muslim.uz
Қирғизистонда миллий бош кийимни ҳақорат қилганлар жаримага тортилади
Қирғизистон Республикасида миллий бош кийим ҳисобланган - Оқ қалпоқни ҳақорат қилганлар жаримага тортилиши ҳақида маълум қилинди. Бу ҳақда Қирғиз парламенти депутатлари ушбу миллий кийимга Республиканинг миллий рамзи статусини бериш борасида таклиф киритдилар.
islam-today.ru нашрининг хабар беришича, ушбу таклиф бугунги кунда муҳокамага киритилган. "Оқ қалпоқ миллий бош кийимига миллий рамз статусини бериш тўғрисида"ги қонун лойиҳасига парламент сессиясининг биринчи ўқувида қабул қилинган.
Яқин кунларда қонун қабул қилиниши кутилмоқда. Қонун билан Оқ қалпоқни миллий белги сифатида ҳурмат қилишга чақириш, миллий белгини ҳимоя қилиш кўзда тутилган.
Миллий рамзни ҳақоратлаган, унга нисбатан ҳурматсизлик кўрсатганлар учун жарима қўллаш кўзда тутилмоқда. Маълумот учун, жисмоний шахслар учун 1000 сом (15 АҚШ доллари) ва юридик шахслар учун 5000 сом (72 АҚШ доллари) миқдорида жарима кўзда тутилмоқда.
Ўзбекистон мусулмонлар идораси Матбуот хизмати
Шуларни бир ўқиб кўринг!
Агар намозингда шошилсанг, ёдингда тут, сен етишга интилаётганинг ва йўқотишдан қўрқаётганинг барча нарса – сен ҳузурида турган Зотнинг қўлидадир.
*****
Бир киши олимнинг ёнига келиб: “Фалончи сизни сўкди” деди. Шунда олим: “Ўша одамнинг менга отган ўқи тегмаган экан. Нега сен ўша ўқни олиб келиб, қалбимга санчяпсан?!” деди. Душманинг фақат сен ҳақингда гапирган кимса эмас, балки ўша гапни сенга олиб келган кимса ҳамдир.
*****
Ҳаёт супермаркетга ўхшайди. Ичига кириб, айланиб, ўзингга ёққан турли нарсаларни сотиб оласан. Амма унутма! Олдинда касса бор. Олган ҳамма нарсангнинг ҳаққини у ерда тўлайсан.
*****
Садоқат китобга ўхшайди. Ёзиш учун бир неча йил вақт кетади. Ёқиш учун эса бир неча сониялар.
*****
Чироқ қанча баландга кўтарилса, унинг ёритадиган майдони шунча катта бўлади. Сен ҳам Динга амал қилишинг, ахлоқинг, фикрлашинг, имкониятларинг билан юксал. Токи одамларга берадиган нарсаларинг ва ҳаётдаги ижобий таъсир доиранг кенгайсин.
*****
Безовталик тебранма стулга ўхшайди. Сени доим ҳаракатлантириб туради, аммо ҳеч қаерга олиб бормайди.
*****
Кўзойнагинг қайсидир фирманики.
Соатинг ҳам таниқли фирманинг маҳсулоти.
Поябзалинг ҳам довруғи кетган фирмага тегишли.
Шахсиятинг ҳам қайсидир спротчи, қўшиқчи ёки актёрга тақлиддан иборат.
*****
Ўрни келганда хатоларини ўчириб, унинг ўрнига яхши ёзув ёзиши учун инсон бу ҳаётда қаламдек бўлиши керак. Ана шунда қалам тугаса, яъни вафот этасангиз, ортингизда Аллоҳ рози бўладиган гўзал ёзувлар (солиҳ амаллар) қолади.
*****
Фейсбукдаги “Ҳаётнинг нариги юзи” саҳифасидан
Нозимжон Иминжонов таржимаси
Ўзбекистон Қозон шаҳридаги RUSSIA HALAL EXPO кўргазмасида иштирок этади
24-25 апрель кунлари Қозон шаҳрида ҳар йиллик RUSSIA HALAL EXPO халқаро ҳалол индустрия кўргазмаси ўтказилади.
Кўргазмада Россиядан ташқари ўз маҳсулотларини Ўзбекистон, БАА, Саудия Арабистони, Эрон, Туркия, Индонезия, Баҳрайн, Малайзия, Ўмон, Миср, Жанубий Корея, Канада, Буюк Британия, Франция, Қозоғистон, Қирғизистон, Озарбайжон, Белоруссиянинг ҳалол маҳсулот ишлаб чиқарувчи компаниялари иштирок этишади.
Бу йил кўргазма майдони ўтган йилгига қараганда 3,5 баробар ошиб, 5 минг кв.м.ни ташкил этади.
Кўргазмага 5 мингдан ортиқ одамлар ташриф буюриши кутилмоқда.
Ўзбекистон мусулмонлар идораси Матбуот хизмати
Қадр-қиммат
Ўн йилнинг қадрини яқинда ажрашган эр-хотиндан сўранг.
Тўрт йилнинг қадрини университетни яқинда битирган йигитдан сўранг.
Бир йилнинг қадрини якуний имтиҳонда йиқилган талабадан сўранг.
Бир ойнинг қадрини боласини муддатидан бир ой олдин дунёга келтирган онадан сўранг.
