Бугун, 20 июнь кунидан барча диний таълим муассасаларида 2023–2024 ўқув йили учун қабул ҳайъатлари ўз ишини бошлади. Абитурентларнинг ҳужжатларини қабул қилиш жараёни тегиши тартиб-қоидалар асосида амалга оширилмоқда.

Айни дамда диний таълим билим юртларида абитуриентлар қабул қилиш учун керакли шароитлар ҳозирланган.

Жумладан, бугун бошланган “Қабул–2023” жараёни билан яқиндан танишиш учун Дин ишлари бўйича қўмита масъул ходими Нусратулло Нодиров ҳамда Ўзбекистон мусулмонлари идораси Таълим ва илмий тадқиқодлар бўлими ходими Абдуносир Бобамирзаевлар Кўкалдош ўрта махсус ислом билим юртига ташриф буюришди.

Қабул жараёни Қуръони карим тиловати ва дуою хайрлар билан бошланди.

Меҳмонлар Билим юрти мудири, Қабул ҳайъати раиси Абдулҳаким қори Матқулов ҳамроҳлигида
қабул учун яратилган барча шароитларни кўздан кечириб, абитуриентлар билан ўтказилаётган суҳбат ва ҳужжатларни қабул қилиш билан яқиндан танишди. Шунингдек, қабул жараёни борасида керакли тавсиялар берди.'

Ўзбекистон мусулмонлари идораси
Матбуот хизмати

14 июнь куни Малайзия сайёҳлик компаниялари ва туроператорлари ассоциацияси (MATTA) томонидан мамлакатнинг Селангор штатидаги “Setia City Convention Centre” анжуманлар марказида “MATTA Travel Exchange 2023” (MTEX 2023) “B2B” форуми бўлиб ўтди, деб хабар бермоқда «Дунё» АА мухбири.
Ушбу тадбир доирасида Ўзбекистоннинг Куала-Лумпурдаги элчихонаси томонидан мамлакатимизнинг зиёрат туризми салоҳиятига бағишланган тақдимот маросими ўтказилди.
Тадбирда Малайзиянинг 100 дан ортиқ туроператорлари ҳамда Ўзбекистон, Вьетнам, Грузия, Индонезия, Корея Республикаси, Сингапур, Эрон, Ҳиндистоннинг туриндустрия ва авиакомпаниялари вакиллари иштирок этдилар.
MATTA 1975 йилда ташкил этилган бўлиб, 3 мингдан ортиқ сайёҳлик компанияларини ўз атрофида бирлаштирган. Ушбу ассоциация бутун мамлакат бўйлаб ўз ваколатхоналарига эга бўлиб, мунтазам равишда Малайзиянинг барча штатларида “МАТТА Fair” сайёҳлик кўргазмалари ва хорижий компаниялар билан “B2B” учрашувларини ўтказиши анъанага айланган.
Тадбир иштирокчиларига Ўзбекистонда турли жабҳаларда олиб борилаётган кенг кўламли ислоҳотлар, замонавий сайёҳлик инфратузилмасини жадал ривожлантириш ва туризм хизматларини диверсификация қилиш бўйича амалга оширилаётган кенг қамровли чора-тадбирлар ҳақидаги батафсил маълумотлар тақдим этилди. Ўзбекистоннинг тарихий ва замонавий сайёҳлик марказлари, жумладан Самарқанд, Бухоро, Хоразм, Сурхондарё вилоятлари ҳамда Тошкент шаҳрининг туризм маҳсулотлари намойишига алоҳида эътибор қаратилди.
Охирги йилларда виза режимининг соддалаштирилиши натижасида 90 дан ортиқ хорижий давлатлар, жумладан, Малайзия фуқаролари учун республикага визасиз кириш тартиби амал қилаётгани алоҳида таъкидланди. Шунингдек, Тошкент ва Куала-Лумпур шаҳарлари ўртасида “Uzbekistan Airways” авиакомпаниясининг тўғридан-тўғри авиақатновлари ҳақидаги маълумотлар ҳам ўртоқлашилди.
Форум доирасида МАТТА вакиллари билан ташкил этилган музокаралар натижасида жорий йил сентябрь ойида Куала-Лумпур шаҳрида ўтказиладиган навбатдаги “МАТТА Fair” сайёҳлик кўргазмасида мамлакатимиз вакилларининг, шунингдек, ноябрь ойига мўлжалланган Тошкент халқаро сайёҳлик ярмаркасида МАТТА вакилларининг иштироки бўйича келишувга эришилди.
“B2B” форуми ишида Бухоро вилоятининг “Antique Travel” туроператори иштирок этгани ҳолда малайзиялик компаниялар билан тўғридан-тўғри ҳамкорлик алоқаларини ўрнатди. Малайзия туроператорлари билан ҳамкорликда Ўзбекистон йўналишида “маданий туризм”, “зиёрат туризми”, “Умра+”, “этнотуризм”, “гастротуризм”, “ишбилармонлик туризми” (MICE) каби янги турпакетлар бўйича ишларни йўлга қўйиш, тарғиб қилиш ва йил охиригача мамлакатимизга қўшимча 1000 нафар сайёҳни жалб қилиш юзасидан аниқ келишувларга эришилди.
Ўзбекистон мусулмонлари идораси матбуот хизмати

