29 май куни Андижон вилояти Шаҳрихон туманидаги “Боистон”, “Эшон”, “Ҳалим қори” ва “Назар Маҳрам” жоме масжидларининг иш фаолияти билан яқиндан танишиш ва намозхонлар билан дилдан суҳбат қуриш мақсадида, Ўзбекистон мусулмонлари идораси идораси раиси, муфтий Усмонхон Алимов ҳазратлари мазкур жомеларга ташриф буюрдилар.
Давлатимиз Раҳбари ташаббуслари билан Ислом дини қадриятларини ривож топтириш, алломалар мерослари ўрганиш, мўмин-мусулмонларнинг диний-маърифий саводхонлигини ошириш ҳамда диёримиздаги масжид-мадрасалар фаолиятини яхшилаш ва имом-домлаларнинг ойлик маошларини ошириш борасида бир қатор ишлар амалга оширилаётгани ҳақида муфтий ҳазратлари намозхонларга сўзлаб бердилар. Ўз навбатида масжидлар қавмлари аъзолари ҳам ўзларининг бугунги кундаги ислоҳотларга фикр-мулоҳазаларини билдиришди.
“Боистон” жоме масжиди қавми аъзоси Ҳусанбой ота муҳтарам Президентимиз олиб бораётган оқилона сиёсатдан намозхонлар чексиз миннатдор экани, аҳолининг кайфияти жуда юқори бўлаётгани, яратилган шарт-шароитлардан барча бирдек хурсандлигини изҳор қилди. Намозхонлардан Баҳодир ака исмли киши масжидга келувчилар диёримизда олиб борилаётган ислоҳотлардан мамнун экани, ҳудуддаги аксар аҳоли ҳунармандчилик билан шуғулланиши, уларга берилаётган имконият ва имтиёзлардан барча розилигини чин кўнгилдан изҳор қилди.
Ушбу жоме масжид имом-хатиби Саидхонов Саидамирхон маҳалла аҳолиси жуда аҳил-иноқлиги, турли руйхатлардан чиқарилган фуқаролар ҳам қисқа муддат ичида жамиятга киришиб, муносиб ўринларини эгаллашганини маълум қилди.
“Эшон” жоме масжидига ташриф буюрилганда, намозхонлар ўз сўзларида ҳудуддаги шарт-шароитлар яхшиланиб бораётгани, масжидларда ибодатларни эмин-эркин адо этилаётгани, кўпчилик аҳоли деҳқончилик билан шуғулланиши, жуда қийин даврларни бошларидан ўтказишгани, бугунги дориломон кунларга шукроналар келтириб, Президентимиз олиб бораётган ислоҳотлардан мингдан-минг рози эканларини баён қилишди.
“Ҳалим қори” жоме масжиди аъзоларидан Мухторжон ота Болтабоев юрт Раҳбари, вазирлар, мутасаддилар ва муфтий ҳазратлари энг олис ва чекка қишлоқларга ҳам шахсан ўзлари ташриф буюришлари биринчи марта бўлаётганини билдирди. Шунингдек, аёл-қизлар, ёшлар тарбиясига янада жиддий аҳамият қаратиш зарурлигини алоҳида қайд этди. Сўзининг якунида бутун шаҳрихонликлар номидан Мухторжон ота ташаккур билдириб, давлатимиз Раҳбарига миннатдорлик изҳор қилди.
Тумандаги “Назар Маҳрам” жоме масжидида муфтий ҳазратлари намозхонлар билан пешин намозини бирга-бирга адо қилдилар ва мавъиза қилиб бердилар.
Муфтий ҳазратлари билан самимий мулоқот қилган мўмин-мусулмонлар дин пешволари, имом-домлаларнинг иш фаолиятлари кенгайиб бораётгани, ҳар бир жабҳада фаол иштирок этишаётгани ва бундан мўмин-мусулмонлар рози эканини сўзлаб беришди.
Муфтий ҳазратнинг Андижон вилоятига сафарлари давом этмоқда.

Ўзбекистон мусулмонлари идораси Матбуот хизмати

Юртимизда муборак Рамазон ойи шукуҳи кезиб юрган айни кунларда кўнгилларга сурур, қалбларга ҳузур, кўзларга нур улашувчи яна бир нашр – янги «МЎМИНАЛАР» журнали чоп этилди.

