Ресторан спорти жаҳон федерацияси (WFRS) 2022 йилнинг 22 февралидан 24 февралигача Ўзбекистонда биринчи ресторан спорти бўйича WFRS ҳалол чемпионати ўтказилишини эълон қилди, деб хабар бермоқда gosrf.ru.

"Исломий меъёрларга мувофиқ тайёрланган ҳалол ошхонага ер юзининг икки миллиард мусулмон аҳолисида эҳтиёж катта", - дейди WFRS Президенти Александр Рабинович, - "Шунинг учун исломга эътиқод қилувчи кўплаб мамлакатларни ўз ичига олган ресторан спорти жаҳон федерацияси бундай чемпионатни ўтказишга қарор қилгани бежиз эмас. Чемпионат ва турнирларимизда фаол иштирок этиб, совринли ўринларни эгаллаб келаётган ўзбекистонлик дўстларимиздан эса ўз ватанида мусобақаларни ташкил этишга таклиф этаётганимиздан беҳад миннатдормиз".

Эслатиб ўтамиз, ҳалол (арабчада - рухсат этилган) – "Исломда рухсат этилган ва жоиз бўлган барча нарсалар" (ҳаромга зид). Кўпинча, бу анжуман мусулмонларга тўғри тайёрланган ва рухсат этилган таомларга мурожаат қилиш учун ишлатилади. Ҳалол таом – мусулмон урф-одат ва қоидаларига мувофиқ тайёрланган бўлади. Менюда фақат ислом дини рухсат берган маҳсулотлар мавжуд. Бундай овқатни мусулмон ошпазлар тайёрлашади.

Чемпионат ташкилотчиси, Ресторан спорти жаҳон федерацияси (WFRS) ҳозирда дунёнинг 36 мамлакати миллий федерацияларини бирлаштиради ва аъзолик учун янги аризалар доимий равишда қабул қилинади. Федерация қароргоҳи Болгариянинг Бургас шаҳрида жойлашган. Ресторан спорт турлари бўйича навбатдаги жаҳон чемпионати Россиянинг Сочи шаҳрида 2021 йилнинг 24 сентябридан 26 сентябрига қадар бўлиб ўтади.

Ўзбекистон мусулмонлари идораси матбуот хизмати

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Хайрия амалларига нафақа қилиш ва фақирларга ёрдамлашиш

Рамазон ойида хайрия амалларини бажаришни одат қилган мусулмон бу хайрли ишларини Рамазондан сўнг ҳам давом эттириши лозим бўлади. Ўз молининг маълум қисмини имкон қадар муҳтож ва фақирларни қўллашга сарфлайди. Бу сабабли бойлар ва камбағаллар орасида улфатчилик ва меҳр-оқибат кенг тарқалади. Ҳар бир мусулмон билиши лозимки албатта, Аллоҳ таоло бу сарфланган маблағни унинг саломатлиги ва фарзандлари ҳамда молларида ўрнини тўлдиради. Бу борада Аллоҳ таоло шундай марҳамат қилади:

“Аллоҳ йўлида молларини инфоқ-эҳсон қиладиган кишиларнинг мисоли худди ҳар бир бошоғида юзта дони бўлган еттита бошоқни ундириб чиқарган битта донга ўхшайди (қилинган битта яхшилик етти юз баробар бўлиб қайтишига ишорат қилинмоқда). Аллоҳ истаган кишиларига бир неча баробар қилиб беради. Аллоҳ (фазлу карами) кенг, билгувчидир”. (Бақара сураси, 261-оят).

“Не бир нарсани инфоқ-эҳсон қилсангизлар, бас, (Аллоҳ) унинг ўрнини тўлдирур. У энг яхши Ризқ бергувчидир”. (Сабаъ сураси, 39-оят).

Абу Ҳурайра розияллоҳу анҳудан ривоят қилинади:

Расулуллоҳ соллаллоҳу алайҳи васаллам айтдилар: “Аллоҳ таоло деди: “Эй Одам боласи нафақа қилгин сенга нафақа қиламан”.

Бухорий ривоят қилган.

