muslim.uz
Ўзингизга боқмайсизми?
Инсондаги бу гўзал хилқат, ажиб юз, хушбичим қомат, кўркам қош-кўзлар, мутаносиб қўл-оёқлар, бир нафас ҳам ором олмай, тўхтовсиз ва беминнат ишлайдиган ички аъзолар ўзича пайдо бўлиб қолмаган. Минглаб мўйқалам усталари ўхшатиб чизолмаган, минглаб шоирлар таърифини келтиролмаган инсон аъзоларининг Яратувчиси, Мусаввири – Аллоҳ таолонинг Ўзидир! Инсоният илм-фанда қанчалик илгарилаб кетмасин, неча-неча кашфиёт ва ихтиролар қилмасин, Аллоҳнинг ҳикмати, мўъжизаси олдида буларнинг ҳаммаси жозибаси, қиммати, аҳамиятини йўқотиб қўяверади.
Аллоҳ таолонинг ҳикмати ва санъатини қарангки, инсон вужудига юз триллион дона ҳужайрани жойлаб қўйибди. Энг ҳайратланарлиси, ана шу ҳужайраларнинг ҳар бирига алоҳида вазифа белгилаб берилган, уларнинг ядросига ДНК молекулалари жойлаб қўйилган. Яна бир ҳайратга солувчи далилга эътибор беринг: ана шу молекулаларнинг ҳар бири бир миллион саҳифага сиғадиган ахборотни ўзига жойлаган. Улар инсон танасидаги модда алмашинуви ва бошқа ҳаётий жараёнларнинг амалга ошуви учун масъулдир.
Инсон тана аъзоларини, умуман, одам фаолиятини бошқариб турадиган муштдеккина миямизни олиб кўрайлик. Ана шу бир парча «лиқиллаган модда» минглаб энг «ақлли» техника бажаришга қодир бўлмаган амалларни бир зумда уддалай олади. Ана шу кичкина жисмдаги асаб толалари ер юзидаги телефон симларидан ҳам кўп экан. Мия иссиқликни сезадиган икки юз минг тирик ҳужайра, оғриқни сезадиган 3,5 миллион ҳужайра ва ҳоказолардан иборат. Бундан ташқари инсон миясининг ҳар куб сантиметрида 225.000.000 ҳужайра бор. Ваҳоланки, ҳозирги ўта «ақлли» электрон машиналарнинг бир куб см. қисмида 2250 элемент мавжуд. Демак, ҳар қандай электрон «мия» инсон миясидан юз минг марта оддийроқ экан.
Бугунга қадар миядаги ўн тўрт миллиард асаб толасининг атиги беш фоизи, шунда ҳам ҳид, таъм билиш, оғриқ сезиш, очиқиш каби шартли кўникмаларда иштирок этадиган қисмигина ўрганилган. «Инсон ўз фаолияти давомида миясининг 0,5-1,0 фоизини, хотирасининг беш фоизини ишлатишини инобатга олсак, у ҳали очилмаган бир мўъжиза, коинот каби сирли ва мураккаб хилқат эканига ишонамиз» (Морис Бокай, «Қуръон, Таврот, Инжил ва ҳозирги замон», Париж, 1988)
Ёки бу ёруғ оламни илғаш, унга нигоҳ ташлаш воситаси бўлган кўзларимизни олиб кўрайлик. Шундай кичкина аъзоимизнинг тузилишини, унинг ишлашини текширган ҳар бир киши Аллоҳ таолонинг санъатига, ҳикматига тасанно айтмай иложи йўқ! Кўз ўзидан суюқлик (ёш) чиқариб, ўзини намлаб, ювиб, поклаб, ҳатто бегона жисмларни эритиб туради. Кўз қорасидаги бениҳоя кичик пайлар кўз қорасининг ўртасидан чиқиб, четига тўғри чўзилиб кетган, баъзиси эса халқасимон. Ёруғ оз бўлса, тўғри пайлар йиғилади, натижада кўз қорачиғи кенгайиб, кўзга кўпроқ ёруғлик тушади. Ёруғ кўпайиб кетса, энди халқасимон пайлар йиғилади. Оқибатда, кўз қорачиғи торайиб, ёруғ кам тушади. Кўриш учун ёруғлик кўзга тушиб, ички қаватдаги кўриш пайларига тушиши лозим. Мазкур пайлар ёруғлик таъсирини бир неча ҳисса ошириб беради ва инсон мўлжаллаган нарсасини кўра олади.
