Мусулмон дунёсида ўзига хос шуҳратга эга бўлган машҳур спортчи, бокс қироли Муҳаммад Али 3 июнь санасида АҚШнинг Аризона штати Феникс шаҳридаги Phoenix-area шифохонасида 74 ёшида вафот этди. 
Боксчи 32 йил давомида паркинсон касаллигидан азият чеккан. 
Асл исм-шарифи Кассиус Клей бўлган спортчи 1942 йилнинг 17 январь куни АҚШнинг Кентукки штати Луисвилл шаҳрида туғилган. 12 ёшидан бошлаб бокс билан шуғулланган. Фаолияти мобайнида 61 та жанг ўтказиб, шундан 56 тасида ғалаба қозонган, 37 жангни нокаут билан якунлаган. 
Кассиус Клей 1965 йили ислом динини қабул қилгач, бутун дунё бўйлаб нуфузи янада ошиб кетади. Айниқса, мусулмонлар орасида. У ирқий тенглик, бағрикенглик, тинчликпарварлик борасидаги қарашлари билан одамлар меҳрини қозонган. Мусулмонларга қарши ҳар қандай ёлғон ва уйдирмаларга қарши доим ўзининг кескин муносабатини билдириб келарди. 
Муҳаммад Али 8 нафар фарзанднинг отаси эди. 
Муҳаммал Али сўзларидан иқтибослар 
Мен ким билан учрашишни хоҳлардим? Муҳаммад пайғамбар билан! 
*** 
Сен ҳақ бўлсанг, ҳеч ким эсламайди. Агар бирор хато қилсанг, ҳеч ким унутмайди. 
*** 
Сукунат — олтин, қачонки у арзирли жавобни ўйлаб олиш учун бўлса. 
*** 
Журналист: "11 сентябрь воқеаларидаги террорчилар сизнинг динингизда эканини билганингизда кўнглингиздан қандай ҳислар ўтган?” Муҳаммад Али: « Гитлернинг дини сизникидек эди, нимани ҳис этгансиз?» 
*** 
Мен нимани тушунмайман? Бу – уруш! 
*** 
Менинг энг оғир жангим – Паркинсон касаллиги билан. Йўқ, бу оғриқли эмас. Буни тушунтириш мушкул. У мени аниқ синаяпти: сиғинишда давом этаманми, имонимни сақлаб қола оламанми? Яратган барча буюк шахсларни синовларга дучор қилади. 
*** 
Биз бошқаларга қанча кўп ёрдам берсак, шунча кўп ўзимизга ёрдам берган бўламиз. 
*** 
Эзгулик? Менинг онам! 
*** 
Бегуноҳ одамларни ўлдириш—менинг динимга зид! 
*** 
Мен ўғилларим ва қизларим ёнида турганимда, улар билан суҳбатлашганимда, ўзимни Буюк Аллоҳга яна ҳам яқинроқдек ҳис қиламан...

Манба: muxlis.uz

3 июнь куни Хадичаи Кубро аёл-қизлар билим юртида катта шодиёна – битирувчи курсларнинг Хатмона тантанаси бўлиб ўтди. 

Тадбир, аввало, Қуръони карим тиловати билан бошланиб, 4 курс талаба қизларининг келажак ҳаётларига муваффақиятлар тиланди. Сўнг Республикамиз мадҳияси янгради. Талабалар илм фазилати ҳақида саҳна кўриниши намойиш қилиб, мазмунли шеърлар ҳамда саловотлар ўқишди. 
Тадбирнинг асосий қисмидан сўнг, талабаларга диплом ва эсдалик совғалари топшириш маросими бўлиб ўтди. 

Тадбирга Тошкент ислом институти ректори Уйғун Ғофуров, “Кўкалдош” ўрта махсус ислом билим юрти ўқув ишлари бўйича мудир муовини Маъмур Эркаев, Вазирлар Маҳкамаси ҳузуридаги дин ишлари бўйича қўмита ходимаси Нигора Минаварова ҳамда билим юртида фаолият кўрсатган фахрий устозлар ташриф буюришди. 

Юртимиз равнақи, динимиз ривожи йўлида камарбаста барча битирувчиларга Аллоҳ таолодан улкан зафарлар тилаймиз! 

