muslim.uz
Ҳадис илми мактабига замонавий автобус топширилди
Бугун, 27 март куни Самарқанд вилоятидаги Ҳадис илми мактабига замонавий автобусни топшириш маросими бўлиб ўтди. Унда Самарқанд вилояти ҳокими Эркинжон Турдимов замонавий автобусни Ҳадис илми мактабига топшириш чоғида давлатимиз Раҳбари ташаббуси билан ушбу таълим даргоҳини ташкил қилиниши мамлакатимиз маънавий тараққиётининг бугунги босқичида муҳим аҳамият касб этиши, келгусида ушбу мактабдан ҳадис олимлари етишиб чиқишига тилак билдирди.
Ўзбекистон мусулмонлари идораси раиси, муфтий Усмонхон Алимов ҳазратлари маросимда олий мактабдаги жуда кўп қулайликлар билан бирга ушбу замонавий автобус Ҳадис илми мактаби фаолиятида катта хизмат қилиши, энг замонавий ва қулай шароитлардан унумли фойдаланган талаба-ёшлар келгусида Имом Бухорий, Имом Термизий ва Имом Доримий каби улуғ муҳаддислар бўлиб етишишларига умид боғладилар. Шунингдек, Аллоҳ таборака ва таолонинг берган неъматларига шукр қилиш, неъматларни янада зиёда бўлишига асосий омил эканини шарҳладилар. Муфтий ҳазратлари Ўзбекистон мусулмонлари идораси томонидан ҳам мазкур олий мактабга муносиб совға топширилишини билдирдилар.
Маросимда мутасадди ташкилотлар раҳбарлари, таниқли уламолар, бош имом-хатиблар, мадрасалар мудирлари ва тажрибали имом-хатиблар иштирок этди.
Ўзбекистон мусулмонлари идораси Матбуот хизмати
Муфтий ҳазрат ўзи таълим олган Тошкент ислом институтига китоблар совға қилди
Президент ташаббуси ўлароқ Ўзбекистон мусулмонлари идораси раиси, муфтий Усмонхон Алимов ҳазратлари ўзлари таълим олган Имом Бухорий номли Тошкент ислом институтига ўзларининг шахсий кутубхоналаридан китоблар совға қилдилар. Тақдим этилган адабиётлар орасидаги "Тафсири Ирфон", "Ҳидояи шариф", "Муножотнома", "Мақомоти Юсуф Ҳамадоний" ва "Муҳаммад Ҳаким Термизий рисолалари" каби асарларни алоҳида таъкидлаш керак.
Ушбу китоблар институт талабалари янада чуқур билим олиши, дунёқарашини кенгайтириши, маънавиятини ривожлантиришга катта ҳисса қўшади. Инсоннинг маънавий улғайишида китоб муҳим аҳамият касб этади. Фарзандларимиз қалбида китобга нисбатан меҳр-муҳаббатни янада кучайтириш, уларда мутолаага бўлган иштиёқни оширишимиз лозим.
Эслатиб ўтамиз, Муҳтарам Президентимиз раҳбарлигида 19 март куни ўтказилган видеоселектор йиғилишида ёшлар маънавиятини юксалтириш, уларнинг бўш вақтини мазмунли ташкил этиш, китобхонликни тарғиб қилиш масалалари атрофлича муҳокама қилинди.
Йиғилишда давлат раҳбари аҳоли, айниқса, ёшлар маънавиятини юксалтириш масаласига тўхталар экан, “Ҳар бир раҳбар ўзининг шахсий кутубхонасидан ўзи таълим олган мактаб кутубхонасига китоблар совға қилса, бу яхши ташаббус бўлиб китобхонликни ривожлантириш билан фарзандларимиз тарбиясига ижобий таъсир кўрсатади”, деб таъкидладилар.
Ҳақиқатдан ҳам, ўсиб-униб келаётган йигит-қизлар жамиятда ўз ўрнига эга бўлган, маълум бир ютуқларга эришган кишиларга ҳавас қилади, уларга ўхшашга интилади, ортидан эргашади. Улар томонидан совға қилинган китоблар албатта ўқилади, асраб-авайланади, қадрли совға саналади.
