Анор қадим замонлардан шифобахшлиги билан эъзозланиб, меваларнинг султони ҳисобланган.      Анорнинг юзлаб турлари мавжуд бўлиб, меваси таркибида органик кислоталар, витаминлар, шунингдек микробларни йўқ қилувчи моддалар мавжуд. Анорнинг асосан пояси, шохи, гули, илдиз пўстлоғи ва меваси даво сифатида қўлланилади.

 Ўрта асрда Европалик табиблар анор шарбатидан асабларни тинчлантиришда фойдаланганлар.

Хитой табобатида анор гулларидан тайёрланган дамлама ичбуруғ, тишларнинг қимирлаб қолиши ва тушиб кетишиниyu олдини олишда фойдаланилган. Анор гулларининг қуритилган кукуни турли жароҳатларга ишлатилган.

Ҳинд табиби Бухан анор дарахтининг илдизидан лентасимон гижжаларни  йўқотишда фойдаланган.

ХАЛҚ ТАБОБАТИДА:

Қондаги гемоглобин миқдорини ошириш учун – ярим пиёла анор, хом лавлаги, қизил сабзи шарбатига бир ош қошиқ асал солиб аралаштириб наҳорга ичилади.

• Хафақон касаллигида – аччиқ ва нордон анорнинг сувини тенг миқдорда олиб, 15 кун 3 маҳал 50 граммдан ичилади.
• Қувват бўлиши учун – аччиқ анор сувини 10 кун 3 маҳал оч ҳолда 50 граммдан ичилади.
• Кўздаги ҳарорат ва кундузи кўрмай қолишликка – ширин ва аччиқ анорни сувини асал билан қўшиб, бир неча кун офтобга қўйилади.
• Қувватлантирувчи сифатида – анор шарбати радиактив моддалар ва компьютер билан ишлайдиганларга, операциядан кейин қувват бўлиши учун тавсия этилади.
• Ангинада, стоматитда, гингивит ва бошқа оғиз бўшлиғи хасталикларида – анор пўстидан тайёрланган дамлама ёки меваси шарбати билан оғиз чайилса самарали даволайди.
• Ҳомиладор аёлларда – анор мевасидан ейишлари туғилажак болада юрак хасталиклари, бош мия нуқсонларининг олдини олади.
• Асабийлашишда, хавотир, уйқусизликда – анор меваси орасидаги пардани қуритиб гиёҳли чойга қўшиб ичилса, ёрдам беради.

Анорнинг хосиятлари

Ширин анор эрур ҳўл-совуқ ҳар вақт

Бу сўзга табиблар сўзидир ҳужжат

Аччиғидан сафро бўлур тору-мор

Ундан ёмон хилтлар туғилмас зинҳор,

Асал билан қўшиб агар ширинин

Ярага суркалса – йўқотар барин,

Чарчоқ, қулоқ оғриқ, оғиз яраси,

Меъда иллати ҳам кетар барчаси

Аччиғи сийдикни ҳайдайди кўпроқ,

Майҳуши наздимда яна яхшироқ,

Аччиғи зарардир еса томоққа,

Йўтал бўлса – шошмас эл ҳам емоққа,

Аччиқ, ширин яна ул майхуш анор,

Ҳафақон ҳайдовчи хосиятга ёр.

Анор гулининг хосиятлари

Гапирсам анор гулидан – совуқ-

Биринчи ўринда, иккинчи қуруқ,

Тиш милкин доимо қилур мустаҳкам,

Қон туфлаш дардини даф этар ҳар дам

Ичак ярасига ундан наф етар

Яра-чақаларни яна даф этар.

Ширин анор

Ширин анор сувини шиша ичига солиб,

Қайнаб чиққунча офтоб тиғига тутгин уни

Сўнг чўп билан кўзингга ўша сувдан суркасанг,

Кўз қичишни йўқотиб, кўпайтирар нурини.

“Табобат дурдоналаридан”

*****

Оғиз ичра пишган бир дона анор,

Мингталаб хом сувдан яхшидир минг бор.

