Ислом ҳамкорлик ташкилотининг Таълим, фан ва маданият масалалари бўйича Халқаро ислом ташкилоти – ISESCO бош директори доктор Салим бин Муҳаммад ал-Малик ва Марокаш Қироллигидаги Ёшлар, маданият ва коммуникация ишлари вазири Муҳаммад ал-Маҳди Бинсаид ISESCO нинг ислом дунёси маданий пойтахтлари дастури доирасида 2022 йили араб минтақасидан Марокаш пойтахти Работ шаҳрига ислом маданий пойтахти мақоми берилгани муносабати билан келгусида амалга ошириладиган чора-тадбирлар тўғрисида суҳбат олиб борди.

Вазирликнинг Работдаги қароргоҳида бўлиб ўтган йиғилишда 2022 йилда ушбу муносабат билан тантанали халқаро анжуманни ташкиллаштириш масалалари бўйича ўзаро фикр алмашилди.

Мазкур анжуманга ҳозирлик кўриш мақсадида шу йил 22 ноябрида ўтказилаётган йиғилишда Марокаш ҳукуматидаги барча вазирлик секторлари вакиллари ва Таълим, фан ва маданият масалалари бўйича Халқаро ислом ташкилоти – ISESCO вакиллари қатнашади.

Учрашувда Марокаш Қироллигидаги маданият вазирлиги томонидан энг йирик маданий тадбирлардан бири ҳисобланган китоб ва нашр ишларига оид халқаро кўргазмани Работ шаҳрида ўтказиш таклифи муҳокама қилинди. Шунингдек, томонлар ISESCO халқаро ислом ташкилоти томони билан Марокаш Қироллиги Ёшлар, маданият ва коммуникациялар вазирлиги билан ҳамкорликда амалга ошириладиган маданият ва меросга оид қатор лойиҳалар, халқаро ташкилот ва вазирлик ҳамкорлигида бир неча маданий тадбирларни ўтказиш масалалари тўғрисида ҳам келишиб олинди.

ЎМИ Халқаро алоқалар бўлими

Абдусамад домла ЖЎРАҚУЛОВ

Тошкент тумани "Ҳамд" жоме масжиди имом-хатиби 

Кун тарихи

18 ноябрь – Ўзбекистон Республикасининг “Давлат байроғи тўғрисида”ги қонуни қабул қилинган кун.

Бугун давлатимиз суверенитетининг рамзларидан бири – мустақил Ўзбекистон Республикасининг “Давлат байроғи тўғрисида”ги қонуни қабул қилинганлигига 30 йил тўлди. Ўзбекистон Республикаси Олий Кенгашининг 1991 йил 18 ноябрдаги навбатдан ташқари VII сессиясида тасдиқланган Давлат байроғи – мамлакат давлат суверенитетининг рамзи ҳисобланиб, у ер юзининг шу сарҳадларида мустақил Ўзбекистон давлати борлигини англатади ва ўзида миллий-маданий анъаналаримизни мужассамлаштиради.

Ўзбекистон Республикасининг Давлат байроғи халқаро майдонда, жумладан, Ўзбекистон Республикаси расмий делегацияларининг хорижий мамлакатларга сафарлари чоғида, халқаро ташкилотларда, конференцияларда, жаҳон кўргазмаларида, спорт мусобақаларида Ўзбекистон Республикасининг тимсоли бўлади.

Байроғимиз ўзида бутун Ўзбекистон халқининг асрий орзу-истаклари, ғайрати ва шижоатини, халқимизга хос меҳмондўстликни мужассам этган. Миллий байроғимизнинг давлат идора ва муассасалари, ўқув юртлари, Ўзбекистон аъзо бўлган халқаро ташкилотлар, чет эллардаги элчихона ва доимий ваколатхоналаримиз пештоқида ҳилпираб туриши, турли байрам ва тантаналарда, мамлакатимиз вакиллари қатнашаётган халқаро миқёсдаги сиёсий, маданий-маърифий тадбирларда, нуфузли спорт мусобақаларида Ватанимизнинг шаъни, халқимизнинг ғурурини ёрқин акс эттириши барчамизга ифтихор бахш этади. Масалан, халқаро спорт беллашувларида ғалаба қозонган спортчиларимиз шарафига юртимиз байроғи баланд кўтарилган лаҳзада ҳар биримиз чексиз ҳаяжонга тушамиз, ҳеч кимдан кам эмаслигимизни ҳис қиламиз.

