muslim.uz
Муваффақиятга эришишнинг 10 сири
- Умидсизликка тушманг
Ноумидлик – муваффақиятга эришишга тўсқинлик қилувчи биринчи рақамли душман. Шунинг учун дарҳол умидсизликдан халос бўлишингиз зарур. Бунинг энг қулай йўли – Аллоҳ таоло сизга ато этган имкониятлар, қобилиятлар ҳақида тафаккур қилишингиздир. Олимлар айтишларича, инсон ўзига берилган имкониятларнинг фақат 10 фоизини ишлатар экан. Шундай экан, ҳозир сизда камида 90 фоиз имкониятингиз, ишлатилишини кутиб турган яширин қувватингиз бор. Агар уларни ишга сола билсангиз, муваффақиятингиз сари асосий қадамни босган бўласиз.
- Йиқилиш – муваффақиятга эришиш йўли
Кўплаб кашфиётчилар, ишлаб чиқарувчилар жуда кўп марталаб омадсизликка учрайдилар. Лекин улар қайта-қайта уриниб кўрадилар. Бу эса охир-оқибат муваффақиятнинг сабаби бўлади. Агар бир неча марта омадсизликка учрасангиз, бу дегани сиз ҳеч қачон ютуққа эришмайсиз деганимас. Балки бу омадсизлик сиз учун тажриба, малака бўлиб, ундан келгусида юз берадиган тойилишдан сақланишни ўрганасиз. Шунинг учун ҳам “Чумоли мақсадига етиш учун 99 марта уриниб кўради ва юзинчи мартасида етади” деган гап бор.
- Вақтни бошқариш санъати
Вақт орқага қайтмайди. Шунинг учун ҳар бир дақиқадан унумли фойдаланишга ҳаракат қилинг. Вақтни зое қилишдан эҳтиёт бўлинг! Вақт сизни муваффақият сари етаклайдиган хазинадир, фақат бир шарти бор: сиз унинг ҳар бир лаҳзасидан оқилона фойдаланишингиз керак!
- Тўғри қарор қабул қилиш
Нотўғри қарорлар – муваффақиятдан тўсадиган энг катта омиллардан биридир. Шунинг учун бир қарор қабул қилишдан олдин узоқ ўйлаб, масаланинг ҳар тарафини ҳисобга олиб, муносиб вақтни белгилаб, энг намунали тажрибадан фойдаланиб, тўғри қарор қабул қилишингизни маслаҳат берамиз. Шу ўринда бир қоидани эслатиб ўтамиз: “Икки нуқта орасидаги энг қисқа йўл – тўғри чизиқдир”.
- Кичик нарсаларни паст санаманг
Кичик масалаларни арзимас санаманг. Гоҳида озгина фикр катта муаммонинг ечими бўлиши мумкин. Шунинг учун муаммоингиз ҳар қанча катта бўлмасин, унинг ечими жуда оддий бўлади. Фақат бир шарти бор: тангликдан халос бўлишингиз ва муаммога кичик, ечими бор нарса деб қарашингиз керак. Ана шунда тезда ечим топилади. Муҳими шошмасдан фикрланг ва муаммога ўз ҳажмидан катта тус берманг.
- Биринчи қадамнинг аҳамияти
Дунёдаги энг узун саёҳат ҳам биринчи қадамдан бошланади. Агар сиз шу қадамни қўймасангиз, йўлнинг охирига етолмайсиз. Шунинг учун олдингизда катта лойиҳа, қилиниши керак бўлган муҳим иш бўлса, илк қадамни қўйишга иккиланманг! Ана шунда қолган қадамлар унинг ортидан бирма-бир келади. Муҳими, сиз шу биринчи қадамни пайсалга солманг. Лойиҳани амалга оширишдаги, муваффақиятга эришишдаги муҳим омиллардан бири – биринчи қадамни қўйишдир.
- Аниқ мақсад – муваффақият калити
Агар сизда мақсад бўлмаса, ҳеч қачон муваффақиятга эришолмайсиз. Мақсадни аниқ қилиб белгилаб олиш маррага эришишнинг ярмидир. Шунинг учун амалга оширмоқчи бўлган мақсадларингизнинг рўйхатини тузиб, унга эришишга сабаб бўладиган энг афзал йўлни ўрганиб олишингиз керак. Ана шунда Аллоҳнинг изни ила муваффақиятга эришасиз.
- Ростгўйлик
Муваффақиятга эришмоқчи, омадли етакчи бўлмоқчи бўлсангиз, ўзаро муомалаларда ростгўйлик ва бошқаларни ҳурмат қилишни ўзингизга шиор қилиб олинг. Шунда атрофингиздаги инсонларнинг ишончини, ҳурматини қозонасиз. Айтадиган ҳар бир сўзингиз рост бўлишига эътибор беринг ва шунга урининг. Билингки, муваффақиятга эришиш ва яхши раҳбар бўлишнинг энг қисқа йўлларидан бири – ростгўйликдир.