Ушбу ташаббусни қўллаб-қувватлаймиз ва барчани унда иштирок этишга даъват этамиз.
Тошкент ислом институти Матбуот хизмати
Китоблар совға қилинди
2019 йил 19 март куни ўтказилган видеоселектор йиғилишида давлатимиз Раҳбари аҳоли, айниқса, ёшлар маънавиятини юксалтириш масаласига тўхталиб, «Ҳар бир раҳбар ўзининг шахсий кутубхонасидан ўзи таълим олган мактаб кутубхонасига китоблар совға қилса, бу яхши ташаббус бўлиб, китобхонликни ривожлантириш билан фарзандларимиз тарбиясига ижобий таъсир кўрсатади», – дея таъкидлаган эди.
Мана шундай эзгу ташаббусдан руҳланиб, Қашқадарё вилояти Китоб туманидаги “Хожа Бухорий” ўрта махсус ислом билим юрти мудири Ўткир Ғузаров ушбу тумандаги 3-сонли мактаб кутубхонасига ўз ҳисобидан бадиий ва илмий-оммабоп китобларни туҳфа этди.
Дарҳақиқат Ислом илм-маърифат динидир. Қуръони каримнинг 811 ўрнида илм сўзи келиши ҳам фикримизни тасдиқлайди. Демак, билим олишга чорлаш энг савобли амаллардандир.
Шундай экан барчани ушбу эзгу ишда фаоллик кўрсатишга чорлаймиз.
Ўзбекистон мусулмонлари идораси Матбуот хизмати
Ер юзидаги энг пок инсон
Абу Лаҳаб исмли бир кофир Муҳаммад соллаллоҳу алайҳи васалламнинг туғилганларидан қувониб, хушхабар келтирган чўрисини озод қилиб юборган эди. Шу қилган иши учун унга жаҳаннамда ҳар душанба куни азоб енгиллатилади. Ваҳоланки, у Қуръонда мазаммат қилинди (қораланди).
Энди умр бўйи ҳақларига саловот айтиб, у зотнинг уммати бўлганидан шодланиб, суннатларига амал қилиб юрган мўмин ҳақида нима дейиш мумкин?!
Доктор Аҳмад Умар Ҳошим
*****
Душманларнинг ашаддийси бўлган Умар ибн Хаттоб Исломга киргач, мусулмонларни душманлардан ҳимоя қилувчи қўрғонга айланди.
Доктор Аҳмад Умар Ҳошим
*****
Абдуллоҳ ибн Масъуд розияллоҳу анҳу шундай деганлар: “Умар ибн Хаттобнинг Исломга кириши фатҳ, ҳижрат қилиши наср, мўминларнинг амири бўлиши раҳмат эди”.
Яъни у кишининг Исломга кириши Аллоҳнинг фатҳи, Мадинага кўчиб кетиши Аллоҳнинг мўминларга ёрдами, раҳбар бўлиши Аллоҳ таолонинг мўминларга раҳмати бўлди.
Доктор Аҳмад Умар Ҳошим
*****
Ер юзида юрган энг пок инсон – Муҳаммад соллаллоҳу алайҳи васалламдирлар.
Доктор Аҳмад Умар Ҳошим
*****
Пайғамбаримиз соллаллоҳу алайҳи васаллам Рафиқул Аълога интиқол қилганларидан сўнг Билол розияллоҳу анҳу Мадинада тура олмай, Шом тарафларга бош олиб кетадилар.
Кунларнинг бирида тушларида Набий соллаллоҳу алайҳи васалламни кўрадилар. У зот алайҳиссалом ҳазрати Билолга “Бу қандай жафо бўлди, эй Билол?!” дедилар. Уйқусидан йиғлаб уйғонган Билол Мадинага, Набий соллаллоҳу алайҳи васалламнининг равзаларини зиёрат қилгани келадилар. Шунда Абу Бакр Сиддиқ розияллоҳу анҳу Билол розияллоҳу анҳудан азон чақиришни илтимос қиладилар. Ҳазрати Билол у кишига узр айтиб, “Пайғамбаримиз соллаллоҳу алайҳи васаллам борликларида азон чақириб бўлиб, севикли Ҳабибимнинг уйлари олдига келиб, “Намоз вақти бўлди, эй Аллоҳнинг Расули!” дердим. Энди азон чақириб бўлиб, бу сўзни қандай айтаман?!” дедилар.
