Рамазон ҳайити – катта шодиёна, хурсандчилик ва кўтаринки руҳда ўтадиган муборак байрам. Чунки ушбу кун тутган рўзаларимиз қабул бўладиган, Аллоҳнинг раҳмати ва фазли  мўл-кўл ёғиладиган ажойиб палладир. Шу боис ҳайитда барчамиз хурсандчилигимизни, саховатимизни ва юксак ахлоқимизни ҳар қачонгидан кўра кўпайтиришимиз зарур. 

 Ҳайит – Аллоҳ таолонинг мўмин бандаларига зиёфат куни, Қуръони каримда бундай марҳамат этилади:  “Албатта, мана шу (жаннат неъматлари) улкан ютуқнинг ўзидир. Бас, айнан мана шундай ютуқ учун амал қилувчилар амал қилсинлар!” (Соффот сураси, 60-61-оятлар).

Рамазон рўзасидан олган тарбиямизнинг яна бир жиҳати шу бўлдики, бу ой бизларга бир-биримиз билан янада аҳил, тотув бўлиб яшашни, бағрикенг бўлишни, фақат ўзимиз учун эмас, ўзгалар учун ҳам камарбаста, фидойи бўлишни ўргатди.  Чунки   юртимизда  тинчлик ва осойишталик бардавом бўлишида, Ватанимиз тараққиёти ва халқимиз фаровонлиги  юксалишида бу инсоний фазилатларнинг ўрни беқиёсдир. 

Рамазон ойини қандай ихлос, ғайрат ва сабр билан ўтказган бўлсак,   ҳайит байрамини ҳам ўшандай файзли қилиб  ўтказишимиз  керак бўлади. Ҳайитдан мақсад, кўнгилларга хушнудлик, нафсларга севинч, жисмга роҳат бағишлаш, дўстлар, яқинлар ўртасида муҳаббат, қариндошлар, қардошлар орасида меҳр ришталарини янгилаш, кишиларни бир-бирларига  ёрдам ва саховат кўрсатишга чорлашдир. 

Ҳайит муносабати билан қўни-қўшниларга таом улашиб, уларни зиёрат қилинса, қавму қариндошларнинг ҳолидан хабар олинса, хурсандчиликлар янада зиёда бўлади.  

Ҳайит байрамида хурсандчилик қилаётган мусулмон шариатда ман қилинган ишлардан тийилиш лозим. Чунки бу кунда қилинган хайрли ишларнинг савоби улуғ бўлганидек, ношаръий ишларнинг ҳам гуноҳи каттадир. Гўё "ҳайитда рухсат" дегандек турли ношаръий ўйин-кулгуларга машғул бўлиш ёки аксинча шариат байрам қилиб белгилаган кунни азага айлантириш ярамайди. Зеро ҳайит куни ҳам мусулмон кишининг бошқа кунлари сингари яхшилик ва хайр-барака куни бўлиши, гуноҳ ва маъсиятлар содир этадиган кун бўлмаслиги керак. 

Ҳайит байрамида ёш болаларни хурсанд қилишга, бу куннинг бошқа кунлардан фарқли мусулмонларнинг байрами эканини англатишга ҳам алоҳида эътибор қаратиш лозим. Бунда уларга ҳайитлик совғалар улашиш, истирохат боғларига ёки ўйингоҳларга олиб бориб ўйнатиб келиш мақсадга мувофиқ. Шунингдек, ҳайит байрамининг шодликларидан эҳтиёжманд оилаларнинг фарзандларини ҳам баҳраманд қилишга уриниш комил мусулмонлик белгиларидан биридир. Зеро ҳар бир воқеа ёш боланинг онгида тошга ўйилган нақш каби сақланади. Бир танишимиз бундай ҳикоя қилади: "Етмишинчи йилларнинг боши... Комфирқа одамлари ҳайит намозини масжидда ўқитмайди. Намозга тўпланган жамоа нима қиларини билмай қолади. Шунда дадам: "Юринглар, ҳайит намозини ўқийдиган жой бор", дейдилар. Одамлар дадамга эргашишди. 