Бир ҳафтанинг қадрини ҳафталик газета муҳарриридан сўранг.
Бир дақиқа қадрини вокзал ёки аэропортга бир дақиқа кеч келиб, поезд, автобус ёки самолётга улгура олмаган йўловчидан сўранг.
Бир сониянинг қадрини фалокатдан қутулиб қолган кишидан сўранг.
Сониянинг бир бўлаги қадрини олимпиада ўйинларида кумуш медал соҳиби бўлган кишидан сўранг. (Кўпинча олтин медал олган билан кумуш медал олган спортчининг маррага етиб келишида сониянинг бир неча улушларида фарқ бўлади)
Опа-сингилнинг қадрини опа-синглиси йўқ кишидан сўранг.
Ҳаёт, яшаш қадрини ўлим тўшагида ётган кишидан сўранг.
Аллоҳни зикр қилишнинг қийматини, қадрини билмоқчи бўлсангиз, ўлинг ва умрингизнинг қанча қисмини ғафлатда ўтказиб юборганингизга қаранг.
Фейсбукдаги “Ҳаётнинг нариги юзи” саҳифасидан
Нозимжон Иминжонов таржимаси
Қадимий Ахсикент ёдгорлиги туризм манзилига айлантирилади
Президент Шавкат Мирзиёев Тўрақўрғон туманидаги Ахсикент археологик ёдгорлик мажмуасини бориб кўрди. Бу ҳақда Президент матбуот хизмати хабар берди.
Ахсикент эрамиздан аввалги III асрда ташкил топган бўлиб, қадимги Фарғона давлатининг пойтахти, Буюк ипак йўлининг асосий шаҳарларидан бири бўлган. Тарихий манбаларда, хусусан, «Бобурнома»да бу кентнинг алоҳида аҳамияти ҳақида кўп ёзилган. Қадимдан бу ерда ер ости сув иншооти бўлгани боис мудофаа учун қулай саналган.
Шаҳар Арк, ички ва ташқи шаҳардан иборат бўлган. Бу ерда ўз даврида шишасозлик, кулолчилик, темирчилик, қуролсозлик каби ҳунармандлик турлари ривожланган. 1620 йилга келиб зилзила оқибатида улкан шаҳар вайрон бўлган.
Бугунги кунда харобаларнинг 60 гектарга яқин қисми сақланиб қолган бўлиб, Фарғона водийсидаги энг катта археологик ёдгорликдир. Археологлар томонидан темирчилар устахонаси, X-XIII асрларга оид ҳаммом қолдиқлари, аскарлар хоналари, жомеъ масжиди, мудофаа деворлари, ер ости ирригация тармоқлари, ҳунармандлар маҳалласи, ҳукмдор қароргоҳи – Арк қазиб ўрганилган.
Президент топшириғига мувофиқ 2017 йилда Ахсикент тарихий ёдгорлигини асраб-авайлаш ва тадқиқ этиш, унинг ҳаққоний тарихини яратиш бўйича улкан ишлар бошланди. «Ахсикент» археология мероси объектини муҳофаза қилиш ва тадқиқ этиш дирекцияси» давлат унитар корхонаси ташкил этилди.
Мазкур ёдгорлик Наманган вилоятининг сайёҳлик салоҳиятини оширишда муҳим аҳамиятга эга. Юртимиз ва хориждаги сайёҳлик кўргазмаларида қадимий Ахсикент ҳақида ҳам тақдимотлар ўтказилмоқда. Бунинг самарасида маҳаллий ва хорижий сайёҳлар ўртасида тарихий ёдгорликка қизиқиш ортмоқда. Ҳозирга қадар Бельгия, Австрия, Япония, Жанубий Корея, Россия, Эрон, Покистон, Ҳиндистон каби давлатлардан сайёҳлар ташриф буюрган. Қадамжони тадқиқ этиш, унинг жозибадорлигини ва сайёҳлар оқимини ошириш мақсадида махсус концепция ишлаб чиқилган. Айни кунда шу асосда Фарғона водийсида ички туризмни ривожлантириш чоралари кўрилмоқда.
Президентга Ахсикент мажмуа бош режаси, унинг тадқиқот олиб борилган объектлари, ҳудудда барпо этиладиган туристик мажмуа лойиҳаси ҳақида маълумот берилди.
Унга кўра, бу ерда музей ташкил этилади. Ахсикентнинг қадимий довруғини тиклаш мақсадида рамзий дарвоза қурилади. Умаршайх Мирзо ва Бобурнинг Камолиддин Беҳзод чизган суратлари асосида уларнинг ҳайкали бунёд этилади. Сайёҳлар учун Сирдарё бўйлаб қайиқларда сайр қилиш, туяда кўҳна шаҳарни томоша қилиш имконияти яратилади.
Бир сўз билан айтганда, зарур инфратузилма, савдо ва хизмат кўрсатиш объектлари қурилиб, Ахсикент туризм манзилига айлантирилади.
Давлат раҳбари Ахсикент тарихини илмий асосланган ҳолда чуқур ўрганиш, аждодларимизнинг асл ўтмиши ҳақида маълумотларни тўплаш ва ёш авлодга сингдириш бўйича тизимли ишларни олиб бориш кераклигини таъкидлади.
Ўзбекистон мусулмонлар идораси Матбуот хизмати
Мақолалар
