muslim.uz

Воскресенье, 26 Апрель 2020 00:00

Рамазон бу

Ойлар сарвари бўлган,
Рамазон бу, Рамазон.
Қалблар гавҳари бўлган -
Рамазон бу, Рамазон!

Гўзал моҳитобондур,
Бир ойгина меҳмондур.
Покланишга имкондур,
Рамазон бу, Рамазон!

Аввали раҳмат эрур,
Мағфиратга юз бурур.
Дўзахдан нажот берур,
Рамазон бу, Рамазон!

Чин банда қадрин билар,
Силайи раҳм қилар,
Саховатдан нур илар,
Рамазон бу, Рамазон!

Қилиб иймон шукрини,
Ҳақ дин — Ислом фикрини.
Қўймас тилдан зикрини,
Рамазон бу, Рамазон!

Кўнгилларни эритган,
Каломларни дур этган.
Чеҳраларни нур этган -
Рамазон бу, Рамазон!

Дуоларни айлаб сой,
Иймонга бўламиз бой.
Қуръон нозил бўлган ой -
Рамазон бу, Рамазон!

Ҳақ ризоси кўчида,
Тоат кундуз-кечида.
Қадр бордир ичида -
Рамазон бу, Рамазон!

Рўзамиздур қаноат,
Мўъжизаю, синоат.
Рабб олдида шафоат,
Рамазон бу, Рамазон!

Ғаниматдур ҳар дами,
Ихлослилар байрами.
Аллоҳнинг кенг карами,
Рамазон бу, Рамазон!

Ойлар сарвари бўлган,
Рамазон бу, Рамазон.
Қалблар гавҳари бўлган -
Рамазон бу, Рамазон!

Бобур БОБОМУРОД,

Ўзбекистонда хизмат кўрсатган маданият ходими

Бўлим Рамазон-2020

Воскресенье, 26 Апрель 2020 00:00

БАА: полициячилар “ақлли“ қалпоқ орқали коронавирусни юқтирган беморларни аниқлашмоқда

Бирлашган Араб Амирликларида коронавирус инфекциясига чалинган беморни аниқлаб берадиган “ақлли“ шлем яратилди. Унга ўрнатилган инфрақизил нурли камера ва қиёфани аниқловчи технология беш метр атрофдаги 200 кишининг тана ҳароратини кўрсатиб беради. Агар кимнингдир “градуси“ меъёридан ортиқ бўлса, шу заҳоти бу ҳақда сигнал беради.

Бу ҳақда "РИА Новости" ўз манбаларига таяниб маълум қилди.

Айни пайтга келиб Дубай шаҳридаги метро ва автобус бекатларида назорат ҳамда кузатув олиб борадиган барча полициячилар ана шундай темир бош кийим билан таъминланган.

Бугунги кунга келиб БАА COVID-19ни юқтириш ҳолатлари бўйича Форс кўрфазидаги олтита давлат ичида иккинчи ўринда турибди. Мамлакат соғлиқни сақлаш вазирлиги маълумотига кўра, бу ерда 24 апрель куни 525 киши инфекцияга чалинган.

БААда тожли вирус беморларининг умумий сони 9,2 мингдан ортиқ, 64 инсон ушбу касаллик қурбони бўлган.

UzA

Бўлим Дунё янгиликлари