Давлат рамзлари ҳар бир мамлакатнинг мустақиллигини ифодаловчи муборак белгидир. Республикамиз давлат рамзлари халқимизнинг шон-шарафи, тарихий хотираси ва интилишларини ўзида мужассам этиб, тинч ва осойишта, озод ва эркин ҳаётимиз, ёруғ келажагимизга бўлган ишончимиз ифодасидир.

Республикамиз давлат байроғидаги рамзлар Ўзбекистон сарҳадида қадимда мавжуд бўлган давлатлар билан тарихан боғлиқликни ҳамда юртимиз ҳудудида яшовчи миллат ва элатларнинг анъаналарини ўзида мужассамлаштирган.

Байроқдаги мовий ранг – унинг остида барча миллатлар турли хил хавф-хатарлардан холи, эмин-эркин ҳолда аҳил-иноқ яшаб келаётган мусаффо осмонимиз ҳамда оби ҳаёт рамзидир. Байроқдаги оқ ранг – давлатимиз фуқароларининг ўзаро ҳамжиҳатликда, бир-бирини ҳурмат қилиб, диний бағрикенглик тамойиллари асосида тинч-тотув яшаётганининг тимсоли. Яшил ранг эса табиатнинг янгиланиши ҳамда юртимизнинг жаннатмонанд эканлиги рамзидир. Бу ранг кўпгина халқларда навқиронлик, умид ва шодумонлик тимсоли ҳисобланади.

Қизил чизиқлар давлатимиз фаровонлиги, жамият тараққиёти йўлида ўзаро ҳамжиҳатлик билан ҳормай-толмай меҳнат қилаётган юрт фарзандларининг вужудида оқаётган ҳаётий қудрат ирмоқларидир.

Давлат рамзлари ҳамиша муқаддас ва улуғ саналади. Чунки у халқнинг ўтмиши, бугуни ва келажагини ўзида мужассам этган Ватаннинг ёрқин тимсолидир.

Ҳақиқатдан ҳам, ҳаётимизда рамз ва тимсолларнинг ўрни катта. Зеро, миллий рамзлар ор-номус, шон-шараф саналган. Шайх Нажмиддин Кубронинг жасоратини тарихдан яхши биламиз. Ҳамон бу буюк қаҳрамонлик тилдан тушмайди, ҳанузгача халқимизни ватанпарварликка, қаҳрамонликка чорлайди. Юрт байроғини ёв қўлига топширишни истамаган Нажмиддин Кубро уни қўлида маҳкам тутганча жон берган эди. Душман ҳарчанд уринмасин, унинг қўлидан байроқни тортиб ололмай, охири панжалари билан кесиб олади. Туғини жонидан ортиқ асраган Тўмарис, Спитамен, Муқанна, Темур Малик, Амир Темур, Жалолиддин Мангуберди каби ўнлаб саркардалар ҳаёти ҳам бугун авлодларимизга катта ибрат. Аслида Ватан байроғини кўзга суртиш, уни тўтиё қилиш Ватанни севиш, унинг учун жонини фидо қилишга тайёр бўлиш деганидир.

Мустақил давлатимиз байроғи тинч ва осойишта, озод ҳамда эркин ҳаётимиз, ёруғ келажагимизга бўлган ишончимиз тимсолидир. Давлат рамзларининг муқаддаслигини, улар бизга юрт манфаати ҳар недан устунлигини англатиб, эслатиб туришини ҳар биримиз ёдда тутишимиз шарт.

