muslim.uz
Қориялар мамнун бўлдилар
Мўминлар Қуръони каримни тиловат қилса ёки эшитса; маъносини билса-билмаса, Аллоҳ таолога яқинлик ҳосил қилади. Чунки уни ўқиш ва эшитиш ибодат. Буюк олим Имом Ғаззолий ҳазратлари: “Қуръон бир нурдир, хато қилишдан нажот ва қутилиш фақат у билан мумкиндир, қалбларни бузувчи касалликларга шифо ундадир”, деганлар.
Юртимизда бир неча ойдан бери бўлиб ўтаётган “Ўзбекистон Қуръон мусобақаси-2018” кеча якунланди. Республика босқичига келган қория аёл-қизлар яратилган шароитлардан ғоят миннатдор бўлишди. Мусобақа бошланишидан бир кун олдин пойтахтга етиб келган қорияларни бу ерда Ўзбекистон мусулмонлар идораси ходимлари кутиб олишди. Ундан сўнг махсус автобус қорияларни “Grand way” меҳмонхонасига олиб борди. Улар меҳмонхонадаги шароитларни кўриб роса хурсанд бўлишди. Юқори даражада кўрсатилган хизматлардан қория аёл-қизлар мамнун бўлишди.
Икки кун бўлган Қуръон мусобақасида қорияларни тушликка энг яхши тамаддихонага (ресторанга) олиб боришди. Қориялар тушликдан сўнг намоз ўқишлари учун масжидга олиб борилиб сўнгра яна “Ёшлар иттифоқи” анжуманлар саройига олиб келинди.
Бу каби эътибор ва махсус тузилган ишчи гуруҳ хизматларидан қориялар янада руҳландилар. Улар мутасаддилардан миннатдор бўлиб, узундан-узоқ дуолар қилиб “Бу кунлар умримизнинг эсда қоларли, ширин ва ҳузурли лаҳзалари бўлиб қолади” дейишди.
Қорияларга яна бир кутилмаган ажойиб совға: мусобақадан эсдалик учун альбомлар тақдим этилди.
Нилуфар БОЗОРБОЙ қизи
Фатво ҳайъатига келган саволлар (7-қисм)
Саволларга Ўзбекистон мусулмонлари идораси Фатво ҳайъати жавоб беради.
Савол: Ассалому алайкум! Аллоҳ умрингизни, илмингизни зиёда қилсин! Бир саволим бор эди. Мени турмушга зўрлаб беришган. Онамга мен рози эмаслигимни жуда кўп айтиб, қаршилик кўрсатганман. Онамнинг кўз ёшлари, отамнинг қаттиқ қўлликлари сабабли ҳеч нарса қила олмаганман. Оиламизда доим уруш жанжал, меҳр оқибат йўқ. Мен қўлимдан келганча эримнинг ҳамма одатларига чидаб, меҳр қўйишга ҳаракат қиляпман. Онамдан ҳалигача хафаман. Онам: «бу сенинг тақдиринг» дейдилар. Мен ҳар бир иш олдимизга келтирилади, биз қайси йўлни танласак кейин у бизга тақдир бўлади дейман. Тўғрими? Ислом динини ўрганганимдан кейин никоҳга мажбурлаб бўлмаслигини билдим. Ота-оналар никоҳга зўрлашмасин! Эр-хотин, фарзандлар бундан азобланмасин. Саволим: Домла никоҳ ўқиётганда розилигимни айтганман. Лекин ичимда тинмасдан «эй Худо, ўзинг кўриб турибсан мен қаршиман, норизиман» деганман. Шариатимизда никоҳ овоз чиқариб тасдиқлаш билан кучга кирадими? Қалб,иши ҳисобга олинмайдими? Мени никоҳим борми? Илтимос жавоб берсангиз. Раҳмат!