...Эндигина кўча эшик олдини супуриб бўлган онам дадамнинг эрта қайтганидан ажабланди. Дадам шошилиб, қибла томонга шолча тўшади. Бир зумда ҳовли одамга тўлди. Биров қўйнидан жойнамоз олди, биров белбоғини ечиб ерга солди. Намоз ўқилди. Кишилар дуо қилиб тарқалишди. Дадам одамларни кузатгач, бизга ҳайитлик бердилар. 

Бу воқеадан сўнг онам анча вақтгача дадамдан хавотирга тушиб, сал кеч қолсалар, илҳақ бўлиб, бизни хабар олишга жўнатардилар. Бу хавотирларининг сабабини кейинроқ тушундим..." 

Алҳамдулиллаҳ, ҳозир жума ва ҳайит кунлари эмин-эркин ибодат қилиб, яқинларига ҳайитликлар улашаётган юртдошларимизни кўриб, кўнглимиз қувнайди. 

Расулуллоҳ соллаллоҳу алайҳи васаллам ва ҳазрат Умар розияллоҳу анҳу ҳайит куни бирга кетишаётган эди. Мадина кўчаларида ўйнаб юрган болалар Пайғамбаримиз соллаллоҳу алайҳи васалламдан ҳайитлик сўрашди. У зот соллаллоҳу алайҳи васаллам: 

– Эй Умар, мени бу болалардан сотиб олмайсизми? – дедилар.

Ҳазрат Умар розияллоҳу анҳу югуриб кетдилар ва болаларга гўшт, бир оз хурмо ва мевалар келтириб бердилар. Мамнун бўлган Пайғамбаримиз соллаллоҳу алайҳи васалламнинг муборак юзларига табассум ёйилди. ("Тарихул Анбиё"). 

Одатда байрамларда жамият ахлоқи, истак ва майллари, урф-одатлари ҳар қачонгидан аниқроқ бўртиб кўринади. Шу боис Рамазон ойи давомида бўлгани каби ҳайит арафасида ҳам меҳр-муҳаббат, саховат, ўзаро ёрдам бериш,  ҳожатмандлар ҳолидан хабар олиш, кексаларни қадрлаш ва ҳурматларини жойига қўйиш, ота-оналарга ҳар қачонгидан кўра эътибор кўрсатиш, инсонлар ўртасида меҳр-оқибатни янада кучайтириш талаб этилади.

Шунинг учун ҳам Яратганга шукроналар айтиб, буюк фарз амали Рамазон ойи рўзасидан сўнг Аллоҳнинг тавфиқи билан диёримизга кириб келган муборак Рамазон ҳайити  барчамизга  шодлик ва ҳуррамлик айёмига айлансин, деймиз! Бу кун шоду хуррамлик айёми, қутлуғ байрам экан, унинг шукрини адо этиш, ушбу муборак кунда ҳаммамизга ардоқли ота-оналаримиз, қавму қариндошларимиз, улуғларимиз зиёратига бориб, уларнинг дуоларини олиш, бетоб, эҳтиёжманд кишилар ҳолидан хабардор бўлиш, ёрдамга муҳтож кишилар кишиларга қўлдан келганича хайр-саховат кўрсатиш, бир-бирларимизни ҳайит билан муборакбод этиш, эски гина-кудуратларниунутиб, силаи раҳмни ва инсоний муносабатларни тиклаб олиш ва шу тариқа Аллоҳ таолонинг раҳмат ва мағфиратига    сазовор бўлиш ҳар бир мусулмоннинг байрам кунларидаги энг савобли амаллари саналади. Бу кунларни азага, хафагарчиликка айлантирмаслик керак. Ўтганларимизни эслаш, уларнинг руҳларини шод этиб дуойи хайрлар қилишимиз яхши амал, лекин булар ҳайит байрами шукуҳига таъсир қилмаслиги лозим. 

