Индонезия дин вазирлиги Саудия ҳукуматидан 100 тонна хурмо ва 10 000 нусха Қуръон олди, дея хабар берди Kompas нашри.

Islam.ru маълумотларига кўра, ҳадя қилинган хурмолар жамоат ташкилотлари, масжидлар ва намозхонларга тарқатилади.

Эслатиб ўтамиз, Индонезия энг кўп мусулмон бўлган мамлакат сифатида Саудия Арабистони билан жуда яқин алоқаларга эга.

Ўзбекистон мусулмонлари идораси матбуот хизмати

Маданият деганда халқимиз азал азалдан эъзозлаб, авайлаб келаётган миллий ва диний қадриятларимиз бевосита хаёлимизга келади. Эркакларимизнинг мардлиги, оиласига содиқлиги, оиласи, ватани, дину диёнати учун жон жахди билан курашишлиги, муштипар аёлларимизнинг ўз одоб-ахлоқлари, ҳаёлари оиласи ва фарзандлари учун жон куйдирганликлари натижасида дунёни лол қолдирган буюк бобокалонларимиз дунёга келганларини тарихдан яхши биламиз.

    Демак, маданиятли, одобу ахлоқли, дину диёнатли оилада дунёга келган фарзанд, албатта у ҳам ҳудди ота-онаси каби одобли бўлиб тарбия топади.

Энди биз айтаётган ёки жон куйдириб, салбий оқибатларга етакловчи, халқимиз маънавиятига мутлақо тўғри келмайдиган “оммавий маданият” ҳақида тўхталиб ўтмқчимиз.

 “Оммавий маданият” ўз маъносида эмас, балки кўчма маънода ишлатилмоқда. Чунки у қўштирноққа олинган. Бу тушунча ҳақида кўплаб олимларимиз таъриф  беришади.

 «Оммавий маданият» туб моҳиятига кўра миллий маданиятларнинг кушандасидир.

«Оммавий  маданият» тарғиботи энг аввало исломий қадрият, ахлоқимизни ғарб турмуш тарзи, шахс эркинлиги, демократия ниқоби доирасида талқин қилинадиган ахлоқ (тўғрироғи ахлоқсизлик) билан алмаштиришдир.

  “Оммавий маданият” асосан замонамиз вакилларининг янги-янги “мода”лари асосида бойиб боради. Гўёки ким ўша “мода”га амал қилса, у маданиятли деб топилади. Ҳамма оммавий равишда ана шу мода асосида яшаши керак бўлади. Акс ҳолда у замондан орқада қолган – маданиятсиз деб ҳисобланади. Чунки у бугуннинг модасини билмайди. Шундан келиб чиққан ҳолда айтиш мумкинки, “оммавий маданият” бу – оммавий “мода” ният, яъни янгича модани ният қилиш, кимгадир тақлид қилиш, унга эришиш ва уни оммавийлаштириш демакдир.

Демак “оммавий маданият” айнан маданият эмас, балки маданият кушандаси, инсонни инсон қиёфасидан чиқарадиган бир кушандадир.

        Муқаддас динимиз чиройли хулқ ва гўзал одобга чақиради, зеро сукли пайғамбаримиз Муҳаммад соллоллоҳу алайҳи васаллам инсонларнинг энг гўзал хулқлиси бўлганлар ва умматларини шундай бўлишга чақирганлар.

Расулуллоҳ соллаллоҳу алайҳи васалламдан “Қайси мўминнинг имони комил ҳисобланади”, деб сўрашганида: “Гўзал хулқли мўминнинг”, деб жавоб берганлар (Имом Абу Довуд ривояти).

Расулуллоҳ соллаллоҳу алайҳи васалламдан сўрашди: Бадбахтлик нима, ё Расулуллоҳ?— Ёмон хулқ! Дедилар. (Имом Аҳмад ривояти).

Динимиз, миллатимизга мутлақо ёт бўлган бу каби маънавий, ахлоқий-бузуқлик, тубанлик, зўровонлик иллатларини ўз ичига олган “оммавий маданият” ёпирилиб кириб келишлиги мумкинлигидан огоҳ бўлиш ҳар биримизни бурчимиздир. Лекин эътироф этиш керакки, “оммавий маданият” турмушимизга чет элдан келтирилаётган товарларнинг пардоз, ёрлиқ қоғозларидаги расмларида сўнгги модадаги либослар, фильм, интернет тармоқлари орқали билимсиз ҳолда кириб келмоқда ва мазкур «маданият»нинг хуружини ҳали ҳамма бирдек англаб етаётгани йўқ. Аччиқ ҳақиқат бўлса ҳам шуни тан олиш керакки, баъзи ёшларимиз орасидаги ғарбга маҳлиё бўлиш, ўз миллийлигидан бегоналашиш ҳислатлари шубҳасиз, “оммавий маданият”нинг таъсири натижасидир.

