Баъзида инсон гуноҳ қилиб қўяди. Шунда иймони унга буни қайтиб қилмасликка буюради. Шайтони эса ундан яна бир марта лаззатланиб, кейин бутунлай тарк этишига чақиради. Инсон унинг гапига кириб, ўша гуноҳни яна бир бор қилади. Шайтон-чи?! У тўхтамайди. Яна ва яна келиб, ҳалиги гуноҳга ундайверади, унинг “яна бир гал”и тугамайди. Охир оқибат тавба кейинга сурилиб қолиб кетади.

Ҳа, шайтоннинг мўминларни тузоққа тушириш йўлида ишлатган хатарли ҳийлаларидан бири мана шу, яъни улар гуноҳларни бутунлай тарк этишларига йўл қўймаслигидир. Балки, ўша гуноҳларни зийнатли кўрсатиб, қалбда ҳасрат қолмасин дея яна бир бор қилиб кўришлари, такрор қўл уриб, кейин тавба қилса бўлишини қалбига солади. Шу боис гуноҳ қилган инсон учун муносиб йўл шуки, нафсига қаттиқ босим ўтказиб бўлса-да, ўша гуноҳ ишни дарров тарк қилимоғи лозим.

Шайх Таҳонавий раҳматуллоҳи алайҳ айтганлар: “Бу ўта хатарли алдовдир. Чунки мўмин киши иймони ва тақвоси туфайли маъсият яқинига боришга журъат қилмайди. Лекин, агар бирор гуноҳни бир марта қилиб кўрса, ундаги маъсиятларни тўсиб турган иймоний оташ ўчади. Шу билан у бошқа ва бошқа гуноҳларга қўл ура бошлайди. Маъсият ҳеч қачон инсонни тўйдирмайди. Инсон гуноҳни яна қайта қилиш билан ундан тўйгани ёки зерикканидан тарк қилишга бормайди. Балки, маъсиятнинг табиати, у ёнига бошқа кўпгина гуноҳларни чақиради. Уни теридаги қўтирга ўхшатиш мумкин. Инсон уни қашлаб роҳатланади-ю, лекин бу қашлаш қўтирларни кўпайтириб, касалликни кучайтириб юборади”.

Шайх Муҳаммад Тақий Усмоний ҳафизаҳуллоҳнинг асар ва мақолалари асосида

Тошкент Ислом институти катта ўқитувчиси Абдулҳодий Ғиёс тайёрлади.

#uzbekiston24

Аввал хабар берганимиздек, юртимизнинг бир гуруҳ уламолари ватандошларга илмий суҳбат қилиш, уларни ўйлантираётган саволларга жавоб бериш, муборак Рамазон ойи ва ҳайитини бирга ўтказиш мақсадида АҚШга ташриф буюришган эди.  

Бугун, 21 апрель куни мазкур мамлакатнинг Орландо шаҳрида (Флорида штати) Рамазон хайити намозини ватандошлар жамоаси билан кўтаринки ўтказган Ўзбекистон мусулмонлари идорасининг Муҳаммад Айюб домла Ҳомидов, Аҳмадхон қори Рашидов, Ихтиёр қори Абдураҳмоновлар каби вакиллари Ўзбекистоннинг АҚШдаги элчихонаси томонидан ташкил этилган сайлов участкасида ватандошлар билан бирга Ўзбекистон Конституциясига ўзгартишлар киритиш бўйича референдумда муддатидан аввал овоз бериш жараёнида фаол қатнашиб, Ватанимиз келажаги ва равнақи учун бефарқ эмасликларини намоён этишди.

Муддатидан аввал овоз бериш жараёнида қатнашган вакилларимиз сайлов участкаси фаолиятини юқори баҳолаб, жумладан, у кундалик иш ва ўқиш билан банд бўлган кўплаб ватандошларимиз учун қулай имконият бўлганлигини таъкидлашди. Уларнинг фикрига кўра, кенг умумхалқ муҳокамаларидан ўтган янгиланаётган Конституция лойиҳаси хорижда яшаётган ҳар бир фуқаро учун ўта муҳим аҳамиятга эгадир.

Уламоларимизнинг АҚШ сафари тафсилотларини кузатиб боринг.

Ўзбекистон мусулмонлари идораси Матбуот хизмати

Жалолиддин Ҳамроқулов - Ўзбекистон мусулмонлари идораси раиси ўринбосари
#21apr #uzbekiston24

Тошкент ислом институтида Ўзбекистон мусулмонлари идораси Таълим ва илмий-тадқиқот бўлими мудири С.Шерхонов, бўлим мутахассиси А.Дусматов ва Масжидлар бўлими мудири Музаффар Камолов иштирокида кундузги таълим йўналиши битирувчи курс талабалари билан очиқ мулоқот бўлиб ўтди.

Учрашувда ТИИ ректори, сиёсий фанлар доктори, профессор Муҳаммадолим домла Муҳаммадсиддиқов, Ўқув ишлари бўйича проректор Ё.Бухарбаев ҳам иштирок этиб, битирувчилар иш тақсимоти лойиҳаси билан таништирилди.

Маълумот учун, мазкур 2022-2023 ўқув йилида институтни кундузги таълим йўналиши бўйича 66 нафар йигитлар ва 11 нафар аёл-қизлар, жами 77 нафар талаба битирмоқда.

Уларга, юртимиздаги масжидларга имом-хатиб, ноиб имом ҳамда ўрта махсус ислом таълим муассасаларига ўқитувчи вазифаларида ишлаш учун йўлланма берилади.

Магистратура босқичида таълимни давом эттирмоқчи бўлган битирувчилар республика олий таълим муассасаларидан бирига ҳужжат топширишлари мумкин.

Халқнинг диний эҳтиёжларини қондиришда масжидлар ҳамда диний ходимларнинг хизмати катта ўрин тутади. Масжид имом ва ноиблари жамоатга намозларни адо қилиб бериши билан бирга кундалик масалаларда мусулмонларга йўл-йўриқ кўрсатиши, уларнинг дардига қулоқ солиб, қийнаётган муаммоларига ечим топиш орқали ижтимоий ҳаётда фаол иштирок этадилар. Шунинг учун бўлажак имом-хатиб вазифасида ишловчи талабаларнинг илмий савияси, дунёқараши ва шахсий сифатлари талаб даражасида бўлиши лозим.

Масжид меҳроби Расулуллоҳ соллаллоҳу алайҳи васалламдан мерос экан, У зотга муносиб бўладиган диний соҳа ходимларини тайёрлаш асосий вазифа ҳисобланади.

ТИИ Матбуот хизмати