Яна ўша кишидан ривоят қилинади:

Расулуллоҳ соллаллоҳу алайҳи васаллам айтдилар: “Бевалар ва мискинлар ёрдамига шошилган Аллоҳ йўлида жиҳод қилган каби ёки кечаси қоим бўлиб кундузи соим бўлгани кабидир”.

Бухорий ривоят қилган.

Абу Кабша ал-Анморий розияллоҳу анҳудан ривоят қилинади:

Расулуллоҳ соллаллоҳу алайҳи васаллам айтдилар: “Уч нарсага қасам ичиб айтаман ёдлаб олинглар: “Банданинг моли садақа ила нуқсонга учрамас. Банда бир зулмга учраса-ю, унга сабр қилса, албатта, Аллоҳ унинг иззатини зиёда қилур. Банда тиланчилик эшигини очса, албатта, Аллоҳ унга фақирлик эшигини очар”.

Термизий ривоят қилган.

(Давоми бор)

Манба: islamtoday.net

Муҳаммадали таржимаси

Кеча, 28 май куни Қорақалпоғистон Республикаси Тахтакўпир тумани “Даўқара” овул фуқаролар йиғини ҳудудида янги қурилган “Абдулкарийм Ахун” жоме масжиди очилиш маросими бўлиб ўтди. Унда Қорақалпоғистон Республикаси Адлия вазири Саулаубай Мамбеткадиров, Қорақалпоғистон Республикаси қозиёти қозиси Шамсиддин домла Бауатдинов, мутасадди вакиллар, имом домлалар, овул аҳли иштирок этди.

Тадбир давомида сўзга чиққан нотиқлар масжид аҳлини жоме билан муборакбод этиб, юртимизда диний-маърифий соҳада қилинаётган ишлар ҳақида сўзлади, илиқ тилаклар билдирди. Шунингдек, унда Қорақалпоғистон Республикаси Адлия вазири Саулаубай Мамбеткадиров жоме ходимларига масжиднинг давлат рўйхатидан ўтказилгани тўғрисидаги гувоҳномани топширди.

Масжиднинг очилиш маросими кунларнинг улуғи муборак жумада ҳудуд аҳлиги туҳфа бўлди, унда тадбир қатнашчилари жамоат бўлиб жума намозини адо этиб, намозхонлар билан хайрли дуолар қилинди.

Маълумот учун, масжид қурилиши соҳоватпеша инсонлар кўмаги ва халқ ҳашари йўли билан 2021 йил бошида бошланиб, ҳозирга келиб тўлиқ битказилган. Шу билан мамлакатимиздаги масжидлар сони 2091 тага, Қорақалпоғистонда эса 55 тага етди.

Жоме 120 нафар намозхонга мўлжалланган катта хонақоҳ, бир вақтнинг ўзида 15 киши фойдаланиши мумкин бўлган замонавий таҳоратхона ва маъмурият хоналарини ўз ичига олган. Катта гумбаз ва бинога қўшилиб кетган икки минора масжидга ўзгача кўрк бериб турибди.

Масжид ўз даврининг маънавият ва маърифат нурини тарқатган дин пешвоси, уламо, кўплаб толиби илмларининг устози бўлган Абдулкарийм Ахун номига қўйилди. Ҳозирда республика қозиёти томонидан масжидга имом-хатибликка номзоднинг ҳужжатлари мутасадди ташкилотларга юборилган.

Аллоҳ таоло ушбу байтуллоҳнинг қиёматгача мўмин-мусулмонларга хизмат қилишини, унинг барпо бўлишига ҳисса қўшганлар бандаларига ваъда қилган ажру мукофотларни кўпайтириб беришини, бундан хайрли ишлари бардавом бўлишини насиб қилсин!

Ўзбекистон мусулмонлари идораси матбуот хизмати

Бирлашган Араб Амирликлари прокуратураси маҳаллий аҳолига жодугарлик амалиёти учун жиноий жазо берилишини эслатди. Жумладан, унда БААнинг Жиноят кодексига зид бўлган қора сеҳрни тарғиб қилиш ёки бундай фаолиятни амалга оширишда ҳар қандай ёрдамнинг йўл қўйилмаслиги ҳақида боради.