Аллоҳ таоло Рамазон ҳайитини барчаларимизга муборак қилсин! Байрамнинг шарофатидан мустақил Ватанимиз равнақи, халқимизнинг аҳил-иноқлиги, бирдамлиги, ҳамжиҳатлиги янада мустаҳкам бўлишини ва икки дунё саодатини насиб айласин! Аллоҳ таоло барчамизни имонда, Исломда собитқадам қилсин, юртимиз тинчлиги, осмонимиз мусаффолигини бардавом, халқимизни янада фаровон бўлишини насибу рўзи айласин. 

Одилжон НАРЗУЛЛАЕВ,

Янгийўл тумани “Имом Султон” жоме масжиди имом-хатиби

Қадрият

Бисмиллаҳир Роҳманир Роҳийм.

Аллоҳнинг раҳмат-мағфирати ёғиладиган, ажру мукофот бериладиган ва хурсандчилик айёми бўлган Ийдул фитр — Рамазон ҳайити яқинлашиб келмоқда.

Аллоҳ таолонинг амрини адо этиб, тақво неъматини қўлга киритган, Расул алайҳиссаломнинг суннатига эргашиб, имон ила савоб умидида рўза тутган мўмин-мусулмонларга жаннатнинг Райён дарвозасидан кириш бахти насиб этсин!

Шундай файзли кунларга етказгани учун Ҳақ таолога шукроналар айтамиз. Қодир Аллоҳдан халқимизга қут-барака, бахту саодат ва тинчлик-офият беришини сўраб, дуолар қиламиз.

Рамазон ойида юртимизга Аллоҳ таолонинг раҳмати ёғилди. Мўмин-мусулмонлар субҳидамда саҳарлик дастурхони атрофида ибодатга киришди. Файзли оқшомларда эса ифторлик қилиб, қалб роҳати — таровеҳ намозини адо этишди. Аллоҳ таоло фарз қилган закотлар адо этилди, фитр садақаси ҳамда фидялар берилди.

Қутлуғ ойда 2 мингдан зиёд масжидда таровеҳ намози ўқилди, 1,5 мингдан ортиқ жомеда Қуръони карим хатм қилинди. Мухлис халқимиз Ҳақ таоло Каломига сомеъ бўлди.

Бундай саодат Президентимиз ташаббуси билан кейинги йилларда диний-маърифий соҳада амалга оширилган ислоҳотлар мевасидир, десак, айни ҳақиқат.

Янгидан очилаётган масжид-мадрасалар, қайта чирой очаётган қадамжолар қалбимизни яшнатиб, умримизни нурга тўлдирмоқда. Мамлакатимизда азалий қадриятларимиз саналган, муқаддас динимизнинг асосий мезони бўлган ўзгаларга яхшилик қилиш, йиқилганни суяш, кечиримлилик, бағрикенглик, меҳр-оқибат кўрсатиш, эҳтиёжманд инсонларни қўллаб-қувватлашга қаратилган эзгу ишлар кенг қулоч ёзаётгани барчамизга мамнуният бағишламоқда.

 Бу борадаги ишлар муборак Ҳайит кунларида янгича мазмун билан бойийди. Маҳаллалар, хонадонлар тоза-озода ҳолга келтирилади. Қариндош-уруғлар, етимлар, бевалар, кекса ва имконияти чекланган инсонлар, беморлар  ҳолидан хабар олинади. Уларнинг кўнглини кўтариш, оғрини енгил қилишга кўмаклашилади. Ўзаро совға-саломлар улашилади.

Президентимиз кеча ўтказилган видеоселектор йиғилишида вилоят, туман ва шаҳар ҳокимлари, сектор раҳбарлари олдига байрамни ана шундай руҳда, юқори савияда ўтказиш вазифасини қўйди.

Зотан, давлатимиз раҳбари таъкидлаганидек, бугунги муборак кунларда халқимизга хос олижаноблик ва меҳр-мурувват рамзи сифатида нуронийларимиз, ёлғиз ва эҳтиёжманд бўлган опа-сингилларимиз, ака-ука ва фарзандларимизга эътибор кўрсатиш, ҳолидан хабар олиб, дардига малҳам бўлиш, Яратганга ҳам, халқимизга ҳам, албатта, хуш келади.

