Ислом олами уюшмаси томонидан Макка шаҳрида Қуръони карим халқаро музейини барпо этилди. Унда халқаро учрашув ўтказиш ва Қуръоннинг нафис нусхаларини намойиш этиш ҳам режа қилинган.
IQNA сайтининг “Arab News” нашрига таяниб хабар беришича, Ислом олами уюшмаси Бош котиби Муҳаммад бин Aбдулкарим ал-Исо Макка шаҳрида Қуръони Карим халқаро музейи очилишини маълум қилган.

Унинг айтишича, мазкур ташаббус Қуръон ва Суннатни тарғиб қилиш мақсадида бошланган ва ушбу музей илмий далиллар билан Қуръони карим мўъжизаларини ёритиб боради.

Музей лойиҳаси бутун ислом оламининг бир неча олий мартабали олимларидан иборат Халқаро олимлар Кенгаши ташаббуси билан бошланган. Музей ходимларига бутун дунё бўйлаб анжуман ва маърузалар ташкил этиш вазифаси юкланади.

Ислом олами уюшмаси Бош котиби Муҳаммад ал-Исо бундай дейди: “Ўз мазмуни ва мақсадлари бўйича биринчи бўлган ушбу кашшоф лойиҳа ғояси Аллоҳнинг китоби ва Суннатга хизмат қилувчи бўлим ва Ислом олами уюшмаси томонидан кўриб чиқилди”.

Ал-Исонинг айтишича, ушбу Уюшма биносига ташриф буюрувчилар музейни кўришлари мумкин. Музейнинг халқаро бўлимлари Қуръони карим қадриятлари ва оятлардаги ҳикматли ҳукмлар билан таништиради.

Унинг қўшимча қилишича, ушбу музейда Қуръони карим ва унинг илмлари билан боғлиқ анжуман, йиғилиш, маъруза ва тадқиқотлар олиб бориш билан бирга Қуръони карим қўлёзмаларининг тарихий маълумотлари ҳам тақдим этилади.

Интернет маълумотлари асосида
Илёсхон Аҳмедов тайёрлади

“India Narrative” ахборот-таҳлилий порталида ҳиндистонлик таниқли халқаро шарҳловчи Адити Бҳадурининг Ўзбекистон халқаро ислом академияси доценти Бектош Бердиев билан суҳбати эълон қилинди, деб хабар бермоқда “Дунё” АА мухбири.

Материалда Ўзбекистонда диний эркинлик учун яратилган шароитлар, ўзбекистонликлар ҳаётида диннинг тутган ўрни, конфессиялараро тотувлик, жамиятнинг радикаллашувига қарши олиб борилаётган изчил чора-тадбирлар ҳақида сўз юритилган.

Ўзбекистон бой маънавий-маърифий меросга эга. Бухоро, Самарқанд ва бошқа шаҳарлар азалдан йирик таълим марказлари сифатида машҳур бўлган, дейилади интервьюда.

Суҳбатда мазкур йўналишда илмий изланишлар олиб бораётган, мамлакатимизда ислом дини ва мероси ҳақидаги билимларни тарқатаётган ислом олий таълим муассасалари, жумладан, Ўзбекистон халқаро ислом академияси фаолияти ҳақида маълумотлар тақдим этилган.

Ўзбек олимининг “Биз жамиятда бағрикенгликни ривожлантирувчи ва тарғиб қилувчи мутахассисларни тайёрлаймиз, чунки Ўзбекистонда ислом азалдан шундай мазмун касб этган. Биз асрлар давомида турли маданиятлар ва ғоялар таъсирида бўлган Ипак йўли чорраҳасида жойлашганмиз. Академиямизнинг асосий мақсадларидан бири ҳам жамиятда бағрикенгликни, турли дин вакиллари тинч-тотув яшашини мустаҳкамлашга ҳисса қўшишдан иборатдир”, деган сўзлари келтирилган.

Материалда Ўзбекистоннинг янгиланган Конституциясида мамлакат дунёвий давлат деб эълон қилингани таъкидланган.
«Мамлакатимизда 130 миллат ва 16 турдаги диний конфессия вакиллари бир оила бўлиб истиқомат қилади. Уларнинг ҳуқуқларини бирдек ҳимоя қилишимиз керак. Биз демократия шароитида яшашни хоҳлаймиз”, дейди Бектош Бердиев.

Интервью Ўзбекистон халқи Асосий қонунга таклиф этилган ушбу тузатишларни референдумда қўллаб-қувватлагани ҳақидаги сўзлар билан якунланган.


Ўзбекистон мусулмонлари идораси
Матбуот хизмати

Британияда нашр этиладиган нуфузли «The Telegraph» кундалик газетасида «У Дубайга айланишидан олдин Ўзбекистонни кашф этиш вақти нега айнан ҳозир?» сарлавҳали мақола босилиб чиқди, деб хабар бермоқда «Дунё» АА мухбири. Унда муаллиф Жеймс Дрэвен мамлакатимиз бўйлаб амалга оширган саёҳати ҳақидаги таассуротларини ўқувчилар билан ўртоқлашган.

Унинг қайд этишича, Ўзбекистон жаҳоннинг 90 давлати фуқаролари учун визасиз режимни ўрнатган бўлиб, бу мамлакат характерини бутунлай ўзгартириши мумкин бўлган режанинг бир қисми ҳисобланади.

