www.muslimuz

www.muslimuz

Бисмиллаҳир Роҳманир Роҳийм.

Аллоҳ таолога шукрки, юртимиздаги инсон манфаатларига қаратилган ислоҳотлар дунё ҳамжамияти томонидан ҳам муносиб эътироф этилмоқда, тақдим этилган таклиф-ташаббуслар ҳаётийлиги билан муҳим аҳамият касб этаётир. Натижада мамлакатимиз дунё миқёсида ўз ўрни, ўз сўзига эга бўлиб, довруғи янада юксалмоқда.

Президентимизнинг 2023 йил 17-21 сентябрь кунлари АҚШга қилган сафари ҳам самарали мулоқотлар, манфаатли учрашувлар ва фойдали келишувларга бой бўлди. Айниқса, давлатимиз раҳбарининг 19 сентябрь куни Бирлашган Миллатлар Ташкилоти Бош Ассамблеясининг 78-сессиясидаги нутқида жаҳон ҳамжамиятини бугунги кунда муҳим бўлган масалаларга эътибор қаратиб, бир қатор таклифларни илгари сургани океанорти сафарининг энг муҳим нуқтаси бўлди.

Таъкидлаш керакки, сўнгги йилларда Ўзбекистон ва БМТ ўртасидаги ҳамкорлик мисли кўрилмаган юксак даражага чиқди. Биргаликда қарийб 140 та дастур ва лойиҳалар муваффақиятли амалга оширилгани, айниқса, Ўзбекистон ташаббуси билан БМТ Бош Ассамблеясининг 6 та резолюцияси қабул қилингани фикримизни яққол тасдиқлайди.

Шунингдек, Ўзбекистон БМТнинг бир қатор нуфузли тузилмаларига сайланди ва уларнинг ишида фаол иштирок этмоқда. Биргаликда глобал кун тартибига оид, жумладан, озиқ-овқат хавфсизлигини таъминлаш, туризмни ривожлантириш, камбағалликка ва иқлим ўзгаришига қарши курашиш масалалари бўйича йирик халқаро тадбирлар ўтказилмоқда.

Юртбошимиз ўз чиқишида “Биз ҳуқуқий, дунёвий, демократик ва ижтимоий давлат бўлмиш Янги Ўзбекистонни барпо этиш сиёсатини қатъий давом эттирмоқдамиз. Мамлакатимиз “Инсон қадри ва манфаатлари учун” деган эзгу ғоя асосида демократия ва адолат тамойилларини мустаҳкамлашга қаратилган туб ислоҳотлар йўлидан дадил илгари бормоқда”, дея таъкидлади.

Дарҳақиқат, бугун юртимизнинг барча жабҳасида изчил ислоҳотлар давом этмоқда. Бу эса, ўз навбатида, халқимизнинг турмуш фаровонлиги ошишига, юрт равнақи ва дунё миқёсида муносиб ўрин эгаллашида муҳим омил бўлаётир. Айниқса, барча йўналишда “Инсон қадри ва манфаатлари учун” деган тамойил асосида иш олиб борилаётгани бу ислоҳотларнинг янада самарали кечишига, халқимизнинг розилигига замин бўлмоқда.

Аҳоли билан ишлашда маҳаллалар, оилалар кесимида иш олиб борилаётгани, барча мутасадди ташкилот вакиллари қаторида диний соҳа ходимлари, хусусан, имом-хатиблар ҳам халқ билан мулоқотни йўлга қўйгани бу ишларнинг янада самарали кечишида муҳим ўрин тутмоқда.

Президентимиз ўз нутқида ислом динининг инсонпарварлик моҳиятини кенг тарғиб этиш, диний бағрикенгликни қарор топтириш ва турли таҳдидларга қарши биргаликда курашишга ҳам алоҳида тўхталди.

