Тошкент шаҳри Шайхонтоҳур туманининг “Ҳувайдо” маҳалласидаги 1930 йилдан буён аҳоли турар жойлари орасида қаровсиз қолиб кетган эски қабристоннинг ер майдони 1989 йил августь ойида Тошкент шаҳар ижроия қўмитасиннинг қарорига асосан обод қилиш учун маҳалла оқсоқоллари ихтиёрига топширилди. 1991 йил Ватанимиз мустақилликка эришганидан сўнг, маҳалла аҳолисининг илтимосига кўра мазкур ерда масжид қурилишига рухсат берилди.

Маҳалла аҳолиси ва ҳомийлар кўмагида ҳашар йўли билан 0,8 гектар майдонни эгаллаган ҳудудда қурилиш ишлари бошланиб, 1993 йилда қурилиш якунланиб, масжид ишга туширилди. Масжидга 1701-1780 йилларда Фарғона водийсининг Чимён қишлоғида яшаб ижод этган тасаввуфий шоир ва мутафаккир Ҳувайдо номи берилди.

Ушбу масжидда илк бора имом-хатиб сифатида ҳозирда Ўзбекистон мусулмонлари идораси раиси ўринбосари лавозимида хизмат қилиб келаётган, муҳтарам устоз шайх Абдулазиз Мансур ҳазратлари фаолият юритганлар. Устоз масжид қавми ва маҳалла аҳлига илму маърифат улашиш билан уларнинг меҳрини қозонди. Ўша вақтдан бошлаб мазкур муқаддас даргоҳ обод масканга айлана бошлади.

2016 йилда масжид ҳудудида кенг кўламли кўкаламзорлаштириш ва ободонлаштириш ишлари олиб борилди. Хонақоҳ айвони ва таҳоратхона қайтадан қурилди. Масжид биносининг ташқи фасади таъмирланиб, замонавий кўринишга келтирилди. Экин майдонларига гул ва манзарали дарахт кўчатлари ўтқазилди.

Бундай хайрли ишларни амалга оширишда ҳукуматимиз томонидан берилаётган имкониятлар билан бир қаторда Ўзбекистон мусулмонлари идорасининг маслаҳат ва кўрсатмалари алоҳида ўрин тутади. Ушбу масжиднинг гўзал ҳолатга келишида, албатта, “Ҳувайдо” маҳалласи ихлосманд аҳолисининг беминнат моддий-маънавий ёрдами таҳсинга лойиқдир.

Бугунги кунда “Ҳувайдо” масжидида нуроний отахонлар, намозхонларимиз кўтаринки кайфиятда имон ва ихлос билан ибодатларини адо этиб келмоқдалар.

Ушбу масжидда 2011 йилдан буён Тошкент ислом институтини тамомлаган, айни вақтда мазкур даргоҳда мударрислик қилаётган Фарҳод Жўраев имом-хатиб вазифасида меҳнат қилиб келмоқда.

Музаффар Жабборов,

ЎМИ Масжидлар бўлими ходими

Ўч олишга қодир бўла туриб кечириб юбориш фазилати худди бир кўзгу бўлиб, у ўзида нафснинг энг гўзал кўринишлари ва энг олий мақсадларини акс эттириб туради. Аллоҳ таоло бундай марҳамат қилади:

خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ

Афвни (қабул қилиб) олинг, яхшиликка буюринг, жоҳиллардан эса юз ўгиринг!  (Аъроф, 199).

Барчамиз сийрат китобларидан Расулуллоҳ соллаллоҳу алайҳи ва саллам Маккаи мукаррамага фатҳ қилган, зафар қучган ҳолларида кириб келганларида Макка аҳли, Тоиф аҳли ва у зотга нисбатан фитна қилган зодагонлар, ёмонлик қилган бошлиқларга қандай муомалада бўлганларини ўқиганмиз. Ўшанда У зотнинг афвлари, кечиримлик сифатлари бутун ўлкаларни, ер юзида бузғунчилик қилган, Пайғамбаримиз алайҳиссаломга азият берган, зулм қилган Макка зодагонларию бошлиқларини қамраб олган эди. Қуйида Расулуллоҳ соллаллоҳу алайҳи ва салламнинг беназир кечиримликларидан баъзи намуналарини санаб ўтамиз:   