Британиялик журналистнинг Ўзбекистон бўйлаб саёҳати Самарқанддан бошланган. Унинг ёзишича, бу ерда XIV асрдан XX асргача бўлган Марказий Осиё меъморчилигининг энг сара намуналари қарор топган.

«Самарқанд нафақат Ўзбекистондаги, балки бутун Марказий Осиёдаги энг кўҳна шаҳарлардан бири бўлиб, унинг тарихи эрамиздан олдинги 1500 йилларга тўғри келади. Ҳунармандчилик ишлаб чиқариши билан машҳур бўлган бу афсонавий кент Буюк Ипак йўлидаги энг муҳим чорраҳалардан бири бўлиб, II асрдаёқ Евроосиёни замонавий Хитойнинг шарқидан Туркиянинг ғарбий қисмигача кесиб ўтган, ипак, зиравор ва бошқа турли маҳсулотлар ташиладиган савдо йўлларининг тармоғи бўлган. Икки минг йил давомида бутун дунёдан савдогарларни жалб қилган Самарқанд аллақачон ЮНЕСКО томонидан жаҳон маданияти чорраҳаси сифатида эътироф этилган», деб ёзади муаллиф.

У мамлакатимизнинг мустақил ривожланиш тарихи ҳақида ёзар экан, 2016 йилдан бошлаб мамлакатимиз тараққиётнинг янги йўлига чиққанини алоҳида қайд этади.
«Президент Шавкат Мирзиёев суд-ҳуқуқ ислоҳотларини тезкорлик билан амалга оширгани баробарида мамлакатни туризм ва хорижий инвестициялар учун ҳам очди. 2020 йил бошида БМТнинг Жаҳон сайёҳлик ташкилоти (ЮНВТО) Ўзбекистонни сайёҳликнинг ўсиши бўйича тўртинчи мамлакат, деб топди», деб ёзади Жеймс Дрэвен.

Британиялик журналистнинг фикрича, Ўзбекистондаги замонавий тараққиёт мамлакатнинг бой тарихи ва меросини ўзида мужассам этган.
"Самарқанд аэропорти терминали биноси XV асрнинг буюк астрономи, шаҳарнинг энг машҳур тарихий сиймоси ҳисобланадиган Улуғбекнинг очиқ китобини («Зижи Кўрагоний» асари) эслатиб туради», деб ёзади у.

Шунингдек, ушбу мақолада Самарқанд шаҳрида бунёд этилган «Боқий шаҳар» мажмуаси, Регистон майдони, хорижлик сайёҳлар учун яратилган замонавий қулайликларга оид муҳим маълумотлар ҳам ўқувчиларнинг эътиборига ҳавола қилинган.

Ўзбекистон мусулмонлари идораси
Матбуот хизмати

Ўзбекистон сайёҳлик салоҳияти Индонезиянинг Жакарта шаҳрида ташкил этилган «Halal Fair Jakarta» туризм ярмаркасида намойиш этилмоқда, деб хабар бермоқда «Дунё» АА мухбири.

Туризмни ривожлантириш давлат қўмитаси маълумотига кўра, тадбирда бутун мусулмон дунёси мамлакатларидан йирик компания вакиллари иштирок этаяпти.
Халқаро ярмарка кунларида делегациямиз аъзолари томонидан кўплаб янги ва қизиқарли туристик маҳсулотлар тақдимоти намойиш этилди. Асосий эътибор нафақат анъанавий туризм йўналишлари, балки мамлакатнинг гастрономик ва зиёрат туризми салоҳиятининг тарғиботига ҳам қаратилмоқда. Шунингдек, стендимизга ташриф буюрувчилар севимли миллий таомимиз – паловнинг тайёрланиши ва дастурхонга тортилишини ўз кўзлари билан кўриш имконига эга бўлаяптилар.

Ярмарка давомида, шунингдек, тадбирга ташриф буюрган Индонезияниг туризм ва креатив иқтисодиёт вазири Сандиага Салаҳуддин Уно билан ҳам учрашув ташкил этилиб, унда икки давлат ўртасидаги туризмни ривожлантириш бўйича музокоралар олиб борилди.

«Ушбу тадбирда Ўзбекистоннинг иштироки муҳим аҳамиятга эга. Сабаби мамлакатингиз Ислом тараққиёти йўлида беқиёс хизмат кўрсатган. Бошқа мамлакатларда бўлгани каби индонезияликлар ҳам Ал-Бухорий, Ат-Термизий, Нақшбандий, Мотрудий каби алломалар етишиб чиққан юртни бориб кўришни ва зиёрат қилишни жуда хоҳлайди. Индонез халқининг сифатли дам олишини ташкил этиш мақсадида Ўзбекистон томони билан манфаатли ҳамкорлик истиқболларига эгамиз», - деди Сандиага Салаҳуддин Уно.

Икки томонлама ўтказилган мулоқот жараёнида Индонезия аҳолиси учун қизиқ бўлган Ўзбекистоннинг қишки туризм салоҳияти тўғрисида ҳам батафсил маълумот берилди.

«Halal Fair Jakarta» туризм ярмаркаси бугун ўз ишини якунлайди.

Ўзбекистон мусулмонлари идораси
Матбуот хизмати