Жавоб: Ва алайкум ассалом! Сизнинг никоҳингиз бор. Шариатимиз айтилган лафзга эътибор қилади. Ўзингиз ўйланг, сизнинг дилингиздаги норозилик бор эканини никоҳ ўқиган домла қаердан билади? Ота-она мажбурлашга ҳақи йўқлиги маълум. Лекин никоҳ бўлгач, сиз домлага розиман, деганингиздан сўнг никоҳ боғланади.
Савол: Ассалому алайкум, мен намоз ўқишни бошламоқчи эдим лекин таҳорат олаётганда масҳ тортиш керак. Менинг эса бошим шамоллаган масҳ тортсам хўл бўлса бошим оғрийди нима қилишим керак? Жавоб учун олдиндан раҳмат.
Жавоб: Ва алайкум ассалом! Масҳни қўлнинг намлиги билан бажарилади. Бу эса бошни ҳўл қилиб юбормайди. Аллоҳ шифо берсин!
Савол: Ассалому алайкум, мен 25 ёшдаман 2 нафар фарзандим бор. Катта қизим 5 ёш боғчага боради, ўғлим икки ярим ёш, мен билан уйда. Қайнонам ўтган йили октябрь ойида оёғлари сингани учун гипс қилишди. Бу йили февраль ойида кўкрак саратонига чалинганлари учун операция қилишди, кейин 1 марта кимё терапия олдилар. Қайнотам билан эримнинг ишлари яхши юришмаяпти, қайнисинглим ҳам 23 ёшда ҳеч бахти очилмаяпти. Кейин мен 5 маҳал намоз ўқишни бошладим. 4 кун ўқидим. Намозимнинг 5-кунига ойижонни 2чи маротаба кимё терапияни олгани оборишди. У ердан дўконга чиқаётган пайтларида машина йўлда йиқилиб чап қўлларини синдирдилар. Гипс қилишди. Ҳозир уйдалар. Қайнотам билан эримнинг топган пуллари дорига кетмоқда. Нима қилсак бўлади. Тўғрисини айтсам ҳамма нарсага улгуришга чарчаб қоляпман, 5 маҳал намоз ўрнига фақат бомдодни ўқисам бўладими? Олдиндан Раҳмат
Жавоб: Ва алайкум ассалом! Беш вақт намозни ўз вақтида ўқиш ҳар бир мусулмон эркак ва аёлнинг зиммасидаги фарзи айндир. Бир вақтга ўтманг, беш вақтда давом этинг. Қолаверса, намоз иш юришмай қолганда эмас, доим ўқилиши керак. Ишнинг ривожишни фақат Аллоҳдан сўраш керак.
"Илмул яқийн", "Айнул яқийн" ва "Ҳаққул яқийн" ҳақида
"Бизда дўзах ҳақида илмул яқийн бор. Бу дўзах ҳақидаги илм бўлиб, Қуръондаги дўзах ҳақида келган маълумотлардир. Бу Роббимизнинг бизга дўзах ҳақида билдирган илмидир. “Албатта, дўзахнинг сифатлари мана бундай, мана бундай” деб, бизни дўзахдан огоҳлантирган. Биз шу дунёнинг фаровон ҳаётида яшаб турганимизда, Аллоҳ бизга дўзахни танитиб, ундан эҳтиёт бўлишга чақирган ва эҳтиёт бўлиш йўлларини кўрсатган.
Айнул яқийн эса, охиратда, Сирот устидан ўтаётганимизда, остимиздаги дўзахни кўрганда бўлади. Ўшанда дўзахни кўзимиз билан кўрамиз. Ҳаққул яқийн эса, фақат кофирларга бўлади. Ўша Кунда кофирлар дўзахга ташланадилар ва азобни бошларидан кечирадилар. Мана шу ҳаққул яқийндир.
Бунинг учун бир мисол келтирамиз: агар мен сизга “Нью Йорк деган шаҳар бор. У ерда осмонўпар бинолар бор. У шаҳарнинг сифати фалон, фалон” десам, сизга рост илмий суратини баён қилган бўламан. Агар сиз ушбу гапларимни тасдиқласангиз, сизда ўша шаҳар ҳақида илмул яқийн ҳосил бўлади. Агар биз ўша шаҳарнинг устидан самолётда учиб ўтсак ва уни ўз кўзимиз билан кўрсак, бу кўриш айнул яқийн бўлади. Агар сиз ўша шаҳарга тушиб, у ерда яшаб, кўчаларини айланиб юрсангиз, бу ҳаққул яқийн бўлади".