Эроннинг машҳур «Asia News» газетасида Ўзбекистоннинг сайёҳлик салоҳиятига бағишланган мақола чоп этилди, деб хабар бермоқда «Дунё» АА мухбири.
Нашрда Ўзбекистон қадимдан Буюк ипак йўлининг марказида бўлиб келгани, буюк тарихий, маданий ва меъморий меросга эга эканлиги қайд этилган.
«Мамлакатда етти мингдан ортиқ қадимий ёдгорликлар мавжуд бўлиб, улар тарихий-маданий, меъморий ва археологик жиҳатдан катта аҳамиятга эга. Ўзбекистон буюк маърифатпарвар ва олимлар - Ибн Сино, Беруний, Ал-Хоразмий Мирзо Улуғбек ва бошқа буюк шахслар ватани бўлиб, улар жаҳон маданияти ҳамда илм-фани тамаддунига катта ҳисса қўшган»,- дейилади мақолада.
Материалда қайд этилишича, Ўзбекистоннинг тоғ ва чўллари манзаралари дунёнинг турли бурчакларидан келган сайёҳларнинг эътибори ва ҳайратига сабаб бўлмоқда. Шу боис мамлакатнинг сайёҳлик салоҳиятини ортиқча баҳолаш шарт эмас ва ҳукумат уни ривожлантириш учун катта саъй-ҳаракатларни амалга оширмоқда.
2016 йилдан бошлаб Ўзбекистонда туризм соҳасини тубдан ислоҳ қилиш жараёни бошланди. 65 давлатдан ташриф буюрувчилар учун 30 кунлик визасиз тизим жорий этилди ва 77 давлат, жумладан Эрон фуқаролари учун электрон виза бериш тизими соддалаштирилди. Ислоҳотлар шарофати билан 2022 йилда Ўзбекистонга 5,2 миллион сайёҳ ташриф буюрган бўлса, жорий йилда 7 миллион сайёҳ жалб этилиши режалаштирилган.
«Ўзбекистон «The Guardian», «The Independent», «Global Muslim Travel Index», «National Geographic Traveler Awards», «Lonely Planet» сингари халқаро рейтингларда юқори ўринларда қайд этилмоқда. ЮНВТО маълумотига кўра, Ўзбекистон энг жадал ривожланаётган туризм саноатига эга бешта давлат қаторига киради ва «The Guardian» Ўзбекистонни дунёдаги энг яхши сайёҳлик йўналишларидан бири сифатида эътироф этди», - деб таъкидлайди форс нашри.
Мақолада қайд этилганидек, жори йилда Самарқанд шаҳрида Жаҳон туризм ташкилоти (UNWTO) Бош Ассамблеясининг 25-сессияси ўтказилади.
«2022 йил сентябрь ойида Шанхай ҳамкорлик ташкилотига (ШҲТ) аъзо мамлакатлар Давлат раҳбарлари кенгаши саммити бўлиб ўтган Самарқанд шаҳрида «Silk Road Samarkand» сайёҳлик маркази барпо этилди, – деб ёзади манба. – Марказ 260 гектардан ортиқ майдонда қурилган бўлиб, эшкак эшиш каналининг икки томонида жойлашган. Бу ерда қарийб 1,2 минг хонага эга саккизта меҳмонхона, жумладан, мамлакатдаги илк иккита беш юлдузли меҳмонхона, «Боқий шаҳар» карвонсаройи ва Конгресс-холл барпо этилди. Конгресс марказининг 18 минг квадрат метр майдонда сиғими 3,5 минг кишигача бўлган ўн учта конференция зали жойлашган».
Ушбу платформа Ўзбекистонда халқаро тадбирлар, форумлар, конференциялар, кўргазмалар, ярмаркалар ва фестивалларни ўтказиш орқали MICE туризми учун ажойиб имконият яратади. Бу ерда сайёҳлар ва меҳмонларни юқори савияда қабул қилиш учун тайёр барча инфратузилма мавжуд.
«Шунингдек, Қашқадарёнинг Шаҳрисабз шаҳри Иқтисодий ҳамкорлик ташкилотининг (ИҲТ) 2024 йилдаги туристик пойтахти этиб эълон қилинган. Қарор 2022 йил 13 декабрда онлайн тарзда ўтказилган ИТҲ давлатлари туризм вазирларининг тўртинчи йиғилиши якунлари бўйича қабул қилинди», - деб ёзади «Asia News».
Ўзбекистон мусулмонлари идораси матбуот хизмати