Юртбошимиз ташаббуси билан бу қутлуғ айёмда дам олиш кунларининг кўпайтириб берилгани байрамни ўзгача шукуҳ билан муносиб тарзда ўтказишимизга, савоб ишларни кўпроқ қилишимизга имкон яратади.

Жорий Рамазон ойи халқимиз учун эсда қоларли воқеаларга бой бўлди.  Президентимиз Ўзбекистондаги Ислом цивилизацияси маркази қурилиш майдонига ташриф буюриб, маънавий қудратимиз тимсоли бўлган ушбу муаззам мажмуа фаолиятини йўлга қўйиш бўйича қимматли маслаҳатлар берди. Бу ерда юртимиз уламоларининг ислом цивилизацияси ривожига қўшган буюк ҳиссаси яққол ифода этилади. Имом-хатибларимиз ушбу бетакрор масканда малака оширади.

Аллоҳ таоло қутлуғ ойда халқимиз ҳаётида муҳим бўлган хайрли ишларни насиб этди. Ушбу ой баракотидан юртимизда янги жоме масжидлар очилди, 13 минг фуқаро умра амалини адо этди, шу кунга қадар эса бу рақам 40 минг нафарни ташкил қилмоқда.

Хориж давлатлари диний идораларидан келган таклифлар асосида уламо ва қориларимиз чет мамлакатларда диний-маърифий тадбирларда иштирок этиб, таровеҳ намозларини адо этиб берди. Юртимизнинг бир гуруҳ уламолари АҚШ ва Россиянинг турли ҳудудларида хатми Қуръон ва таровеҳ намозларида қатнашиб, эътирофларга сазовор бўлди.

Кейинги йилларда фаолияти йўлга қўйилган Ўзбекистондаги Ислом цивилизацияси маркази, Халқаро ислом академияси, Имом Бухорий, Имом Термизий, Имом Мотуридий халқаро илмий-тадқиқот марказларида муқаддас динимизнинг илмий жиҳатдан тадқиқ этилиши “Жаҳолатга қарши — маърифат” ғоясининг ҳаётий рўёбига ҳисса қўшмоқда. Бундай хайрли ишларнинг самараси ўлароқ, заминимиздан яна бухорийлар, термизийлар, насафийлар ва нақшбандийлар етишиб чиқажак, инша Аллоҳ.

Шубҳасиз, Имом Термизий бобомиз ривоят қилган “Яхшиликка далолат қилувчи уни қилган киши кабидир”, ҳадиси шарифига мувофиқ санаб ўтилган савобли ишлар сабабчиси бўлган инсонларга ҳам чексиз ажру мукофотлар ёзилади ҳамда юртимизга қут-барака ёғилади.

Шундай улуғ неъматларнинг қадрига етиб, динимиз ривожига кўрсатилаётган шароитларни Аллоҳ таолонинг улуғ марҳамати деб қабул қилишимиз, бунинг шукронасини ҳамиша адо этишимиз лозим.

Ушбу улуғ кунларда, ҳадиси шарифларда марҳамат қилинганидек, ҳар бир амал эвазига 70 тадан 700 тагача савоб берилади. Инша Аллоҳ.

Ийдул Фитрни дунё мусулмонлари қатори юртимиз аҳли ҳам катта шодиёна ва хурсандчилик ила ўтказади. Ушбу кун Яратган эгамнинг раҳмати Ер юзига ёғиладиган, қалблар завқланадиган, рўзадорларга ажрлар бериладиган ажойиб фурсат.

Ҳазрати Расулуллоҳ соллаллоҳу алайҳи васаллам: “Ҳар бир қавмнинг ўз байрами бор, бу — Ийд куни бизнинг байрамимиздир”, деб марҳамат қилганлар.

Ҳофиз ибн Ҳажар роҳимаҳуллоҳ “Фатҳул Борий” асарларида шундай деган: “Ҳайит кунлари шодликни изҳор қилиш диннинг шиорларидандир”.