- Вазиятни ва ҳиссиётларингизни бошқаринг
Омадга эришишнинг энг муҳим омилларидан бири – атрофингиздаги вазиятни ва ҳиссиётингизни идора қилишингиздир. Агар шундай қилмасангиз, мавжуд вазиятнинг ўзи сизни истаган куйига солиши ва тойилтириши мумкин. Шунинг учун ҳис-туйғуларингиз ва фикрларингизни назорат қила олинг. Омадга эришишингиз учун муносиб вақт ва шароитни изланг. Ҳеч қачон тасодифан омадга эришаман деб ўйламанг!
- Меҳнат қилиш
Ишлаш – мақсадга етишишнинг энг асосий йўлларидандир. Муваффақиятга эришган инсонларнинг таъкидлашича, омаднинг 95 фоизи мунтазам ва давомли меҳнатдир. Ақл-заковат эса муваффақиятга эришишга атиги 5 фоиз ҳисса қўшади. Шунинг учун аниқ мақсадни олдингизга қўйиб олинг-да, меҳнат қилинг, ишланг, изланинг. Яхши натижани истасангиз, тиришиб, сабр-бардош билан ишланг. Ана шундагина Аллоҳнинг изни ила меҳнатингизнинг самарасини кўрасиз.
www.kaheel7.com сайтидан
Нозимжон Иминжонов таржимаси
Гиёҳвандлик – аср вабоси
Бугунги кунда энг долзарб муаммолардан бири – гиёҳвандликдир. Аллоҳ Таоло инсонга ақл бериб, барча мавжудотдан устун қилди, мукаррам қилди, азизлади. Инсон ақли билан нима фойда-ю, нима зарар эканлигини ажратади. Ақлга путур етказадиган барча нарса ҳаромдир. Ислом дини ақл йўлига ғов бўладиган маст қилувчи барча воситаларни, шу жумладан, ҳашиш яъни гиёҳвандликни ҳам ҳаром қилди.
Расулуллох соллаллоҳу алайҳи васаллам айтдилар: “Ҳар бир маст қиладиган нарса хамрдир ва шунинг учун хар бир хамр ҳаромдир”. Хамр ичувчига қандай жазо белгиланса, уни истеьмол қилувчига ҳам шундай жазо белгиланади. Уни ейувчи ҳам, уни севувчи ҳам Аллоҳ ва унинг Расулининг ғазабига учрайди. Уни истеьмол қилиш инсоннинг динига, ақлига, хулқига, табиатига зарар бўлади. Ибн Ҳожар роҳматуллоҳи алайҳ гиёҳвандлик етказадиган 120 хил зарарни санадилар. Бир марта истеьмол қилган инсон бу моддага жуда тез ўрганиб қолади. Тананинг бунга эҳтиёжи кескин ортиб боради. Тананинг фаолияти сусайиб, қарамлик ҳолати юзага келади. Гиёҳвандлик инсон фикрини ўтмаслаштиради, хотирани сусайтиради, ибодатдан тўсади, шарму-ҳаёни кеткизади, меҳр-муҳаббатни йўқотади. Гиёҳвандликка ружу қўйган одам, оиласидан бора-бора ажралади. Чунки уни кўзига на оиласи, на ота-онаси, на фарзандлари кўринади. Унга ўша 2 дақиқалик роҳат бўлса бас. Молини ҳам, уйини ҳам ва охирида ғурурини ҳам сотади. Гиёҳванд кишилар ўзини оридан, шаънидан ҳурмати, касб-ҳунаридан айрилади. Оиласи бузилади, фарзандлари тирик етимдек бўлиб қолади. Қисқаси гиёҳванд инсон нафақат ўзига балки яқинларига ҳам бир умр азоб беради. Гиёҳванд инсон худдики бир қуриб бораётган дарахт кабидир...
Шариатимиз нозил бўлганидан бери гиёҳвандликнинг ҳаром экани, уни ҳалол санайдиган киши кофир бўлиб қолиши айтилган ва барча уламолар шунга иттифок қилган. Шунингдек, гиёҳвандлик моддаларини ейиш, ичиш, ҳидлаш ва игна орқали қабул қилиш мутлақо ҳаром эканини таькидлашган. Гиёҳванд моддаларни истеъмол қилиш, ишлаб чикариш, уларнинг тижорати билан шуғулланиш оқибати бахтсизликдир. Уламолар гиёҳванд моддалар орқали қилинган касб ҳаромдир, уларни таьсири остида ўқилган намоз қабул эмас, улардан келган фойда ҳам ҳаром уни садақа ҳам қилиб бўлмайди, деганлар.