Аёл – мураббий, насллар давомийлигини таъминлашдек шарафли вазифага масъул зот. Муқаддас динимиз аёлнинг маънавий хазинасини бойитиш, уни маърифатга ошно қилиб, кўнглини меҳр жавоҳирлари билан тўлдиришга амр этади.

Шуни инобатга олиб Ўзбекистон мусулмонлари идораси «Мовароуннаҳр» нашриёти муассислигида «МЎМИНАЛАР» журнали чоп этила бошланди.

Ўзбекистон мусулмонлари идораси раиси, муфтий Усмонхон Алимов ҳазратларининг «Мукаррамлик насиб этсин!» табрик-мақоласи билан очилган журналда динимиз аҳкомлари, аёлларга хос ҳукмлар махсус рукнларда тушунарли баён этилган.

Оилаларимиз чироғи ва чароғбони – мўътабар оналаримиз, опа-сингилларимиз ҳақида Аллоҳнинг каломида нималар дейилгани, саҳармардонда уйғонган аёл қандай дуо-илтижо қилиши лозимлиги, аёллар фиқҳи, республикамиз бўйича юқори савияда ўтказилган Қуръон мусобақаларидан лавҳалар, мўминлар онаси – Хадича бинти Хувайлид (роҳияллоҳу анҳо)нинг ибратга тўла ҳаёт йўлларидан ўрнак олиб яшамоқчимисиз?

Динимизда маҳрнинг ҳукми қандай, куёв келинга қанча маҳр бериши керак; мўмина аёл фарзанд тарбиясида нималарга эътибор қаратиши зарур; пойтахтимизда фаолият юритаётган «Хадичаи Кубро» аёл-қизлар ўрта махсус билим юрти фаолияти сизни қизиқтирадими?

«Фолбинга борса нима бўлади?», Шайх Зиёвуддинхон ҳазратларининг авлодлари, сулолалари бугун қанадй хайрли ишлар билан банд?

Ушбу саволларга атрофлича жавоб олмоқчи, туркум қизиқарли мақолаларни ўқимоқчи бўлсангиз, «МЎМИНАЛАР» журналининг нишона сонини мутолаа қилинг.

«МЎМИНАЛАР» журналининг дастлабки сонини Тошкент шаҳри, Зарқайнар кўчаси 18-берк кўча, «Мовароуннаҳр» нашриётиидан ёки пойтахтимиздаги йирик жоме масжидлардан ёхуд Чорсу бозори атрофидаги китоб дўконларидан сотиб олишингиз мумкин.

ЎМИ Матбуот хизмати

Рўза тутиш нафақат еб-ичиш ва нафсни жиловлаш билан, балки тилидан чиқаётган ҳар бир сўзга эътиборли бўлиш билан ҳам мукаммал адо этилади. Киши тонг қоронғусидан то шомгача қийналиб еб-ичмасаю оғзидан турли сўкиниш ва ёлғонлар чиқаверса, бу рўза мукаммал бўлмайди. Бу борада Абу Ҳурайра (р.а.)дан ривоят қилинган ҳадиси шарифда Расулуллоҳ (с.а.в.): “Рўза шаҳватлардан тўсувчидир, агар бирортангиз рўза тутадиган бўлса, нолойиқ сўзларни айтиб, жоҳиллик қилмасин, бирор киши урушиб ёки сўкишадиган бўлса, мен рўзадорман, деб икки марта айтсин”, - дедилар. (имом Бухорий ва имом Муслим ривоятлари). Ушбу ҳадисда айтилганидек, имкон борича ёмон сўзлардан узоқ бўлиш, мабодо бирор кимса рўзадорни ранжитадиган бўлса,  тилига эҳтиёт бўлишдан чалғитса бунинг ҳам ечими борлигини, “мен рўзадорман” деб айтиши кифоя экани таъкидланади.