Яна шуни таъкидлаш жоизки, хозирги кунда ғарб мамлакатларидан кириб келаётган жуда хам нафратланадиган одатлар, танасига ҳар хил расмларни чиздириш, аянчлиси, хозирда бу холат қизлар орасида ҳам жуда кенг авж олмоқда. Энг ачинарлиси, иккита бир хил жинсли инсонларнинг турмуш қуриши, ўз жинсини ўзгартириш каби холатлар шулар жумласидандир. Ваҳоланки Аллоҳ таъоло ўзининг каломида шундай дейди:

 “Унинг аломатларидан (яна бири) – сизлар (нафсни қондириш жиҳатидан) таскин топишингиз учун ўзларингиздан жуфтлар яратгани ва ўртангизда иноқлик ва меҳрибонлик пайдо қилганидир. Албатта, бунда тафаккур қиладиган кишилар учун аломатлар бордир”( ”Рум” сураси, 21-оят).

Демак Аллох барча махлуқотларини ўз жинсидан бўлган жуфти билан яратган экан. Тарихдан жуда яхши биламизки, айнан ана ўша бир хил жинслик инсонларни бир бирлари билан алоқада бўлишлиги яна хам аниқроқ айтадиган бўлсак, бесоқолбозлик, лўттибозлик қилганликлари учун Лут алайҳиссаломнинг қавмига Аллоҳ томонидан қаттиқ бало юборилган.

Ундан ташқари, хозирги баъзи ёшларимизни кияётган кийимини кўриб уялиб кетасан киши. Эмишки, бу хозирги мода. Энди модани хам чегараси маданияти менталитети бўлади, ахир. Айтингларчи, тор шим кийиб тизза ва сонларини йиртиб олиб мода деса ёки киндигини кўрсатиб калта кўйлклар, калта юбкалар кийиб олсалар, қулоқларига қаторлатиб сирға ва бурун- қошларига халқалар тақиб олишса, буни хам маданиятда деб, бепарво қараб ўтирамизми?

        Демак хар бир ота-она, хар бир мен мусулмонман деган инсон, ўз фарзандларини одоб ахлоқига, тарбиясига эътибор бериб, ана шундай ёмон иллатли оқимлар, гурухлар ва секталарга қўшилиб қолишини олдини олиш лозим.

Муроджон МИРСОАТОВ,

Сирдарё тумани "Аҳмад Яссавий" жоме масжиди имом-хатиби

Озарбайжонлик 3 ёшли Собир Агавердиев Қуръон ўқиб интернетда оммалашмоқда. У бунгача ҳам кишиларни ажаблантирган. Икки ёшида Озарбайжон алифбосини ўрганган.

"Бир ёшдан ошганда ётишдан олдин унга ўқиб берган болалар шеърларини ёддан ўқий бошлади. Мен у билан ўқишни давом эттирдим ва қизиқиш учун Қуръондан бир парчани ўқишга қарор қилдим. Собир уни ярим соатдан кейин хотира бўйича қайта сўзлаб берди", - деди Собирнинг отаси Жобир Агавердиев.

Islam.ru маълумотларига кўра, кичкина вундеркинд Озарбайжон шоирлари шеърлари, хорижий сўзларни ўрганади ва юзгача рақамларни санашни билади.

Собир географияни осон ўрганади ва хариталар билан ишлайди. Тезда дарёлар, тоғлар, темир йўллар ва гидроэлектростанцияларни топиб беради.

Ота-оналар боланинг ҳар куни янги нарсаларни ўрганиш истаги борлиги учун ҳамма нарсани қилишга ҳаракат қилишади.

