muslim.uz
Нишонга урилган гаплар: “қалблар ҳалол луқма ейиш сабабли юмшайди”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Мўминларнинг онаси Оиша розияллоҳу анҳо
Расулуллоҳ соллаллоҳу алайҳи васалламнинг қалбларида Оиша розияллоҳу анҳонинг ўзига хос ўрнилари бор эди. Пайғамбаримиз соллаллоҳу алайҳи васаллам Оиша розияллоҳу анҳога бўлган муҳаббатларини зоҳир қилар, махфий тутмас эдилар.
Амр ибн Осс розияллоҳу анҳудан ривоят қилинишича, албатта, Набий соллаллоҳу алайҳи васаллам у кишини Зотус салосил қўшинига қўмондон этиб юбордилар. У киши (Амр розияллоҳу анҳу) дедилар: “У зот соллаллоҳу алайҳи васалламнинг олдиларига бордим ва: “Инсонларнинг қайсиниси сизга маҳбуброқ?” дедим. У зот соллаллоҳу алайҳи васаллам: “Оиша” дедилар. “Эркакларданчи?” дедим. У зот соллаллоҳу алайҳи васаллам: “Унинг отаси” дедилар. “Кейин ким?” дедим. У зот соллаллоҳу алайҳи васаллам: “Кейин Умар ибн Хаттоб” дедилар. Шу тарзда (бир неча) кишиларни санадилар”.
Муттафақун алайҳ.
*****
Аёлнинг ақли ва дини ноқислигининг сабаби
«Саҳиҳайн»даги Абу Саид ал-Худрий розияллоҳу анҳунинг ҳадиси:
«Расулуллоҳ соллаллоҳу алайҳи васаллам Қурбон ҳайити ёки Рамазон ҳайити куни намозгоҳга чиқа туриб, аёллар ёнидан ўтдилар ва: «Эй аёллар жамоаси, садақа қилинглар, чунки, мен дўзах аҳлининг кўпи сизлар эканингизни кўрдим» дедилар.
Улар «Нима сабабдан шундай, эй Расулуллоҳ?» деб сўрашди.
У зот «Лаънатни кўпайтирасизлар ва эрга нонкўрлик қиласизлар. Ақли ва дини ноқис бўла туриб, сизларнинг бирингиздан кўра эҳтиёткор эркакнинг ақлини кеткизувчироғини кўрмадим» деб жавоб бердилар.
Улар «Динимизнинг ва ақлимизнинг ноқислиги нима, эй Расулуллоҳ?» дея сўрашди.
У зот «Аёлнинг гувоҳлиги эркак гувоҳлигининг ярмига тенг эмасми?!» дея сўрадилар.
Улар «Тенг» дейишди.
У зот «Мана шу ақлининг ноқислигидандир. Аёл ҳайз кўрганда, намоз ўқий олмай, рўза тута олмай қолмасмиди?!» дедилар.
Улар «Шундай» дейишди.
У зот «Мана шу динининг ноқислигидандир» дедилар».
*****
Ким уни, яъни намозни муҳофаза қилса, намоз у учун нур, бурҳон (ҳужжат) ва дўзахдан нажот бўлади.
Абу Бакр Сиддиқ розияллоҳу анҳу
*****
Ушбу тўрт нарса биз учун яхшироқ ва боқийроқдир:
- Субҳаналлоҳ.
- Алҳамдулиллаҳ.
- Лаа илаҳа иллаллоҳ.
- Аллоҳу акбар.
“Ховатир роқия журнали”
*****
Аллоҳнинг тақсимига рози бўлинг! Худди ҳамма нарсаси бор киши каби бўлинг! Аллоҳнинг сиз учун ёзиб қўйгани сиз хоҳлаган нарсалардан яхшироқ, латифроқдир.
“Ховатир роқия журнали”
*****
Дунё уч кун...
- Кеча ўтди ва у ҳаргиз қайтмайди.
- Бугун яшаяпмиз ва у ҳам узоқ давом этмайди.
- Эртага эса, қаерда бўлишимизни билмаймиз.
Шундай экан, инсонларни кечир, халқни Холиққа қўйиб бер. Мен ҳам, сен ҳам, улар ҳам, барчамиз кетувчимиз. Қалбингнинг туб-тубидан сенга ёмонлик қилганни кечир!
