Бугун, 1 июнь куни "Кўкалдош" ўрта махсус ислом таълим муассасаси битирувчи талабаларининг “Хатмона – 2023” тадбири бўлиб ўтди. Унда диний соҳа раҳбарлари, фахрий уламолар, муддарислар, ота-оналар ва талаба-ёшлар иштирок этди.

Маросимни билим юрти мудири Абдуҳаким қори Матқулов кириш сўзи билан очиб, мадраса тарихи, бугунги кундаги фаолияти, талабаларга яратилган шароит ва имкониятлар ҳақида сўзлади.

Файзли тадбирда сўзга чиққан Ўзбекистон мусулмонлари идораси раиси, муфтий Нуриддин домла ҳазратлари мадраса битирувчи талабаларини муборакбод этиб, Ҳақ таолодан бўлғуси ёш диний соҳа ходимларининг фаолиятига улкан зафар ва муваффақиятлар тиладилар, уларни тарбиялаган устоз ва ота-оналарига ташаккур изҳор этдилар.

Муфтий ҳазратлари юртимизда диний соҳада катта тарихий ўзгаришлар бўлаётгани, айниқса, таълим соҳасига алоҳида эътибор берилаётгани, хусусан, келгусида билим юртларининг илмий савияси, диний таълим сифати ва нуфузини янада ошириш ҳамда маълум бир диний йўналишга ихтисослаштириш, таниқли устозларни жалб этиш, мадрасаларнинг иқтисодий мустақиллигини таъминлаш, жумладан талабаларни тўлиқ грант асосида ўқитадиган даражага кўтариш каби хайрли ишлар режа қилингани ҳақида сўзладилар.

Ўз чиқишларида Муфтий ҳазратлари мазкур тадбирда нафақат меҳмон, балки ота сифатида ҳам қатнашаётганлари, ўзларининг фарзандлари ҳам айни кунда мазкур муассаса битирувчиси экани, ҳар қандай ота учун фарзандининг илму маърифатли бўлганини кўриш катта бахт экани, шу боис ўзлари ҳам барча ота-оналар қатори катта ҳаёжонда ва бахтиёр эканларини баён этиб, мадраса устозларига катта миннатдорлик изҳор этдилар. Шунингдек, битирувчи талабаларга насиҳат қилиб уларнинг ютуқ ва камчилиги билим юртиники бўлиши, шу боис унинг мақоми ва обрў-эътиборини янада кўтаришга астойдил ҳаракат қилишлари лозимлигини уқтирдилар. Энди улар талаба эмас, балки диний соҳа ходими ва уламоликка қўйилган навбатда қадамни босганларинитушунтирдилар.

Дин ишлари бўйича қўмита масъул ходими Муҳаммадбобур Юлдошев ҳам сўз олиб, талаба-ёшларни битирув айёми билан табриклаб, келгусида ўз соҳалари бўйича етук кадр бўлишлари учун тавсия ва насиҳатларини тақдим этди.
Тадбир асносида битирувчи талабалар ва уларнинг ота-оналарига ҳам сўз берилди. Улар ўз миннатдорлик ва фикр-мулоҳазаларини билдиришди.

Маросим давомида илмли ва фаол битирувчи талабалар ва уларнинг ота-оналари диплом, ташаккурнома билан тақдирланди.
Тадбир сўнгида хайрли дуолар қилинди.

Ўзбекистон мусулмонлари идораси Матбуот хизмати

#Ҳаж_умра

1063-CАВОЛ: Тавофи қудум ёки нафл тавофни бетаҳорат қилиб қўйса, бирор жарима лозим бўладими?

ЖАВОБ: Бисмиллаҳир Роҳманир Роҳим.
Ҳар қандай тавофда таҳоратли бўлиш вожиб саналади. Тавофи қудум суннат ҳисобланади. Суннат ва нафл тавофларни бетаҳорат қилиб қўйса, жиноят қилган бўлиб, жаримасига садақа лозим бўлади. Фарз ва вожиб тавофларни бетаҳорат қилиб қўйса, жонлиқ сўйиш ёки шу тавофнинг ўзини қайтариш вожиб бўлади.

ومن طاف طواف القدوم محدثا فعليه صدقة ...فإذا شرع في هذا الطواف وهو سنة يصير واجبا بالشروع ويدخله نقص بترك الطهارة فيجبر بالصدقة إظهارا لدنو رتبته عن الواجب بإيجاب الله وهو طواف الزيارة وكذا الحكم في كل طواف هو تطوع ولو طاف طواف الزيارة محدثا فعليه شاة ...وإن كان جنبا فعليه بدنة

“Тавофи қудумни бетаҳорат қилса, садақа вожиб бўлади. Чунки тавофи қудум суннат бўлсада, киришиш билан вожибга айланади. Уни бетаҳорат ҳолда қилиш камчилик ҳисобланади. Бу камчиликни садақа билан тўлдирилади. Чунки бу тавоф Аллоҳ таоло фарз қилган тавофи зиёратдан қуйида туради. Барча нафл тавофларда ҳам ҳукм шундай(Яъни садақа лозим бўлади). Агар тавофи зиёратни бетаҳорат қилса, қўй сўйиш, жунуб ҳолатда бажарса, будана (туя ёки қорамол) сўйиш вожиб бўлади”. (Ҳидоя). Валлоҳу аълам.