Шу пайт имом Ҳасан ва имом Ҳусайн розияллоҳу анҳумо келиб қолишди. Ҳазрати Билол розияллоҳу анҳу уларни кўриб, хурсанд бўлдилар ва икковларини бағриларига босиб, йиғладилар. Чунки улардан севикли боболарининг ҳидлари келар эди. Улар Билол розияллоҳу анҳудан азон чақириб беришни илтимос қилишди. Ҳазрати Билол жаннат йигитлари саййидларининг бу илтимосларига йўқ дея олмадилар ва Расулуллоҳ соллаллоҳу алайҳи васалламнинг даврларида азон чақирадиган жойларига чиқиб, азон чақира бошладилар.
Аллоҳу акбар, Аллоҳу акбар.
Мадина шовқинга тўлиб кетди.
Аллоҳу акбар, Аллоҳу акбар.
Одамлар уйларидан туриб бақирдилар, бундай деб дод солдилар: “Расулуллоҳ соллаллоҳу алайҳи васаллам қайта тирилдиларми?”
Чунки бу азон Пайғамбаримиз соллаллоҳу алайҳи васалламнинг даврларидагина эшитилар эди.
Ашҳаду аллаа илааҳа иллаллоҳ
Ашҳаду аллаа илааҳа иллаллоҳ
Одамлар уйларидан масжид сари югуриб кела бошладилар. Йўлда келар эканлар, бир-бирларидан “Расулуллоҳ соллаллоҳу алайҳи васаллам қайта тирилдиларми?” деб сўрардилар.
Ашҳаду анна Муҳаммадар Росулуллоҳ
...
Шу ерга келганда буюк муаззиннинг томоқларига нимадир тиқилди. Азонни давом эттиролмадилар. Турган жойларидан пастга тушдилар.
Ровийларнинг айтишича, Мадина шаҳри ўша кундагидек бирор марта йиғи ва фарёд садоларига тўлмаган экан.
Бу йиғи соғинч ва муҳаббат кўз ёшлари эди. Севикли Пайғамбар алайҳиссаломга бўлган муҳаббат...
Али Жифрий ҳафизаҳуллоҳ
*****
Саҳобаи киромлар Расулуллоҳ соллаллоҳу алайҳи васалламни кўзлари билан кўриб, қўлларидан ушлаб, ортларида иқтидо қилиб намозни адо этиб, у зот билан бирга Исломнинг равнақи учун бутун борлиқларини фидо қилишган. Аммо Набий соллаллоҳу алайҳи васаллам муборак ҳадисларидан бирида шундай деганлар: “Биродарларимни кўргим келди”. Саҳобалар: “Биз сизнинг биродарларингиз эмасмизми?” деб сўрашди. У зот: “Сизлар саҳобаларимсиз, биродарларим эса мендан кейин келадилар, мени кўрмаган ҳолларида менга иймон келтирадилар” деб марҳамат қилганлар.
Бугун биз, бизни ва бизга бўлган меҳрини ҳамма нарсадан устун кўриб, “Умматим, умматим” дея нола қилган зотга муносиб уммат бўла оляпмизми?!
Расулуллоҳ соллаллоҳу алайҳи васаллам бизларни яхши кўрганчалик биз ҳам у зотни яхши кўра оляпмизми?! Зотан, ҳадиси шарифда Пайғамбаримиз соллаллоҳу алайҳи васаллам: “Бирортангиз мени фарзандидан, отасидан ва барча одамлардан кўпроқ яхши кўрмагунча, иймони комил бўлмайди” деб марҳамат қилганлар.
Интернет маълумотларидан Нозимжон Иминжонов таржимаси
Янгиликлар