“Ховатир роқия журнали”
*****
Ер юзида Ислом динини илк қабул қилган инсоннинг аёл киши бўлгани аёлларнинг фахрланишлари учун етарлидир.
Бу аёл биз мўминларнинг онаси Хадийжа розияллоҳу анҳодир.
*****
Агар 30 долларлик соат тақсанг ёки 3000 долларлик соат тақсанг ҳам, барибир, бир хил вақтни кўрсатади.
Агар 30 долларлик сумкага эга бўлсанг ёки 300 долларлик сумкага эга бўлсанг ҳам, барибир, ичидаги нарса ўзгармайди.
Агар 300 метрлик уйда яшасанг ёки 3000 метрлик уйда яшасанг ҳам, барибир, ёлғизликни ҳис қилиш бир хил бўлади.
Охир-оқибат автобуснинг олди ўриндиғига ўтирсам ҳам ёки орқа ўриндиғига ўтирсам ҳам, барибир, манзилимга бир вақтда етиб боришимни тушуниб етдим.
Фарзандларимизга бой бўлишларини эмас, балки, қандай қилиб бахтли бўлишларини ўргатайлик. Ана ўшанда улар катта бўлганларида, нарсаларнинг нархига эмас, қийматига, қадрига назар соладиган бўладилар.
Қалбимизни фоний дунёга эмас, балки, абадий Охират ва Жаннатга боғлайлик!
*****
Тирикнинг ёлғизлиги — унинг ёнида бирор киши бўлмаслигидир. Ўликнинг ёлғизлиги — унинг учун бирор киши дуо қилмаслигидир.
*****
Ибн Умар розияллоҳу анҳумо шундай деганлар:
«Албатта, мен ташқарига, инсонларга салом беришим ва улар менга салом беришлари учун чиқаман».
*****
Атрофимиздаги шахсларнинг ҳақиқатини фақат Аллоҳ билади. Шунинг учун доимо:
“Эй Аллоҳ, менга яхшиликни раво кўрадиган кишига мени рўпара қил ва уни менга рўпара қил! Менга ёмонликни раво кўрадиган кишидан мени буриб юбор ва уни мендан буриб юбор!” деб айтинг.
“Ховатир роқия журнали”
*****
«ҚАЛБЛАР ҲАЛОЛ ЛУҚМА ЕЙИШ САБАБЛИ ЮМШАЙДИ».
Имом Аҳмад ибн Ҳанбал раҳимаҳуллоҳ
*****
Агар аёл ўқиб-ўрганса, турмушга чиқса, яхши кўрса, ихлосли бўлса, ҳомиладор бўлса, фарзандни дунёга келтирса, эмизса, тарбия қилса, ишласа, безовталик ва қўрқувга бардош берса, охирида буларнинг ҳаммасини ноқис ақл билан қилган бўлса!
Агар ақли ноқис бўлмаганда қандай бўларди?!!
“Ховатир роқия журнали”
*****
30 ёшларида мусулмон бўлдилар. 36 ёшларида вафот этдилар. 6 йил...
Эй Саъд ибн Муоз розияллоҳу анҳу! Вафотингиз сабабли Раҳмоннинг Арши титраши учун ўша 6 йил мобайнида нима амал қилдингиз?!!
*****
- Менга жаннатнинг неъматларини васф қилиб бер, дея сўради.
- У ерда Расулуллоҳ соллаллоҳу алайҳи васаллам борлар, деди.
“Ховатир роқия журнали”
*****
Соғлом ҳолингда чириган бўйра устида ухлашинг бемор ҳолингда олтин кароват устига ётқизиб қўйилишингдан яхшидир.
«Алкалимут тоййиб»
*****
Тилдан кўра қамоқда узоқроқ сақлашга лойиқ ҳеч нарса йўқ.
Абдуллоҳ ибн Масъуд розияллоҳу анҳу
*****
Қанча кўп гапирсанг, шунча кўп хато қилаверасан. Аммо Аллоҳни қанча кўп зикр қилсанг, гуноҳларинг ҳам шунча кўп ўчирилаверади.