Таълим ва кадрлар тайёрлаш бўлими 

2016 йил 3 июн куни Ўзбекистон мусулмонлари идораси мажлислар залида муборак Рамазон ойи давомида Тошкент шаҳри масжидларида хатми Қуръонга ўтадиган қорилар билан учрашув бўлиб ўтди.

Унда Ўзбекистон мусулмонлари идораси раиси, муфтий Усмонхон Алимов қатнашиб, йиғилганларни яқинлашиб келаётган Муборак ой билан қутлади. Шунингдек, қориларга таровиҳ намозларида Аллоҳнинг каломини тўлалигича ўқиб беришдек шарафли ва масъулиятли вазифа олдидан ўзларининг тегишли кўрсатма ва тавсияларини бериб ўтди. Тадбир сўнгида қориларнинг ҳифзлари ва зеҳнларига Яратгандан барокатлар сўраб дуои хайрлар қилинди. 
Жорий йилда Тошкент шаҳридаги 109 та масжидда 167 нафар мураттаб қорилар иштирокида хатми Қуръон тадбирлари ўтказилиши режалаштирилмоқда. 

ЎМИ Масжидлар бўлими 

(китоб тақдимоти, Рамазон ойи олдидан йиғилиш тадбирлари) 
2016 йилнинг 2 июн куни Самарқанд шаҳридаги муҳташам санъат саройида Ўзбекистон мусулмонлари идораси Самарқанд вилояти вакиллиги тасарруфидаги масжид имом хатиблари ва ноиб имомлари ўртасида“Йил имоми - 2016” кўрик танловининг вилоят босқичи бўлиб ўтди. Унда танловнинг дастлабки туман босқичида ғолибликни эгаллаган 16 нафар имом хатиб ва ноиб имомлар беллашдилар. 

Кўтаринки руҳ ва юқори савияда ўтган “Йил имоми - 2016” кўрик танловига вилоят миқёсидаги ҳакамлар, вилоят бош имом хатиби Нуриддин Исламов, вилоят бош имом хатибининг ўринбосари Зайниддин Эшонқулов, Имом Бухорий халқаро маркази директори, Шовосил Зиёдов, Имом Бухорий халқаро маркази малака ошириш бўлими мудири Тоҳир Эвадуллаев, Самарқанд қишлоқ хўжалик институти маънавий маърифий ишлар бўйича ректор ўринбосари Абдушукур Ҳамзаевлар ҳайъат сифатида иштирок этиб, баҳолаб бордилар. 
Танлов иштирокчиларининг вилоят босқисига кучли тайёргарлик кўрганлиги ғолибларни аниқлашни анча қийинлаштириб қўйди. Шундай бўлсада тажрибали ҳакамлар ҳайъатининг қарорига кўра биринчи ўринга Жомбой тумани “Иброҳим ота” жоме масжиди имом хатибиАхмедов Анвар, иккинчи ўринга Пайариқ тумани “Мулла Тоҳир” жоме масжиди имом ноибиАзимов Қамариддин, учинчи ўринга эса Ургут тумани “Боғишамол” жоме масжиди имом ноиби Латипов Маҳмуд лойиқ топилди. Ғолиблар қимматбаҳо совғалар ва вакилликнинг фахрий

ёрлиқлари билан тақдирландилар. 

Кўрик-танлов ниҳоясига етгач, бевосита тадбирнинг иккинчи қисми: йилнинг энг яхши китоби дея эътироф этилган “Интернетдаги таҳдидлардан ҳимоя” номли китоб тақдимотига ўтилди. Тақдимот давомида мутахассислар Тошкент вилояти бош имом хатиби Хайрулло Турматов, “Мовароуннаҳр” нашриёти ходими Илҳом Маъруповлар китоб моҳияти ва унинг бугунги кундаги аҳамияти борасида батафсил сўзлаб беришди. Шунингдек, йиғилганларга, мавзуга оид видеофилм ҳам намойиш этилди. 

Тадбирнинг учинчи қисми муборак Рамазон ойи олдидан ва ой давомида ҳамда ҳайит кунида амалга ошириладиган ишлар муҳокамасига қаратилди. Вилоят бош имом хатиби Н.Исламов залда йиғилган шаҳар ва туманлар бош имом-хатиблари, масжид имомлари ҳамда ноибларига мавзуга оид кўрсатма ва топшириқлар бериб ўтди. 

