18 август куни АОКАда Туризмни ривожлантириш давлат қўмитаси вакиллари иштирокида матбуот анжумани бўлиб ўтди. Унда ҳалол туризм мавзусида ҳам сўз бор, хабар бермоқда kun.uz.
«Мамлакатда маҳаллий ва хорижий мусулмон сайёҳлар талабларига жавоб берадиган дам олиш масканларини очиш халқаро тажрибада бор. Масалан, Туркия, Малайзия ва Индонезия мамлакатларида бу тажриба кенг қўлланилади. Бунда нафақат мусулмонлар учун, балки оилавий дам олувчилар, аёллар ва эркакларнинг алоҳида дам олиши учун шароитлар яратилади.
Бундай талабларни жорий қилиш асосан инвесторларнинг бизнес режалари ва бозор талабларидан келиб чиққан ҳолда ташкил этилади. Шунинг учун Бўстонлиқдаги ёки Тўдакўлдаги дам олиш ҳудудларида агар инвесторлар мусулмон сегментига ёки шу шароитларни талаб қилган мижозларга хизмат кўрсатишни хоҳласа, очишлари мумкин. Туризм қўмитаси Сингапурда жойлашган CrescentRating халқаро ташкилоти билан бу масала ёрдам беради»,― деди зиёрат туризми бўйича мутахассис Саидкамол Холхўжаев.
Қўмита раиси ўринбосари Фахриддин Давруқовнинг қўшимча қилишича, Ўзбекистондаги меҳмонхоналардан хоналарнинг камида 30 фоизида мусулмонлар учун қулайлик яратиш талаби қўйилган.
Маълумот учун, CrescentRating агентлиги – жаҳон ҳалол туризм бозоридаги йирик эксперт-ташкилотлардан саналади. Агентлик 2015 йилдан бошлаб «Жаҳон мусулмон сайёҳлари индекси» (Global Muslim Travel Index) рейтингини эълон қилиб келади. Рейтингда 40дан ортиқ мезонлар асосида мусулмон сайёҳлар учун таклиф этиладиган хизматлар баҳоланади.
Ўтган йилнинг кузида «Mastercard» молия ташкилоти ва CrescentRating агентлиги томонидан эълон қилинган ҳисоботда Ўзбекистон мусулмон аёл сайёҳлар учун энг қулай мамлакатлар ўнталигидан жой олганди.

Ўзбекистон мусулмонлар идораси матбуот хизмати

ЎМИ матбуот хизмати

ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ

“Ана шундай. Ким Аллоҳнинг нишоналарини улуғласа, бас, албатта, бу қалбларнинг тақвосидандир”. (Ҳаж сураси, 32-оят).

Шиор сўзи «нишон», «белги», «аломат» деган маъноларни билдиради. Бу сўз Аллоҳ таолога нисбат берилиб, «шаоируллоҳ» – «Аллоҳнинг нишонлари» дейилганда эса Аллоҳнинг дини, Исломнинг кўзга кўринган, шон-шавкати аломати бўлган нарсалар кўзда тутилади.

Шулардан бири – масжидлар ҳам Аллоҳ таолонинг шиорларидир. Демак, кимда ким масжидларни улуғласа, у Аллоҳ таолонинг шиорлари улуғлаган, шу орқали Аллоҳ таолони улуғлаган бўлади. Масжидларни улуғлаш эса жумладан уларнинг шаъни, ҳайбати ва масжидлардаги жамоат қоидаларини муҳофаза этишда намоён бўлади.

Юртимизда карантин қоидалари юмшатилди. Алҳамдулиллаҳ, 17 август санасидан беш ой-у, икки кун интиқ бўлиб кутганимиз махсус тартиб-қоида ва чекловлар билан бўлса-да, жамоат бўлиб масжидда ибодат қилиш бахтига эришдик. Бу бахтда бардавом бўлишимиз учун кўрсатилган қоидаларга амал қилайлик, азизлар! Зеро, бошқаларга тартиб-интизомда ибрат ва намуна бўлиш учун...

Аллоҳ таолонинг шиори – масжидлар шаъни-шавкатини сақлаш учун...
Намозхонлар карантин қоидаларига амал қилишни билмас экан, масжидлар карантин талабларини бажара олмас экан, деган хунук гаплар пайдо бўлиб масжидларимиз шаъни паст бўлмасин.

Бундан-да ёмони “фалончи фалон масжидда вирус юқтириб олибди”, “масжидлар касаллик тарқалиши ўчоғи бўлибди”, мазмунидаги гаплар масжидлар – Аллоҳ таолонинг шиорлари шаъни учун энг ёмон гаплар бўлади. 

