Каъбатуллоҳ зиёрати – ҳар бир мусулмоннинг орзуси. Таассуфлар бўлсинки, миллатимизнинг не-не фозил фарзандлари учун бу орзу армонга айланган замонлар ҳам бўлган эди. Яратганнинг буюк инъоми – мустақиллик йилларида ушбу ибодат учун ҳам муайян шароитлар яратила бошланди. Кейинги йилларда эса бошқа барча соҳаларда бўлгани сингари ҳаж ибодати учун мамлакатимизда ҳар қачонгидан ҳам кенг имкониятлар яратилди.

         Барчамизга маълум ўтган икки йил дунёда кенг тарқалган вирус сабаб ҳаж ибодатини адо этиш ҳеч бир мусулмонга насиб қилмади. Алҳамдулиллаҳ, бу йил яна каъбаи муаззамани зиёрат қилиб, исломнинг бешинчи аркони бўлмиш ҳаж ибодатини бажариш учун зиёратга йўл очилмоқда.

Хўш, бу йилги ҳаж зиёрати Ўзбекистон мусулмонлари учун қандай амалга оширилади. Бугун “Ҳаж – 2022” мавсумига тайёргарлик кўриш юзасидан брифинг бўлиб ўтди. Унда ҳажга доир бир қанча масалалар очиқланди. Жумладан, Саудия Арабистони томони билан олиб борилган музокаралардан сўнг жорий йил Ўзбекистон фуқаролари учун умумий ҳаж квотаси 10 865 нафар этиб белгилани маълум қилинди. 2019 йилда эса бу кўрсаткич 7 200 нафарни ташкил этган эди. Жорий ҳаж мавсуми учун ҳаж квотасининг оширилгани, шубҳасиз, юртимиз зиёратчилари  учун жуда катта хушхабар бўлди.

Маълумки, Саудия Aрабистони Ҳаж ва умра вазирлиги пандемия ҳамон давом этаётгани туфайли “Ҳаж – 2022” баёнотида бир қатор талаб ва чекловларни эълон қилди. Ҳар мавсумда 4 миллиондан зиёд зиёратчилар ҳаж ибодатини адо этишаётган бўлса, бу йил ушбу кўрсаткич 1 миллиондан ортиқроқни ташкил қилмоқда. Зиёратчилар сони дунё миқёсида шунча чекланишига қарамай Ўзбекистонлик ҳожилар учун квотанинг оширилиши ҳам катта неъматдир.

         Саудия Арабистони Подшоҳлиги Ҳаж ва умра вазирлиги томонидан қўйилган қатъий карантин талабга кўра, “Ҳаж-2022” мавсумида иштирок этиш ёш чегараси 65 ёшгача этиб белгиланди.

         Умид қиламизки, ушбу ёш бўйича чеклов вақтинча бўлиб, келгуси ҳаж мавсумларида ёши улуғ инсонларни ҳам бу муборак амални адо этиш саодатига эришадилар, инша Аллоҳ.

         Шунингдек, ҳаж сафари нархларида ҳам ўзгаришлар бор. Қайд этилишича, нархларнинг ошишига Саудия ҳукумати томонидан ҳаж сафари нархига таъсир қилувчи қўшимча солиқ ва мажбурий тўловлар жорий қилинган, коммунал, транспорт, электр-энергия ва бошқа хизматлар учун тўловлар миқдори бир неча баравар (30-40 фоиз) ошгани сабаб бўлган. 

         Ҳаж ҳар бир мусулмоннинг орзусидир. Чунки у сабабли киши онадан қайта туғилгандек гуноҳларидан покланади. Дунёдаги мусулмонлар бирдамлигига гувоҳ бўлади ва оламларга раҳмат қилиб юборилган севикли Пайғамбаримизни (с.а.в)зиёрат қилиш бахтига мушарраф бўлади. Қуръони карим оятлари ва ҳадис шарифлардан маълум бўладики ҳаж, Ислом арконларидан бири экан. Бас йўлга қодир мусулмон, умри давомида бир маротаба ҳаж ибодатини амалга ошириши билан Ислом арконларидан бирини адо этган саналади.

