Манбаларда қайд этилишича, Мавлоно Муҳаммад Зоҳид ўз даврининг улуғ шайхларидан бири, Хожа Убайдуллоҳ Аҳрор Валий ҳазратларининг энг суюкли халифалари бўлган. Силсила омонати яъни, иршодномани ҳазрати Аҳрор Валийдан олган.

Сурхондарё вилояти Олтинсой туманидаги Кичик Вахшивор қишлоғида у зоти олийга қурилган мақбара муқаддас зиёратгоҳга айланган. Мавлоно Яъқуб Чархий раҳматуллоҳи алайҳининг набиралари, яъни қизларининг ўғли бўлган Хожа Муҳаммад заиф вужудли, оппоқ рангли ва сийрак соқолли, ўз замонасида илм ва тақвода тенгсиз зот сифатида таърифланади.

Хожа Муҳаммад Зоҳид раҳматуллоҳи алайҳи ёшликларида ўз-ўзларидан ибодат, тақво ва зоҳидликка берилиб, кейинчалик бир муршиди комилга эҳтиёж сеза бошлайди. Шунда Хожа Убайдуллоҳ Аҳрор раҳматуллоҳи алайҳни излаб, сафарга отланади. Бундан хабар топган Хожа Убайдуллоҳ Аҳрор у зотни кутиб олиш учун уловига миниб, шаҳар ташқарисига чиқади. Тасодифни қарангки, икковлари сўлим дарахтзор қўйнида учрашиб, шу ерда бир-бирларидан хол-аҳвол сўрашгач, устоздан сабоқ олишни бошлайди.

Тариқат аҳлининг йирик намояндаси, нақшбандийлар раҳномаси бўлган Хожа Аҳрор Валий Муҳаммад Зоҳиднинг ўта қобилиятли ва зийраклигини кўриб, катта эътибор билан дарс ўтади. Сабоқлар тез ниҳоясига етгач, ул зотга иршод учун ижозат беради. Бу икки буюк аждодимизнинг биринчи ва сўнгги мулоқотлари бўлган. Шундан сўнг Муҳаммад Зоҳид ўз даврининг улуғ олими, адиби, шоири, орифи сифатида танилган. Милодий 1529 йилда вафот этган.
Буюк алломанинг бетакрор табиат манзараларига бой тоғли гўшада мангу қўним топган сўлим маскани обод зиёртгоҳга айланган. Муқаддас бу жойни нафақат мамлакатимиз балки, бутун мусулмон олами дунёси давлатларидан келаётган сайёҳлар ҳам зиёрат қилиб, ул зот билан ғойибона суҳбатлашишга, маънавий озуқа олишга ошиқади.

Холмўмин МАМАТРАЙИМОВ

19 июль куни Ўзбекистоннинг Қоҳирадаги элчихонасида Миср фуқароси, математика фани бўйича малакали педагог Ҳатем Аҳмад билан учрашув ўтказилди, деб хабар бермоқда “Дунё” АА мухбири.

Суҳбатдош сўзларига кўра, у узоқ йиллар давомида Ислом тамаддуни марказларидан ҳисобланган Бухоро ва Самарқандни зиёрат этиш, математика фани асосчиси Хоразмий юртида бўлишни орзу қилиб келган.

Ҳатем Аҳмад Ўзбекистон расмийлари билан ўтказилган қатор учрашув ва музокаралар натижасида Тошкент шаҳридаги Президент мактабида ишлашга таклиф этилганини таъкидлар экан, ўзбекистонлик ёш ўқувчиларга малакали таълим бериш учун бор куч-ғайратини ишга солишини билдирди.

Ҳозирда элчихона томонидан мисрлик педагогнинг Ўзбекистонга сафарига оид ташкилий масалаларда амалий кўмак берилмоқда.

Ҳатем Аҳмад “Айн Шамс” университетини математика фанлари йўналишида тамомлаган. Шунингдек, Қоҳира шаҳридаги Америка университетида математика фанини инглиз тилида ўқитиш бўйича қўшимча таълим олган. У ўз соҳасида 15 йиллик иш малакасига эга бўлиб, бунга қадар Миср ва Саудия Арабистонидаги нуфузли халқаро мактабларда дарс берган.

Ўзбекистон мусулмонлари идораси Матбуот хизмати

— Бир дўстим бор, ўқимишли, ишбилармон, дунёни кўрган. Лекин ёши ўтиб боряпти, уйланмасликка қарор қилганмиш... Яна бир танишим эса ногирон, яшаш шароити жуда оғир, шу сабабли уйланолмаяпти... Шариатимизда уйланмаганларнинг ҳукми нима бўлади?

— Бу иш нотўғри. Шаръий сабаб бўлмаса, никоҳланишни тарк этиш мутлақо жоиз эмас.