Расулуллоҳ соллаллоҳу алайҳи васаллам марҳамат қилганлар:
قال رسول الله صلي الله عليه و سلم:إِنَّمَا بُنِيَتْ لِلصَّلَاةِ وَتِلَاوَةِ الْقُرْآنِ وَذِكْرِ اللهِ
رواه المسلم “(Масжид) намоз (ўқиш), Қуръон тиловат қилиш ва Аллоҳ таолони зикр қилиш учунгина бино қилинади” (Имом Муслим ривояти). Шу муборак сўздан келиб чиқиб ҳадисда айтилган уч ишдан бошқасини масжид ва унинг атрофида бажармаслигимиз лозим. 

Аллоҳ таолодан гуноҳларимизни мағфират этишини, хатоларимизни ўчиришини сўрайман. Гуноҳларимиз ва хатоларимиз сабабли бошимизга келган вабони тез фурсатда инсоният, хусусан, юртимиз устидан даф қилишини сўрайман!

Тавфиқ ва ҳидоят Аллоҳ таолодан...

Зикрулло Маҳкамов,

Чилонзор туманидаги "Ҳасанхон қори" жоме масжиди имоми

Пандемия билан боғлиқ мураккаб шароитга қарамасдан дунё ҳамжамияти тиббиёт, илм-фан ривожига муносиб ҳисса қўшган буюк олим Абу Али ибн Сино таваллудининг 1040 йиллигини кенг нишонлаяпти. Бу ҳақда “Дунё” АА манбасига асосланиб xs.uz сайти хабар бермоқда.

16 август куни Ибн Сино жамоат фонди “UzReport” телеканали билан ҳамкорликда Ибн Синонинг инсониятга қолдирган бой меросини чуқур ўрганиш, чет элда кенг тарғиб қилиш мақсадида табиб, олим ва файласуф Абу Али ибн Сино таваллудига бағишланган “Абу Али ибн Сино – Ўзбекистон ғурури ва умумжаҳон мероси” мавзусида халқаро илмий-маърифий видеоконференция ўтказди.

Унда Олий Мажлиси Қонунчилик палатаси депутатлари, Ёшлар ишлари бўйича агентлиги, Ўзбекистон тарихи давлат музейи, Олий таълим муассасалари, Тошкент шаҳридаги Вестминстер университети вакиллари, Германия, Бельгия, Франция, Исроил, Туркия, Ҳиндистондан етакчи мутахассис ва экспертлар иштирок этди. Шунингдек, онлайн анжуманда 17 та илмий маърузачи, хусусан, 6 та хорижий маърузачи қатнашди.

Ибн Сино академияси президенти, профессор Саид Зиллур Раҳмон (Хиндистон), Ибн Сино халқаро фонди президенти, профессор Михаэл Сач (Исроил), Авиценна ассоциацияси президенти, профессор Марк Боннел (Францийа), Таълим бўйича ЮНEСКО аъзоси, ҳакам, профессор Амина Атхер, тиббиёт фанлари номзоди Абдукарим Усмонхўжаев Ибн Сино жамоат фонди маслаҳатчиси, профессор Жасур Ризаев ва бошқалар Абу Али ибн Сино меросининг замонавий тиббиёт учун долзарблигини қайд этиб, унинг фан ва замон эҳтиёжларига мослашиш кераклигини таъкидлашди.

Халқаро видеоконференция якунида унинг долзарблиги, илмий-маданий ва сиёсий аҳамияти, Ибн Сино кўп қиррали илмий меросини ўрганиш учун давлат томонидан қўллаб-қувватланиши ҳамда тадқиқот фаолиятини молиялаштириш зарурлиги, публицистик ва илмий асарлар нашрини фаоллаштириш бўйича зарур таклифларни ишлаб чиқишга келишилди.

Таъкидлаш жоиз, Ибн Сино таваллудининг 1040 йиллигига бағишланган тадбирга тайёргарлик кўриш доирасида ўзбек, рус ва инглиз тилларида тематик видеороликлар тайёрланди.

Халқаро видеоконференция доирасида “Ибн Сино” жамоат фонди, “UzReport” телеканали ва Тошкент давлат шарқшунослик университети ўртасида ҳамкорлик меморандумлари имзоланди.

Ўзбекистон мусулмонлари идораси Матбуот хизмати

ЎМИ матбуот хизмати