Кичкинагина кўздаги аъзолар фаолиятини, жойлашув низомини, ўта нозик ва мураккаб томирча ва пардаларни онанинг қорнига ким жойлаб қўя олади? Албатта, Буюк Холиқимиз Аллоҳ таолонинг илоҳий қудрати бу нозик ишнинг удасидан чиқади.
Бошқа тана аъзоларимизга ҳам бир назар солинг-чи: Ер юзидаги энг турфа ҳидларни бир-бирига аралаштириб юбормай, ажратиб илғай оладиган, ўпкамизга соф ҳавони ҳайдаб берадиган бир парча гўшт – буруннинг хизматини қайси машина ёки асбоб бажаришга қодир? Сон-саноқсиз товуш ва шовқинлардан фақат кераклисини топиб эшитадиган ва бу ҳақда шу заҳотиёқ адашмай хабар берадиган оддийгина қулоқнинг вазифасини яна бошқа нима уддалай олиши мумкин? Ҳеч нарса! Ҳатто ихтирочилар ясаган энг мукаммал эшитиш асбоблари ҳам қулоқ ўрнини босолмайди.
Ёхуд бир «тишламгина гўшт»дан иборат тилингизни олиб кўринг: агар шу тил бўлмаганида турфа ноз-неъматларнинг мазаси ва таъмини била олармидик? Овоз чиқара ёки гапира олармидик? Оғиз бўшлиғи қуриб қолмаслиги учун томоғимизни ҳўллай олармидик? Томоқдан ўтаётган овқатни саралаб, ютиб, ҳазм қилиб олиш учун тилдан ўзга бирор нарса топа олармидик? Йўқ!
Энди бир тасаввур қилиб кўринг: ана шу кўзлар бўлмаса, биз бу ёруғ оламнинг гўзалликларию турфа рангларини, махлуқотлар қиёфасини, борлиқ-табиатда барқ уриб яшнаётган минглаб хил гул-чечакларнинг жозибасини кўра олармидик? Тун ва кунни фарқлай олармидик? Одамларни ажрата олармидик? Ёки бурун ишламай қолса, автомобил ўтхонасидан чиққан бадбўй ис билан мушк-анбарнинг хушбўй ҳидини фарқлай олармидик? Еяётган таомимизнинг ҳидини ҳидлагачгина унинг нечоғли мазали эканини билишга ақлимиз етармиди? Бурундаги қайси нозик «асбоблар» фаранг атири билан сассиқ алафнинг ҳидини аралаштирмай ажратиб беради?
Инсоннинг дам олмай, чарчашдан «нолимай», ўз вазифасини сабот ва содиқлик билан бажарадиган ички аъзоларининг ишлашига не дейсиз? Кечаю-кундуз тўхтамай, бутун тана аъзоларига тинмай иссиқ қон ҳайдаб, ҳаёт бағишлаб турувчи юракни ким тўхтовсиз ишлатиб қўйган? Еган овқатларимизнинг керакли, фойдали қисмини танага сингдириб, ортиқчасини чиқариб ташлайдиган ошқозон-ичакларимизни ким бошқариб туради? Ўрнини ҳеч нарса босолмайдиган ўпка, жигар, буйрак каби тана аъзоларимиз қайси қонунларга буйсуниб, бу қадар итоаткорлик билан фаолият кўрсатади?
Иннайкейин, инсон дегани фақат моддий тана аъзоларидан иборат эмас-ку! Ундаги руҳ ва ақлнинг сир-синоатини инсоният ҳали англаб етгани йўқ ва бунга қодир ҳам эмас! Инсондаги руҳий олам, ҳис-туйғулар, фикрлаш, хаёл суриш, туш кўриш имконияти наҳотки ўз-ўзидан пайдо бўлиб қолган бўлса ёки тарбия жараёнида ўргатилган бўлса? Бу оний, ноёб хислатлар Аллоҳнинг ғайбидан, мўъжизасидан бошқа нарса эмас!