Ийд — Аллоҳ таолога қилинган тоат-ибодатлар туфайли, У зотнинг бандаларига кўрсатган раҳмату мағфирати туфайли хурсандчилик изҳор қилиш учун бир муносабатдир.

Аллоҳ таоло ўз Каломида: “Аллоҳнинг фазли ва раҳмати ила. Ана шу билан хурсанд бўлсинлар. У улар жамлайдиган нарсалардан яхшидир”, деб айт”, деб марҳамат қилган (Юнус сураси, 58-оят).

Аллоҳнинг фазлидан хурсанд бўлиш ҳам У зотга қурбат саналади.

Расулуллоҳ соллаллоҳу алайҳи васаллам: “Аллоҳ таолога фарз амалларидан сўнг энг маҳбуб амал мўминнинг қалбига хурсандчилик солишдир” (Имом Табароний) деган.

Зеро, ҳар бир мўмин-мусулмон учун Роббининг ибодатини адо этиш чинакам бахту саодатдир. Шунинг учун бу байрам имон ҳаловати, ибодат ва дуо-истиғфор байрами. Бу байрамда мусулмонлар жоме масжидларга тўпланиб, Ийд намозини жамоат билан ўқийди. Сўнг дуолар қилиб, ўтганларнинг руҳини шод этади, эл-юртга, Ватанга, бутун дунёга осудалик тилаб, илтижолар қилади.

Яратган Парвардигор бутун дунё мусулмонларига Рамазон ҳайити байрамини муборак айласин, бутун оламга тинчлик-хотиржамлик ато этсин, ибодатларимизни даргоҳида қабул этсин, она Ватанимизни обод, халқимиз ҳаётини янада фаровон қилсин!

Нуриддин ХОЛИҚНАЗАРОВ,

Ўзбекистон мусулмонлари идораси раиси, муфтий.

Бисмиллаҳир Роҳманир Роҳим.

Бизларга Рамазон ойини, рўза тутишликни фарз қилиб берган Аллоҳ таолога ҳамду санолар бўлсин. Бу амални умматга мукаммал ўргатган Пайғамбаримиз Муҳаммад мустафо соллоллоҳу алайҳи ва салламга саловот-у дурудларимиз бўлсин.

Аллоҳга беҳад шукроналар бўлсинки, юртимиз мўмин-мусулмонлари бу йилги муборак Рамазон ойини тинч ва осуда, кўтаринки руҳда, кундузларини рўзадор ҳолда, кечаларини тоат ва ибодатда ўтказиб, масжидларда таровеҳ намозларида қориларимиз томонидан ўқилган ҳатми Қуръонларда иштирок этиб, иймон ва ихлосларини янада зиёда қилдилар. Албатта, бу Аллоҳнинг бизга берган энг катта неъмати ва юртимиздаги тинчлик ва осойишталикнинг шарофатидир.

Шукрки, сўнгги йилларда Президентимиз ташаббуси билан диний-маърифий соҳада амалга оширилаётган кенг кўламли ислоҳотлар, янгидан очилаётган масжид-мадрасалар, қайта чирой очаётган қадамжолар мўмин-мусулмонларни чексиз мамнун этмоқда. Шу билан бирга, ҳар йили Рамазон ойи ҳамда иккала ҳайит – Рамазон ва Қурбон байрамлари арафасида давлатимиз раҳбарининг қарори қабул қилиниши динимизга, маънавий-маърифий соҳага қаратилаётган эътиборнинг амалдаги инъикосидир. Айниқса, бу айём кунлари дам олиш кунларининг кўпайтириб берилаётгани мўмин-мусулмонларни яна ҳам хурсанд қилиб, айёмни муносиб тарзда ўтказишга хизмат қилмоқда.