Набий (с.а.в.): “Баъзи рўзадрлар борки, уларга рўзаси учун очликдан ўзга нарса бўлмас. Баъзи тунда бедор бўлган борки, уларга бедорлиги учун уйқусизликдан ўзга нарса бўлмас”, дедилар. Баъзи кишилар рўза тутдим, деб вақтини бекорчи ишларга сарф этади,  ғийбат қиладилар, ёлғон гапириб турли тушунмовчиликларга сабаб бўлади ёки мақтанчоқлиги билан риёкорга айланади. Ушбу ҳадис одамларни ана шундай рўзадорга макруҳ, яъни ёмон кўрилган ишларни бажармасликни огоҳлантиради, акс ҳолда қийинчиликдан бошқаси берилмаслиги таъкидланади. Демак, ҳар бир ибодатнинг ўзига керакли қайтариқларига қатъий амал қилиш жоиз бўлганидек, рўзанинг ҳам муҳим шартларидан бири – тил офатларидан сақланмоқдир.

Ёлғон гапириш мунофиқлик аломати экани ҳадисларда келтирилади. Бу иллат рўза учун ҳам ўз таъсирини ўтказмай қолмайди. Бу борада бир ҳадиси шарифда: “Ким ёлғон гапиришни ва унга амал қилишни қўймаса, унинг таоми ва шаробини тарк қилмоғига Аллоҳнинг эҳтиёжи йўқ”, дейилади. Демак, рўза тутдим деб ният қилган, унинг барча қийинчиликларини сабот билан енгган ҳар киши албатта ёлғон гапиришдан ҳимояланмоғи муҳим экан.

Рўзадор ғийбат, сўкиниш, бўҳтон каби барча иллатли амаллардан тийилмаса, унинг савоблари йўққа чиқиши мумкин. Бу хақда Расулуллоҳ (с.а.в.): «... У киши очликдан бошқа нарсага эга бўлмайди» — деганлар. (Ибн Можа ривояти, саҳиҳут тарғиб).

Аксинча, рўза тутган инсон яхши гапларни гапириб, инсонларга эзгулик улашса, кўнгилларини олиб ширинсуҳан бўлишга интилса, кўплаб савобларга эришади. Рамазоннинг беқиёс имкониятларидан бири дуоларнинг ижобат этилишидир. Бебаҳо лаҳзаларни беҳуда ишларга сарф этиш ўрнига холис дуо қилишнинг хислати сон саноқсиздир.

Бу борада Абу Ҳурайра (р.а.)дан ривоят қилинади. Расулуллоҳ (с.а.в.): “Уч тоифа кишининг дуоси рад этилмайди. Улар: Рўзадорнинг оғиз очгунича қилган дуоси, одил имомнинг дуоси, мазлумнинг дуоси”, - деганлар (Термизий ва Ибн Можа ривоятлари)

Абдуллоҳ ибн Ос (р.а.)дан ривоят қилинган яна бир ҳадисда Расулуллоҳ (с.а.в.): “Рўзадорнинг ифтор пайтида қилган дуоси рад қилинмайди”, - дедилар. (Ибн Можа ва Ибн Сунний ривоятлари).

Бугунги кунда юртимизда айниқса, ифторлик пайтларида қўлларини дуога очиб, Яратгандан аввало осмонимиз мусаффо бўлишини, юртимиз тинч хотиржам, фарзандларимиз соғ-саломат бўлишини сўраётган юртдошларимизнинг сон саноқсизлиги кишини қувонтиради. Уларнинг эзгу илтижолари кўплар қаторида ижобат бўлсин деб Аллоҳдан сўраймиз.

Манбалар асосида “Кўкалдош” ўрта махсус ислом билим юрти мудир муовини А.Ғаниев тайёрлади.

Ҳурматли мухлислар!

Ўзбекистон мусулмонлари идораси томонидан муборак Рамазон ойида Сиз азизлар учун “Muslim ТV” интернет телеканали йўлга қўйилганини маълум қилади.

“Muslim ТV” интернет телеканали интернет тармоғида катта аудиторияга эга бўлган “ITV.UZ” интерактив телевидениеси билан ҳамкорликда йўлга қўйилди. Эндиликда сиз “ITV.UZ”га уланиш орқали “Muslim ТV” интернет телеканалини томоша қилишингиз ва интернет тармоғидаги itv.uz сайтидан рўйхатдан ўтган ҳолда кўрсатувларимизни томоша қилишингиз мумкин.

Мобил қурилмалар учун эса itv.uz мобил иловасини кўчириб олган ҳолда телеканалимизни кузатиш мумкин бўлади.

Ушбу интернет телеканал барчамиз учун манфаатли бўлишини Яратгандан сўраб қоламиз!

