Халқимиз оғир жудоликка учради. Ўзбекистон мусулмонлари идораси раиси, муфтий Усмонхон Алимов 15 август куни хасталик туфайли вафот этди.

Давлатимиз раҳбарининг ташрифи, ҳамдардлик сўзлари оғир жудоликка учраган кўнгилларга таскин бўлди. Марҳумнинг ҳақига дуо қилинди.

Президентимиз муфтий ҳазратнинг эзгу ишларини ёдга олди:

– Ҳаммамиз учун катта йўқотиш бўлди. Улуғ инсон эдилар. Билими, меҳнатсеварлиги, камтаринлиги билан элимизда обрў топган эдилар. Бу бало бутун дунёга азоб олиб келди, қанча йўқотишлар бўлаяпти. Қўлимиздан келган ҳамма ҳаракатни қилдик. Лекин Аллоҳнинг иродаси экан. Илоҳим, жойлари жаннатда бўлсин. У кишини яхши ном билан эслаб, ишларини давом эттириб, руҳларини шод қилайлик.

Bismillahir rohmanir rohiym

Bizlarga bir musibat yetdi. Birodarimiz Shayx Usmonxon Alimov vafot etdilar. Albatta, bizlar Allohnikimiz va Unga qaytguvchimiz. Alloh taolo u kishini o‘z rahmatiga olsin va jannatlaridan joy ato qilsin. Shayx Usmonxon Alimov xalq suygan, samimiy, aziz inson edilar. Men u kishini 1990-yildan beri taniyman. U kishi Marokashning Fas shahriga kelganlarida birinchi bo‘lib men kutib olgan edim. U kishini sakkiz oy uyimda mehmon qilib, arab tilidan saboq berganman. So‘nggi bor 2007-yil Toshkent shahrida uchrashgan edik.

Alloh taolo u kishini o‘z rahmatiga olsin, ahli oilalariga sabri jamil ato aylasin.

Marokashlik olim, professor Hamid Lahmar

Bismillahir rohmanir rohiym

Alloh taolo muftiy Usmonxon Alimov hazratlarini siddiqlar va solihlar bilan birga aylasin. Ya Rabb.

Albaniyalik professor, imom Romiz Mustafo Zakoiy

Bismillahir rohmanir rohiym.

Alloh taoloning qazosiga iymon keltirgan va uning hukmiga rozi bo‘lgan holda...

Butundunyo musulmon jamiyatlari kengashi raisi - muhtaram doktor Aliy Nuaymiy, bosh kotib doktor Muhammad Bashoriy janoblari va kengashning boshqa barcha a’zolari

O‘zbekiston musulmonlari idorasi raisi, muftiy, fazilatli shayx Usmonxon Alimovning vafoti munosabati bilan chuqur mahzunlik va qayg‘u izhor etadi:

Albatta, bizlar Allohnikimiz va Unga qaytguvchimiz. Alloh taolo u zotning pokiza ruhini o‘zining rahmati bilan o‘rasin va keng jannatlaridan joy ato etsin. Bu dunyodagi maskanlaridan ko‘ra xayrli maskan, ahllaridan ko‘ra, xayrli ahl nasib aylasin. Barchalarimizga sabri jamil ato aylasin.

U kishining ahli oilalariga va butun islom olamiga o‘z umrini O‘zbekiston hamda O‘rta Osiyo musulmonlari xizmatiga baxshida etgan ulug‘ olimlardan biridan judo bo‘lgani munosabati bilan hamdardlik bildiramiz.

Albatta, bizlar Allohnikimiz va Unga qaytguvchimiz.

Bismillahir rohmanir rohiym.

Boqiylik va barhayotlik Allohga xosdir. Alloh taolo ajringizni ulug‘, musibatingizni yengil qilsin. Marhumni mag‘firat aylab, uni solihlari qatoriga qo‘shsin. Albatta, bizlar Allohnikimiz va Unga qaytguvchimiz. Allohim u kishini mag‘firat et, o‘zing rahm ayla, so‘roqlarini oson qil, qabrlarini munavvar va keng ayla. U zotni musaffo suvlar bilan yuvgin va xato-yu gunohlarini ketkazgin. Va solihlar qatorida qabul qilgin.

Al-Azhar Islom tadqiqotlari akademiyasi direktori

doktor Nazir Muhammad Ayyad

Hamdardlik maktublar kelishi davom etmoqda

Фазилатли устоз, аллома, муҳаққиқ, етук муҳаддис олим, шайх Муҳаммад ибн Муҳаммад Аввома ҳазратлари Ўзбекистон мусулмонлари идораси раиси, муфтий Усмонхон Алимов ҳазратларининг вафотлари муносабати билан марҳумнинг барча оила аъзоларига, яқинларига, ўзбек халқига таъзия изҳор қилдилар.

Фазилатли шайх Муҳаммад Содиқ Муҳаммад Юсуф раҳимаҳуллоҳнинг яқин дўсти, сафдоши, шайх Аввома ҳазратлари юртимизга 2018 йили оила аъзолари, ўғиллари доктор Муҳиддин Аввома ҳамроҳлигида ташриф буюрган эдилар.