Сўнгги пайтларда айрим мамлакатларда кўзга ташланаётган диний тоқатсизлик, исломофобия ҳолатларига асло йўл қўйиб бўлмаслиги таъкидланди. Ҳақиқатан, кейинги пайтларда дунёда исломни ёмонотлиқ қилишга уринишлар, турли фитналар кенг тарқалмоқда. Аслида, буларнинг динимизга умуман алоқаси йўқ. Ислом одамларни Ер юзида тинчлик-осойишталикда аҳил-иноқ бўлиб яшашга чорлайди. Шу мақсадда ҳар қандай ҳолатда ҳам раҳм-шафқат ва бағрикенглик каби юксак инсоний фазилатларни тарғиб этади.

Манбаларда ҳақиқий мўмин бошқаларга қўли билан ҳам, тили билан ҳам озор бермаслиги кераклиги уқтирилади. Бир ҳадиси шарифда саҳобалардан бири Набий соллаллоҳу алайҳи васалламнинг олдига келиб, “Эй Аллоҳнинг Расули, қайси мусулмон афзал саналади?” деб сўради. Шунда у зот: “Ҳақиқий мусулмон тили ва қўлидан бошқа мусулмонлар саломат бўлган кишидир”, деб жавоб берди.

Бинобарин, қайси динга мансуб бўлмасин, одамлар инсон бўлгани учун ҳурмат қилинади, ҳимоя этилади ва ҳар бири ўз ҳуқуқларига эга бўлади. Қисқача айтганда, динимиз — бағрикенглик дини. Бу тушунча бугун давлатимиз сиёсатида ҳам муҳим ўрин олаётганини алоҳида таъкидлаш жоиз.

Президентимизнинг олий минбардан туриб жаҳон миқёсида динлараро бағрикенглик ва ҳамжиҳатлик ғояларини кенг тарғиб этиш мақсадида Ўзбекистонда ЮНЕСКО шафелигида Динлараро мулоқот ва бағрикенглик халқаро марказини ташкил этиш таклифи ҳам бежиз эмас. Чунки кейинги йилларда Ўзбекистонда турли динларга мансуб қадриятларни асраб-авайлашга, барча фуқарога ўз эътиқодини амалга ошириш учун зарур шароитларни яратиб беришга, динлар ва миллатлараро ҳамжиҳатликни янада мустаҳкамлашга, улар ўртасида муштарак анъаналарни ривожлантиришга алоҳида эътибор қаратиб келинмоқда ва бу борада дунё мамлакатларига намуна бўлаётганини ҳам қайд этиш даркор.

Ҳозирги даврда турли диний конфессиялар ўртасида ўзаро бир-бирини тушуниш, мулоқот қилиш ва аҳил-иноқ яшаш тинчликни қарор топтиришнинг бош омили бўлмоқда. Қуръони каримда ҳам Ҳақ таоло: “Эй, инсонлар! Дарҳақиқат, Биз сизларни бир эркак (Одам) ва бир аёл (Ҳавво)дан яратдик ҳамда бир-бирларингиз билан танишишингиз учун сизларни (турли-туман) халқлар ва қабила (элат)лар қилиб қўйдик...” (Ҳужурот, 13), деб хитоб қилади.

Маълумки, давлатимиз раҳбари 2017 йил 19 сентябрда ҳам БМТ Бош Ассамблеясининг 72-сессиясида “Маърифат ва диний бағрикенглик” деб номланган махсус резолюция қабул қилиш ташаббуси билан чиққанди. Бинобарин, Ўзбекистон томонидан ишлаб чиқилган лойиҳа БМТга аъзо давлатлар томонидан бир овоздан қўллаб-қувватланган. Резолюция нафақат БМТнинг барча аъзо давлатлари томонидан, балки 50 дан ортиқ давлатлар ҳаммуаллифлигида қабул қилинган эди.

Бу Ўзбекистонда турли миллат ва элатлар, диний конфессиялар вакиллари ўртасидаги аҳил-иноқлик, ҳамжиҳатликни таъминлаш, тинчлик-осойишталик, барқарорликни сақлаш йўлида оқилона ислоҳотлар ва амалий чора-тадбирлар олиб борилаётгани баробарида мамлакатимиз жаҳонда бағрикенглик тарғиботчиси ва ташаббускори бўлаётганидан далолат.

