muslim.uz
Рўза — қоринни оч қолдириб, қалбни тўйдиришдир
Рўза — бандани дунёда ифторга, уқбода ифтихорга етказадиган қутлуғ ибодат.
Рўза — нафсни сабр қафасида тутмоқ, ишқ самосидат руҳга тутунмоқ.
Рўза — ғафлатдан қутлуғ тирилмоқ, шаҳватга қарши курашмоқ.
Рўза — зоҳиран қоринни оч қолдириш, теран нигоҳ ила эса қоринни оч қолдириб, қалбни тўйдирмоқ.
Ғайрат ва муҳаббат билан ёзилган дастурхон дунёда қанчадан қанча эшикларни очишга кучи етади, лекин бир мўминнинг кичкина оғзини очолмайди.
Рўза ўзлигимизга уюштирган саёҳатимиз
Рўза — бизга йўқсилга яқин бўлишни, фақир билан баҳам кўришишни, дўст билан қадрдон бўлишни ўргатган муаллими азиз.
Рўза — муҳтожларга бориш билан, ўзимиз, ўзлигимизга келган муҳташам саёҳат.
Рўза — дарёда тополмаганимиз мусаффо ҳаётни, томчида топмо санъати.
Рўза — исёнкор очлик эълони эмас, итоаткор бандалик вазифаси.
Рўза — машаққатда тобланмоқ, ишқда қоврулмоқ, сабр билан тўғриланмоқ ва ризо билан тўймоқ.
Рўза — мукофотини аниқлаш учун математика илми чорасиз қолган ибодат.
Меҳр-шафқат мавсуми
Оғизнинг чанқоқлик билан қуришига мукофот қилиб, кўнгилнинг нурдан ясалган косалар билан ишқ ирмоғидан сувга қониши.
Рўза — ичимиздаги душманга нисбатан энг буюк жиҳоднинг ягона номи.
Рўза — бандани Аллоҳдан узоқлаштирган ёмонликлардан ҳимояланиши учунбутун умматларнинг пешонасига ёзилган раййон муҳри.
Рўза — ҳаёт йўлида Қуръон чироғи билан Қадр топмоқлик.
Рўза — дунёда гуноҳларни, уқбода дўзах оловини сўндирмоқ учун муҳаббат билан ёнмоқ санъати.
Рўза — меҳр ва шафқатнинг китоблардан қалбларга ҳижрат қилгани эҳсон мавсуми.
Рўза — қўлимизни аввал виждонимизга, кейин эса яхшилик учун чўнтагимизга олиб борган инфоқ баҳори..
Саноқли кунларнинг саноқсиз яхшиликлар ибодати
Рўза — дунё ғала-ғовурида йўқотиб қўйган ўзлигимизни, кимсасизларни хотирдамоқ билан топган дийдор вақти.
Рўза — саноқли кунларнинг беҳисоб яхшиликларининг ибодати.
Рўза — ҳамма нарсага эришиш билан қидирган ҳаловатни, ҳеч нарсани ўзимизники дея билмаслик билан топган хотиржамлигимиз василаси.
Рўза — жисм кемаси барча ҳаромларга ёпиб, ҳалол денгизининг саломат соҳилига ихлос капитанлиги билан чиққанимиз қутлуғ сафар.
Рўза — бола учун завқли ўйин, ёшлар учун ўзига хос фазилат, кексалар учун азиз хотира, аёллар учун мустасно зийнат.
Рўза — қалбдаги ниятнинг ҳолда самимиятга, ҳаётда маданиятга айланиши.
Рўза — очкўзнинг зиндонидан, кўнгли тўқнинг саройига юксалиш.
Рўза — кўкда ҳилолни, ерда ҳалолни кузатишнинг шуури.
Рўза — нафс тарбияси, кўнгил тазкияси, қалбдаги кирларнинг тасфияси...
* Тазкия — зийнатламоқ
* Тасфия —покламоқ.
"Ислом ва эҳсон" сайтидан олинди.
Таржимон: Умида Адизова
Қоримиз АҚШдаги масжидда хатми Қуръон ўтказмоқда
Хабар берганимиздек, Ўзбекистон мусулмонлари идораси муборак Рамазон ойини юқори савияда ўтказиш ишлари қизғин давом этмоқда. Жумладан, хориж давлатлари диний идораларидан келган таклифлар асосида юртимиз қорилари чет мамлакатларда таровеҳ намозларида Қуръони каримни хатм қилиб бериш ва диний-маърифий тадбирлар ўтказиш учун сафарга жўнаб кетишди.