Қонунга кўра, шариат қонунларига зид бўлган, ўзгаларнинг танаси, қалби, ақли ёки иродасига бевосита ёки билвосита, хоҳ реал, хоҳ хаёлий тарзда таъсир этиш мақсадида қилинган ҳар қандай сўз ёки ҳаракатлар жодугарлик деб эътироф этилади.

Islam.ru хабарига кўра, уларнинг имонига, ақлига таъсир қилиш ёки фойда олиш мақсадида уларни ҳақиқатда мавжуд бўлмаган нарсаларни кўришга ундаш мақсади билан оптик иллюзия ва одамларнинг онги ва қалбини назорат қилишга уринишни ўз ичига олувчи ҳар қандай ҳаракат қора сеҳр, деб тушунилади. Бундан ташқари, одамлардан фойда олиш учун олдиндан кўриш ва башорат қилиш, сирларни билиш қобилиятига эгаликни даъво қилиш ҳам жазоланади.

Қонунда айтилишича, сеҳргарлик ёки қора сеҳргарлик билан шуғулланувчи ҳар бир киши қамоқ жазоси ва камида 50 минг дирҳам (13.6 минг АҚШ доллари) жаримага тортилади. Қамоқ жазосини ўташ натижасида хорижликлар ҳам ватанига депортация қилинади. Барча ҳолларда суд жодугарлик амалиёти билан шуғулланиш учун буюмларни мусодара қилиш тўғрисида ҳукм чиқаради.

Қонунда бундай ҳаракатларда иштирок этганлар ва уларни амалга оширишда ёрдам кўрсатганларнинг барчаси учун ҳам жавобгарлик белгиланган, деб хабар бермоқда Gulf News нашри.

Ўзбекистон мусулмонлари идораси матбуот хизмати

Ислом дини ҳамиша эзгуликни тарғиб қилади, динни ниқоб қилиб турли ғаразли мақсадларни амалга оширувчи гуруҳларнинг ниятларини қоралайди. Бу ҳақда Пайғамбаримиз соллаллоҳу алайҳи васаллам: "Ҳақиқий мусулмон қўлидан ҳам, тилидан ҳам ўзгаларга озор бермаган кишидир" дедилар. Ақида исломнинг асоси бўлгани учун ҳам уни бузишга ҳаракатлар ҳар доим бўлиб келган. Хусусан катта саҳобийларнинг вақтларидаёқ ақидавий баҳслар олиб боришга мажбур бўлинган эди.

Тобеинлар даврига келиб ҳолат янада жиддийлашди. Чунки бу пайтда мўътазилий, қадарий, хорижий каби кўплаб бузуқ ақидадаги тоифалар тарқалиб бўлган эди. Бундан ташқари динбузарлар ва диндан ўз мақсадида фойдаланишни мақсад қилганлар ҳам кўпайган эди. Ана шундай оғир пайтларда соф Ислом ақидасини сақлаб қолиш учун ҳаракат қиладиган уламолар ўз вазифаларини муносиб бажардилар. Улар Аҳли сунна вал жамоа ақидасини муносиб ҳимоячилари бўлиб, бу йўлда жуда машаққатли ишларни бажардилар. Бу борада имом Ашъарий ва имом Мотуридийларни алоҳида кўрсатиш мумкин.

