muslim.uz
Ким бошқалардаги оғриқни ҳис қилса...
Абу Ҳурайра розияллоҳу анҳу ривоят қилган ҳадисда, Расулуллоҳ соллаллоҳу алайҳи васаллам айтдилар:
«Ким бир мўминдан дунё ғамини аритса, Оллоҳ ундан қиёмат куни ғамини аритади. Ким қийналганга ёрдам берса, Оллоҳ унга дунё-ю охиратда ёрдам беради. Ким бир мусулмоннинг айбини яширса, Оллоҳ уни дунёю охиратда сатр қилади, айбларини яширади. Банда модомики биродарига ёрдам берар экан, Оллоҳ унга ёрдам бераверади». (Муслим ривояти).
Динимизда инсонлар бир-бирига моддий ва маънавий ёрдам беришининг савоби жуда улуғдир. Бу билан жамиятда ўзаро меҳр, муҳаббат, самимийлик ва инсонийлик каби фазиллатлар тарқалиб, нафрат, адоват, ҳасад каби иллатлар барҳам топади.
Бир ҳикояча келтирсак: “Масхарабоз биргина ўғлини дафн этгач, циркка етиб келиб, саҳнага чиқди. Томошабинлар уни кулиб кутиб олдилар. Қўлида тупроқ қолдиқлари қолганди. Ўшани қоқиб ташлади. Томошабинлар янада баландроқ овозда кулдилар. Ўғлининг вафотидан ва томошабинлар уни ҳис қилмаётганидан таъсирланган масхарабоз хўнграб йиғлаб юборди, яна ҳар тарафдан кулгу садолари эшитилди. Мана шу пайт унинг жони узилиб саҳнага йиқилди. Ҳамма ўрнидан туриб, қарсаклар билан олқишлади”.
Ҳа, азизлар, ҳикоя шундай якун топди. Одамларни кулдиришга, хурсанд қилишга одатланиб қолганингда, улар сенинг ичингдаги оғриқ ва аламларни сезмайдилар.
Ҳикматларда шундай дейилган: “Агар ўзингдаги оғриқни ҳис қилсанг, демак, тириксан. Агар бошқалардаги оғриқни ҳис қилсанг, демак, инсонсан”.
Одамларнинг оғриқларини ҳис этишга, уларга ёрдам беришга, тасалли билан кўнгилларини кўтаришга ва оғирларини енгил қилишга уринайлик!
Нозимжон Иминжонов тайёрлади
Нуриддин домла Холиқназаров – Ака-ука оқибати
ЎМИ Матбуот хизмати
Фоторепортаж: Ҳазрати Нақшбанд зиёратгоҳи
ЎМИ Матбуот хизмати
Расмлар муаллифи Шаҳзод Шомансур
Самарқандда қабристонларни ободонлаштириш бўйича ҳашар ташкил этилди
Аждодларимизнинг ҳоклари қўним топган масканларни тоза тутиш, бир кун келиб ўзимиз ҳам охиратга қадар қўйилишимиз мумкин бўлган жойларни ободонлаштириш ҳар бир мўмин кишининг бурчидир. Шундай хайрли ишларни амалга оширишда бугунги кунда диний соҳа ходимлари фаоллик кўрсатмоқдалар.
Ўзбекистон мусулмонлари идораси Самарқанд вилояти вакиллиги ҳамда жойлардаги масжидлар томонидан жорий йилнинг 2-3 март кунлари қабристонларни ободонлаштириш ва тозалаш бўйича ҳашар ўтказилди.
Вилоятда 1441 та қабристон бўлиб, шундан 819 тасида ҳашар ўтказилган. Унда 27 минг нафардан ортиқ фуқаролар иштирок этиб, ҳашар жараёнида кўчатлар ўтқазилган, тозалаш ва ободонлаштириш ишлари амалга оширилган.
Жумладан, 2290 дона манзарали дарахт кўчатлари экилган, 13 минг метрдан ортиқ ариқлар тозаланган. 91,5 тонна чиқиндилар олиб ташланган. 7900 туп дарахтлар оқланиб, уларга шакл берилган. Ушбу ишларга 73 та техника жалб этилиб, 560 та қабрлар сомонли сувоқ қилинган.
Март ойида қабристонларни ободонлаштириш ишлари яна давом эттирилиши маълум қилинган.
Ўзбекистон мусулмонлари идораси Матбуот хизмати
Беҳуда нарсаларни тарк этиш
Маълумки, инсон бу дунёда қилган ишларига ва гапирган гапларига охиратда жавоб беради. Елкамиздаги фаришталар қилган ишларимиз билан бирга оғзимиздан чиққан ҳар бир сўзни ёзиб боришади.
Аллоҳ таоло Қуръони Каримда шундай марҳамат қилган:
إِذْ يَتَلَقَّى الْمُتَلَقِّيَانِ عَنِ الْيَمِينِ وَعَنِ الشِّمَالِ قَعِيدٌ مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ
“Зотан икки кутиб олувчи ўнгда ва чапда ўтирган ҳолларида кутиб олурлар. У бирор сўз айтмас, магар ҳузурида (фаришта) ҳозиру нозир” (Қоф сураси, 17-18-оятлар).
Буюк тобеинлардан бўлган Умар ибн Абдулазиз раҳимаҳуллоҳ “Айтаётган гапини амалидан деб билган одамнинг гапи оз бўлади” деганлар.
Бир масални келтирсак: “Бир куни эшак арслоннинг терисини ёпиниб олиб, ҳамма ҳайвонларни қўрқита бошлабди. Шу пайт у тулкига йўлиқиб қолди ва бошқа ҳайвонларни қўрқитганидек, уни ҳам қўрқитмоқчи бўлди. Шунда тулки: “Менга ишон, агар сенинг ҳанграганингни эшитиб қолмаганимда, сендан қўрқиб кетган бўлардим” деди”.
Аҳмоқ кимсалар ақлли инсонларнинг “либослари”ни кийиб оладилар. Кейин ўзларининг бемаъни маҳмадоналиклари билан аҳмоқ эканликларини фош қилиб қўядилар.
Дўстлар, дунё ва охиратимизга фойдали бўладиган ўринлардагина гапирайлик. Бўлмаса, сукут сақлаб турайлик. Зеро, муборак ҳадисда шундай дейилган:
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Ўзи учун беҳуда нарсаларни тарк қилиши киши Исломининг ҳуснидандир», дедилар».
Термизий ва Ибн Можа ривоят қилишган.
Гўзал мусулмоннинг қиладиган ишлари ва айтадиган сўзлари фақат фойдали, ўринли бўлиб, беҳуда, кераксиз гапларни гапирмайди, ундай ишларни қилмайди.
Аллоҳ таоло бизни ҳам айтадиган сўзини амалидан деб, фойдали ўринлардагина гапирадиган бандаларидан қилсин, омин!
Нозимжон Иминжонов тайёрлади
Мақолалар