Юртбошимизнинг мазкур Ассамблеядаги яна бир муҳим ташаббуси 2024 йилда Ўзбекистонда “Ислом тинчлик ва эзгулик дини” мавзусида халқаро конференция ўтказиш таклифи бўлди. Диёримиз жаҳон илм-фани ривожига беқиёс ҳисса қўшган, исломни илм-маърифат ва тинчлик дини сифатида намоён этган ал-Хоразмий, Беруний, Ибн Сино, Имом Бухорий, Мирзо Улуғбек, Алишер Навоий сингари улуғ аллома ва мутафаккирлар ватанидир. Буюк олимларнинг бой меросини ўрганиш, исломнинг асл инсонпарварлик моҳиятини чуқур очиб бериш бугунги кун учун ғоят долзарб аҳамият касб этмоқда.

Бугун тараққиётнинг янги босқичида тарихий меросни асраб-авайлаш, ўрганиш ва авлоддан-авлодга қолдириш давлатимиз сиёсатининг устувор йўналишларидан бирига айланган. Зеро, муборак динимизнинг асл инсонпарварлик моҳиятини кенг жамоатчиликка етказиш, миллий қадриятларимизни, азиз авлиёларимизнинг хотирасини тиклаш, бебаҳо меросини ўрганиш, қадамжоларини обод қилиш борасида амалга оширилаётган кенг кўламли ишлар Ўзбекистонни илм-фан, маданият, маърифат марказига айлантиришдек эзгу ниятларга, юксак мақсадларга пойдевор бўлмоқда.

Ушбу чиқишда давлатимиз раҳбари Биз экстремизм балоси тарқалишига, ёшларнинг радикаллашувига йўл қўймаслик учун биргаликдаги ҳаракатларимизни кучайтиришимиз зарур, деб таъкидлади. Мазкур йўналишда авваллари экстремизм ғоялари таъсирида бўлган шахсларни соғлом ҳаётга қайтариш ва жамиятга мослаштириш масаласига алоҳида урғу берилди. Жумладан, беш марта “Меҳр” инсонпарварлик миссияси ўтказилгани, 530 нафардан зиёд фуқаролар, аввало, аёллар ва болалар Яқин Шарқ ва Афғонистондаги ҳудудлардан юртимизга қайтарилгани Президентимиз нутқида алоҳида таъкидланди. Ушбу шахсларнинг барчасига тиббий, руҳий, ижтимоий ва бошқа ёрдамлар кўрсатилганига эътибор қаратилди. Ушбу тажриба ҳам анжуман иштирокчилар томонидан эътироф этилди.

Мана шундай таклиф ва ташаббуслар сессия иштирокчилари, делегациялар аъзолари ва сиёсий етакчилар томонидан илиқ кутиб олинди. Айниқса, давлатимиз раҳбарининг нутқини БМТ Бош котиби юксак баҳолаб, унда билдирилган таклифлар, ташаббуслар долзарб глобал ва минтақавий муаммоларга ечим топишда муҳим аҳамиятга эгалигини, мамлакатимизда амалга оширилаётган ислоҳотларни қўллаб-қувватлашини урғулади.

Аллоҳ таоло юртимизда амалга оширилаётган ислоҳотларни бардавом айласин ва дунёда мамлакатимиз нуфузини янада оширсин!

 

Шайх Нуриддин ХОЛИҚНАЗАР,

Ўзбекистон мусулмонлари идораси раиси, муфтий.

Среда, 13 Сентябрь 2023 00:00

УМРА ЗИЁРАТЧИЛАРИ УЧУН ЙЎРИҚНОМА!