1. Расулуллоҳ соллаллоҳу алайҳи ва саллам Маккага кирганларида Икрима ибн Абу Жаҳл, Сафвон ибн Умайя, Суҳайл ибн Амр ва бир қанча кишилар у зотга бўйсунишдан бош тортиб, уруш қилишди. Мағлуб бўлиб, қочиб кетишди. Сўнг у зотдан омонлик беришларини сўраб элчи юборишди. Ўшанда Расулуллоҳ соллаллоҳу алайҳи ва саллам уларга омонлик бердилар, қилган ишларини кечириб юбордилар, ҳатто қалбларини улфат қилиш мақсадида, Ҳавозин ғазотидан тушган ўлжалардан тақсимлаб бердилар.
2. Отаси ҳам ўзи ҳам душман бўлган Сафвон ибн Умайяни мисол тариқасида эслаб ўтайлик. У Яманга денгиз орқали ўтиш учун Жидда томон қочиб кетди. Шунда Умайр ибн Ваҳб Расулуллоҳ соллаллоҳу алайҳи ва салламнинг ҳузурларига келиб:

• Ё Набийюллоҳ, ўз қавмининг саййиди бўлган Сафвон ибн Умайя ўзини денгизга ташлаш мақсадида сиздан қочиб кетди. Унга омонлик берасизми, - деди.
• Майли, у омонда, - дедилар.
• Ё Расулуллоҳ, Сафвонга омонлик берганингизни билиб олиши учун унга бирор белги беринг, деди.

Расулуллоҳ Маккага кириб келганларида кийган саллаларини бердилар. Умайр уни олиб, йўлга отланди, Сафвон энди денгизни сузиб ўтмоқчи бўлганида, Умайр етиб келиб:

• Эй, Сафвон ота-онам сенга фидо бўлсин! Ўзингни ҳалок қилишдан Аллоҳдан қўрқ. Мана Расулуллоҳ томонидан берилган омонлик белгиси, уни сенга олиб келдим, - деди.
• Ҳозир қайтиб борсам жонимга бирор нарса бўлишидан қўрқаман, - деди.
• Расулуллоҳ сен ўйлаганингдан кўра ҳалимроқ ва меҳрибонроқ, - деб Сафвонни орқага қайтарди. Улар Расулуллоҳ соллаллоҳу алайҳи ва салламнинг ҳузурларига келганида, Сафвон:
• Мана бу (ишора Умайр ибн Ваҳбга) айтишича, сиз менга омонлик берган экансиз, - деди. У зот алайҳиссалом:
• Тўғри, - дедилар. Шунда у:
• Ундай бўлса, бу борада (исломни қабул қилиш қилмасликда) ихтиёр этишимга икки ой муҳлат беринг, - деди.  Шунда У зот:
• Ихтиёр этишингга тўрт ой рухсат, - дедилар.

3. Абу Суфён ибн Ҳорис фатҳдан бироз олдин Расулуллоҳ соллаллоҳу алайҳи ва салламнинг олдиларига келди. У илгари У зотга азият беришда жуда пешқадамлардан бири эди. Абу Суфён Пайғамбаримиз алайҳиссалом ҳузурларига киришга изн сўраганида, У зот: “Менинг унга ҳожатим йўқ, менинг у билан ишим йўқ, у мени обрўсизлантирган эди”, дедилар. Ўшанда Абу Суфён ўз ўғли билан бирга эди. Бу гапларни эшитган Абу Суфён: “Аллоҳга қасамки, ё менга киришимга изн берадилар ё мана бу ўғлимнинг қўлидан ушлаб то чанқоқлик ва очликдан ўлгунимизча юрамиз”, деб қасам ичди. Расулуллоҳ соллаллоҳу алайҳи ва салламга бу гаплар айтилганида, унга нисбатан қалблари юмшаб киришига изн бердилар. Ҳузурларига кирганида уни кечирдилар. Шунда Абу Суфён қуйидаги шеърни айтди:

Умрингизга қасамки, Лотнинг оти Муҳаммаднинг отидан ғолиб келиши учун байроқ кўтарган куним,

Зулматли кечада ҳайрон бўлиб, йўлга чиққан кишидек эдим.

Мана энди тўғри йўлга йўлланиб ҳидоятни топган вақтларим келди.

4. Маккада Расулуллоҳ Байтуллоҳни тавоф қилиб турганларида Фазола ибн Умайр у зотни қатл қилиш истагида яқинлашди. Шунда Расулуллоҳ соллаллоҳу алайҳи ва саллам:

• Фазола сенмисан? – дедилар. У:
• Ҳа, Фазоламан, ё Расулуллоҳ, - деди.
• Ичингда нималарни тугиб қўйган эдинг? – дедилар.
• Ҳеч нимани, ўзим Аллоҳ азза ва жаллани зикр қилаётган эдим, - деди. Расулуллоҳ кулдилар ва:
• Аллоҳ таолога истиғфор айт! – деб, қўлларини унинг кўксига қўйдилар. Шу заҳоти унинг қалби тинчланди. Фазола розияллоҳу анҳунинг ўзи бу ҳақда шундай деган: “Аллоҳга қасамки, Расулуллоҳ соллаллоҳу алайҳи ва саллам қўлларини кўксимдан олишлари билан дунёда мен учун у зот энг севимли инсонга айландилар”.

