ЎМИ матбуот хизмати

ЎМИ матбуот хизмати

4 июнь куни Ўзбекистоннинг Малайзиядаги элчихонаси ташаббуси билан Вазирлар Маҳкамаси ҳузуридаги Имом Бухорий халқаро илмий-тадқиқот маркази, Ўзбекистондаги Ислом цивилизацияси маркази, Халқаро ислом академияси ҳамда Малайзиянинг Исломни англаш институти (IKIM) ҳамкорлигида диний-маърифий йўналишдаги илмий-тадқиқот масалаларига бағишланган онлайн мулоқот ташкил этилди.
Имом Бухорий халқаро илмий-тадқиқот маркази матбуот хизматининг хабар беришича, суҳбат чоғида Ўзбекистон ва Малайзия ўртасида маданий-маърифий, ижтимоий-гуманитар ва илм-фан йўналишидаги ҳамкорликнинг бугунги ҳолати ва истиқболлари ҳақида сўз юритилди. Илмий-тадқиқот йўналишида истиқболли лойиҳаларни амалга ошириш имкониятлари муҳокама қилинди.
Онлайн мулоқот сўнгида Малайзиянинг Исломни англаш институти (IKIM) ва Вазирлар Маҳкамаси ҳузуридаги Имом Бухорий халқаро илмий-тадқиқот маркази, Ўзбекистондаги Ислом цивилизацияси маркази, Халқаро ислом академияси ўртасида ўзаро ҳамкорликка оид меморандумлар имзоланди.
Меморандумга кўра, томонлар Исломнинг илмий меросини ўрганадилар, Ўзбекистонда сақланаётган қадимий қўлёзмалар бўйича қўшма анжуманлар, семинарлар ва тадқиқотлар ўтказадилар, шунингдек, профессор ўқитувчилар учун малака ошириш курсларини ташкил этишади, талабалар билан алмашишади ва маърифатли Ислом бўйича тадқиқотлар олиб борадилар.
Тадбирда мамлакатимизда фуқаролик жамиятини ривожлантириш, бағрикенглик ва диний эркинликни таъминлаш, диндорлар ҳуқуқларини ҳимоя қилиш ва уларнинг камситилишига йўл қўймаслик борасида амалга оширилаётган ислоҳотлар ҳақида маълумот берилди. Ўзбекистон ҳукумати Ислом динини тўғри идрок этиш ва тушуниш масалаларига жиддий эътибор қаратаётгани алоҳида таъкидланди.
Малайзиянинг Исломни англаш институти раиси Аҳмад Саржи бин Абдул Ҳамид Ислом цивилизацияси бешиги ва дунёга машҳур олим ва мутафаккирларнинг ватани бўлмиш Ўзбекистон Малайзиянинг илмий-академик ҳамжамиятида катта қизиқиш уйғотаётганини таъкидлади.
А. Ҳамидга кўра, Ўзбекистон томонидан Республикада сақланаётган 100 мингдан ортиқ қадимий ва ноёб қўлёзмаларни ўрганиш учун тақдим этилган имконият ҳақиқий маърифатли Исломни чуқур англаш имконини беради.
Тадбир натижасида Ўзбекистонда чоп этилган илмий нашрларнинг IKIM онлайн кутубхонасига киритилиши, шунингдек, COVID -19 атрофидаги вазият барқарорлашгани сайин ўзаро ташрифлар ташкил этилиши маълум бўлди.
IKIM Исломнинг илм соҳасида фундаментал ва чуқур тадқиқотлар олиб бориш учун 1992йилда ташкил этилган. Институтда Шариатшунослик, ҳуқуқ ва сиёсатни ўрганиш маркази (Centre for the Study of Shari’ah, Law & Politics – SYARAK), фан ва атроф-муҳитни ўрганиш маркази (Centre for Science and Environment Studies – KIAS), иқтисодий ва ижтимоий тадқиқотлар маркази (Centre for Economics & Social Studies – EMAS) ҳам фаолият кўрсатади.
Таъкидлаш лозимки, 2017 йилда ташкил этилган Имом Бухорий халқаро илмий-тадқиқот маркази бугунги кунда дунёнинг 24 та етакчи ислом тадқиқот марказлари, университетлар билан ҳамкорлик йўлга қўйган бўлса, Ислом цивилизацияси маркази томонидан ҳамкорлик тўғрисида хорижий мамлакатлар билан имзолаган меморандумлар сони 13 тага етди.