Ўзбекистон мусулмонлари идораси Матбуот хизмати

Олимлар “Пашшанинг тузилиши ўта мураккаб бўлиб, у учиш пайтида ва бутун ҳаёти давомида мураккаб технологияларни ишга солади” деган хулосага келишди.
Шунинг учун улар бугунги кунда Ғарб оламида техника, технология ақл бовар қилмас даражада ривожланганига қарамасдан, пашшанинг учишига ўхшаб учадиган қурилма ясай олмасликликларини эътироф этдилар.
Пашшани ўрганиш борасидаги тадқиқотларнинг адади бир неча мингдан ошиб кетган. Лекин шундай бўлса-да, инсоният пашшага ўхшаган қурилма ижод қилишдан ожизлигича қолмоқда.
Соҳа олимлари “Биз бу ажойиб жонзот ҳақида ҳали кўп нарса билмаймиз” дейишяпти. Улар бу заиф махлуқнинг сирларидан воқиф бўлиш мақсадида кўплаб конференциялар ва семинарлар ўтказяптилар. Тадбир якунида эса “Ҳеч бир инсон нафақат пашшага, балки, бирорта ҳашаротга ўхшаган қурилма ясай олмайди!” дея эътироф қилмоқдалар.
Мана шу ўринда Аллоҳ таолонинг мана бу гапини келтирсак:

يَا أَيُّهَا النَّاسُ ضُرِبَ مَثَلٌ فَاسْتَمِعُوا لَهُ إِنَّ الَّذِينَ تَدْعُونَ مِن دُونِ اللَّهِ لَن يَخْلُقُوا ذُبَاباً وَلَوِ اجْتَمَعُوا لَهُ وَإِن يَسْلُبْهُمُ الذُّبَابُ شَيْئاً لَّا يَسْتَنقِذُوهُ مِنْهُ ضَعُفَ الطَّالِبُ وَالْمَطْلُوبُ

“Эй одамлар! Бир масал айтилмиш, бас, унга қулоқ солинг! Албатта, сизлар Аллоҳни қўйиб, топинаётган нарсаларингиз, агар барчалари бирлашсалар ҳам, битта пашша ярата олмаслар. Ва агар пашша улардан бирон нарсани тортиб олса, ундан ўшани қутқариб ололмаслар. Талаб қилувчи ҳам, талаб қилинган ҳам ожиз бўлди. (Бошқа катта жонзотларни қўйсинлар-у, энг кичик, энг ҳақир, энг аҳамиятсиз кўринган пашшани яратишга уриниб кўрсинлар. Ярата олмаслар. Хўш, энди бир дона пашшани ярата олмаган бутга қандай қилиб топиниш, сиғиниш, айтганини (агар айтолса,) қилиш мумкин? Асло мумкин эмас. Умуман ақлга, мантиққа тўғри келмайди. Пашша жуда заиф, ҳақир жон. Аммо, у сабаб бўлиб баъзи бир касалликларни ташиб келтирса, ҳаммаси тўпланиб, ҳаракат қилса ҳам, ўша касалликдан зарар кўраётганни ёки ўлаётганни қутқариб қололмайдилар. Буни ҳамма ҳаётда кўрган. «Талаб қилувчи ҳам, талаб қилинган ҳам ожиз бўлди». Яъни, Аллоҳдан ўзганинг ибодатини талаб қилувчи ҳам, ибодати талаб қилинган нарсалар ҳам ожиздирлар. Бирон нарса қўлларидан келмас.) (Ҳаж сураси, 73-оят).
مَا قَدَرُوا اللَّهَ حَقَّ قَدْرِهِ إِنَّ اللَّهَ لَقَوِيٌّ عَزِيزٌ
“Улар Аллоҳнинг қадрини жойига қўймадилар. Албатта, Аллоҳ кучли ва азиздир. (Яъни, улар ёлғиз Аллоҳнинг Ўзига эътиқод қилишлари, фақат Унгагина ибодат қилишлари лозим эди. Аммо улар Аллоҳнинг қадрини билмадилар, унга ширк келтирдилар, Ундан ўзгаларга топиндилар.)” (Ҳаж сураси, 74-оят).
Бизчи?! Биз мўмин бўла туриб, Аллоҳнинг қадрини жойига қўя оляпмизми?!

www.kaheel7.com сайтидан
Нозимжон Иминжонов таржимаси