Таржима қилинди
Интернет материалларидан тўплаб, таржима қилувчи
Нозимжон Иминжонов
Муфтий ҳазратлари Испаниядаги анжуманда иштирок этади
Бугун, 4 ноябрь куни Ўзбекистон мусулмонлари идораси раиси, муфтий Усмонхон Алимов ҳазратлари Кавказ мусулмонлари идораси раиси, шайхулислом Оллоҳшукур Пошшозоданинг таклифига биноан Испаниянинг Мадрид шаҳрида бўлиб ўтадиган анжуманда иштирок этиш учун жўнаб кетдилар.
Ушбу анжуман Кавказ мусулмонлари идораси, Испания Адлия вазирлиги ва Халқаро “Эвсен” фонди ҳамкорлигида ташкил этилган. Унда Ислом бирдамлиги ва динлараро мулоқот мавзулари муҳокама қилинади. Кўплаб давлат ва дин арбоблари, таниқли уламолар қатнашади.
Ўзбекистон мусулмонлари идораси Матбуот хизмати
“Меҳр-мурувват карвони” Қорақалпоғистонда
«Вақф» хайрия жамоат фонди ташкил қилингандан буён саховат ва меҳр-мурувват уйлари, касалхоналар, мактаб-интернатлар, ёрдамга муҳтож оилалар, боқувчисини йўқотган хонадонлар ва ногиронларга хайрия ёрдамларини қилиб келмоқда.
Фонднинг “Меҳр-мурувват карвони” бугун Қорақалпоғистоннинг Нукус шаҳрига етиб келди ва ушбу шаҳардаги “Имом Эшон Муҳаммад” жоме масжидида кам таминланган 100 нафар оилага озиқ-овқат маҳсулотлари, 15 нафар шахсга ногиронлик аравачаси, “Муҳаммад ал-Беруний” мадрасасида таълим олаётган барча талабаларга иссиқ кийим-кечаклар улашди ва мадрасадаги икки нафар талабанинг шартнома пўлини тўлаб берди.
Шунингдек, Нукус шаҳрида истиқомат қилувчи 4 та хонадонни таъмирлаб бериши режалаштирилди ва масжид имом-хатибларига диний-маърифий китоблар берилди.
Исламатдин Алланов,
Қорақалпоғистон мусулмонлари қозиёти мутахассиси
Аждодлар асос солган Ҳадис илми мактаби равнақ топади
Дунёда иқтидорсиз одам бўлмагани каби иқтидорсиз миллат ҳам йўқ. Фақат ўзида мавжуд иқтидорни юзага чиқариш учун кўп меҳнат қиладиган ва камроқ ҳаракат қиладиган одамлар ҳамда ўша одамлардан ташкил топган миллатлар бор. Кимнинг ёинки қайси миллатнинг нимага иқтидори борлигини билмоқчи бўлганлар кўҳна тарих зарварақларини саҳифалаб кўрса, ҳаммасини очиқ-ойдин кўради.
Бизнинг миллатимиз тарих саҳифаларига ватанпарвар, жанговар, мард ва шижоатли миллат сифатида киргани ҳатто тарих фанининг “ота”си Геродотнинг “Тарих”, Страбоннинг “География” каби энг қадимий асарларда; аждодларимизнинг янада қадимийроқ бўлган “Ўғузнома”, Ўрхун-Энасой битиктошлари каби меросларида ўз ифодасини топган.
Ҳазрат Навоий “Муҳокамат ул-луғатайн” асарида туркийларнинг ниҳоятда тезхотир ва илмга ташна халқ эканини таъкидлаб ўтган. Бу борада бобо-ю момоларимиз қўлга киритган ютуқларни санаб чиқишга уриниб ўтирмадик. Зеро, яна бир мутафаккир бобомиз Бобур Мирзо айтганидек, аён гапнинг байнига не ҳожат. Аммо мавзуга дахлдор бўлгани боис Имом Бухорий, Имом Термизийларнинг номини тилга олиб ўтсак, фикримиз тушунарлироқ бўлади, деган умиддамиз.
Юртимизга Ислом дини кириб келган паллаларда миллатимизнинг табиатида ана шу муборак динга мойиллик бўлгани ҳамда миллатимиз фарзандларининг Ислом динини ўрганишга, хусусан, ҳадис илмига катта иқтидори борлиги юқорида номи тилга олиниб ўтган зотлар сиймосида яққол кўзга ташланди.