Ўзбекистон мусулмонлари идораси матбуот хизмати

ЎМИ матбуот хизмати

Жорий йилнинг 1 июнь куни Ўзбекистон ташаббуси билан БМТнинг Бутунжаҳон сайёҳлик ташкилоти (ЮНВТО) шафелигида «Тикланиш йўли» номли халқаро онлайн-конференция ўтказилди, деб хабар бермоқда «Дунё» АА.
Унда Ўзбекистон Республикаси Бош вазири ўринбосари-Туризмни ривожлантириш давлат қўмитаси раиси Азиз Абдуҳакимов, ЮНВТО бош котиби Зураб Пололикашвили, ушбу ташкилотда рўйхатдан ўтган Марказий Осиё мамлакатлари ва Озарбайжон, Арманистон, Грузия, Россия, Беларусь ҳамда Молдова туризм маъмуриятлари раҳбарлари иштирок этди.
Ўзбекистон делегацияси раҳбари йиғилиш қатнашчиларига Ўзбекистонда туризм соҳасинининг замонавий ривожланиши, малакатимиз раҳбарияти томонидан турзм саноатининг ўсишини рағбатлантириш бўйича кўрилаётган чора-тадбирлар, шу жумладан давлатимиз раҳбарининг жорий йил 28 майдаги «Коронавирус пандемиясининг салбий таъсирини камайтириш учун туризм соҳасини қўллаб-қувватлаш бўйича шошилинч чора-тадбирлар тўғрисида»ги қарори ҳақида маълумот берди. Ушбу ҳужжатга мувофиқ миллий туристик хизматларни етказиб берувчиларга катта имтиёзлар берилиши таъкидланди
Ўзбекистонда туризм соҳасини қайта тиклаш жараёнида ЮНВТО, Жаҳон соғлиқни сақлаш ташкилотининг талаб ва таклифлари, халқаро экспертлар фикрлари ҳамда хорижий давлатларнинг тажрибаси инобатга олинаётгани таъкидланди.
Иштирокчиларга Ўзбекистон МДҲда биринчи бўлиб ички туризмга рухсат бергани айтиб ўтилди. Сайёҳларнинг хавфсизлигини таъминлаш мақсадида янги «Ўзбекистон хавфсиз туризмни кафолатлайди» (Uzbekistan safe travel guaranteed) тизими ва махсус хавфсиз туризм суғурта фонди ташкил этилди. Буларнинг барчаси Ўзбекистонда сайёҳларнинг хавфсиз ва қулай бўлиши учун ишлаб чиқилган.
Онлайн-конференция иштирокчилари ўз мамлакатларида туризмни қўллаб-қувватлаш ва COVID-19нинг ижтимоий-иқтисодий оқибатларини юмшатиш бўйича тажриба бўйича кўрилаётган чора-тадбирлар тўғрисида маълумот берди, туризм индустриясини тиклаш бўйича самарали стратегияларни ишлаб чиқиш бўйича энг яхши тажрибалари билан ўртоқлашди.
ЮНВТО бош котиби Зураб Пололикашвили ўз нутқида Ўзбекистон Республикаси ушбу ташкилотнинг фаол аъзоси эканлигини ва мамлакат доимо аҳолини ҳимоя қилиш воситаси сифатида барқарор туризмга содиқлигини намойиш этишини, шунингдек туризм соҳасини ривожлантириш учун янги бизнес моделларини қабул қилаётганини эътироф этди.
Бош котиб конференция иштирокчиларига ЮНВТОнинг Европа минтақавий комиссиясининг 65-йиғилиши онлайн тарзда бўлиб ўтишини ва ташкилотнинг навбатдаги 66-йиғилиши 2021 йил июнь ойида Самарқандда ўтказилиши режалаштирилганлигини маълум қилди.
Унга кўра, бугунги кунда ЮНВТО пандемияга қарши курашдан келажакка фаол тайёргарлик кўриш учун ҳаракат қилмоқда. Шу мақсадда ташкилотга аъзо давлатлар учун бир нечта тамойиллар ишлаб чиқилган. Улар орасида давлатнинг молиявий ёрдамига муҳтож бўлган туристик субъектларга кўмак бериш, вирусдан холи бўлгандан кейин туристик шароитларни енгиллаштириш, истеъмолчиларни ҳимоя қилиш орқали хавфсиз туризмни таъминлашга қаратилган қўшма протоколлардан фойдаланиш киради.

Ўзбекистон мусулмонлари идораси матбуот хизмати