Маълумки, дин мустаҳкам ақида устига қурилмас экан, унинг натижаси залолат, адашишдан бошқа нарса бўлмайди. Зеро, буюк бобомиз Сўфи Оллоҳёр раҳимаҳуллоҳ: Ақида билмаган шайтона элдир, Агар минг йил амал деб қилса, елдир, деганлар. Бугун дунё саҳнасида “Ислом” динини ниқоб қилиб олган манфур, пасткаш кимсалар ўз ғаразли мақсадларини амалга ошириш учун ҳар қандай йўл ва услублардан фойдаланмоқдалар. Уларнинг асл мақсадлари анъанавий Ислом ривожига ҳисса қўшиш эмас, балки инсонларга Ислом динини ёмон кўрсатиш билан бир қаторда, анъанавий бўлган шариат аҳкомларига ўзларининг бузуқ ақидаларини тиқиштириб, ҳақиқий ислом таълимотидан узоқлаштиришдир. Шунингдек, мазкур бузуқ ақидалари билан инсонлар орасида турли фитна фасодлар ва нотинчликлар келтириб чиқариб ҳокимиятга интилиш каби мақсадларни илгари сурадилар. Чунки улар томонидан амалга оширилаётган ишларга бир назар ташлаган киши уларнинг ишлари умуман Исломга ёт эканлигини англаб етади. Албатта, улар қилаётган ишларини Исломга нисбат бериб, ўзларини оқлаш мақсадида Қуръони каримдан ёки ҳадиси шариф ва суннати Набавиядан ўзларича далиллар келтиришади. Бу далилларни ҳали Исломдан тўлиқ хабари бўлмаган ёки кенгроқ тушунчага эга бўлмаган кимсалар “тўғри” эканлигига шак шубҳа ҳам қилмайдилар.

Аслида улар келтираётган оят ва ҳадисларнинг сабаби нузули - ( яъни пайғамбар алайҳиссаломга бирор бир оят ваҳий қилинганда (туширилганда) тушиш сабаби бўлган) улар эса асл мақсад ва сабабларни четга суриб ўзларининг фикрларини келтиришади. Натижада, ҳали ғўр Исломдан яхши хабари бўлмаган ёшлар бундай оқимлар таъсирига тушиб, ўзи ва ўзгаларни адаштириб нотўғри йўлдан кетиб қоладилар. Шу билан иш тугамайди, тинчгина яшаб турган она заминига хоин ва манқурт кимсаларга айланиб қоладилар. Бузуқ ақидаларга тарғиб қилаётган кимсаларнинг асл мақсадлари шу бўлиб, энди улар бундай манқуртлаштирилган кимсаларга ҳар қандай буйруқлар бериб уларни осонгина бошқаришлари мумкин бўлади. Бу улар дунёнинг хоҳлаган бурчагида ғаразли мақсадларини амалга ошириш учун тайёргарлик кўрди деганини англатади. Бугун дунёда бўлаётган қонли тўқнашувларнинг асосий сабабчилари қандай ном билан чиқмасин, бузуқ ақидаларга суянган кимсаларнинг ишидир. Демак, сизу биз, ниҳоятда сергак бўлишимиз, фарзандларимизни таълим тарбиясига алоҳида эътибор қаратиб, уларга аҳли сунна вал жамоа эътиқодидан бошқа, ҳар қандай ақидалар, бузғунчи ғоялар эканлигини тушунтириб, динимиз анъанавийлигини йўқотмаслигимиз лозим бўлади.

Хулоса қилиб айтганда, “Аҳли суннат вал жамоа” эътиқодининг софлиги, мўътадиллиги ва бошқа динлар билан ҳам муносабатида бағрикенглиги, ҳаётий эҳтиёжлар билан ҳамнафаслиги, тирикчилик ва тараққиёт заруратини чуқур идрок этиш бўлиб, Ўзбекистоннинг бугунги демократик тараққиёти йўлига ҳам ҳамоҳангдир. Аллоҳ таолога шукрлар айтамизки, бугунги кунда мусулмончилигимизни, эътиқодимизни соғлом қилишга, уни мукаммал ўрганишга имкониятлар мавжуд. Мана республикамизда олий ва ўрта ислом билим юртлари, икки мингдан ортиқ масжидлар фаолият кўрсатиб турибди. Билмаганларимизни мўътабар, ҳурматли уламоларимизнинг таълиф этган китобларидан ўқиб, имом-хатиблардан сўраб ўрганишимиз даркор. Уларнинг сўзларига доим қулоқ тутишимиз ва ҳурматларини жойига қўйишимиз лозим. Барчамиз ниятимизни пок қилиб, ватанимиз, динимиз ва халқимизга манфаати тегадиган мусулмонлар бўлишга ҳаракат қилишимиз керак. Аллоҳ таоло барчамизни фирқаланишдан сақлаб, “аҳли суннат вал жамоа” да собитқадам қилсин!

Давронбек АБДУҚОДИРОВ,