Қадрли ватандошлар!

Бугунги кунда мамлакатимизда инсон қадри, унинг ҳуқуқ ва манфаатларини таъминлаш давлат сиёсатининг устувор йўналиши этиб белгиланган. Бу жараёнда барча фуқароларимиз каби ногиронлиги бўлган юртдошларимизга эътибор ва амалий ғамхўрлик кўрсатиш, уларни ҳар томонлама қўллаб-қувватлашга алоҳида аҳамият қаратилмоқда.

Бу борада чуқур инсонпарварлик ғоялари билан йўғрилган саъй-ҳаракатларимиз 3 декабрь – Халқаро ногиронлар кунидан кўзланган мақсад ва вазифаларга уйғун ва ҳамоҳанг эканини таъкидлаш лозим.

Дунё мамлакатлари қатори юртимизда ҳам кенг нишонланаётган мазкур сана муносабати билан мамлакатимиздаги 1 миллионга яқин ногиронлиги бўлган юртдошларимизга ўзимнинг самимий ҳурмат-эҳтиромим ва эзгу тилакларимни изҳор этаман.

Маълумки, Ўзбекистонда ногиронлиги бўлган шахсларга жамият ва давлат томонидан кўмак ва ёрдам бериш, уларни ижтимоий- сиёсий ҳаётга фаол жалб этишга қаратилган кенг кўламли чора-тадбирлар амалга оширилмоқда. Ҳозирги вақтда ушбу тоифага мансуб фуқароларни қўллаб-қувватлашга ихтисослашган бир қатор тузилмалар, хусусан, Ўзбекистон ногиронлар жамияти, Ногиронлар ассоциацияси, Кўзи ожизлар жамияти, Карлар жамияти самарали фаолият кўрсатмоқда.

Энг муҳими, тақдир тақозоси билан ногирон бўлиб қолган биронта ҳам юртдошимиз халқимизнинг, давлат идораларининг меҳру эътиборидан четда қолмасдан, ўзининг меҳнати ва қобилияти билан нафақат ҳаётда ўз ўрнини эгаллаб келмоқда, балки азму матонати, сабр-бардоши ва шукроналик фазилатлари билан кўпчиликка ибрат бўлмоқда.

Биз сизларнинг бундай олижаноб интилишларингизни юксак қадрлаймиз ва ижтимоий-иқтисодий ҳаётимиздаги фаол иштирокингиз учун барчангизга чуқур миннатдорлик билдирамиз.

Азиз дўстлар!

Жамиятимизнинг ажралмас бир қисми бўлган ногиронлиги бор фуқароларнинг ҳуқуқ ва манфаатларини таъминлаш, меҳнат ва турмуш шароитларини яхшилаш мақсадида кейинги йилларда мамлакатимизда бир қатор қонунлар ҳамда 25 дан ортиқ бошқа меъёрий-ҳуқуқий ҳужжатлар қабул қилиниб, мустаҳкам қонуний база яратилди. Бу эса мазкур тоифа вакилларига тиббий-ижтимоий хизматлар кўрсатиш, уларнинг билим олиши, меҳнат қилиши, малакали тиббий хизматлардан фойдаланиши, ўз истеъдод ва салоҳиятини рўёбга чиқариши, мухтасар айтганда, ўзларини жамиятимизнинг тўлақонли аъзоси деб ҳис этишлари учун янада қулай шароитлар яратиш имконини бермоқда.

Бугун, бутун халқимизга мурожаат қилиб, сиз, азиз ватандошларимни  бу йўналишда бошлаган хайрли ишларимизни фаол давом эттиришга чақираман. Шу мақсадда, биз барча фуқаролар, жумладан, ногиронлиги бўлган шахслар учун бир хил имкониятлар амал қиладиган инклюзив жамиятни барпо этиш бўйича комплекс чора-тадбирларни амалга оширамиз. Шу асосда ногиронликни белгилашнинг аллақачон эскирган тиббий моделидан умумэътироф этилган ижтимоий моделига босқичма-босқич ўтишни ўз олдимизга муҳим вазифа қилиб қўйганмиз.

Бундан буён бино ва иншоотларни қуриш, реконструкция қилиш, жамоат транспорти, ахборот ва алоқа воситаларини ишлаб чиқаришда ногиронлиги бўлган шахсларнинг улардан ҳеч бир монеликсиз фойдалана олишига бирламчи аҳамият қаратилади.