Анас розияллоҳу анҳудан ривоят қилинади. Набий соллаллоҳу алайҳи васаллам: “Огоҳ бўлинг! Аллоҳга қасамки, мен Аллоҳдан энг кўп қўрқадиганингизман, Унга энг кўп тақво қиладиганингизман. Аммо рўза ҳам тутаман, оғзим очиқ ҳам бўлади. Намоз ҳам ўқийман, ухлайман ҳам. Аёлларни никоҳимга ҳам оламан. Ким менинг Суннатимга рағбат қилмаса, мендан эмас”, дедилар (Икки Шайх ва Имом Насоий ривоят қилишган).

Абу Зарр розияллоҳу анҳудан ривоят қилинади: “Расулуллоҳ соллаллоҳу алайҳи васалламнинг ҳузурларига Аккоф ибн Бишр Тамимий исмли бир киши келди. Набий соллаллоҳу алайҳи васаллам унга: “Эй Аккоф, хотининг борми?” дедилар. Шунда у: “Йўқ” дедилар. “Чўрингчи?” дедилар. “Чўрим ҳам йўқ, ўзимга ҳам тўқман”, дедилар. “Ундай бўлса сен шайтоннинг дўстларидан экансан. Насоролар ичидан бўлганингда уларни роҳиблардан бўлар эдинг. Суннатимиз никоҳланишдир, сизларнинг ёмонларингиз тулларингиздир. Сизларни разил ҳолатда вафот топувчиларингиз тул ҳолатда вафот топувчиларингиздир. Шайтон билан алоқада бўласизларми? Солиҳларни ичида шайтон учун хотинлардан кўра кучлироқ қурол йўқ. Уйланганлар бундан мустасно. Улар покдурлар ва хано (шаҳвоний бузуқлик)дан йироқдирлар. Ҳолинга вой бўлсин эй Аккоф, аёллар Айюб, Дувуд, Юсуф ва Курсуф соҳибаларидир” дедилар. “Курсуф ким ё Расулуллоҳ” деган эди. “У кундузлари рўза тутиб, кечалари қоим бўлиб, денгиз бўйларидан бирида Аллоҳга ибодат қилиб, кейинчалик бир хотинга ошиқ бўлиб, Аллоҳ Аъзимга кофир бўлган ва Аллоҳнинг ибодатини тарк қилган. Сўнг Аллоҳ уни баъзи ишлари туфайли уни Ўз раҳматига олган ва тавбасини қабул қилган кишидир. Ҳолинга вой бўлсин эй Аккоф, уйлангин. Акс ҳолда Музабзабин (доим шубҳада юрадиган)лардан бўласан”, дедилар. Шунда: “Мени уйлаб қўйинг ё Расулуллоҳ” деган эди, “Сени Кулсум Ҳимяриннинг қизи Каримага никоҳладим”, дедилар (Имом Аҳмад ривояти).

Сизга Расулуллоҳ соллаллоҳу алайҳи васалламнинг мана бу ҳадисларини ҳам келтирамиз. Шунда дўстларингиз уйланмаслик фикридан қайтади деб умид қиламиз.

Анас ибн Молик розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Никоҳ менинг суннатимдир, ким менинг суннатимдан юз ўгирса, мендан эмас”, дедилар (Имом Бухорий ривояти).

Расулуллоҳ соллаллоҳу алайҳи васалламнинг ушбу сўзлари имкони бўла туриб оила қурмаслик, никоҳланмаслик мусулмон кишининг иши эмаслигини англатмоқда. Валлоҳу аълам!

Муҳаммад Айюбхон домла Ҳомидов

Бирлашган Араб Амирликлари (БАА) ҳукумати 3 миллиард дирҳам (тахминан 817 миллион доллар) миқдоридаги маблағ билан фазо секторини ривожлантиришни қўллаб-қувватлаш учун фонд ташкил этди. Бу ҳақда БАА президенти Муҳаммад бин Зоид Ол-Наҳаёнга асосланиб маҳаллий WAM ахборот агентлиги хабар бермоқда.

Шунингдек, БАА раҳбари, замонавий радиолокацион “Сирб” номли сунъий йўлдошларни ривожлантириш бўйича янги миллий дастурнинг ишга туширилишини эълон қилди (“Сирб” – араб тилидан таржимада тўда, ғуж маъносини билдиради).

Унинг таъкидлашича, мамлакат "инновацион ечимларни топиш ва ушбу ўта муҳим соҳани ривожлантириш учун ўз кадрларини тайёрлаш соҳасида ишлашни давом эттиради".

БАА 2020 йил июль ойида Марсга “ал-Амал” сайёралараро станциясини юборди, шу йил 9 февраль куни ушбу станция Марс сайёраси орбитасига етиб борди. Миссиянинг мақсади Марснинг атмосфераси ва иқлим шароитларини, шунингдек, Ердаги йил ва фасллардан деярли икки баравар узоқ давом этадиган Марс йили ва фаслларининг алмашишини ўрганишдир.

Бундан ташқари, 2022 йилда мамлакат Ернинг табиий сунъий йўлдоши бўлган Ойнинг илгари тадқиқ қилинмаган жойларини ўрганиш учун ой модулини ишга туширишни режалаштирмоқда, дея хабар беради ТАСС.

ЎМИ Халқаро алоқалар бўлими