Хусрав Деҳлавий

*****

Тўкди заҳмидин бағир қонини ҳижрон нолиши,

Ўйлаким сиқмоқ ила эл сув оқизгай нордин

Навоий

*****

Мунира АБУБАКИРОВА

ЎМИ Матбуот хизмати

• Спиртли ичимликлар ичишдан ва тамаки чекишдан йироқ бўл!
• Уйланмоқчи бўлсанг, солиҳа қизни танла. Чунки бахтли ёки изтиробли ҳаёт кечиришингда рафиқангнинг ҳиссаси катта.
• Хонадонинг учун жиҳозлар сотиб олмоқчи бўлсанг, уч жиҳатга эътибор бер: У ростдан ҳам керакми? У сифатлими? У оила бюджетига жиддий таъсир кўрсатмайдими?
• Унутма, ҳеч қандай юмуш оиланг ва фарзандларингга меҳр беришдан устун бўлолмайди.
• Дўстларингдан ишлатиб туришга нимадир олсанг, албатта, уни гўзал ҳолатда қайтаргин!
• Турли замонавий алоқа воситалари вақтингни, соғлигингни, ақлингни, маблағингни ҳамда яқинларингга ғамхўрлик ҳиссини тортиб олишига йўл қўйма! Чунки улар сенинг узоғингни яқин, оғирингни енгил қилиш учун ишлаб чиқарилган.
• Инсонларни ўз хизматингга ёлласанг, хизматига яраша ҳаққини ўз вақтида бер.
• Ҳеч қачон ўзингдан бой ёки сенга нисбатан ночорлардан моддий масалаларда маслаҳат сўрама.
• Одамларнинг маоши ва қанча пул топишининг сен учун фойдаси йўқ.
• Ҳар доим ўзинг севган ишни касб қил. Ҳам бахтли бўласан, ҳам яхши даромад топасан, ҳам ишинг сифатли бўлади.
• Кўп ҳам хотирангга таянаверма. Чунки хотира йўқолиш хусусиятига эга. Билганларингни қоғозга тушир.
• Фарзандларингга тарбия беришда мўътадил бўл. Қаттиққўлликда ҳам, эркалашда ҳам чегарадан чиқма.
• Яқинларингнинг муваффақиятини эътироф этишда бахиллик қилма.
• Инсонлар билан муомала қилишда ахлоқингни йўқотма. Акс ҳолда ҳурматингни ҳам, ҳуқуқингни ҳам йўқотасан.
• Шахсий маълумотларингни ҳаммага ошкор қилма.
• Дўстинг ҳақида ижобий фикр, мақтов эшитсанг, буни унинг ўзинг ҳам етказиб қўй.
• Уйқуга ҳам эътиборли бўл. Ухлаш вақтида дам олиб, танангни эртанги муҳим ишлар учун тайёрла.
• Уйланмоқчи бўлсанг, иқтисодий ва ижтимоий жиҳатдан ўзингга тенг бўлган қизга уйлан.
• Уйингга келган меҳмонни иззат-икром қил.
• Ҳамма одам ҳақни гапиролмай, қўрқувда турган бўлса, сен ҳақни айтиб, тўғри фикрни баён қил.
• Табиий инсон бўлгин, мунофиқликдан, иккиюзламачиликдан, сунъийликдан узоқ бўл.
• Арзимас ишларда тортишиб, вақтингни, асабингни исроф қилма.
• Қаерда бўлсанг ҳам одамларга яхшилик қилиб, яхши ном қолдиришга ҳаракат қил.
• Доим ҳалолликка интил. Ҳаромга асло қўл урма.
• Илм аҳлини, устозларни эҳтиром қилиб, уларнинг илмларидан манфаат олишга ҳаракат қил!
• Ота-онанг, ака-укаларинг, опа-сингилларинг, яқин қариндошларинг билан алоқани гўзал даражада йўлга қўй.
• Энг муҳими – НАМОЗингни вақтида адо эт!