Ўзининг бутун турган-битгани – тана аъзоларию ҳис-туйғуларигача, аъзоларининг бекаму-кўст ишлашию жараёнларнинг илоҳий бир низом асосида бир маромда, бузилмай давом этишигача гувоҳ бўлган инсоннинг шундан кейин қудрати улуғ Холиққа, тенги ва ўхшаши йўқ Мусаввирга, улуғ Яратгувчига тасанно ва ҳамд-сано айтмасдан ўзга иложи қолмайди.«Батаҳқиқ биз инсонни энг яхши суратда яратдик» ("Тийн" сураси, 4-оят).
Аҳмад МУҲАММАД
Манба: https://azon.uz
Аллоҳнинг Каломи Аллоҳнинг борлигига далилдир!
Агар биз Қуръони Каримни яхшилаб ўргансак, ҳар бир оятда, ҳар бир калимада Ислом дини ҳақида шубҳа қилувчи кимсага Аллоҳ таолонинг борлиги, бирлигини кўрсатадиган мўъжиза бордир!
Аллоҳ азза ва жалла Қуръондаги ҳар бир оятни “оят” деб атади. “Оят” сўзи бирорта инсон унга ўхшаганини келтира олмайдиган ғайриоддий нарса, мўъжиза маъноларини ифода этади.
Дарҳақиқат, шундай ҳам бўлди! Кўплаб кимсалар бир минг тўрт юз йилдан бери Қуръонга ўхшаш ёки унинг ўнта сурасига ёки бўлмаса битта сурасига ўхшаш сура тўқишга уринмоқдалар, аммо эплай олмаяптилар ва эплай олмайдилар ҳам.
Бир куни даҳрийлардан бири мендан “Аллоҳнинг борлигига илмий далил нима?” деб сўради. Мен унинг бу саволига жавобан: “Аллоҳнинг борлигига илмий далил Аллоҳ субҳанаҳу ва таолонинг Каломидир!” дедим.
Буюк Холиқни биз кўра олмаймиз. Аллоҳ таолонинг махлуқларидан кичкинаси бўлмиш Қуёшга тик қарай олмаймиз. Коинотдаги кичик махлуққа бевосита қарай олмаяпмиз-у, Буюк Холиқни қандай кўрамиз?! Бизга маълумки, коинотда миллиардлаб галактикалар, ҳар бир галактикада эса юз миллиардлаб Қуёш каби юлдузлар бор. Шу қуёшлар, галактикалар коинотнинг бир қисмини ташкил этади. Чунки инсон ҳали коинотни тўла ўрганганича йўқ. Ана шундай улкан коинот ичидаги нуқтадек жисм бўлмиш Қуёшга қарай олмайдиган заиф инсон ушбу коинотнинг Буюк Яратувчисини қандай кўради?!
Аллоҳ таоло Қуръони Каримда шундай деган:
وَسِعَ كُرْسِيُّهُ السَّمَاوَاتِ وَالأَرْضَ
“Унинг курсиси осмонлару ерни қамраган” (Бақара сураси, 255-оят).
Унинг Курсиси шундай бўлгач, Арши қандай экан?!
Биз Уни кўра олмаймиз, аммо Унинг Каломини эшитиб, ўқий оламиз. Қуръон – Унинг Каломидир! Аллоҳнинг борлигига энг кучли илмий далил – Қуръондир!
Агар Қуръонни очиб, ундаги оятларни яхшилаб тафаккур қилсак, ундаги ҳар бир сура, ҳар бир оят, ҳар бир калима бу китобни Аллоҳ таоло нозил этганига гувоҳлик беради.
Қуръондаги мингдан ортиқ оятлар коинот, борлиқ, учувчи юлдуз, қора туйнуклар, Қуёш, Ой, юлдузлар, уларнинг ҳаракати, денгизлар орасидаги тўсиқлар, улардаги оқимлар, тўлқинлар ва ҳоказолар ҳақида сўз юритади.
Набий соллаллоҳу алайҳи васаллам фалакиёт олими эдиларми?
Набий соллаллоҳу алайҳи васаллам денгизлар, уларнинг қаъридаги оқимлар, тўлқинлар ҳақида билимга эгамидилар?
Ахир инсоният бу нарсаларни яқин йиллар ичида, аниқроғи ўтган асрда кашф этди-ку!