Байроғимизнинг баландлиги юртимизнинг обрў-нуфузи юксаклигидан далолатдир. Шундай экан, сарбаланд қаддимиз ва қадримиз тимсолини ҳамиша эъзозлайлик ва бошимиз узра баланд кўтарайлик!

Муҳаммади ҚОРАЕВ

2021 йил 16 ноябрь куни Ўзбекистон мусулмонлари идораси раиси, муфтий Нуриддин домла Холиқназаров ҳазратлари Сардоба туманида қайта қурилган “Юсуф” жоме масжиди очилиш маросими доирасида жоменинг боғига мевали дарахт кўчатларини экдилар.

Айни кунларда давлатимиз раҳбари ташаббуси билан бошланган “Яшил макон” умуммиллий лойиҳаси доирасидаги кўчат экиш ва боғлар ташкил этиш ишлари қизғин паллага кирди. Мазкур умуммиллий лойиҳаси доирасида йилига 200 миллион туп дарахт ва буталар экиш ва шу орқали яшил майдонларни кенгайтириш вазифалари белгиланган. Мазкур лойиҳа доирасида 2 ноябрдан 10 декабрга қадар дарахт экиш бўйича “долзарб 40 кунлик” эълон қилинган эди.

Шу куни Сардоба туманидаги “Юсуф” масжиди янги биноси очилиш маросими доирасида ташкил этилган кўчат экиш тадбир айни мақсадга ҳамоҳанг бўлди. Жоме атрофига 200 га яқин мевали ва манзарали кўчатлар, анвойи гуллар экилди.
Таъкидлаш жоизки, бундай хайрли тадбирлар юртимиздаги барча масжид, мадраса ва диний ташкилотларда кенг кўламда амалга оширилмоқда. Шунингдек, диний соҳа ходимлари томонидан ҳам ҳудудларда яшил майдонлар ҳосил қилинмоқда.
Дарҳақиқат, Қуръони каримда марҳамат қилинади: “Сизлар экаётган зироатларингизни (ўйлаб) кўрдингизми?! Уни сизлар ўндирурсизми ёки биз ўндирувчимизми?!” (Воқеа, 63-64).

Қайси мўмин инсон яхши ният билан экин экса, кўчат ўтқазса улуғ ажру савобга эга бўлади. Динимиз кўрсатмаларида кўчат экиш инсонга нафақат тирикликда, балки унинг вафотидан сўнг ҳам савоби етиб турадиган эзгу амал экани таъкидланган. Расулуллоҳ (соллаллоҳу алайҳи ва саллам) бундай марҳамат қиладилар: “Кимки бирор кўчат ёки экин экса, ундан қуш, одам ёки бирор жонивор еса, эккан кишига садақа савоби ёзилади” (Имом Муслим ривояти).
Шундай экан, мамлакатимизда яшил майдонлар яратиш, ўрмонзорларни кенгайтириш, мавжуд яшиллик дунёсини муҳофазалаш барчамизнинг эзгу ва савобли ишимиздир.
Аллоҳ таоло ушбу хайрли тадбирни манфаатли қилсин.

Ўзбекистон мусулмонлари идораси Матбуот хизмати

2021 йил 16 ноябрь куни Ўзбекистон мусулмонлари идораси раиси, муфтий Нуриддин домла Холиқназаров ҳазратлари Сирдарё вилояти Сардоба туманида жойлашган “Юсуф” жоме масжидининг янгидан бунёд этилган иншооти очилиш маросимида қатнашдилар. У кишига “Вақф” фонди раҳбари Яҳё домла Абдураҳмонов ва вилоят бош имом-хатиби Ҳабибуллоҳ домла Зокиров ҳамрохлик қилишди.

