muslim.uz
“Салгина эпкинга ҳам айланаверадиган онгсиз пирпиракка ўхшамаслик керак”
Кишининг фаолияти ғоя билан суғорилмаган бўлса, қупқуруқ ва ғарибдир.
Н. Г. ЧEРНИШEВСКИЙ
Агар сенга ғоя ёқиб қолса, ундан руҳлан. Чунки Инсонда руҳланиш қобилияти бўлиши керак.
Э. ТEЛМАН
Зарур бўлганда жон фидо этмаган кишини оқил дейиш хато.
Г. БИЧEР
Олижаноб ғояларсиз инсоният яшай олмайди.
Ф. М. ДОСТОЕВСКИЙ
Одамзод бахти учун ҳамма нарсадан воз кечишга ўргатадиган ажиб ғояларни кишиларга сингдириш буюк санъатдир.
СТEНДАЛ
Инсониятнинг бутун мақсадлари, бутун меҳнатлари муҳаббатсиз нимага ҳам арзирди?
М. Ю. ЛEРМОНТОВ
Ғоядан қўрққан одам бора-бора ўз тушунчасини ҳам йўқотади.
ГЁТE
Инсонда изчил ва онгли эътиқод, фақат ё жамият таъсири остида ёки адабиёт ёрдамида ривожланиши мумкин.
Н.Г. ЧEРНИШEВСКИЙ
Тирик жон кучли эътиқодга эга бўлмаслиги мумкин эмас… Эътиқодсиз кишиларгина эътиқодни амалга ошира олмайдилар; калтафаҳм одамлар ёки виждонсиз одамларгина эътиқодсиз бўладилар.
Я. Г. ЧEРНИШEВСКИЙ
Ғояни фойдали деб эътироф эта туриб, лекин ундан фойдалана билмаслик ҳам мумкин.
ГЁТE
Ўз эътиқодингни айтмоғинг учун журъатли бўлишинг керак.
Я. М. СEЧEНEВ
Ҳар бир киши ўз эътиқодини ҳимоя қилиши учун мард бўлиши керак.
А. ГУМБОЛДТ
Эътиқод ўзимизники бўлгани учун эмас, балки ҳаққонийлиги учунгина қимматлидир.
В. Г. БEЛИНСКИЙ
Ҳар қандай қатъий эътиқодларимиз ҳам билимларнинг янада юксалиши туфайли улоқтириб ташланиши ёки жуда бўлмаганда ўзгартирилиши мумкин.
Т. ГЕКСЛИ
Фақат тентаклар ва мурдаларгина ҳеч қачон ўз фикрларини ўзгартирмайдилар.
Ж. ЛОУЭЛЛ
Эътиқод ўз табиатига кўра фаолсиз маънавий бойлик бўлолмайди.
В. А. СУХОМЛИНСКИЙ
Агар эзгу ишларга бошламаса, энг зўр маънавий истаклар ҳам уч пул.
Ж. ЖУБEР
Инсоннинг энг юксак хоҳишлари, ғоялари, ниятлари ва туйғулари кундалик ҳаётда ўз бурчини кўнгилдагидек бажаришга уни ундамаса, сариқ чақага ҳам арзимайди.
Г. БИЧEР
Ҳаётини ўз эътиқодига бағишлаган одам янги металлни ихтиро этган ёки янги газни топган тадқиқотчига қараганда ҳам инсониятга кўпроқ хизмат қилган бўлади.
Ж. ЛОУЭЛЛ
Эътиқодсиз одам нотавон, ҳар бир аъмоли йўқ одам ғариб кимсадир.
Я. Е. РEПИН
Жиддий одамнинг ғоялари кўп бўлмайди. Ғояси кўп одам ҳеч қачон жиддий бўлолмайди.
П. ВАЛEРИ
Салгина эпкинга ҳам айланаверадиган онгсиз пирпиракка ўхшамаслик керак.
Ж. ЛОНДОН
Менинг эътиқодларим юрагимнинг урушига қараб ўзгараверса, унда ҳолимга вой.
Ф. ШИЛЛEР
Биринчи учрашган кимсага ёқиш учун ўз фикрини дарров ўзгартираверадиган одамни биз бўлмағур, пасткаш, ҳеч бир ихлоси йўқ одам деймиз.