Ташриф чоғида шайх Муҳаммад Аввома ҳафизаҳуллоҳ Ўзбекистон мусулмонлар идораси раиси муфтий Усмонхон Алимов ҳазратлари билан учрашган эдилар.

Ҳақ таоло Усмонхон Алимов ҳазратларини барча солиҳ амалларини, динимизга қилган хизматларини, илм-маърифат, зиё таратиш йўлидаги саъй-ҳаракатларини ҳусни қабул айлаб, Ўз мағфиратига олсин, чеккан дардларини барча саҳву хатоларига каффорат қилиб, раҳматига чулғасин, қабрларини жаннат боғчаларидан қилиб, охиратларини обод айласин!

Чеченистон давлат раҳбари Рамзан Қодиров Ўзбекистон мусулмонлари идораси раиси, мамлакат бош муфтийси вафоти юзасидан ҳамдардлик билдирди. 

Қодиров муфтийнинг ўлими ҳақидаги хабарни қайғу ҳисси билан қабул қилган. Ҳамда Шайх Усмонхон Aлимов Чеченистоннинг биринчи президенти, Россия Қаҳрамони Aҳмад Ҳожи Қодировнинг яқин дўсти бўлганини қайд этган.

“Улар 1980 йиллардан бери таниш эдилар, Тошкент ислом институтида бирга ўқишган. Мен ҳам Усмонхон Aлимов билан кўп марта учрашганман. Биз нафақат Грознийда, балки Ўзбекистонда ҳам кўришганмиз. Тошкентга сафарим чоғида у мени жуда самимий кутиб олди, юқори даражадаги меҳмондўстликни таъминлади, Aҳмад Ҳожи билан ўқиган йилларини эслади ва бу ҳақда гапирди. У жуда доно, тақводор ва камтар одам эди”, – деган у.

Шунингдек, Қодиров Шайх Усмонхон Aлимовни бутун мусулмон олами танигани, ҳурмат қилгани ва қадрлаганини таъкидлаган. 

“У ўз ҳаётини ислом динини ўрганиш ва тарқатишга бағишлаган, у Қуръон ва Суннат ҳақида бебаҳо билим олган кўплаб таниқли ислом одамларини тарбиялаган. 2006 йилдан Ўзбекистон мусулмонлари идораси раиси вазифасида фаолият олиб борган. Шайх ваъзларида ҳар доим яхшиликка чақириб, ҳаромдан эҳтиёт бўлишни айтган. Шу кунларда бизнинг қалбимиз қардош Ўзбекистон халқи билан. Ўзбекистоннинг муҳтарам Президенти Шавкат Мирзиёевга, Шайх Усмонхон Aлимовнинг оиласи ва яқинларига самимий ҳамдардлик билдираман! Aллоҳ таоло биродаримизга раҳм қилсин!”, – деган Чеченистон раҳбари.

Россия Федерацияси мусулмонлари диний идораси раиси, муфтий Шайх Равил Гайнутдин Россия мусулмонлари номидан Ўзбекистон халқига ҳамдардлик билдирди.  Унда бундай дейилади: “Россия Федерацияси мусулмонлари диний идораси, барча ходимлар ва ўз номимдан, азиз биродаримиз, Ўзбекистон Республикаси Олий муфтийси Шайх Усмонхон Aлимовнинг охират диёрига рихлат қилишлари муносабати билан чуқур ҳамдардлик билдираман. Ислом динининг асл қадриятлари, Муҳаммад ал-Бухорий, Абу Мансур ал-Мотуридий, Баҳоуддин Нақшбанд каби улуғларнинг маънавий бойликларини қайта тиклашда беқиёс ҳисса қўшган, Ислом уммати ва ўз халқига кўп хизмат қилган уламонинг фоний дунёдаги сафари тугади. Марҳум Усмонхон хазрат Aлимов ўз ҳаётини атеистик тузум даврида қурий деб қолган маънавий ҳаёт идишларини тирик мазмун билан тўлдириш, янги авлод имомлари, уламолари ва Қуръон ҳофизларини тарбиялашга бағишлади.

Усмонхон Aлимовнинг вафоти Ўзбекистон халқи ҳамда бутун мусулмон уммати учун улкан йўқотишдир. Aллоҳ субҳанаҳу ва таолодан биродаримизнинг руҳини қабул қилиб, гуноҳларини кечиришини ҳамда қиёмат куни жаннати наъимдаги улуғ даражотлар билан мукофотлашини сўраймиз. Оламлар Парвардигори марҳум муфтийнинг барча эзгу ишлари ва ниятларини қабул қилсин, чеккан дардларини барча саҳву хатоларига каффорат қилиб, раҳматига чулғасин.

Яратгандан Усмонхон Aлимов биродаримизнинг оиласи ва яқинларига ушбу синовда сабри жамил тилайман.

Дарҳақиқат, барчамиз Aллоҳникимиз ва Унгагина қайтамиз!”