Жумладан, АҚШ даги Туркистон – Америка жамиятининг расмий таклифига биноан Тошкент шаҳридаги “Аҳмаджон қори” масжиди имом-хатиби, 2018 йилги Ўзбекистон Қуръон мусобақаси ҳакамлар ҳайъати аъзоси Муҳаммадий қори Эргашев АҚШга жўнаб кетди ва мутасадди вакиллар томонидан кутиб олинди. Муҳаммадий қори Эргашев АҚШ да Рамазон ойи давомида мусулмонларга таровеҳ намозини адо этиб, диний – маърифий суҳбатлар ўтказиб беради.
Маълумот учун, бир неча йиллардан буён имом-домлаларимиз Туркистон – Америка жамияти таклифига кўра, Рамазон ойида АҚШда бўлиб қайтган эди. Ўтган 2020 йили пандемия сабаб қориларимизнинг хориж сафари ташкил этилмади. Жорий йил Рамазон ойида қориларимиз АҚШ, Россия, Украина ва бошқа мамлакатларда хатми Қуръонлар ва диний-маърифий суҳбатлар ўтказиб қайтишади.
Сафар тафсилотлари ҳақида порталимиз орқали хабар бериб борамиз, иншоаллоҳ.
Ўзбекистон мусулмонлари идораси матбуот хизмати
Рўзага доир 3 саволга 3 жавоб
Савол: Рўзадор одам қон анализи топширса бўладими ?
Жавоб: Бисмиллаҳир Роҳманир Роҳим. Ҳа, рўзадор одам турли мақсадларда қон топшириши мумкин, бу иш билан унинг рўзаси очилмайди. Чунки рўза ичга кирувчи нарсалар сабабли бузилади. Лекин рўзадор қон топширса, заифлашиб қоладиган бўлса, макруҳ бўлади. Бу ҳолатда қон топширишни ифтордан кейинга қолдириш мақсадга мувофиқ бўлади. Валлоҳу аълам.
Ўзбекистон мусулмонлари идораси Фатво ҳайъати.
Савол: Рўзадор таҳоратда оғиз-бурнини чайиши мумкин?
Жавоб: Бисмиллаҳир Роҳманир Роҳим. Рўзадор ҳам таҳорат қилганда оғиз ва бурнини чайиши жоиз, лекин муболаға қилиб, ғарғара қилмайди, бурнига қаттиқ сув тортмайди. Таҳорат пайтида рўзадорнинг оғзидан ва димоғидан ичига сув ўтиб кетса, рўзаси бузилади. Рамазондан кейин бир кун қазо рўзасини тутиб беради. Валлоҳу аълам.
Ўзбекистон мусулмонлари идораси Фатво ҳайъати.
Савол: Саҳарликда таҳоратсиз рўзани ният қилса бўладими?
Жавоб: Бисмиллаҳир Роҳманир Роҳим. Албатта, саҳарликда таҳоратсиз бўлсада рўзани ният қилиш мумкин. Ният дуруст бўлиши учун таҳорат шарт қилинмайди. Таҳорат – намоз ўқиш ва Қуръони каримни ушлаш каби ибодатларда шарт бўлади. Ҳатто, жунуб киши баданидан нажосатни кетказиб, қўл-бетини ювиб, оғиз бурнини чайиб, саҳарлик қилиши ва рўзани ният қилиши жоиз. Табиийки, оғиз ёпгандан кейин ғусл қилиб олади. Валлоҳу аълам.
Ўзбекистон мусулмонлари идораси Фатво ҳайъати.
Масжиди Набавийда Рамазон ойида ибодат қилиш учун талаблар қўйилди
Пайғамбар масжиди ишлари бўйича Бош бошқарма COVID-19 га нисбатан эҳтиёт чораларига мувофиқ масжидда Рамазон ойида тоат-ибодатлар бўйича саъй-ҳаракатларни фаоллаштирди.