Албатта бу улуғ ибодат фақат Яратганнинг розилиги учун бўлмоқлиги лозим. Риё ва гуноҳлардан холи, сахийлик ҳамда ҳусни хулқ ила ихлос билан амалга оширилган ҳаж – “ҳажжи мабрур” деб аталади. Бундай ҳаж хусусида Абу Ҳурайра розияллоҳу анҳудан ривоят қилинган ҳадисда Наби (с.а.в) шундай марҳамат қиладилар:

“Ким Аллоҳ учун ҳаж қилса, фаҳш сўз айтмаса ва фисқу фасод қилмаса, худди онаси туққан кунидек қайтади”.

         Ҳаж ибодатини адо этишни ният қилган ҳар мўмин-мусулмон кишини Аллоҳ таолонинг ўзи чақиришини насиб қилсин.

ЗАЙНИДДИН ЭШОНҚУЛОВ

Ўзбекистон мусулмонлар идораси Самарқанд вилоят вакили

Бугун барча Ўзбекистон аҳолиси – мўмин-мусулмонларга муборак ҳаж сафарининг хушхабари етиб борди. Бу билан борган ҳожига ҳам бўлажак ҳожиларга ҳам минг-минглаб сурурлар инъом этилди. Бунинг учун Аллоҳга беадад ҳамд ва шукроналар бўлсин!

Тўғрида, ўтган 2019 йилда 7200 нафар ҳожи ота, ҳожи оналаримиз беҳад хурсандчилик билан ибодатга мушарраф бўлиб, тинч-омон уйларига қайтиб, оилалари билан ҳаж ибодати нашъу-намосига муяссар бўлишган эди.

Бироқ, ўртада икки йил бутун дунё, жумладан Ўзбекистонга ҳам етиб келган коронавирус касаллиги ўртага нохушлик чегарасини қўйиб, бугунги кунгача бу неъматдан маҳрум бўлиб турган эдик, дилларимиз маҳзун эди.

Алҳамдулиллаҳ, Алҳамдулиллаҳ, янги хушхабар 2022 йил саодатли йил бўлиб, ҳаж зиёрати йўли очилди. Ҳатто, очилганда ҳам умумий ҳаж квотаси 10865 нафар этиб белгиланди. Албатта, бунда муҳтарам Юртбошимизнинг Ўзбекистон аҳолисига яратиб берган имкониятларининг самараси бўлди. Аллоҳ юртимизни тинч қилсин, Юртбошимизга узоқ умр берсин!

Таъкидлаб айтаманки, бу фақат менинг сўзим эмас, балки, маърифатпарвар имон аҳли бу хушхабардан беҳад, бениҳоя сурурларга тўлиб, шукроналар келтирмоқда.

Аллоҳ барча ишларида мададкор бўлсин, яқинда Дин ишлари бўйича қўмита раиси ва Ўзбекистон мусулмонлари идораси раиси, муфтий ҳазратлари бошчилигидаги Ўзбекистон делегацияси Саудия Арабистонида бўлиб қайтганларида ҳам элимиз айни шу хурсандчиликни интиқлик билан кутганди. Мана бугунги хушхабар бутун вужудимизни хурсандлик билан сарафроз этмоқда.

Биламизки, ҳаж ибодати юрти, тили, об-ҳавоси, иқлими билан бизлардан фарқ қиладиган юртда адо этилади, уларнинг барча талаб ва истакларини бажаришга мажбурмиз ва бажарамиз ҳам.

Шунинг учун ҳозирги кундаги улар томонидан қўйилаётган талаблар ортидан келиб чиқаётган қоидаларга мўмин-мусулмон сифатида эргашамиз ва бажаришда барчамиз бир тил ва бир дил бўлиб ибодатимизни адо этамиз инша Аллоҳ.

Ҳаж сафарига интилаётган барча мўмин-мусулмонларни Илоҳим моддиятларига ҳам, иқтисодларига ҳам, имон-эътиқодларига ҳам, сабр-тоқатларига ҳам Аллоҳим Ўзи мадад берсин!