ЎзА аввал хабар берганидек, Индонезия вице-президенти Маъруф Амин бошчилигидаги делегация мамлакатимизга келган.
Юқори мартабали мулозимнинг матбуот котиби Масдуки Баидлови Ўзбекистон – Индонезия муносабати билан боғлиқ узоқ ўтмишга мурожаат қилар экан, юртимизни буюк ижодкорлар ватани, деб атади.
– Шу кунларда вице-президент рафиқаси билан Ўзбекистонда бўлиб турибди. Бу раҳбаримизнинг мамлакатингизга илк амалий ташрифи. Кун тартибида муҳим масалалар бор: ҳамкорликни, айниқса, иқтисодий алоқани кенгайтириш, ўзаро инвестиция жалб қилиш.
Шерикликнинг жадал ривожланиши сифатида яқинда Ўзбекистон Тошкентдан Жакартага тўғридан-тўғри ҳаво йўли очганини эътироф этамиз. Бу борада юртингизни қўллаб-қувватлаймиз.
Ташрифнинг иккинчи куни тарих ва цивилизацияга асосланган. Маълумки, Ўзбекистон диний ва илмий фанлар билан боғлиқ интеллектуал соҳада бой тарихга эга диёр, Ибн Сино, Имом Бухорий, Нақшбандий, Имом Термизий сингари кўплаб улуғ ижодкорлар ватани ҳисобланади.
Индонезия ва Ўзбекистон ўртасида зиёрат туризмини ривожлантириш ҳар икки томон учун муҳим жиҳат, деб ўйлайман.
Масалан, Индонезия, Ўзбекистон ва Имом Бухорий шахси ўртасида мустаҳкам тарихий алоқа мавжуд. Ўйлайманки, вице-президент ҳам ушбу нуфузли ҳадис уламоси мажмуасини зиёрат қилади. Умуман, давлатларимиз ўртасида зиёрат туризми салоҳияти жуда юқори. Энг муҳими, айни йўналиш мамлакатлараро, минтақалараро дўстликни мустаҳкамлашга хизмат қилади.
Дарвоқе, индонезияликлар одатда Макка, Мадина зиёратига доим Миср, БАА ёки Туркия орқали учишади. Фикримча, Саудия Арабистонига боришдан олдин Ўзбекистонга келиб, Имом Бухорийни зиёрат қилиб, кейин бошқа амалларни адо этсак, яхши бўларди. Буни кўпчилик эътироф этади.
Ўзбекистон мусулмонлари идораси матбуот хизмати