Саудия матбуот агентлиги (SPA) маълумотларига кўра, фақат икки дозадаги коронавирус вакцинасини олган, вирусдан халос бўлган ёки масжидга боришдан 14 кун олдин битта вакцинани олган одам Равзага қатнаши ва масжидда намоз ўқиши мумкин. Ҳар бир инсоннинг эмлаш ҳолати Tawakkalna иловасида рўйхатдан ўтган бўлиши керак.
Islam.ru маълумотларига кўра, Рамазон ойида масжид қавми ва меҳмонларга кунига 100 000 шиша сув тарқатилади, бу уч миллион шиша замзам сувини ташкил этади. Ҳар бир намозхонга ифторлик учун хурмо ва сув алоҳида тақдим этилади. Масжид ҳовлиларида суҳур ва ифторни ташкил қилиш ва тарқатиш таъқиқланади.
Эътикоф (маълум бир кун масжидда қолиб, ўзини ибодатга бағишлаш) пандемия туфайли кетма-кет иккинчи йилга тўхтатилади.
Ўзбекистон мусулмонлари идораси матбуот хизмати
Ақийдавий ихтилофлар сабаби
«Кейинги пайтда саҳнага чиққан ақидавий ихтилофлар сабаби кўп ўйлантираётган ва қийнаётган эди.
Мусулмонларни бўлакларга бўлиб ташлаётган бу кўриниш мени қаттиқ изтиробга солиб, унинг сабаблари ва муолажалари ҳақида жиддий изланаётган эдим. Ва булар натижасида айрим хулосаларга келган ҳам эдим.
Бугун ана шу хулосаларимни тўлдирадиган қимматли жумлаларни учратдим. Улар марҳум шайх Муҳаммад Саид Рамазон Бутийнинг «Тавҳидий мазҳаблар ва замондош фалсафалар» китобларидаги қуйида келтирадиганим сатрлар эди», дейди устоз, Ислом олими Мубашшир Аҳмад домла.
Қуйида ушбу иқтибосни келтириб ўтамиз:
«Агар ақида асослари қалбий таслимият билан ҳимояланган ва асл инсоний фитрат тўсиқлари билан ўралган бўлса, одатда нафснинг ташидан келадиган ташвиш ва шубҳалар ақлни эгалламаган бўлса, ихтилоф омилларидан бирор нарса бундай ҳолдаги киши онгига кириб кела олмайди.
Ихтилоф бир нарсада чуқурлашиш натижасида пайдо бўлади. Чунки изланиш олиб бораётган киши бунда аниқ зоҳирдан зонний ботинга ўтган бўлади.
Агар изланувчилар ана шундай ботинга етиб боришса, ихтилоф қилишдан омонда бўлишмайди. Чунки бунда далилларнинг кўпи зонний бўлади. Бу эса, иттифоққа эришишга йўл бермайди.
Қалбий таслимият эгалари эса ихтилофга ўрин бермайдиган зоҳирдан бошқа томонга ўтиб кетишмайди.
Зеро, улар зоҳирнинг ортида бўлган ноаниқлик ва муаммоларга эътибор қаратишмайди. Масалани мушоҳада қилишдан кўз юмишади ва фикрий тааммул эшикларини ёпишади.
Ишни Аллоҳ азза ва жаллага таслим этишади. Сўнг, асосий ўқ томир ва равшан куллий зоҳирни маҳкам тутишга қайтишади. Бунда ҳеч қандай хилофга ўрин қолмайди.
Бу илк даврлардаги Расулуллоҳ соллаллоҳу алайҳи васаллам асҳобларининг ҳолатлари эди. Агар ҳолат мана шундай давом этганида мусулмонлар сафига ихтилоф сизиб кирмаган ва турли мазҳаб-фирқалар пайдо бўлмаган бўлар эди».
(Шайх Муҳаммад Саид Рамазон Бутийнинг «Ал-мазоҳибут тавҳидийя вал фалсафотул муосира» китобларидан, 45-46 бетлар. «Дорул-фикр» нашриёти, 2008-й.)
Бу иқтибосдан маълум бўляптики, агар мусулмон Аллоҳнинг борлиги ва бирлигига иймон келтириш билан кифояланиб, қолган масалаларни Аллоҳга таслим эта олса, ихтилофлардан омонда бўлар экан.
Мубашшир Аҳмад
Видеолавҳалар