Юртимиз мўмин-мусулмонларини бу йилги муборак санада адо этадиган ҳаж ибодатларини ҳажжи мабрур айласин!

Абдулҳай ТУРСУНОВ,

Ўзбекистон мусулмонлари идорасининг

Наманган вилоят вакили

Илҳомжон домла Умаржон ўғли

Ассалому алайкум!

Қадрли юртдошлар!

Сўнгги йилларда, барча соҳалар қатори, диний-маърифий жабҳада, хусусан, ҳаж ва умра тадбирларини ташкил этиш борасида салмоқли ишлар амалга оширилди.

Жумладан, фуқароларимизнинг муқаддас зиёратга бўлган эҳтиёжларини тўлақонли қондириш мақсадида Раҳбарият кўрсатмаси ва жамоатчилик кенгаши қарори асосида  Ҳаж ва Умра сафарларини ташкил этиш янги босқичга кўтарилди.

Хусусан, Умра сафарига борувчи зиёратчиларнинг сонини белгилаш бўйича квота олиб ташланди, натижада республикамизнинг айрим ҳудудларида навбатлар тугатилди, баъзиларида эса навбатларининг сезиларли даражада камайишига эришилди.

“COVID-19” пандемияси сабабли тўхтатилган узоқ муддатли танаффусдан кейин, шу йилнинг 22 январь куни зиёратчиларимизнинг дастлабки гуруҳлари Саудия Арабистонига Умра сафарига жўнатилган эди.

Жорий йилнинг 26 май ҳолатига кўра, 37 мингга яқин  зиёратчи умра амалини тўлиқ адо этиб, юртимизга қайтиб келди.

Шуни алоҳида таъкидлаш лозимки, сўнгги йилларда Ҳаж сафари билан боғлиқ ташкилий ва хизмат кўрсатиш йўналишидаги ишлар ҳам тубдан яхшиланди ва такомиллаштирилди.

Шу йилнинг 3-7 май кунлари Дин ишлари бўйича қўмита, Ўзбекистон мусулмонлари идораси ва ҳамкор ташкилотлар вакилларидан иборат Ишчи гуруҳи “Ҳаж-2022” тадбирини ташкил этиш механизми ва бозорларни ўрганиш мақсадида Саудия Арабистони қироллигига хизмат сафарини амалга оширди.

Сафар давомида Ишчи гуруҳ аъзолари “Ҳаж-2022” мавсумида Макка ва Мадина шаҳарларида зиёратчиларимиз учун хизмат кўрсатишга мўлжалланган меҳмонхоналарни кўздан кечирдилар. Шунингдек, Мино, Арафот, Муздалифа манзилларида бўлиб, у ерлардаги шарт-шароитлар билан яқиндан танишдилар. 

Энди эса, “Ҳаж-2022” масуми билан боғлиқ муҳим янгилик ва маълумотларга тўхталамиз.

Саудия Арабистони томони билан олиб борилган музокаралардан сўнг жорий йил Ўзбекистон фуқаролари учун умумий ҳаж квотаси 10 865 нафар этиб белгиланди. Маълумот учун, 2019 йилда бу кўрсаткич 7 200 нафарни ташкил этган эди.

Яна шуни алоҳида таъкидлаш керакки, жорий ҳаж мавсуми учун ҳаж квотасининг оширилгани, шубҳасиз, юртимиз зиёратчилари  учун жуда катта хушхабар бўлди. 

Қадрли юртдошлар!

Ўрганишлар Саудия ҳукумати томонидан ҳаж сафари нархига таъсир қилувчи қўшимча солиқ ва мажбурий тўловлар жорий қилинганини кўрсатмоқда. Жумладан, коммунал, транспорт, электр-энергия ва бошқа хизматлар учун тўловлар миқдори бир неча баравар (30-40 фоиз) ошган. Шунингдек, ҳаж амалларини ташкил этувчи муассасаларнинг хизматларига 2022 йилда янги мажбурий тўловлар жорий этилган.

Қайд этилган ўзгаришлар натижасида дунё мамлакатлари
учун ҳаж хизматлари нархи ўртача 40-45 фоизга кўтарилгани
маълум бўлди.