Ҳар бир мўмин-мусулмон, мўмина-муслима борки, Аллоҳнинг байтини умрида бир бор бўлса-да, тавоф қилишни, Пайғамбаримиз Муҳаммад соллаллоҳу алайҳи ва салламнинг муборак Равзаи шарифларини зиёрат этишни орзу қилади. Зеро, бу муқаддас заминда Қуръони карим оятлари нозил бўлган, ислом тарихига оид кўплаб воқеа-ҳодисалар кузатилган.

Умуман, Каъбатуллоҳда ибодат қилиш, Пайғамбаримиз масжидларида намоз ўқишнинг савоби кўп: Масжидул Ҳаромда бир ракат намозга Ислом дини Ҳаж мавсуми – улуғ амаллар адоси минг ракат намозининг, Масжиди Набавийдаги минг ракат намознинг савоби берилади. Бундай улкан имкониятга эришиш учун барча талпиниши табиий.

Ҳақиқат қиёсда юзага чиқади. Авваллари ҳаж квотаси 5200 тани ташкил этган бўлса, 2019 йил бу рақам 7200, 2022 йил эса 12000 га етди. Жорий йил Ўзбекистон фуқаролари учун умумий ҳаж квотаси 15000 та этиб белгиланди. Бу мисли кўрилмаган улкан неъмат. Бир умр Каъбаи муаззама, Равзаи шарифни соғиниб яшаб ўтиб кетган аждодларимиз орзулари 15 минг ҳожи тимсолида рўёбга чиқмоқда. Буюк шарафга, бахтга ноил бўлиб турган юртдошларимиз одамнинг ҳавасини келтирадиган шароитларда ҳаж сафарини адо этиш учун айни кунларда Мадинаи Мунаввара ва Маккаи Мукаррама шаҳарларида бўлиб туришибди.

Аввалги номи Ясриб бўлган шаҳар Пайғамбаримиз ташрифлари билан нурли, мунаввар шаҳарга айланди. Масжиди Набавийга кирган одам муаззам маскандан чиққиси келмайди: тўйиб-тўйиб ибодат қилишни хоҳлайди. Пайғамбаримизнинг бу масжидларида намоз ўқиётган, дуо, зикр қилаётган ҳожи намоз асносида худди ўзини Расулуллоҳ ортида тургандек тасаввур қилади. Айниқса, Равзаи шарифга кирган киши ўзини, гўё, жаннатда ҳис этади. Чунончи, Набий алайҳиссалом муборак ҳадисларида: “Уйим ва минбарим ўртасида жаннат боғларидан бир боғ бор”, деганлар. Дарҳақиқат, шундай. Ҳожиларимиз ибодатни хотиржам бажариши учун Мадинаи Мунавварада барча қулайликларга эга беш юлдузли “Замзам Пуллман”, Макка шаҳрида “Рошидия” меҳмонхоналари хизматда. Ушбу турар жой мажмуалари Масжиди Набавийнинг шундоқ ёнгинасида жойлашгани юртдошларимиз намоз ва зиёратни кўпроқ адо этишига имкон яратяпти.

Масжиди Набавий ҳовлисида туриб, гўзал манзарани кузатишнинг завқи бўлакча: эгнига Ўзбекистон байроғи рамзи туширилган нимча кийиб олганча ибодатга шошаётган ҳожи ота, ҳожи оналаримиз юз-кўзларидаги қувонч уларнинг нақадар бахтиёр эканликларидан нишона.