Н. А. ДОБРОЛЮБОВ
“Маърифат гулшани” китоби асосида тайёрланди
“Ҳадис ва ислом тарихи фанлари” кафедраси
ўқитувчи Пўлатхон Каттаев
Нишонга урилган гаплар: “Ўзларини доим «Биз тўғри иш қиляпмиз» деб ўйлайверадиган кишилар билан яшаш қийин”
Қуйида келтириладиган фикрлар ижтимоий тармоқлардаги “Тарих мухрлаган сўзлар” саҳифасидан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
- Аёл Ой кабидир. Уни севадиган эркакдан келадиган нурни юзида акс эттиради.
- Аёлнинг ҳақ-ҳуқуқи борлигига ишонмайдиган, уни менсимайдиган киши ўзининг онаси, синглиси ва қизи ҳам аёл жинсига мансуб эканини кўпинча унутиб қўядиган одамдир.
Ўта кетган пасткашлик
Эр аёлига қамоқ панжараси ортидан: “Болалигимизда онам бизга сигиримиз сутидан пишлоқ тайёрлаб берардилар. Ўша пишлоқни жудаям соғиндим!” деди.
Аёл сигир сотиб олди. Эрталаб ва кечқурун уни яйловга қўйиб юборарди. Кейин сигирни соғиб, ўша сутдан пишлоқ тайёрлар эди. Йигирма йил давомида эрига шу тарзда пишлоқ тайёрлаб, жўнатиб турди.
Эр қамоқдан озод бўлиб қайтгач, аёлидан келаётган бадбўй тезак ҳидидан жирканди ва у билан ажрашиб, бошқа аёлга уйланди.
- Мактабда ўрганган дарсларимиздан бири шуки, ичи бўш бошоқ далада бошини кўтариб туради, донга тўла бошоқ эса бошини энгаштириб туради. Демак, фақат олийжаноб инсон камтар бўлади, пасткаш кимса кеккайган бўлади.
Али Тантовий раҳимаҳуллоҳ
- Ўзларини доим «Биз тўғри иш қиляпмиз» деб ўйлайверадиган кишилар билан яшаш қийин.
Али Шариатий
Интернет материалларидан тўплаб, таржима қилувчи
Нозимжон Иминжонов
Имом-хатиблар учун ўқув семинар ташкил этилди
Имомларнинг касб маҳоратини ошириш, бугунги кун билан ҳамнафасликларини таъминлаш замон талабига айланди. Имомлар билимини доимий равишда янгилаб боришда ўқув-семинарларини ташкил этиш муҳим аҳамиятга эга.
Шундай тадбирлардан бири жорий йилнинг 16-18 октябрь кунлари Самарқанд вилояти имом-хатиблари учун ташкил этилди.
Имом-хатибларнинг билим савиясини юксалтириш, дунёқарашини кенгайтириш ҳамда жамоат ишларидаги фаоллигини янада оширишга қаратилган ўқув-семинарнинг дастлабки босқичи 16 октябрь куни вилоятнинг бешта ҳудудида бошланди.
Самарқанд, Каттақўрғон шаҳри, Пастдарғом, Пайариқ ва Ургут туманида махсус ташкил этилган жойларда семинар машғулотлари мутахассис маърузачилар томонидан юқори савияларда олиб борилмоқда.
Маърузачилар Имом Бухорий халқаро илмий-тадқиқот маркази ва вилоятдаги олий таълим муассасалари илмий ходимлари, профессор ўқитувчилари орасидан танлаб олинган.
Семинар машғулотлари 17-18 октябрь кунлари ҳам давом эттирилади.
ЎМИ Матбуот хизмати
Ўзбекистон делегацияси Сибирда
Ўзбекистонлик диний уламолар Россия Федерациясининг Сибир ўлкасига Новосибир мусулмонлари идораси таклифига биноан хизмат сафарига юборилдилар.
Ўзбекистон мусулмонлари идораси раиси ўринбосари Иброҳим Иномов бошчилигидаги делегация аъзолари Новосибир мусулмонларига диний-маърифий мавзуларда маърузалар қилиш, маҳаллий аҳоли ва меҳнат мигрантлари билан учрашувлар ўтказиш мақсадида ташриф буюрдилар. Шунингдек, сафар доирасида бузғунчи ғояларни тарғиб этишни мақсад қилган гуруҳлар таъсирига тушиб қолмаслик, уларнинг қарашлари нотўғри экани ҳақида тушунтириш ишлари ҳам олиб борилади.
Новосибир вилояти муфтийси Салим Шакирзяновнинг фикрича ўзбекистонлик уламоларнинг маърузалар билан иштирок этиши мўмин-мусулмонларнинг билимларини янада ошишига катта хизмат қилмоқда.
Ўзбекистон мусулмонлари идораси Матбуот хизмати
Мақолалар