Шайх Муҳаммад Мутаваллий Шаъровий раҳимаҳуллоҳнинг тафсирларидан Нозимжон Иминжонов таржимаси
Диний идора вакилликларининг ўзаро ҳамкорлиги бошланди
25 апрель куни Диний идорада видеоконференция ташкил этилгани ҳақида хабар берган эдик.
Ушбу видео анжуманда ҳудудий вакилликлар ўртасида ўзаро ҳамкорликни йўлга қўйиш вазифаси топширилди. Ушбу кўрсатма ижросини таъминлаш мақсадида, Ўзбекистон мусулмонлари идорасининг Самарқанд вилояти вакиллиги томонидан амалий ишлар бошлаб юборилди.
Бугунги кунда Самарқанд вилоятида фаолият юритаётган бир гуруҳ имом-хатиблар тажриба алмашиш мақсадида, Фарғона, Андижон, Наманган вилоятларига хизмат сафарига чиқдилар.
Самарқанд вилоятининг Булунғур, Пастдарғом, Тайлоқ туманлари бош имом-хатиблари ва Самарқанд шаҳридаги "Оби Раҳмат" жоме масжиди имом-хатиби мазкур вилоятларида бўлиб, имом-хатибларнинг касб маҳорати, илмий савияларини мунтазам ошириб бориш ва масжид ҳужжатларини юритиш бўйича ўзаро тажрибаларини алмашмоқдалар.
Зайниддин Эшонқулов, Самарқанд вилояти бош имом-хатиби
Нега мусулмонлар Грузияга саёҳатга боради?
Global Muslim Travel Index-2018 рейтингида Грузия Республикаси 130 мамлакат ичида 61 ўринда қайд этилди. Бироқ рейтингда айтилишича Грузия 2020 йилга бориб мусулмон сайёҳлар энг кўп ташриф буюрувчи мусулмон бўлмаган мамлакатлар ўнталигига киради.
Бу эса мамлакат иқтисодиётига миллионларни келтиради. Грузияга кўп ҳолларда қўшни бўлган мамлакатлардан сайёҳлар ташриф буюради. Бунда биринчи ўринда озарбайжонликлар бўлиб, ташриф буюрувчилар сони 354 мингни ташкил этади. Бу рақам 2018 йилнинг биринчи чорагида олинган маълумотлардир.
Иккинчи ўринда Туркия (287,9 минг нафар), кейинги ўринларда Эрон (91 минг нафар), Қозоғистон (8,7 минг нафар), Саудия Арабистони (3,4 минг нафар), Қувайт (2,3 минг нафар), БАА, Туркманистон, Покистон ва Миср фуқаролари ташриф буюради.
Ташриф буюрувчиларнинг кўплигига виза тизимининг соддалиги, тўғридан тўғри рейсларнинг кўплиги, қуёшли мавсумда Грузия тоғларида дам олишнинг қулайлиги сабаб сифатида келтириб ўтилади.
Бугунги кунда Грузида 200 га яқин масжидлар фаолият юритади. Уларнинг 50дан ортиғи Квемо Картли минтақаси ва 120 дан ортиғи Аджария минтақасида жойлашган. Мамлакат пойтахти тбилисида ҳам кўплаб масжидларнинг борлиги мусулмон сайёҳлар учун қулайлик яратади.
Грузияда ҳалол ресторанлар тармоғи мавжуд, бироқ ҳалол меҳмонхоналарни яратиш борасида иш олиб борилмоқда. Оилавий ташрифлар учун алоҳида виллаларнинг мавжудлиги меҳмонхоналар билан боғлиқ муаммони бироз енгиллаштиради.
ЎМИ Матбуот хизмати
Янгиликлар