Шуларни инобатга олиб, “Ҳаж-2022” мавсуми учун 1 нафар зиёратчига тўлов миқдори, Жамоатчилик кенгашининг қарорига асосан, 62 миллион 900 минг сўм сўм этиб белгиланди.

Яна бир муҳим эслатма – ҳаж тадбири шартномалари Саудия Арабистони Ҳаж ва умра вазирлигининг “Ҳаж электрон портали” орқали белгиланган тартибда амалга оширилди.

Азиз юртдошлар!

Саудия ҳукумати томонидан бу йилги ҳаж ибодатини адо этиш учун хорижий ва маҳаллий фуқароларга қуйидаги талаблар эълон қилинганини маълум қиламиз:

Биринчидан, Саудия Арабистони Подшоҳлиги Ҳаж ва умра вазирлиги томонидан қўйилган қатъий карантин талабга кўра, “Ҳаж-2022” мавсумида иштирок этиш ёш чегараси 65 ёшгача этиб белгиланди. Ушбу ёш чегарасига 1957 йил 30 июнь кунигача туғилган инсонлар киради.

Кези келганда, шуни алоҳида таъкидлаш лозимки, ёш чегараси билан боғлиқ мазкур тартиб – Ўзбекистон томонининг эмас, балки Саудия Арабистонининг қатъий талаби ҳисобланади.

Иккинчидан, бўлажак ҳожилар Саудия Арабистони Подшоҳлиги Соғлиқни сақлаш вазирлиги талабига кўра, Жаҳон соғлиқни сақлаш ташкилоти томонидан тасдиқланган Pfizer/BioNTech (АҚШ-Хитой), Oxford-AstraZeneca (Буюк Британия-Швеция), Moderna (АҚШ) ва Johnson & Johnson (АҚШ) вакциналарининг тўлиқ дозасини қабул қилган бўлишлари шарт;

Учинчидан, барча зиёратчилар Саудия Арабистони Соғлиқни сақлаш вазирлиги талабига кўра, менингитга қарши 4 валентли вакцинани қабул қилган бўлиши зарур;

Тўртинчидан, барча фуқаролар Саудия Арабистонига киришдан
72 соат олдин коронавирус диагностикаси ҳақида салбий натижали ПЗР маълумотномани тақдим этишлари лозим.

Эслатиб ўтамиз!

Юртимиз зиёратчилари шу йилнинг 18-30 июнь кунлари Тошкент-Мадина, Бухоро-Мадина, Наманган-Мадина, Самарқанд-Мадина, Қарши-Мадина, Урганч-Мадина, Нукус-Мадина йўналишлари бўйича ҳаж сафарига кузатилади ва худди шу йўналишлар бўйича 14-31 июль кунлари юртимизга қайтиб келадилар.

Маълумот учун, зиёратчиларимиз Мадина шаҳрида “Масжиди Набавий”дан 100 метр узоқликда жойлашган 5 юлдузли “Зам-зам Пуллман” ва “Краун Плаза” меҳмонхоналарида, Макка шаҳрида эса “Аброж ал-Ҳидоя” меҳмонхонасида истиқомат қиладилар.

Ҳаж мавсумида ўзбекистонлик зиёратчиларга хизмат кўрсатиш ҳамда ибодатларни эмин-эркин ва тўла-тўкис амалга оширишлари учун соҳа мутахассисларидан иборат Ишчи гуруҳи, шифокорлар ва гуруҳ раҳбарлари жалб этилади.

Зиёратчиларимизга нафақат меҳмонхона балки, Мино-Муздалифа-Арафот манзилларида ҳам уч маҳал иссиқ овқат тортиқ этилади ҳамда бепул тиббий хизмат кўрсатиш таъминланади.

Қадрли юртдошлар, азиз зиёратчилар!

“Ҳаж-2022” мавсуми нумунали ва тартибли, чиройли ва кўнгилдагидек ўтишини, Ҳаж сафарига отланаётган юртдошларимизнинг сафарлари бехатар, ибодат ва дуолари мукаммал, дуолари мустажоб бўлишини тилаб қоламиз.

Эътиборингиз учун раҳмат!