ЎМИ Самарқанд вилояти вакиллиги 

2016 йил 2 июнь куни Ўзбекистон мусулмонлари идорасида янги нашрдан чиққан “Дунё уламолари мурожаати” номли китоб тақдимоти бўлиб ўтди. 
Маълумки, ҳозирги глобаллашув даврида ёшларни тўғри йўлдан адаштиришга, уларни маънан қашшоқлаштиришга, манқуртга айлантиришга қаратилган кўплаб маънавий таҳдидлар бор. Шундай ҳолатда ёшларимиз, жоҳил кимсаларнинг алдовларига учиб кетмасликлари учун уларни ёт иллатлардан хабардор қилиш, асл мақсадларини фош этиш, келажак эгаларини жаҳолатга қарши маърифат билан курашадиган қилиб тарбиялаш бугунги кундаги энг долзарб вазифадир. Шуларни инобатга олган ҳолда, Республикамизда соғлом маънавий муҳитни сақлаш, ёшларимизни соф Ислом маърифати асосида тарбиялаш, уларни турли ёт ғоялардан ҳимоя қилиш мақсадида кўплаб долзарб мавзудаги китоблар ва рисолалар нашр қилинмоқда. “Оилада фарзанд тарбияси”, “Ислом ва ақидапарст оқимлар”, “Интернетга ин қурган “ўргимчаклар””, “ИШИД фитнаси (Смута ИГИЛ)”, “Интернетдаги таҳдидлардан ҳимоя” ва бошқа қатор китоблар шулар жумласидандир. Бугун тақдимоти ўтказилган “Дунё уламолари мурожаати” китоби ҳам ана шундай долзарб мавзуни ўз ичида мужассам этган китобдир. 
Бу каби китоб ва рисолаларнинг нашр қилинишидан кўзланган энг олий мақсад – ёшларни ахлоқан баркамол, турли таҳдидларга қарши кураша оладиган, ҳушёр ва сергак қилиб тарбиялашдир. 
Китоб тақдимотида имом-хатиблар, диний таълим муассасалари мударрис-ўқитувчилари ва талабалар иштирок этишди. 
“Дунё уламолари мурожаати” китоби тақдимотини Ўзбекистон мусулмонлари идораси раиси, муфтий Усмонхон Алимов бошлаб берди. 
Ҳозирги кунда ёшларни тўғри йўлдан адаштиришга қаратилган ғояларга алданмаслик, залолат ботқоғига ботмаслик учун китобда дунё уламоларининг қатор тавсиялари келтириб ўтилган. 
Анжуманда Дин ишлари бўйича қўмита масжидлар бўлими мудири Муҳаммад Бобур Юлдошев, профессор Убайдулла Уватов, Ўзбекистон мусулмонлари идораси фатво бўлими мудири Абдулҳамид Турсунов, Ўзбекистон мусулмонлари идорасининг Тошкент шаҳридаги вакили, шаҳар бош имоми Анвар қори Турсунов, Тошкент ислом институти ректори Уйғун Ғофуров сўзга чиқишди. 
Китобда юртимиз ва дунё уламоларининг турли ёт оқимлар, бузғунчи кучларга қарши билдирган жуда муҳим фикрлари жамланган. Шунингдек ушбу китобда, дунёнинг бугунги кунда эътироф этилган забардаст уламолари томонидан ислом динининг мусаффолигини сақлаш, турли-туман туҳматлардан, эътиқодимизга бутунлай зид, динимизга мутлақо алоқаси бўлмаган гап сўзлардан ҳимоя қилиш мақсадида берилган фатволари, маърузаларидан намуналар келтирилган. Шунингдек, китобда мусулмон киши тўғри йўлдан адашмаслиги, бузғунчи кучларнинг пуч ғояларига алданмаслиги учун зарурий тавсиялар ҳамда асримизнинг йирик ислом уламолари ишлаб чиққан замонавий медиа воситаларидан фойдаланиш одоблари ҳам илова қилинган. 
Тақдимот тадбири муфтий ҳазратлари китоб ижодкорлари, азиз меҳмонларимиз ҳақларига дуо билан якунланди.

 
Ўзбекистон мусулмонлари идораси 
Матбуот хизмати