САФАРГА ТАЙЁРЛАНАЁТГАНИНГИЗДА ҚУЙИДАГИЛАРГА АҲАМИЯТ БЕРИНГ:

Сурункали хасталиклари бор зиёратчилар:

 ✓Ҳар куни истеъмол қиладиган ноёб дори-дармонларни заҳираси билан олиши;

✓ Зиёратчилар сафардан олдин ўз ҳас-таликларини беркитмай, балки шифокор-ларга мурожаат қилиб, зарур бўлса, ётиб даволанишлари;

✓ Қулай ва енгил оёқ кийим олиш, иложи бўлса, ўз яшаш жойидан ҳарид қилиб, 4-5 кун давомида кийиб, оёғига мос-лаштириши лозим, акс ҳолда сафарда оёқ шилинишидан азият чекиш мумкин;

✓Грипп, коронавирус ва бошқа касал-ликларнинг олдини олиш мақсадида 10-15 дона тиббий ниқоб ва Оксалин сурмасини олиш зарур;

 

САФАР ДАВОМИДА ҚУЙИДАГИЛАР ҚАТЪИЯН МАН ЭТИЛАДИ:

✓Сафар учун олинган дорилар ичида наркотик ва психотроп моддалар бўлган дори воситалари, нос ва сигарет маҳ-сулотларини олиб бориш;

 ✓Саудия Арабистонига сотиш мақсадида қурт, асал, турп, бодом, туршак, майиз ва бошқа шу каби маҳсулотларни олиб бориш ҳамда у ердан белгиланган меъёрдан ортиқ товар ва маҳсулотларни мамлакати-мизга олиб келиш мумкин эмас.

 ✓Қисқа муддатда бузилиши натижасида истеъмол қилинганда ўткир ичак заҳар-ланишга олиб келиши мумкин бўлган маҳсулотларни олиб бориш;

 ✓Мадина, Макка ва Жидда шаҳарлари ҳудудларида “Суратга тушиш ман этила-ди” деган белгилар қўйилган жойларда сурат ва видеога тушиш;

 ✓Меҳмонхона, Ҳарам ҳудудларида, аэропортларда бепул тарқатиладиган диск ва диний адабиётларни (Қуръони каримдан ташқари) олиш мумкин эмас;

 ✓Бегона одамлар билан бирор жойга (Жидда ва Тоиф шаҳарларига, турли нотаниш жойларга) бориш;

 ✓Қуръон оятига асосан эҳромли ҳолатда жанжал, тортишув ва дилозорликлардан узоқ бўлиш лозим.

 

ШУНИНГДЕК, ЗИЁРАТЧИЛАР ҚУЙИДАГИЛАРГА ЭЪТИБОР ҚАРАТИШЛАРИ ШАРТ:

✓Саудия Арабистони Подшоҳлигининг тегишли идоралари томонидан жорий қилинган тартибга кўра, Масжиди На-бавийда “Равза” зиёратини амалга оши-риш учун бериладиган махсус рух-сатномада белгиланган талабларга амал қилиш зарур;

 ✓Меҳмонхоналардаги ҳар бир хонага жойлаштирилган ва ўрнатилган мебель жиҳозлари меҳмонхонанинг мулки бўлиб, уларга зарар етказманг;

 ✓Макка ва Мадина шаҳарларидаги меҳмонхоналарда санитария қоидалари-га риоя қилинг;

 ✓Меҳмонхоналардаги сув техник сув бўлиб, уни ичиш ва исроф қилиш мумкин эмас;

 ✓Иссиқ мавсум вақтида ҳаво ҳарорати 60 даражадан юқори бўлиши эҳтимоли-дан келиб чиқиб, кўчаларга соябонсиз чиқманг! Бирор кўнгилсизлик содир бўлса ёки бирор жойга меҳмонга бормоқчи бўлганингизда гуруҳ раҳбари-ни хабардор қилиб, Сизни меҳмонга олиб кетаётган одамнинг манзилини бериб кетишингиз лозим;

 ✓Кўчага ёки Ҳарамга борганингизда камзулингиз ва бейжигингизни тақиб чиқинг;