Ўзбекистон мусулмонлари идораси матбуот хизмати

Бир ҳолат бор. Бу ҳолат инсонни юксакларга кўтаради, мартабасини улуғ қилади. Бундай ҳолат ҳатто жаннатда ҳам бўлмас экан. Бу кишининг сажда ҳолатидир. Инсон ўзини ҳақир санаб, муборак пешонасини ерга қўйиб, Буюк Раббисига шивирлаб тасбеҳ айтади. Мана шу шивирни Аллоҳ таоло етти қават осмоннинг устидан эшитади.

Бу ҳолат масжидларда тааллуқли. Зотан, “масжид” сўзининг маъноси ҳам сажда қиланидиган жойдир. Масжид мўмин-мусулмонлар Аллоҳ таолога ибодат қиладиган жойдир. Шу боис масжид “Байтуллоҳ”, яъни, Аллоҳнинг уйи дейилади. Шу нуқтаи назардан масжидларнинг бошқа иншоотларга нисбатан ўзига хос ҳурмати бор.

Масжид ибодат қилувчилар билан ободдир. Жамоатнинг кўплиги масжиднинг ободлигига далолат қилади. Аллоҳ таоло Қуръони каримда: «Аллоҳнинг масжидларини фақат Аллоҳга ва охират кунига имон келтирган, намозни баркамол ўқиган, закот берган ва фақат Аллоҳдангина қўрққан кишилар обод қилурлар. Айнан ўшалар ҳидоят топувчилардан бўлишлари мумкин» (Тавба сураси, 18-оят), деб марҳамат қилади.

Уламолар масжиднинг ободлигини икки турга ажратишган. Биринчиси, ҳиссий, яъни, жомени қуриш, тузатиш, тозалаш, таъмирлаш, вайрон этишдан сақлаб қолишдир. Иккинчиси эса, маънавий бўлиб, унда намоз ўқиш, зикрда бўлиш, дуо қилиш, улуғлаш ва ибодат учун масжидга қатнашдан иборат.

Ҳадиси шарифларда ҳам масжидларни обод қилган, қурган мўмин-мусулмонларга улуғ ваъдалар бор. Жумладан, Имом Бухорий бобомиз ривоят қилган ҳадисда Набий алайҳиссалом: “Ким Аллоҳ таоло розилигини истаб, масжид барпо этса, Аллоҳ таоло унга жаннатдан қаср қуради”, деб марҳамат қилганлар.

Аллоҳ таолога беадад шукрлар бўлсин, сўнгги йилларда юртимизда масжидлар сони тобора кўпайиб, жомеларимиз обод, файзли ва шинам масканларга айланиб боряпти. Айниқса, жума ва икки ҳайит намозлари ҳамда таровеҳларда масжидларимизга одамлар сиғмай кетяпти.

Айни пайтда республика бўйича жами масжидлар сони 2085 та бўлса, Тошкент вилоятида 225 та жоме ишлаб турибди. Бу маъволарга кирган киши руҳан тетик ва бардам бўлади. Жомеда ибодат қилганларнинг савоби якка ҳолда намоз ўқиган кишига бериладиган ажрдан йигирма етти баробар кўпдир (Имом Бухорий ривояти).

Бугун нафақат масжидларимиз обод бўлмоқда, шу билан бирга, жомеларда ибодат қилаётган мўмин-мусулмонлар сафи ҳам кенгайиб боряпти. Табиийки, Рамазон ойи ҳамда Қурбон ҳайити йилнинг турли мавсумларига тўғри келиши мумкин. Яъни баъзан саратонда рўза тутиб, таровеҳларни ўқисак, баъзан қаҳратонда жомеларга қатнаймиз.

Бундай ҳолларда эски лойиҳада қурилган масжидларимиз намозхонларга торлик қилиб қолади. Шуни инобатга олиб ҳамда Тошкент вилоятида яшовчи мўмин-мусулмонларнинг таклиф ва тавсиялари асосида 2021 йилда вилоятимиздаги тўққизта жоме масжид қайта қурилади.

Хусусан, Бўка туманидаги “Чимилдиқ ота”, Бўстонлиқ туманидаги “Хўжахонтўра”, Занги ота туманидаги “Умир”, Қибрай туманидаги “Зайниддин ҳожи ота”, Паркент туманидаги “Бобомочин” ва “Ҳисарак”, Юқори Чирчиқ туманидаги “Абу Ҳанифа”, Янгийўл туманидаги “Икром ҳожи” жоме масжидлари тўлиқ қайта қурилади. Тошкент туманидаги “Зиннурайн” жоме масжидига қўшимча хонақоҳ ва таҳоратхона барпо этилади.