Ногиронлиги бор шахсларни реабилитация қилиш ва протезлаш марказларидаги қамров ҳажмини 2 баробар ошириш, ҳудудларда фаолият кўрсатаётган 10 га яқин шундай марказларни кенгайтириб, замонавий тиббий ва реабилитация ускуналари билан жиҳозлаш ишлари амалга оширилади.

Ишонтириб айтаманки, сизлар ўзларингизни ёлғиз ҳис этмаслигингиз, зарур билим ва касб-ҳунарларни эгаллаб, барча соҳа ва тармоқларда фаол иштирок этишингиз, жисмоний тарбия ва спорт билан шуғулланишингиз, маданий эҳтиёжларингизни таъминлашингиз учун бор куч ва имкониятларни сафарбар этамиз.

Фурсатдан фойдаланиб, барчангизга сиҳат-саломатлик, тинчлик-хотиржамлик, оилавий бахт-саодат ва омад тилаб қоламан.

Чуқур ҳурмат билан,

Шавкат Мирзиёев,

Ўзбекистон Республикаси Президенти

Шу йилнинг 2 декабрь куни Нукус шаҳридаги Муҳаммад ибн Аҳмад ал-Беруний ўрта махсус ислом билим юртида 1 декабрь – «Қорақалпоқ тилига давлат тили мақоми берилган кун» муносабати билан ўтказилган «Иншолар танлови» мусобақасининг тақдирлаш маросими бўлиб ўтди. Тадбирда ўрта махсус ислом билим юрти ёшлар билан ишлаш, маънавият ва маърифат бўлими бошлиғи Адилбай Ережепов, Ажинияз номидаги Нукус давлат педагогика институтининг Қорақалпоқ адабиёти кафедраси доценти, филология фанлари бўйича фалсафа доктори Қабил Мамбетов ва билим юрти талабалари иштирок этди.
Тадбирни Муҳаммад ал-Беруний ўрта махсус ислом билим юрти ёшлар билан ишлаш, маънавият ва маърифат бўлими бошлиғи Адилбай Ережепов очиб берди.
Кейин сўзга Қабил Мамбетов чиқиб тилимизга кириб келаётган янги сўзларнинг аҳамияти ҳақида кенг тушунча бериб ўтди.
Шундан сўнг иншолар танловида иштирок этган ва ғолиб бўлган талабалар тақдирланди.
Танловда фахрли биринчи ўринни 1-курс талабаси Аллаяр Байимбетов, иккинчи ўринни 2-курс талабаси Бекбаулиев Ҳамидуллоҳ, учинчи ўринни 1-курс талабаси Балтабаев Ўразбек эгаллади. Танлов ғолибларига ва иштирокчиларига совғалар топширилди.

Билим юрти матбуот хизмати

«Яҳёхон Тўра» жоме масжиди имом-хатиби Жамалов Нуруллоҳон

Татаристонда кўзи ожизлар учун Қуръони карим маъноларининг рус тилида таржимаси чоп этила бошланди”, – деб ёзади ДУМ РТ.
Қуръони карим маъноларининг рус тилига таржимаси Татаристон Республикаси мусулмонлари диний бошқармаси ва Доғистон Республикаси муфтияти томонидан 2019 йилда нашр этилган.

2020 йили “Ёрдам” миллий хайрия жамғармасининг кўзи ожиз мутахассислари Қуръони карим маъноларининг рус тилига таржимасини “Брайл” алифбосидаги нусхасини тайёрлашга киришди. 10 жилдли китоб бўртма усулда ёзилган.
Ушбу китоб воситасида кўзи ожиз инсонлар матнни қийинчиликсиз ўқиши мумкин.

Мазкур тафсир тўпламини чоп этиш Фонд томонидан буюртма асосида амалга оширади.

Маълумот учун, “Брайл” алифбосидаги Қуръони карим маъноларининг рус тилидаги таржимаси китоби қиймати 15 000 рубл (2750 000 сум)ни, бир жилди 1500 рубл (275 00 сум) ни ташкил этади.

“Ёрдам” жамғармаси қошидаги босмахона мустақил давлатлар ҳамдўстлигида “Луи Брайл” тизими бўйича исломий қоғоз маҳсулотларини чоп етувчи ягона босмахона ҳисобланади.

Ўзбекистон мусулмонлари идораси
Халқаро алоқалар бўлими

Ўзбекистон Республикаси Конституцияси халқимизнинг асрий анъаналари билан ҳамоҳанг равишда яратилиб, фаровон турмуш, фуқароларимиз сиёсий-ҳуқуқий тафаккурининг ёрқин ифодасидир. Мана неча йиллардан бери мамлакатимизнинг халқаро майдондаги обрў-эътиборини юксалтиришда мустаҳкам пойдевор бўлиб хизмат қилмоқда.