Пайғамбаримиз соллаллоҳу алайҳи васаллам умрлари давомида бирор марта денгизга чиқмаган, кемага минмаган эдилар. Шундай зот денгизларнинг, улардаги мавжу тўлқинлар ҳамда оқимларнинг ҳаракатини қаердан билиб айтдилар экан?!
Шунингдек, Қуръони Каримда инсоннинг яратилиши, ҳомиланинг босқичлари ҳақида сўз юритилган. Набий соллаллоҳу алайҳи васаллам тарихда илк бор ҳомиланинг қачон инсон шаклига ўтишининг аниқ кунларини белгилаб бердилар. У зот алайҳиссалом муборак ҳадисларидан бирида ҳомила онанинг қорнида 42 кечалик бўлганда инсон суратини ва шаклини олиши ҳақида хабар берганлар.
Абдуллоҳ ибн Масъуд розияллоҳу анҳудан қилинган ривоятда: “Агар нутфа қирқ икки кунлик бўлса, Аллоҳ унга (нутфага) бир фариштани юборади. Бас, Аллоҳ ўша нутфага шакл беради, қулоғи, кўзи, териси, гўшти ва суякларини яратади...” деганлар. Имом Муслим ривоят қилган.
Эътибор берайлик, севикли Ҳабибимиз соллаллоҳу алайҳи васаллам бу ҳадисда ҳомиланинг инсон шаклини олиш кунини аниқ рақамлар билан баён қиляптилар.
Бундан ўн тўрт аср олдин бу каби аниқ рақамни ким айта оларди?! Қаердан билиб айта оларди?!
Маълумки, хамр, қон, тўнғиз, қимор инсониятга зарарли бўлгани учун ҳаром қилинган. Пайғамбаримиз соллаллоҳу алайҳи васалламга хамрнинг, тўнғизнинг, қиморнинг, қоннинг зарарли нарса эканини ким айтди?!
Маълумки, Қуръонда асалнинг шифо экани айтилган. Ҳозирги тиббиёт ҳам инсонларга асални истеъмол қилишни, унда кўп шифо борлигини таъкидлаяпти.
Пайғамбаримиз соллаллоҳу алайҳи васалламга асалнинг шифо эканини ким айтди экан?!
Пайғамбаримиз соллаллоҳу алайҳи васалламга тоғларнинг қозиқ каби ерга кириб туришини, булутларнинг ҳолати ва ёмғир ёғиш жараёнини ким ўргатди экан?!
Бу маълумотлар, бу ҳақиқатларнинг барчасини у зот алайҳиссаломга Аллоҳ таолонинг Ўзи билдирган, Ўзи ваҳий қилгандир! Зеро, Қуръон нозил бўлган пайтда юқоридаги маълумотларни, агар Аллоҳ таоло билдирмаса, инсон томонидан айтилиши мумкин эмасдир!
Абдуддоим Каҳелнинг кўрсатувини
Нозимжон Иминжонов таржима қилди
Мисрда талабалар ўртасида ўтказилган Қуръони карим мусобақаси ғолиблари аниқланди
Жорий йилнинг апрель ойи бошида Мисрда олий таълим муассасалари талабали ўртасида ўтказилган Қуръони карим мусобақаси ўз якунига етди. Ушбу мусобақада 135 нафар мисрлик талаба тақдирланди.
Тақдирлаш маросими Қизил денгиз вилоятидаги Сафага шаҳрида ўтказилди. Бу ҳақда Sabaq news сайти хабар берди.
"Ватан истиқболи" партияси томонидан ташкил этилган ушбу мусобақада партия раҳбарияти ҳам иштирок этгани айтилган.
Мусобақада турли ёш доирасидаги талабалар ўзаро куч синашганлар. Мусобақа доирасида қориларнинг оналари ҳам тақдирланган.
Ўзбекистон мусулмонлари идораси Матбуот хизмати
Диний-маърифий ишлар дунё нигоҳида
Ўзбекистонда мўмин-мусулмонлар ҳаётидаги қувончли воқеа-ҳодисалар нафақат маҳаллий, балки хорижий оммавий ахборот воситаларининг ҳам диққат марказида турибди. Март ойининг ўзида ўнлаб дунё электрон оммавий ахборот воситалари Ўзбекистонда бўлаётган диний-маърифий соҳадаги хабарларни мунтазам эълон қилиб борганларини кузатиш мумкин.