Интернет маълумотлари асосида

Нозимжон Иминжонов тайёрлади

Тарихий ва миллий қадриятларга бой юртимизнинг Ислом оламидаги юксак ўрни ва нуфузи ҳеч бир мусулмонга сир эмас. Айниқса, бу юртдан етишиб чиққан буюк алломаларнинг ислом таълимотлари, хусусан, ҳадис илмини шакллантириш ва ривожлантиришдаги хизматлари бутун дунёда тан олинган. Ислом дини ва маданий-маънавий меросга эътибор қаратилаётган бугунги кунда Ўзбекистон заминида ўз дини ва маънавий анъаналарига меҳр ва садоқат, тарихий меросни асраб авайлаш бўйича ажойиб тажриба мактаби шаклланмоқда. Хабарингиз бор марҳум устоз Шайх Муҳаммад Содиқ Муҳаммад Юсуф  ва таржимонлар гуруҳи бутун Ислом оламида энг саҳиҳ ҳадис тўпламлари деб эътироф қилинган тўққиз мўътабар китобдан иборат “Олтин силсила” рукни остида илмий асосга эга, барча шартларга амал қилган ҳолда уламолар ҳайъати ижросида изоҳли таржима қилинишини йўлга қўйиб,  буюк ватандошимиз Имом Бухорий ҳазратларининг “Жомеъус саҳиҳ” тўпламига бағишланган 8-жуздан иборат изоҳли таржиманинг 5 жузи “Ҳилол нашр” нашриёти томонидан чоп этилган эди. Ушбу хайрли ишнинг давоми ўлароқ асарнинг изоҳли таржимасига бағишланган “Олтин силсила” китобининг 6-8-жузлари ҳам нашрдан чиқди. 2019 йил 17 феврал куни унинг тақдимоти  ҳадис илмининг султони, буюк ватандошимиз Имом Бухорий ҳазратларининг равзалари ёнида жойлашган жоме масжидда бўлиб ўтди. Тақдимотда юртимизнинг етук уламолари, устоз Шайх Муҳаммад Содиқ Муҳаммад Юсуфнинг сафдошлари ва шогирдлари, “Ҳилол нашр” нашриёти раҳбари Исмоилхон Муҳаммад Содиқ, Ўзбекистон мусулмонлари идораси котибият мудири Муҳаммад Айюбхон Ҳомидов,  Ўзбекистон мусулмонлари идорасининг Самарқанд вилоятидаги вакили Зайниддин Эшонқулов, Самарқанд “Ҳадис илми мактаби” ректори Олимхон Юсупов ва кўплаб китоб ихлосмандлари иштирок этди. Тадбир аввалида  “Олтин силсила” китобининг ижодий жамоаси томонидан Имом Бухорий ҳазратлари ҳаққига адо этилган Қуръони карим тиловатининг хатми, Умра зиёрати, қурбонликнинг савоблари  дуо қилиниб, у кишининг ҳақларига бағишланди. Шу билан бирга “Жомеъус саҳиҳ” ҳадислар тўплами ҳам тўлиқ мутолаа қилиниб, унда келтирилган охирги уч ҳадиси шариф шу тадбир қатнашчилари иштирокида мутолаа қилиниб, якунига етказилди. Ушбу хатмлар ортидан буюк аллома ва барча ўтган азиз авлиёлар, динимиз, халқимиз ва юртимиз тараққиётга хизмат қилиб ўтганларнинг ҳақларига дуои хайрлар қилинди.

Имом Бухорийнинг ғоят бой меросини асраб-авайлаш ва ўрганиш, маърифий ислом тўғрисидаги таълимотини кенг ёйиш мақсадида Самарқандда Имом Бухорий номидаги Халқаро илмий-тадқиқот маркази ва ҳадис мактабини ташкил этилиши, табаррук ҳадис тўпламларини ўқиб, амал қилиш, ёшлар орасида кенг тарғиб қилиш имкониятларини янада кенгайтирди. Ҳадис китобларининг бирор ватанда ва халқда борлигининг ўзи барака, яхшилик, тинчлик-омонлик, фаровонлик ва бошқа хайрли ишларнинг сабабчисидир. Бу борада машҳур муҳаддис Ибн Дақийқ ал-Ийд раҳматуллоҳи алайҳнинг қуйидаги машҳур гапларини келтиришимиз мумкин: “Мўғул истилочиларининг илк мағлубияти масжид ва мадрасаларда қилинган Бухорий хатмларидан сўнг бошланган” (Абдулазиз Деҳлавийнинг “Бўстонул муҳаддисийн” китоби, 223-бет). Демак, Ислом олами мўғулларнинг истибдоди остида қолганда улуғлар маслаҳатлашиб, кушойиш мақсадида, балони даф қилиш ниятида Имом Бухорийнинг “Саҳиҳ”ларини ўқиб, хатм қилиб туришни таклиф қилганлар. Ихлос ва яхши ният ила бу муборак китобни ўқишни бошлаб, уни хатм қилиш билан кушойиш келди, ёв енгила бошлади, мусулмон юртлари бирин кетин душман истибдодидан озод бўлди. Жамият ва шахс камолотида иймон, эътиқод масаласини олий мақом асосида йўлга қўйиш ва тутиб туришда ҳадис китобларининг ўрни жуда муҳимдир.

Тақдимотда сўзга чиққанлар ушбу асарнинг ўзбек тилига изоҳли таржима қилинишининг аҳамияти, бу йўлда хизмат қилган уламоларимизнинг меҳнатлари, муҳтарам Президентимиз томонларидан буюк алломаларимиз, уларнинг илмий меросларини ўрганиш бўйича қаратаётган эътиборлари ҳамда Ўзбекситон мусулмонлари идораси раиси, муфтий Усмонхон Алимов ҳамда  барча диний соҳа ходимларининг хизматлари эътироф этилди. Тадбир сўнгида “Олтин силсила” асари 6-8-жузларининг илк нашри Имом Бухорий номи билан аталадиган жоме масжид ва ҳадис илми мактабига тақдим этилди. Ижодкорлар олдидаги галдаги вазифа ишончли деб эътироф этилган тўққизта ҳадис тўпламининг иккинчиси “Саҳиҳи Муслим”нинг таржимасига киришишдир. Зеро бу буюк манбаларни таржима қилиб, халқимизга тақдим этиш фақат яхшиликка, хайру баракага сабаб бўлади, иншааллоҳ.

Манба: http://sammuslim.uz