Жорий йил ҳам Президентимизнинг “Муборак Рамазон ойини муносиб тарзда ўтказиш тўғрисида”ги қарори эълон қилинди. Унда Рамазон ойини халқимизга хос меҳр-оқибат ва шукроналик туйғуларини юксалтириш, эҳтиёжманд кишиларни қўллаб-қувватлашга алоҳида урғу берилгани барча мўмин-мусулмонларни мамнун этди. Қарор доирасида Республикамизнинг барча жоме масжиди ва идора бўлимларида Рамазон ойини муносиб ўтказишга ҳаракат қилинди. Хусусан, мўмин-мусулмонларнинг эркин ибодат қилиши учун масжидларда қулай шарт-шароитлар яратилиб, хатми Қуръонларга пухта тайёргарлик кўрилди. Шу билан бирга, ифторлик ўтказишда исрофга йўл қўймаслик ва муборак ой фазилатлари ҳақида имом-хатиблар томонидан мунтазам равишда тарғибот ишлари олиб борилди.

Қуръони карим хатмоналарини юқори савияда ташкил этиш учун юртимиз қорилари босқичма-босқич сараланди. Шунингдек, илк бора Тошкент шаҳри масжидларида таровеҳ намозларида ўқиладиган хатми Қуръоннинг кунлик жадвал тақсимоти ишлаб чиқилди. Унга кўра, хатми Қуръонлар рўзанинг биринчи кунидан бошлаб, 27 санаси – Қадр кечасида якунланиши белгиланди. Ушбу тартибнинг жорий қилишдан мақсад Қуръони карим тиловатидан кўпроқ баҳраманд бўлиш ва бир вақтнинг ўзида пойтахтдаги масжидларда муборак кечада жамланган Қуръон шайдоларининг дуолари барокатига сазовар бўлишдир.

Бундай саъй-ҳаракатлар самараси ўлароқ Рамазон ойи юртимизда ўзгача файзли ва шукуҳли кечиб, кечалари юртимиз нурга тўлди, десак янглишмаймиз. Чунки ҳар кеча мамлакатимиздаги бир ярим мингдан зиёд масжидларимизда 2400 нафардан зиёд қориларимиз таровеҳ намозларида Қуръони каримни хатм қилдилар.

Уларга соме бўлувчи, Илоҳий каломга муҳаббатли тингловчилар ҳам ҳар йилгидан кўпайиб, масжидларимиз намозхонлар билан тўлди. Қолаверса, 50 дан зиёд масжиддаги энг моҳир қорилар томонидан ўқилаётган хатми Қуръонлар ижтимоий тармоқларда жонли-онлайн тарзда узатилмоқда. Бу эса жаҳон афкор оммасининг юртимизда бўлаётган Қуръони карим хатмоналаридан баҳраманд бўлишига ҳамда хорижда юрган юртдошларимизнинг Қуръонга, Ватанларига муҳаббатлари янада зиёда бўлишига сабаб бўлди.

Шу ўринда бир ҳолатни эслаб ўтиш жоиз. Авваллари юртимизда саноқли масжидларда Қуръони карим хатм қилинар, қорилар Миср, Туркия, Саудия Арабистони каби давлатлардан таклиф этилар эди. Шукрки, бугун бизнинг олим-у қориларимиз дунёга чиқишмоқда.

Бир неча йилдан буён хориж давлатлари диний идораларидан келган таклифлар асосида уламо ва қориларимиз чет мамлакатлардаги диний-маърифий тадбирларда иштирок этиб, таровиҳ намозларини адо этиб бермоқдалар. Жорий йил ҳам юртимизнинг бир гуруҳ етук уламолари АҚШ ва Россия Федерациясининг турли жойларида Рамазон ойи якунига қадар хатми Қуръон ва таровиҳ намозларда қатнашиб, маърифий суҳбат қилиб бериш баробарида турли тадбирларда ҳам иштирок этиб, эътирофларга сазовор бўлишди. Бу ҳам ўз навбатида юртимизда илм-у маърифатга берилаётган эътиборнинг самараси десак, муболаға бўлмас.