Бош қомусимизни “Инсон – жамият – давлат” тамойили асосида ҳақиқий халқчил ҳужжатга айлантириш ишлари изчил амалга оширилмоқда. Зеро, бу Янги Ўзбекистонда олиб борилаётган ислоҳотларнинг устувор мақсади ҳисобланади.

Хабарингиз бор, бундан бир неча ой муқаддам Олий Мажлис палаталари кенгашларининг қўшма қарорига мувофиқ, Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия тузилган эди.

Бу борада фуқаролар ва кенг жамоатчилик вакиллари таклифларини йиғиб, умумлаштириш, уларни Конституциявий комиссияга тақдим этиш тизимини ишга тушириш мақсадида “Ўзбекистон Республикасининг Конституциясига ўзгартиш ва қўшимчалар киритиш тўғрисида”ги қонун лойиҳаси ишлаб чиқилди. Мутасаддилар томонидан “Менинг Конституциям” онлайн платформаси, колл-марказ, почта, жумладан, электрон почта ҳамда телеграм махсус боти орқали таклиф ва мулоҳазалар юбориш учун барча имкониятлар яратилди.

Конституциявий комиссия ўз фаолиятини уч босқичда амалга ошириб, биринчи босқичда Конституцияни ўзгартириш бўйича таклифларни қабул қилиш, жамлаш ва таҳлил қилинди. Қисқа муддатда фуқаролардан 60 мингдан зиёд таклиф ва ғоялар келиб тушди. Иккинчи босқичда эса парламент томонидан ишлаб чиқилган, такомиллаштирилаётган Конституция лойиҳаси умумхалқ муҳокамасида кўриб чиқилди. Конституциявий қонун лойиҳаси умумхалқ муҳокамасига чиқарилгандан сўнг 1 августга қадар 150 мингдан ортиқ таклиф келиб тушди.

Якуний босқичда эса умумхалқ муҳокамаси натижасида маромига етказилган қонун лойиҳаси Президентимиз таклифига асосан, референдум ўтказиш йўли билан қабул қилиниши белгиланган.

Алоҳида таъкидлаш жоизки, мазкур жараённи таҳлил қилиш, мавжуд хато ва камчиликларни ўз вақтида бартараф этиш давлатимиз раҳбарининг диққат-эътиборида бўлди. Жумладан, Президентимиз жорий йилнинг 20-июн куни Конституциявий комиссия аъзолари билан учрашув ўтказиб, энг аввало, мазкур ислоҳотлар инсон қадрини улуғлашга хизмат қилиши таъкидлади. Бундан ташқари, истиқлолимизнинг 31 йиллигига бағишланган тантанали маросимда ҳам Бош қомусимизни такомиллаштириш масаласига алоҳида тўхталиб ўтди.

Ўз навбатида “Ўзбекистон Республикасининг Конституциясига ўзгартиш ва қўшимчалар киритиш тўғрисида”ги конституциявий қонун лойиҳаси ишлаб чиқилди. Мазкур қонун лойиҳаси жорий йилнинг 25-июнидан умумхалқ муҳокамасига қўйилди. Эътиборлиси, ушбу жараёнлар халқимизнинг катта қизиқишига сабаб бўлди. Фуқароларимиздан келиб тушган таклиф-мулоҳазалар, истаклардан келиб чиқиб, конституциявий қонун лойиҳасининг умумхалқ муҳокамаси муддати икки маротаба узайтирилганини қайд этиш жоиз. Бу эса аҳолида сиёсий онг ва маданият, ҳуқуқий саводхонлик, мамлакатнинг эртанги кунига бўлган дахлдорлик туйғуси янада ортганидан далолат беради. Натижада Конституциямизнинг муқаддимасидан тортиб, 76 та моддасига тузатишлар, 15 та янги модда ва 1 та янги боб киритиш назарда тутилган конституциявий қонун лойиҳаси шакллантирилди.

Хулоса қилиб айтганда, Бош қомусимиз миллатнинг юзи, халқнинг эркини ифодасидир. Уни такомилга етказишда шошма-шошарликка йўл қўйиб бўлмайди. Президентимиз айтганидек, “Янгиланган Конституция мамлакатимизнинг узоқ муддатли тараққиёт стратегиялари, умуман юртимиз ва халқимизнинг эртанги фаровон ҳаёти учун мустаҳкам ҳуқуқий асос ҳамда ишончли кафолат яратиши лозим”.

Манба: ЎзА