Бир йилда тўққизта масжидимиз бутунлай янгича қиёфа касб этиши тобора тараққий этиб, чирой очиб бораёттган жаннатмонанд юртимизга узукка қўйилган кўздек ярашиб тушади, иншоаллоҳ.

Энг муҳими, бугун юртдошларимиз Аллоҳнинг уйини обод этишдек хайрли ишларда бир-бирлари билан мусобақалашаётгандек, гўё. Чунки масжидни обод қилиш мўминлик белгисидир.

Абу Саид  розияллоҳу анҳудан ривоят қилинади: «Набий соллаллоҳу алайҳи ва саллам айтганлар: “Aгaр бирoр киши мaсжидни  тaъмирлaётгaнини кўрcaнгиз, унинг мўминлигигa гувoҳ бўлинг. Чунки Аллоҳ таоло: “Аллоҳга ва охират кунига имон келтирган, намозни баркамол ўқиган, закот берган ва фақат Аллоҳдангина қўрққан кишилар обод қилурлар”, деб марҳамат қилган, деганлар» (Имом Термизий ривояти).

Аллоҳ таоло Ўз уйларини – масжидларни ибодат маскани, ҳидоят маёғи, илм сарчашмаси қилгани бежиз эмас. Чунончи, бу илоҳий бахтни қўлга киритиш илинжида мўмин-мусулмонлар туну кун унга ошиқадилар. У ердан маънавий юксалиб, қалбан покланиб, руҳан тетиклашиб чиқилади. Масжидлар илоҳий нурнинг марказилар.

Расули акрам соллаллоҳу алайҳи ва саллам қиёмат куни Аллоҳ таоло Аршининг соясидан етти тоифа инсонга жой берилишини айта туриб. Учинччи ўринда “қалби масжидга боғланган киши”ни ҳам зикр қилганлар (Имом Бухорий ривояти).

Жаннатда ўзи учун алоҳида қаср бўлишини хоҳламаган одам бўлмаса керак. Бундай имконият бугун бор. Бу имкониятдан барчамиз имконимиз қадар фойдаланиб қолишимиз керак. У ҳам бўлса, янгидан барпо этилаётган масжидлар қурилишига ўз ҳиссамизни қўшишдир.

Азизлар, вақтни бой бермай, Аллоҳнинг уйларини обод қилайлик!

Жасурбек РАУПОВ,

Тошкент вилояти бош имом-хатиби

Транспорт вазирлиги делегациясининг Покистонга ташрифи давомида ушбу мамлакат федерал авиация вазири Ғулом Сарвар Хон билан музокара ўтказди. Унда икки мамлакат ўртасида мунтазам авиақатновларни қайта тиклаш, фуқаро авиацияси соҳасидаги ўзаро манфаатли ҳамкорлик алоқаларини ривожлантириш масалалари муҳокама этилди, деб хабар бермоқда «Дунё» АА вазирлик манбасига асосланиб.

Учрашувда Покистон авиакомпаниялари ҳаво кемаларига аэропортларда ер усти хизматлари кўрсатишнинг асосий турлари бўйича эълон қилинган тарифларга нисбатан 30 фоизгача табақалаштирилган чегирмалар берилиши, зиёрат туризми йўналишида бажарилаётган парвозларга эса 50 фоизга қадар чегирмалар тақдим этиш, шунингдек, Покистон авиакомпанияларига қулай бўлган слотлар берилиши маълум қилинди.

Ўзбекистон делегацияси ташриф давомида Покистон Вазирлар Маҳкамаси ҳузуридаги Авиация бошқармаси бош котиби Шавкат Алихон, Фуқаро авиацияси департаментининг авиация вице-маршали Муҳаммад Жамол Аршад ва «PIA» авиакомпанияси вакиллари билан учрашувлар ўтказди.

Музокараларда «Uzbekistan Airways» ва «PIA» авиакомпаниялари ўртасида турли йўналишдаги келишувларни биргаликда ишлаб чиқишни жадаллаштириш ҳақида келишиб олинди.

Эслатиб ўтамиз, COVID-19 пандемиясига қадар «Uzbekistan Airways» авиакомпанияси «Тошкент-Лаҳор-Тошкент» йўналишида ҳафтасига икки маротаба қатновни мунтазам амалга ошириб келаётган эди.

Ўзбекистон мусулмонлари идораси матбуот хизмати