✓ Зам-зам суви, иккала Ҳарамда, “СООL” (совуқ) ва “НОТ” (иссиқ) белгиси ёзилган идишларда туради. Ҳаво иссиқлиги сабаб-ли кўпчилик совуқ сув ичиб қўяди ва томоғини шамоллатади, бу нарсалардан ўзларини эҳтиёт қилишлари зарур;

✓ Сафарда шамоллашлар сабабларидан бири мармар устида пайпоқ (носки) киймасдан юриш ҳисобланади (эҳромдан чиққандан сўнг, албатта). Шу сабаб оёққа пайпоқ кийиб юриш шамоллаш ва оёқ замбуруғли касалликларининг олдини олади. Ўз жойнамози билан юриш эса совуқ мармар устида намоз ўқиш вақтида шамоллаб қолишдан асрайди;

✓ “Қора тош” – (“Ҳажар ал-асвад”)ни ўпиш фарз ҳисобланмайди. Мусулмонга озор бермаслик эса фарз. Шундай экан, қора тошни ўпаман деб ўзингиз ва дин-дошларингизга қийинчилик туғдирманг;

✓ Саудия Арабистони масъул идоралари белгилаган тартибга кўра, зиёратчи Каъба саҳнига фақат эҳромда Умра қилганда киритилишини инобатга олинг. Қолган вақтда эҳромсиз кириш мумкин бўлган ҳудудларда ибодат қилинади;

✓ Кўпчилик тўпланган жойларга яқин-лашманг, ўзингизни тиқилинч жойлар-дан эҳтиёт қилинг;

✓ Умрани бир марта бажариш суннат. Бир кунда бир неча умрани бажариб соғ-лиғингизга зарар келтирманг;

✓ Эсколаторлардан фойдаланганда эҳтиёт бўлинг, чунки айрим ҳолларда эҳтиётсизлик оқибатида оғир жароҳат-лар олиш ҳоллари кузатилган;

✓ Сабрли бўлинг. Ҳар қандай ҳолатда ҳам бошқа ҳожилар билан урушманг ва талашманг. Гуруҳ раҳбари ва гапларига қулоқ солинг;

✓ Шахсий буюм ва пул маблағларингизга эҳтиёт бўлинг;

✓ Ишчи гуруҳи ва Гуруҳ раҳбари томони-дан меҳмонхонадаги хона тақсимотига қатъий амал қилинг.

 

АВИАКОМПАНИЯ ТАЛАБЛАРИ:

✓ Багажга топшириладиган меъёрдаги юк бўлиши лозим. Меъёрдан ошган ҳар бир килограмм учун белгиланган тариф бўйича тўлов тўланиши лозим;

✓ Самолёт салонига олиб кириладиган қўл юки 8 кг.дан ошмаслиги лозим. Ортиқча қўл юки самолёт салонига киритилмайди. Қўл юкида ўткир тиғли предметлар (пичоқ, қайчи, тирноқ олади-ган ва ҳ.к.) бўлмаслиги лозим;

✓ Шунингдек, қўл юкида ёниш ҳусусияти-га эга бўлган косметик (атир, дезодорант ва ҳ.к.) маҳсулотлари ҳам самолёт салони-га киритилмайди;

✓ Рўйхатдан ўтиш учун аэропортга ўз вақтида етиб келиш.

 

Яратгандан умра ибодатингиз осон ва қабул бўлишини сўраймиз!

 

Ўзбекистон мусулмонлари идораси muslim.uz портали. (https://taplink.cc/muslimuz)

Диний саволлар учун: (https://t.me/SavollarMuslimUzBot)

 

 

 

Ўзбекистон мусулмонлари идораси
Матбуот хизмати
Muslim.uz

Шаҳидлар хотираси хиёбонида қатағон қурбонларини ёд этиш маросими бўлиб ўтди. Унда Президент Шавкат Мирзиёев иштирок этди.

манба: https://president.uz/uz/lists/view/6633

 

Шу йил 22 август куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари сафарлари давомида Бухоро шаҳридаги “Дилкушо” масжидига ҳуфтон намозига ташриф буюриб, жамоат намозидан олдин жомега йиғилган мўмин-мусулмонларга маърифий суҳбат қилиб бердилар.