5. Фатҳдан кейин ҳамма инсонлар ўзларига келгач, Расулуллоҳ соллаллоҳу алайҳи ва саллам Каъба эшиги олдига туриб: “Ла илаҳа иллаллоҳу ваҳдаҳу ла шарика лаҳу, содақо ваъдаҳ, насоро ъабдаҳ, ва ҳазамал-аҳзааба ваҳдаҳ (маъноси: Аллоҳ таолодан ўзга илоҳ йўқ, У Зот ваъдасини бажарди, бандасига ёрдам берди, душманларнинг устидан Ўзи ғолиб келди). Огоҳ бўлинглар! Жоҳилият аҳлининг барча одатларию даъво қилинадиган қону моллари мана бу икки қадамим остида қолди (яъни, бекор қилинди). Фақат Байтуллоҳнинг хизмат ишлари ва ҳожиларни суғориш ишлари бундан мустасно. Эй, Қурайш жамоаси, дарҳақиқат Аллоҳ таоло сизлардан жоҳилият димоғдорлигини, ота-боболари билан фахрланиш одатини кетказди. Барча инсонлар Одам алайҳиссаломдан. Одам эса тупроқдан”, деб қуйидаги оятни ўқидилар:

 يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ

“Эй, инсонлар! Дарҳақиқат, Биз сизларни бир эркак (Одам) ва бир аёл (Ҳавво)дан яратдик ҳамда бир-бирларингиз билан танишишингиз учун сизларни (турли-туман) халқлар ва қабила (элат)лар қилиб қўйдик. Албатта, Аллоҳ наздида (энг азизу) мукаррамроғингиз тақводорроғингиздир. Албатта, Аллоҳ билувчи ва хабардор зотдир. (Ҳужурот, 13).

Сўнг яна:

• Эй, Қурайш жамоаси, сизлар ҳақингизда қандай ҳукм чиқараман, деб ўйлайсизлар, - дедилар. Қурайш қавми:
• Яхшилик қиласан, сен олийжаноб кишининг ўғли бўлган олийжаноб кишисан, - дейишди. У зот:
• Кетаверинглар, сизлар озодсизлар, - дедилар.

Мана Расулуллоҳ соллаллоҳу алайҳи ва салламга тош отиб ҳайдаб юборишган Тоифдаги  Сақиф қабиласининг барчаси У зотнинг ҳузурида турибди. Фатҳ куни Расулуллоҳ уларга нисбатан нима қилдилар, деб ўйлайсиз? Ҳолбуки, улар орасида Пайғамбаримиз алайҳиссаломни Тоифдан хайдаб чиқарган Абдулуайл ибн Амр ибн Умайр каби кишилар ҳам бор эди.

РАСУЛУЛЛОҲ СОЛЛАЛЛОҲУ АЛАЙҲИ ВА САЛЛАМ БАРЧАЛАРИНИ КЕЧИРИБ ЮБОРДИЛАР.

Ғиёсиддин Баратов,

"Кўкалдош" ўртамахсус ислом билим юрти мударриси

Диний –экстремистик ҳаракатлар фаоллари ўзларининг сафларига кишиларни жалб қилиш ҳамда янги қўшилган  аъзоларни жамоага янада кўпроқ мойил қилиш мақсадида ўз раҳнамоларини улуғлашга алоҳида эътибор берадилар. Масалан, шу каби оқимлардан бири бўлган “Мусулмон биродарлар” ташкилоти ўзларининг раҳнамолари бўлган Ҳасан ал- Банно шахсиятини “Аллоҳ тамонидан танланган Зот”, “Шайх”, “Валий”, деб улуғлашади. Бундай амалиётдан, биринчидан, кишилар орасида  ўзларининг раҳнамоларининг обрўсини кўкларга кўтариш  орқали содда халқ орасида жамоалари мавқеини ошириш ва ёшларни тўғри йўлда эканликларига ишонтиришдан иборатдир. Иккинчидан, улар тамонидан чиқарилган “фатво”, амр ва топшириқларни шариат аҳкоми сифатида қабул қилинишига эришиш кўзланганлигини англаш қийин эмас.

Жумладан, “Нурчилик” оқимининг асосчиси Саид Нурсийни “Бадиуззамон” ( “Замонанинг беназири”), ҳозирдаги раҳбари Фатҳулла Гюленни эса “Қутбул ақтоб” (“Буюклар буюги”), “ат-Такфир вал-ҳижра” оқимлари ўзларининг бошчиси  Шукрий Мустафони “Маҳдий” деб улуғлашлари фикримизнинг яққол далилидир.