Муфтий ҳазратнинг ташрифини эшитган сирдарёлик мўмин-мусулмонлар жоме масжидга тўп-тўп бўлиб келишди. Очилиш маросими аввалида Ҳақ таолога шукроналик сифатида жонлиқ сўйилиб, хайрли дуолар қилинди. Қуръони карим тиловат қилиниб, ўтганлар руҳи покига бағшида этилди. Сўнг Ўзбекистон мусулмонлари идораси раиси, муфтий Нуриддин домла Холиқназаров жоме ҳовлисига кўчат экиш тадбирида қатнашиб, табаррукона кўчат экиб бердилар.
Шундан сўнг муфтий ҳазратлари бошчилигида йиғилганлар масжиднинг янги биносида мўмин-мусулмонларга қилинган шарт-шароитлар билан яқиндан танишдилар. Кейин хонақоҳда маърифий тадбир бўлиб ўтди. Маросим аввалида бош имом-хатиб Ҳабибуллоҳ домла Зокиров муфтий ҳазратни ташриф билан қутлаб, янги вазифага тайинланганлари билан Андижон мўмин-мусулмонлари номидан муборакбод этиб, у кишини хайрли тилаклар билдирди ва сўнгра намозхонларга суҳбат қилиб беришни илтимос қилди.

Муфтий ҳазратлари ўз сўзларида ўтган йили Сардоба сув омборида рўй берган фалокат натижасида ҳудуддаги «Юсуф» жоме масжиди ҳам зарур кўрган эди. Ўтган вақт мобайнида Ўзбекистон мусулмонлари идораси ҳузуридаги «Вақф» хайрия жамоат фонди ва сахий юртдошларимизнинг кўмаги билан мазкур масжидда кенг кўламли қурилиш-таъмирлаш ишларини олиб борилиб якунлангани ҳақида Муфтий ҳазратлари сўзлаб, жумладан бундай дедилар:
– «Расулуллоҳ соллаллоҳу алайҳи васаллам: “Ким масжид бино қилса, Аллоҳ унга жаннатда қаср бино қилади”, деганлар. Масжидни бино қилишда қатнашган ҳамма мана шу савобга дохил бўлади, инша Аллоҳ. Кимдир моли билан, кимдир меҳнати, кимдир дуоси билан хизмат қилади.

Аслида масжидлар ортиқча безакларсиз, кишини ибодатдан чалғитмайдиган даражада оддий бўлиши керак. «Юсуф» масжиди ҳам ана шундай безакларсиз бўлгани айни муддао. Бу ерда турли ортиқча унсурлар эмас, жуда катта файз бор. Масжид одамларни ибодатдан чалғитадиган нарсалардан холи бўлиши керак. Масжид маънавият, маърифат масканига айланиши керак», – дейди муфтий Нуриддин домла Холиқназаров ҳазратлари.
Муфтий ҳазрат ўз нутқларидан сўнг масжидга Қуръони карим ва унинг таржимаси китобларини совға қилдилар. Шунингдек, масжидга Диний идора фондидан масжид молиявий қўллаб-қувватлаш учун 20 миллион сўм ажратилди.
«Вақф» хайрия жамоат фонди раиси Яҳё қори Абдураҳмонов эса масжид қурилишига ўзининг каттаю кичик ҳиссасини қўшган барчага миннатдорчилик билдирди. Янги масжиднинг бунёд этилишида хизмат кўрсатган усталарга зарбоф чопон кийдирилди.

Якунда муфтий ҳазратлари хайрли дуолар қилдилар.
Маълумот учун, “Юсуф” масжиди ҳовлиси бир гектар ерни ўз ичига олади. Унинг хонақоҳи ва айвонига 700 одам сиғади. Эҳтиёжга қараб ҳовлида ҳам ибодат жой ҳозирлашга имконият мавжуд. Баландлиги 24 метр, айланаси 10 метр бўлган гумбаз масжид хонақоҳига ўзгача чирой ва файз бериб турибди. Хонақоҳга кириш учун 4 дарвоза бор. Хонақоҳ ва айвони ёнида маъмурият хоналари жойлашган. Масжид ҳовлисига мевали, манзарали кўчатлар, анвойи гуллар экилган.

Ўзбекистон мусулмонлари идораси Матбуот хизмати