Зеро, жорий йилнинг 8-апрел куни – муборак Памазон кунларида давлатимиз раҳбарининг пойтахтимиздаги Ислом цивилизация маркази мажмуасига ташриф буюриб, илм-у маърифат марказини кўркам ва сифатли қуриш билан бирга, унинг мазмунига алоҳида эътибор қаратиш зарурлигини таъкидлаганлари ҳам мамлакатимизда илмга берилаётган юксак эътибор намунасидир. Шунингдек, Президентимиз Ислом цивилизацияси маркази халқимизнинг маънавий қудрати қай даражада эканини кўрсатиши кераклигини ҳам қайд этиб, бу марказдан келгусида улуғ алломаларимиз каби етук уламо-ю олимлар етишиб чиқиб, ислом маърифатини кенг ёйишга хизмат қилишини таъкидладилар.

Албатта, юртимизда бўлаётган бундай ўзгаришлар дунё миқёсида ҳам эътироф этилмоқда. Хусусан, жорий йилнинг 14–17-апрел – Рамазон кунлари Ўзбекистон мусулмонлари идораси делегацияси Истанбул шаҳрида бўлиб ўтган Туркий давлатлар диний идоралари раҳбарларининг И йиғилишида иштирок этиб, салмоқли таклифларни илгари сурдилар. Туркия диёнат ишлари бошқармаси раиси Али Эрбош амалий ва долзарб аҳамиятга эга бўлган мана шундай таклифлар учун миннатдорлик билдириб, уларни келгусида амалга оширишга тайёр эканини маълум қилди. Шунингдек, мазкур сафар чоғида халқаро анжуман ташкилотчилари юртимиз делегациясига, Ўзбекистон мақомига мос ва хос тарзда эҳтиром кўрсатди.

Гапнинг индаллоси, Рамазон ойи бизга чин маънода баракали келди, дейишимиз мумкин. Чунки бу ойда тўхтовсиз хатми Қуръонлар, гўзал маърифий суҳтаблар, халқаро доирадаги эътирофлар бардавом бўлди. Шунингдек, халқимиз бу ойни тақво-ю ибодат, ўзаро меҳр-мурувват, хайр-у саховат улашиш билан ўтказиб, доим яхшиликлар пайидан бўлдилар. Иншааллоҳ, Аллоҳ таоло бу амаллар савобини, ҳадиси шарифларда марҳамат қилинганидек, ҳар бир қилинган амалнинг эвазига 70 тадан 700 тагача савобини беради.

Яна бир гап. Ўтган Рамазон ойи беҳад шукроналар айтиш ойи бўлди. Чунки айни кунда дунёнинг айрим жойларида урушлар, тўс-тўполон, табиий офатлар бир дам тўхтагани йўқ. Шукрки, Ватанимиз тинч, дастурхонларимиз тўкин-сочин, халқимиз ҳаёти кундан-кунга фаровон бўлиб бормоқда. Иншааллоҳ, бундай фаровонлик янада тўкис бўлади. Чунки Рамазон ойида юртдошларимиз кўнгиллар эриган, қалблар юмшаган дамларда Яратгандан юртимиз тинчлиги, халқимиз фаровонлигини сўраб, дуо-ю илтижолар қилдилар.

Нуриддин Холиқназаров,

Ўзбекистон мусулмонлари идораси раиси, муфтий

Манба: “Ўзбекистон адабиёти ва санъати” газетаси 2022-йил 29-апрел, 15-сон.

✅ Рамазон ойи аввалида Муфтий Нуриддин домла ҳазратлари иштирокларида Шайх Aлижон қори қироати асосида Қуръони карим тиловатининг видеотасмага ёзилган лойиҳаси тақдимот қилинган эди.

✅ Бу хайрли иш ўзига хос услубда "Muslim.uz" ва “alQuran. uz” томонидан амалга оширилган бўлиб, видеотасмада ҳар бир оятнинг арабча матни ҳам тиловатга ҳамоҳанг равишда бевосита ифода этилган. Бундай услуб нафақат Ўзбекистон ва Миср диёри, балки бутун дунё бўйича илк марта амалга оширилган, тарихий воқеадир. Мавжудлари эса, бевосита эмас, балки Қуръон матнлари турли жабҳалардаги қироатларга мослаб чиқилган.