Хабарингиз бор: ўлкан ўзгаришларга бой бўлаётган жорий йилимизнинг 16 апрелида муҳтарам Президентимизнинг “Диний-маърифий соҳа фаолиятини тубдан такомиллаштириш чора-тадбирлари тўғрисида”ги фармони қабул қилинган эди. Мазкур фармон ижросини таъминлаш, динимиз ва ҳадис илми ривожига беқиёс ҳисса қўшган буюк ватандошларимизнинг бой меросини пухта ўрганиш, улар асос солган ҳадис илми мактаблари фаолиятини қайта тиклаш ва ривожлантириш, шунинг баробарида, соҳага оид олий маълумотли мутахассислар тайёрлаш мақсадида Ўзбекистон Республикаси Вазирлар Маҳкамасининг «Ҳадис илми мактаби фаолиятини ташкил этиш ва қўллаб-қувватлаш чора-тадбирлари тўғрисида» қарори қабул қилинди.
Қарорда Ҳадис илми мактаби Ўзбекистон мусулмонлари идораси муассислигидаги олий диний таълим берувчи нодавлат таълим муассасаси ҳисобланиши кўрсатилган. Мактаб битирувчиларига диний таълим соҳасидаги бакалавр даражаси берилади.
Ҳадис илми мактабида Қуръони карим ва ҳадиси шарифларнинг асл моҳияти ўргатилиб, ҳадисшунослик соҳасида илмий изланишлар олиб бориш кўникмасига эга мутахассислар тайёрланади. Шунингдек, ҳадислардаги эзгуликка бошловчи умуминсоний ғояларни халқимизга, айниқса, ёш авлодга етказиш ҳам мактабнинг асосий вазифаси этиб белгиланган.
Ҳадис илми мактабида ўқиш муддати беш йил бўлиб, кундузги таълим шаклида олиб борилади. 2018-19 ўқув йили учун қабул квотаси 10 та ўрин этиб белгиланган ва унга араб тилини пухта ўзлаштирган, ҳадисларни ёд олишга салоҳияти бўлган ўрта махсус диний таълим муассасаларининг иқтидорли битирувчилари саралаб олинади.
Бу хабарни эшитиб, Ватанимиздаги ушбу мўътабар илмга қизиққан ёшларимизнинг севинчи ичига сиғмасдан тезроқ қабул кунлари бошланишини кута бошладилар.
Қарорда кўрсатилган муҳим вазифалардан бири – Вазирлар Маҳкамаси ҳузуридаги Дин ишлари бўйича қўмита Ташқи ишлар вазирлиги билан ҳамкорликда мактаб билан хорижий мамлакатларнинг нуфузли илмий ва таълим муассасалари ўртасида ҳамкорлик алоқаларини ўрнатиш, хорижлик профессор-ўқитувчиларни мактабга жалб қилиш бўйича тизимли ишларни амалга ошириш; мактаб профессор-ўқитувчиларини малака ошириш, тажриба алмашиш ва ўқитиш учун чет мамлакатларга юбориш чораларини кўриши белгилангани янада қувончли иш бўлди. Зотан, илм тажриба алмашиш орқали камол топади.
Ҳадис илми мактаби очилиши билан она Ватанимиздаги диний таълим соҳасидаги олий ўқув юртларининг сони яна биттага кўпайди. Илло, бу даргоҳда таълим олган ёшларимиз эртага малакали мутахассислар сифатида халқимизнинг диний илми янада бойишига, ёшларимиз онгини ёт мафкуралардан ҳимоя қилишга, уларда чинакам мафкуравий иммунитет шаклланишига, динимиз софлигини одамлар онгига сингдиришга хизмат қилади.
ЎМИ Матбуот хизмати
.
Фатво бўлими мудири Маккадаги йиғилишда қатнашади
Ўзбекистон мусулмонлари идораси Фатво бўлими мудири Хомиджон Ишматбеков шу йил 4-5 ноябрь кунлари Макка шаҳрида бўлиб ўтадиган SMIIC ташкилоти директорлар кенгашининг 17-йиғилиши ва Бош ассамблеянинг 13-йиғилишида иштирок этиш учун Саудия Арабистони Подшоҳлигига жўнаб кетди (SMIIC – standards and metrology institute for islamic countries – Ислом мамлакатларидаги стандартлаштириш ва метрология институти).
Йиғилиш тафсилотларини сайтимиз орқали кузатинг.
Ўзбекистон мусулмонлари идораси Матбуот хизмати
Мақолалар