Мазмунли суҳбат давомида Муфтий ҳазратлари намозхонларга Бухорои шариф буюк уламоларни етиштиргани, айни кунларда ҳам ушбу анъана давом этаётгани, яъни ушбу юртда 500 йиллик тарихга эга Мир Араб олий ва ўрта махсус мадрасалари фаолият юритаётгани, бу ердан алломалар етишиб чиққани, ўзлари ҳам шу ерда таълим олишга мушарраф бўлганлари, айни пайтда юртимизда фаолият юритаётган қарийб 220 нафар бош имом-хатиб мазкур даргоҳда билим-малакаларини ошираётганини таъкидладилар.

Шунингдек, Шайх ҳазратлари илмнинг аҳамияти, олимнинг мақоми, силаи раҳм, етим ва бева-бечораларга яхшилик қилиш ва ўзаро биродар бўлиб яшаш ҳақида ояти карималар, ҳадиси шарифлар ва улуғлар ибратлари асосида тушунтириб бердилар.

Шайх ҳазратлари “Дилкушо” масжидининг янги биносини кўздан кечириш асносида бу ердаги замонавий кутубхона фаолияти билан танишиб, бениҳоя хурсанд бўлдилар ва ҳар бир масжид ана шундай маърифат масканига айланиши лозимлиги, бу намозхонларнинг саводхонлигини оширишда жуда муҳим эканини алоҳида қайд этдилар. Шунингдек, мустабид даврида Бухорода 4-5 та бўлган масжидлар бугунги кунда 107 тага етгани, уларда мўмин-мусулмонларга барча шароитлар яратилаётгани қайд этилди.

Маълумот ўрнида "Дилкушо" масжиди янги биносида бошқа масжидларда учрамайдиган икки хусусият – масжид гумбазининг ўзига хос, ноанъанавий услубда барпо этилгани ҳамда жоме деворларида ноёб қурилиш ашёлари билан битилгани, нодир настаълиқ хатидаги гўзал ҳуснихат намуналари борлиги билан аҳамиятлидир.

Масжид хонақоҳи ва айвонига 1500 нафар номозхонни ўз бағрига олади. Айни пайтда жомеда намозхонлар ибодатларини бекаму кўст адо этишлари учун барча қулайлик ва шароитлар ҳозирланган.

 

Ўзбекистон мусулмонлари идораси
Матбуот хизмати

Аҳолининг ижтимоий ҳимояга муҳтож вакиллари, жумладан, имконияти чекланган шахсларни моддий ва маънавий қўллаб-қувватлаш "Вақф" фондининг асосий вазифаларидан ҳисобланади. Мазкур йўналишда Фонд томонидан давомли хайрия ишлари амалга оширилмоқда.

Бугун, 21 август куни, Мустақиллик байрами арафасида Фонд томонидан ана шундай хайрия тадбирларининг навбатдагиси ташкил этилди. Пойтахтимиздаги "Оқшом" тўйхонасида Тошкент шаҳрида яшовчи кам таъминланган, боқувчисини йўқотган ва ногиронлиги бор оилаларнинг 23 нафар фарзанди учун суннат тўйи ташкил этилди.

Ҳомийлар билан ҳамкорликда ўтказилган тадбирда Ўзбекистон мусулмонлари идораси раиси ўринбосари Уйғун домла Ғофуров, Вақф фонди раҳбари Зиёвуддин домла Мирсодиқов, Тошкент шаҳар бош имоми ўринбосари Абдуллоҳ домла Йўлдошев, фонд ходимлари ва болажонларнинг оила аъзолари, жами 200 нафар киши иштирок этди.

Тадбир давомида тўй болаларга велосипед, турли ўйинчоқ ва пул маблағлари ҳадя қилинди.

"Вақф" фонди
Матбуот хизмати

Страница 5 из 635

Янгиликлар

Top