? Ушбу видеотасма Рамазон кунлари "muslim.uz" ва “alQuran.uz” ижтимоий тармоқларида ҳар куни бир порадан бериб борилди. Кўп юртдошларимиз мазкур Қуръони карим тиловатидан ўзларининг тиловатларини тўғрилаб олган бўлсалар, яна бошқалари кунлик тақдимотларга ҳамоҳанг бўлиб, Аллоҳнинг каломини хатм қилишга ҳам ургурдилар.

?Дунёнинг етук уламо-ю қорилари бу тақдимот ҳақида илиқ фикрларни изҳор этдилар. Хусусан, ўн қироатнинг суғро ва кубросида қори устоз, Искандария шаҳрида Азҳар билим юртининг Қуръон бўлими мудири, фазилатли шайх, доктор Сами Ҳамид Рамазон Али, жазоирлик Шайх Набил Дағфарий, Миср қурроси Шайх Абдулбосит Абдулсомаднинг ўғли, қироат олими Шайх Ёсир Абдулбосит ҳамда Шайх ал-Ҳусорийнинг қизи Ясмин Маҳмуд ал-Ҳусорий кабилар мазкур лойиҳага юқори баҳо бериб, мусулмон олами учун манфаатли бўлганини қайд этдилар. Уларнинг дил сўзлари ҳақидаги видео тасма тез кунларда ижтимоий тармоқларимиз орқали тақдим этилади.

? Мазкур онлайн Қуръони карим хатмининг якуни бугун, 1 май якшанба куни пойтахтимиздаги “Ҳазрати Имом” масжидида пешин намозидан сўнг бўлиб ўтади.

✅ Ушбу онлайн хатми Қуръонни "Muslim.uz" ва “AlQuran. uz”нинг ижтимоий тармоқларида тўғридан-тўғри кузатинг.

▶️ Ушбу ташриф сайт ва ижтимоий тармоқларда онлайн эфирга узатилади.

Youtube орқали томоша қилиш (https://www.youtube.com/channel/UCQGFSBrqwBCKY5SYk_6wm7A)

Facebook орқали томоша қилиш (https://www.facebook.com/muslimuzportal)

Instagram орқали эшитиш

(https://www.instagram.com/muslimuzportali/)Telegram voice орқали эшитиш

(https://t.me/muslimuzportal?voicechat)? ITV орқали тамоша қилиш (https://itv.uz/#!/concert/34) (tas-ix)

Ўзбекистон мусулмонлари идораси Матбуот хизмати
Muslim.uz
@muslimuzportal | @mp3muslim | @diniysavollar

Бугун, 30 апрель – Рамазон ойининг 29-куни Саудия Арабистони Олий Маҳкамаси Шаввол ҳилоли кўрингани тўғрисида хабар бўлмагани сабабли, жорий йил 1 май якшанба куни Рамазон ойининг 30-куни бўлиши ҳақида баёнот берди. Шунга мувофиқ, 2022 йил 2 май душанба куни Саудия Арабистонида Рамазон ҳайити сифатида кенг нишонланади.

? Олинган маълумотларга кўра, дунёнинг бир қатор йирик мусулмон давлатлари, хусусан, Миср Араб Республикаси, Бирлашган Араб Амирлиги, Жазоир, Кувайт, Баҳрайн, Тунис, Ироқ, Уммон, Яман каби барча араб мамлакатлари ҳамда Туркия, Россия, Қозоғистон ва Қирғизистон давлатларида ҳам Рамазон ҳайити 2 май, душанба куни нишонланади.

 Эслатиб ўтамиз, Рамазон ҳайитининг биринчи куни 2 май – душанба кунига тўғри келиши тўғрисида Ўзбекистон мусулмонлари идораси Уламолар Кенгаши томонидан қабул қилинган қарорни инобатга олиб, мамлакатимизда 2022 йил 2 май куни Рамазон ҳайити байрами сифатида кенг нишонланиши ҳақида хабар берган эдик.

(https://t.me/muslimuzportal/28302)

Ўзбекитон мусулмонлари идораси Матбуот хизмати
Muslim.uz
@muslimuzportal | @mp3muslim | @diniysavollar