салбий ишлардан юз буринг, назарингизни сизга ишонч бахш этадиган ёруғ томонларга қаратинг!

Сиз оптимист бўлиш ўлароқ доим ишлар ҳозиргидан яхшироқ бўлиши мумкинлигини тафаккур қилинг. Одамлар нарсаларни борича кўришади ва “нега бундай?” дейишади. Сиз эса нарсаларга ўзингиз қандай бўлишини хоҳласангиз шундай кўринг, “нега шундай бўлмаслиги керак?” деб савол беринг ўзингизга.

Шундай одамлар борки, гулни тикони бор дея узмай қўяди. Яна баъзи одамлар тиконнинг устида гул борлигини ўйлашади.

Қуёшга қараб ўсадиган гул булутли кунда ҳам худди шундай туради.

Эдисон эшитиш қобилиятини йўқотганида онаси йиғлаб уни бағрига босган экан.  Шунда у онасига дебдики: “Ўксинманг онагинам! Мен бахтлиман, чунки энди шум хабарларнинг овозларини эшитмайман!”.

Доктор Ҳассон Шамси Пошонинг "Метин қоялар" китобидан

Ғиёсиддин Ҳабибуллоҳ, Неъматуллоҳ Исомов таржимаси.

Бугунги замон диний соҳа ходими фиқҳий ва ақидавий ихтилофли масалалар ҳақидаги илмларни мукаммал билиши, ёшлар онгини ёт ғоялар билан бузишга уринмоқчи бўлган оқим ва фирқаларга илмий асосланган раддиялар бериш ҳар қачонгидан муҳим аҳамият касб этмоқда.

Шу мақсадда Ўзбекистон мусулмонлари идораси тасарруфидаги олий ва ўрта махсус диний таълим муассасаларида 2023-2024  ўқув йилининг 2-семестридан бошлаб битирувчи курс талабаларига “Фиқҳ ва ақидага оид ихтилофли масалалар ечими” номли махсус курс фани ўтилади.  

Мазкур махсус курс дарс жараёнларига таълим муассасаларининг тажрибали фиқҳ ва ақоид фани педагог-ўқитувчилари жалб қилинди.

Маълумот ўрнида махсус курс орқали талаблар Аҳли сунна вал-жамоа мазҳабини мукаммал ўрганиш асносида ихтилофлар моҳиятини тушуниб, унинг мақсадини тўғри англаш, ушбу йўналишга оид ҳар бир масала юзасидан мазҳабошиларнинг фикрини қиёсий ўрганиб, илмий таҳлил қилиш қобилиятига эга бўлишади. 

Ўзбекистон мусулмонлари идораси

Матбуот хизмати

Cавол: Бир танишим бу иш орқали топилган пул ҳалол эмас, бу билан шуғулланма деди. Шу ҳақида маълумот берсангиз.

Жавоб: Бисмиллаҳир Роҳманир Роҳим. Динимизда ҳижома билан шуғулланиш ва у орқали топилган пул ҳам ҳалол бўлади. Бошқа ишларда бўлгани каби ҳижома қилишда ҳам шариат кўрсатмаларига амал қилиниши талаб қилинади. Шунинг учун қон олиш асносида мижозга заруратсиз озор бериш, аврати заруратсиз очилишига йўл қўйиш каби ишлардан сақланиш лозим. Бундан ташқари қон билан ишлаш гигиеник қоидаларга жуда ҳам катта эътибор бериши ҳам зарур. Чунки бугунги кунда қон орқали юқиши мумкин бўлган кўплаб хатарли касалликлар мавжуд экани маълум.

Фиҳқий манбаларнинг ижара бобида бу ишнинг жоизлиги баён қилинган. Жумладан Аллома ибн Нужайм бундай дейганлар: “Ҳажжомлик учун ҳақ олиш жоиз. Бунинг далили “Расулуллоҳ соллаллоҳу алайҳи васаллам қон олдирдирдилар ва қон олувчига ҳақини бердилар”, деган ҳадисдир. Қолаверса, бу Расулуллоҳ соллаллоҳу алайҳи васаллам замонларидан ҳозирги кунимизгача одамлар ичида одат бўлиб келаётган иш. Демак, бу иш ижмога кўра ҳам жоиз бўлади” (“Баҳрур роиқ” китоби).

Мулла Алий Қори раҳмаҳуллоҳ ҳам бу ҳақда бундай деганлар: “Ҳаммомда чўмилиш учун ҳақ тўлаш ҳамда қон олувчининг хизматига пул бериш жоиздир. Қон олувчи, яъни “ҳажжом”га келсак, унинг жоизлигига ушбу ҳадисни далил сифатида келтириш мумкин: Имом Бухорий ва Имом Муслимлар Ибн Аббос розияллоҳу анҳумодан ривоят қилади: “Набий соллаллоҳу алайҳи васаллам қон олдирдилар ва қон олувчига ҳақини бердилар” (“Фатҳу бобил иноя” китоби).

Демак, ҳижома билан шуғулланиш шариатимизда жоиз касблардан саналади. Валлоҳу аълам.

Ўзбекистон мусулмонлари идораси Фатво маркази.

Шу йил 6 февраль куни Ўзбекистон мусулмонлари идораси масъул вакиллари хизмат сафари давомида Қорақалпоғистон мусулмонлари қозиётида диний соҳа ходимлари билан учраш ўтказишди.

Йиғилиш давомида мутасадди вакиллар юртимизда диний соҳада бўлаётган сўнгги янгиликлар, ўтган йили амалга оширилган хайрли ишлар, йўл қўйилган хато ва камчиликлар, бу йил режа қилинган ишлар борасида сўз юритилди.

Мулоқот давомида иштирокчиларнинг соҳани ривожлантиришга оид таклифларини тингланаш баробарида уларни қизиқтирган саволларга атрофлича жавоб берилди.

Ташриф давомида Нукус шаҳрида янгидан қурилаётган масжид қурилиши билан яқиндан танишиб, унинг қурилишига ҳисса қўшаётганлар ҳаққига хайрли дуолар қилинди.  

Қорақалпоғистон мусулмонлари қозиёти