Айниқса, маҳаллий uza.uz, kun.uz, daryo.uz, azon.uz, islom.uz сингари сайтлар ҳамда хориждаги islam-today.ru, islamsng.com, sputniknews.ru, muslim.kz каби хорижий веб сайтларда ҳам кенг ёритилди.
islam-today.ru сайтида “В Узбекистане стало легче найти мечети” номли мақола эълон қилинган бўлиб, унда Ўзбекистон йўлларида жоме масжидларнинг жойлашган манзилини кўрсатиб турувчи йўл белгилари мўмин-мусулмонлар учун катта қулайлик келтиргани батафсил ёритилди.
islamsng.com сайтида эълон қилинган “В мечетях Узбекистана совершили дуа за жертв терактов в Новой Зеландии” хабарда эса, Янги Зеландияда террорчилик ҳужуми оқибатида ҳалок бўлган ва жабрланганлар хотирасига бағишлаб юртимиз мўмин-мусулмонларининг тиловати Қуръон ва дуо қилганлари ҳақида маълум қилинди.
Бундан ташқари, "Научной школе хадиса передан современный автобус" Ҳадис мактабига замонавий автобус совға қилингани, "В Самарканде провели семинар по изучению теологических книг аз-Замахшари" Замахшарий китобларини ўрганишга бағишланган илмий семинар ўтказилгани ҳақида ҳам хабарлар чоп этилган.
Шунингдек, “В Ташкенте состоялось открытие нового здания мечети "Валихужа угли Норхужа" номли хабар ҳам кенг ёритилди.
Ўзбекистон мусулмонлари идораси раҳбарларининг хориж мамлакатлари бўйлаб сафарлари ва нуфузли анжуманлардаги иштироклари ҳам хориж матбуотида кенг ёритиб борилмоқда. Жумладан, Бутун Россия мусулмонлари газетаси – “Минбар Ислама” нашрида Франциянинг Париж шаҳрида бўлиб ўтган халқаро анжуманда Ўзбекистон мусулмонлари идораси раиси, муфтий Усмонхон Алимов ҳазратларининг иштироклари кенг ёритилди.
Айни пайтда Диний идоранинг muslim.uz сайтининг рус тилидаги қисми ҳам анча фаол ишламоқда. Мусулмон дунёси ва юртимизда бўлаётган воқеа-ҳодисларни ҳар куни мунтазам ёритиб борилмоқда. Шунингдек, ўзининг кенг қамровли аудиториясига эга бўлиб бормоқда.
Ўзбекистон мусулмонлари идораси Матбуот хизмати
БААда араб тилининг тарихий луғати чоп этилади
Шаржа амирлиги Араб тили академияси бош котиби доктор Муҳаммад Сафи Ал Мостеганеми Милан шаҳрида ўтказилаётган Араб тили ва маданияти фестивалида ўз ҳамкасбларига «Араб тилининг тарихий луғати» устида олиб борилаётган ишлар ҳақида гапириб берди, дея хабар қилади islam.ru нашри.
Олимнинг таъкидлашича, китоб Шаржа амирлиги Олий кенгаши аъзоси ва ҳукмдори доктор шайх Султон ибн Муҳаммад ал-Қосимий раҳбарлиги остида тайёрланмоқда.
"WAM" ахборот агентлиги хабарига кўра, араб тили ва маданиятининг тарихий ривожланиши акс этадиган луғатни яратиш устида Араб илмий тили академиялари иттифоқи (Қоҳира, Миср) билан биргаликда 300 нафардан ортиқ араб тадқиқотчилари ва тилшунослари иш олиб боришмоқда. Китобда араб тили ва маданиятининг охирги 17 асрлик тарихи тадқиқотнинг уч босқичлари: эски ёзувлар, араб тилига урғу билан семит тиллари гуруҳи, шунингдек, тилнинг амалий қўлланилишида таърифланади. У исломгача ва ислом даврлари, сепаратчи сулолалар тарихи, Мамлук султонлиги даври ва замонавий тарихдан иборат бешта даврни қамраб олади.
Ўзбекистон мусулмонлар идораси Матбуот хизмати
Видеолавҳалар