Айниқса, намоздан сўнг жаннатмонанд юртимиз тинч-осуда, халқимиз турмуши бундан-да фаровон бўлишини, хайрли ишларга бош-қош бўлаётган раҳбарларимиз тану жони соғ бўлишини Яратгандан чин дилдан сўраб, илтижо қилаётган юртдошларимиз дуолари ижобат бўлғуси, иншоаллоҳ.

Юртдошларимиз дастлабки уч кун давомида Пайғамбар алайҳиссалом равзаларини зиёрат қилиб, Уҳуд тоғи, ислом оламида биринчи қурилган масжид – “Қубо”да бўладилар. Асосий вақт Масжиди Набавийда тоат-ибодат билан ўтади. Бу муаззам масжид ҳар бир ҳожини ўзига чорлайди.

Қаҳрамонлар зиёрати

Мунаввар шаҳарга келган киши борки, Уҳуд тоғига боришга интилади. Зеро, бу маконни Пайғамбаримиз яхши кўрганлар. Бир муборак ҳадисда: “Бу Уҳуд тоғи, у бизни яхши кўради ва биз ҳам уни яхши кўрамиз”, дейилган.

Уҳуд тоғи Мадинаи Мунавварадан, тахминан, 4-5 километр шимолда жойлашган. Узунлиги 7, кенглиги 2-3 километр, баландлиги салкам 350 метр.

Бу атрофда жуда кўп тарихий воқеалар рўй берган. Шулардан бири – Уҳуд жанги. Айни ғазот Бадр ғазотидан кейин, ҳижрий 3-йилда, муслимлар билан Қурайш қабиласи ўртасида кечган. Ушбу жангда минг нафар мусулмон уч минг нафар Қурайш қўшинига қарши курашган.

Бу тоққа зиёратга келган кишида, беихтиёр, ватанпарварлик ҳисси жўш уради, чунки Уҳуд қаҳрамонлари ўз Ватани – Мадинаи Мунавварини, қолаверса, раҳбарлари, яъни Расулуллоҳни қандай ҳимоя қилганини Саъд ибн Абу Ваққос мисолида билиб оламиз. Бу улуғ саҳоба Набий алайҳиссаломни ҳимоя қилиш асносида етмиш жойидан яраланган.

Раҳмоннинг меҳмонларига хизмат қилиш – шараф!

Ҳаж қилувчи киши Аллоҳ таолонинг меҳмонидир. Ҳаж амалини бажараётган кишига кўмак берган, унинг оғирини енгил қилган инсон улуғ савобга ноиллиги хусусида кўп далил бор. Шу маънода “Ҳаж – 2023” ташкилотчилари ва ишчи гуруҳ аъзолари айни улуғ даражани мақсад қилиб, Раҳмоннинг меҳмонларига Ўзи рози бўладиган даражада сидқидилдан хизмат этяптилар. Делегация, ишчи гуруҳ аъзолари, элликбошилар доимо ҳожилар ёнида, шифокорлар ҳамюртларимиз саломатлигидан мудом хабардор. Ошпазларимиз ибодатга қувват бўладиган тансиқ миллий таомлардан тайёрлаб беришяпти.

Уламоларимиз, аҳли илм зиёратчилар билан мунтазам суҳбат ўтказиб, ибодатни чиройли адо этишга яқиндан кўмакчи. Ҳожиларга сифатли транспорт хизмати кўрсатиш, уларни белгиланган манзилга кечиктирмасдан етказиш мақсадида автобуслар жалб этилган. Бизнинг бош мақсадимиз зиёратчиларнинг ҳар бир қадамини енгиллаштириб, кўп вақтини ибодатга сарфлаш эди ва бунга Аллоҳ муваффақ қилди.

Ҳожиларимиз ҳажини Ўзи мабрур қилсин.

Абдуқаҳҳор домла ЮНУСОВ,

Тошкент шаҳри бош имом-хатиби

Саудия Арабистони, Мадина шаҳри