Маълумки, Ислом оламида диний билимларда юқори даражаларга эришган кишиларга нисбатан муайян ҳолларда “Шайх” унвони ишлатилади. Бундай рутба дин йўлида қилган хизматлари эвазига йирик уламоларнинг унвони сифатида эътироф этилади ва ҳеч ким ўз-ўзича бу даражага эришганини даъво қила олмайди. Шу нуқтаи назардан қараганда, “Ҳизбут – таҳрир”, “Ўзбикистон ислом ҳаракати” каби бошқа фирқа ва оқимлар томонидан ўз раҳнамоларига нисбатан “шайх”лик мартабасининг кенг қўлланилаётгани улар одамларни чалғитиш ва ўз мақсадларига эришишда ҳеч нарсадан тап тортмасликларини кўрсатади. 

Шундай экан ҳар биримиз булар  каби “олим”лик даъвосини қилаётган омиларни, тўғри йўлда эканликларига ишонтирмоқчи бўлган эгриларни, нурмиз деб бонг ураётган зулматларнинг кирдикорларидан огоҳ бўлишимиз лозим.

Муҳаммад ибн Аҳмад ал-Беруний

ўрта махсус ислом билим юрти 2-курс талабаси

ИСАЕВ БЕКИСЛОМ

Ҳузайфа розияллоҳу анҳу(р.а)дан ривоят қилинади, Пайғамбаримиз соллаллоҳу алайҳи васаллам айтдилар:

“Чақимчи жаннатга кирмайди”. (имом Бухорий ва Муслим ривояти)

Абу Ҳурайра р.а. дан ривоят қилинади, Пайғамбаримиз соллаллоҳу алайҳи васаллам айтдилар:

“Орангиздаги энг ёмон киши кимлигини биласизларми? Cаҳобалар Аллоҳ ва унинг Росули билгувчироқ деб жавоб беришди. Ул зот: Сизларнинг энг ёмонингиз иккиюзламачи кишидир. У бир жамоага бир юз билан ва бошқасига бошқа бир юз билан боради”. Муҳаддис олимлар хадисда иккиюзламачи дейилган кишини қуйидагича таърифлашади:

Масалан иккиюзламачи одам Умарнинг олдига бориб Усмоннинг номидан уни ёмонлайди, Усмоннинг олдига бориб Умарнинг номидан уни ёмонлайди. Бу мақолани ўқиётган ўқувчи аввало ўзининг кимлигига ва атрофидаги дўстларини қанақалигига бир аҳамият берсин!

Чақимчилик – бир инсоннинг гапини бошқа бир инсонга уларнинг ўртасида адоват ва ғазаб келтириб чиқариш учун  айтиш. Чақимчилик бу муқаддас Ислом дийнимизда катта гуноҳлардан бири ҳисобланади. Чунки чақимчилик мусулмонлар орасига, жамиятга ва қариндош уруғчилик ришталарига раҳна солувчи иллатлардан биридир. Муқаддас китобимиз Қуръони Каримда ва Пайғамбаримиз соллаллоҳу алайҳи васалламнинг Хадиси Шарифларида ҳам чақимчилик катта гуноҳлардан бири экани зикр қилинади.

Яна бир хадиси шарифда Пайғамбаримиз соллаллоҳу алайҳи васаллам:

“Мендан эмас хасадгўй, чақимчи, коҳин. Ва мен ҳам улардан эмасман” деганлар (имом Табароний ривояти). Хадиси шарифнинг маъносига эътибор берсак юқоридаги уч тоифадан Аллоҳ Таолонинг энг суюкли Пайғамбари юз ўгирмоқда, қиёмат куни мусулмонларни шафоат қилувчи зот улардан қаттиқ ғазабланмоқда. Бу уч гуноҳкор тоифа Аллоҳнинг мағфиратидан, Пайғамбаримиз соллаллоҳу алайҳи васалламнинг шафоатидан маҳрум бўлмоқда. Сиз мусулмон бўла туриб Аллоҳнинг ва Росулуллоҳнинг ғазабига дучор бўлишни хохлайсизми?!

Марҳамат Аллоҳ Таоло сизга ихтиёр бериб қўйган хасад қилишда, чақимчиликда ва коҳин(фолбин)лик қилишда давом этинг. Йўқ мен Аллоҳнинг мағфиратига муҳтожман, қиёмат кунида Пайғамбаримиз соллаллоҳу алайҳи васалламнинг шафоатига эга бўлмоқчиман деса, ҳозироқ хасад, чақимчилик, коҳин(фолбин)лик қилиб дийнга ва жамиятга зарар беришни тўхтатсин. Аллоҳ Таоло барчамизни бу ёмон иллатлардан узоқ қилсин.

Ҳабибуллоҳ Абдураззоқов,
"Ҳазрати Имом" жоме масжиди имом ноиби