Бирлашган Миллатлар Ташқилоти Бош Ассамблеясининг 1987 йил 7 декабрда қабул қилинган резолюциясига кўра, 26 июнь халқаро гиёҳванд моддаларни истеъмол қилиш ва уларни ноқонуний айланишига қарши курашиш куни сифатида белгиланган. Гиёҳвандлик хавфи ҳозирги кунда жуда юқори. Бир йилда гиёҳвандлик орқасидан 73 миллиард АКШ доллари микдорида маблағ айланишини ҳисобга олсак, бу жирканч ишни орқасида нималар борлигини тушунасиз. Дунё бўйлаб асосий гиёҳвандлик етиштирувчи давлатлар Афғонистон, Колумбия, Покистон, Венесуэла киради. Бугунги кунда 250 миллиондан зиёд гиёҳвандлар рўйхатга олинган.
Пайғамбаримиз соллаллоҳу алайҳи ва саллам марҳамат қиладиларки: “Сизлардан ким ёмон, мункар, қабиҳ ишни кўрса, уни қўли билан ўзгартирсин, агар унга қодир бўлмаса, тили билан қайтарсин, тили билан монеьлик қила олмаса, унда қалби билан қайтарсин!
Ушбу ҳадисга биноан гиёҳвандликка қарши курашиш ҳаммамизнинг бурчимиз. Фарзандларимизнинг ҳар бир қадамидан хабардор бўлишимиз зарур. Лоқайд бўлмаслигимиз керак. Аллоҳ барчамизни бундай офатлардан, бундай балолардан Ўзи омон сақласин. Юртимизни тинч, халқимизни фаровон қилсин. Омин.
Ш.Камолов,
Бухоро шаҳар “Маҳмуд Торобий”
жоме масжиди имом-хатиби
Савол-жавоб: Маҳрнинг ози қанча ёки бир дирҳам неча грамм?
Cавол: Масжидимиз имомининг айтишича, маҳрнинг энг ози ўн дирҳам экан. Унинг пулимиздаги қиймати неча сўм бўлади?
Жавоб: Бизнинг мазҳабимизда маҳрнинг энг оз миқдори ўн дирҳам кумуш деб белгиланган. Кўпининг эса чеки йўқ, аммо ҳадиси шарифларда маҳрнинг ҳам озига қаноат қилган аёллар мақталган.
Бир дирҳам замонавий ўлчовда 3,12 граммдир, уни ўнга кўпайтирсак 31,2 грамм бўлади. Никоҳ шартномаси тузилаётганида 31,2 грамм кумушнинг қиймати сўмда қанча бўлса, ўша маҳрнинг энг кам миқдори бўлади. Бундан маҳрга ана шу миқдордан ортиқ бериб бўлмас экан, деган хулоса чиқмайди. Динимиз жамиятнинг барча қатлами манфаатини тенг ҳимоя қилгани учун уларнинг энг камбағалига ҳам малол келмайдиган миқдорни белгилаган. Кимнинг шароити кўтарса, бундан кўпроғига қодир бўлса, кўпроқ ҳам бераверади.
Туркия Президентига ҳамдардлик
Президент Шавкат Мирзиёев Туркиянинг Текирдоғ вилоятида рўй берган поезд ҳалокати оқибатида кўплаб инсонлар қурбон бўлгани ва жароҳатлангани муносабати билан Туркия Республикаси Президенти Режеп Таййип Эрдоғанга ҳамдардлик билдирди.
Бу ҳақда Ўзбекистон Республикаси Президенти Матбуот хизмати хабар қилмоқда.
Ривоят: Барча амал ниятга боғлиқ
Ҳар кимга ниятига яраша.
Луқмони ҳакимнинг қўли очиқлиги, сўраганга қарз бериб, ёзиб қўймаслигини билган бир киши еб кетиш нияти билан ундан минг танга олтин олди. Йўлда дам олгани ўтириб, пулни қизил рангли бир матога ўраб қўйди. Бир қуш уни гўшт хаёл қилиб олиб қочди ва Луқмоннинг уйи устидан учиб ўтаётганида тумшуғидан тушириб юборди. Луқмон ўзи берган олтинларни таниб, олиб қўйди. Ҳалиги одам келиб, яна шу ният билан минг танга олтин олди. Лекин, анҳордан кечиб ўтаётганида уни сув олиб кетди. Анҳор Луқмоннинг уйи ёнидан ўтар эди. Луқмон олтинни таниб, яна олиб қўйди. Ўша одам учинчи марта қайтармаслик ниятида минг олтин олиб, уни ҳам бир сабаб билан йўқотди. Тўртинчи марта ниҳоят, савдо-сотиқ билан шуғулланиш ва фойда кўрса, Луқмонга тўрт минг қилиб қайтариш нияти билан минг олтин сўради. Бу гал фойда кўрди ва Луқмонга тўрт минг олтин олиб келди, Луқмон минг олтинни олиб, қолганини қайтариб берди.
Манба: islaminstitut.uz
Видеолавҳалар