Ўзбекистон мусулмонлари идораси
Фатво маркази.

YouTube (https://www.youtube.com/@Fatvouzb) | Instagram (https://www.instagram.com/fatvouz/) | Facebook (https://www.facebook.com/diniysavollar) | Telegram (https://t.me/diniysavollar)

Аввал хабар қилаганимиздек, бугун, 25 май куни Ўзбекистон Ёзувчилари уюшмасида Ўзбекистон мусулмонлари идораси тасарруфидаги олий ва ўрта махсус диний таълим муассасаларида таълим олаётган талабалар ўртасида “Энг яхши китобхон” кўрик танловининг Республика босқичи бўлиб ўтди.

Тадбирнинг очилиш маросимида Ўзбекистон мусулмонлари идораси раиси ўринбосари Уйғун домла Ғофуров ҳамда Ўзбекистон Ёзувчилари уюшмаси раиси Сирожиддин Саййидлар сўз олди ва китобхонликнинг ҳаётимиздаги ўрни ва аҳамияти ҳақида сўз юритиб, танлов иштирокчиларига муваффақият тиладилар.

Сўнгра танловнинг илк “Бадиий китоблар билимдони” шарти бўйича иштирокчилар беллашдилар. Билим ва маҳорат, китобхонлик ва мулоҳаза синалган ушбу шартда талабалар ўз салоҳиятларини намойш этишди. Уларнинг чиқишларини диний  идора масъуллари ва диний таълим муассасалари устозлари баҳолаб борди.

Қолган “Тезкор савол-жавоб”, “Буюк мутафаккир ва адиб” шартлари ҳам ана шундай муросасиз ва қизғин кечди. Якунда эса ўз билими ва китобхонлигини намойиш этган иштирокчилар ғолиб бўлди.
Натижаларга кўра:
“Энг яхши китобхон” танловида фахрли биринчи ўрин  “Хожа Бухорий” ўрта махсус ислом таълим муассасаси талабаси Муҳаммаджонов Хасанхон Ойбек ўғлига насиб этди. У биринчи даражали диплом ҳамда ўн миллион сўм пул мукофоти билан тақдирланди.

Фахрли иккинчи ўрин  “Жўйбори Калон” аёл-қизлар ўрта махсус ислом таълим муассасаси талабаси Аминжонова Гулжахон Ботирали қизига лойиқ кўрилди.  У ҳам иккинчи даражали диплом ҳамда саккиз миллион сўм пул мукофоти билан тақдирланди.

Учинчи ўрин соҳиби эса “Имом Фахриддин ар-Розий” ўрта махсус ислом таълим муассасаси Исмаилжонов Ҳадятулло Муҳаммадали ўғли бўлди. Унга учинчи даражали диплом билан ҳамда беш миллион сўм пул мукофоти тақдим этилди.

Шунингдек, танловдаги фаол иштироки учун  "Кўкалдош" ўрта махсус ислом таълим муассасаси талабаси Борлибоев Ҳамидулла Хайрулла ўғлига "Энг зукко китобхон" соврини ва фахрий ёрлиғи топширилди.
Уларни Ўзбекистон мусулмонлари идораси раиси ўринбосари Уйғун домла Ғофуров ҳамда диний идора мутасаддилари тақдирлаб, келгуси ўқув ва илмий ишларига ривож тилади. 

Шунингдек, тақдирлаш маросими давомида “Вақф” хайрия жамоат фонди томонидан танловнинг ҳар бир иштирокчисига “Алфиқҳул ҳанафийю фи савбиҳил жадийд” номли беш жилдли китоб тақдим этилди.

Танлов якунида "Кўкалдош" ўрта махсус ислом таълим муассасаси мудири Абдулҳаким қори Матқулов сўзга чиқиб, барча ташкилотчи ва иштирокчиларга миннатдорлик билдириб, хайрли дуолар қилди.

ЎМИ Матбуот хизмати

Мамлакатимизда давлат ташрифи билан бўлиб турган Сингапур Республикаси Президенти Ҳалима Яқуб ва унинг турмуш ўртоғи Муҳаммад Абдулла Тошкент шаҳридаги Ҳазрати Имом мажмуасига борди.

Олий мартабали меҳмонни Президентнинг жамоат ва диний ташкилотлар билан ҳамкорлик масалалари бўйича маслаҳатчиси Музаффар Комилов, Ўзбекистон Республикаси Бош вазири ўринбосари Зулайҳо Маҳкамова, Ўзбекистон мусулмонлари идораси раиси, муфтий Нуриддин домла Холиқназаров ва бошқа расмийлар кутиб олди.

Дастлаб меҳмонларга Ҳазрати Имом мажмуасининг бунёд этилиши ва замонавий услубда зийнатлангани ҳақида батафсил маълумот берилди.

Ҳалима Яқуб хоним ташриф асносида Мўйи муборак мадрасасида сақланаётган Қуръони каримнинг энг қадимий нусхаси – Ҳазрати Усмон Мусҳафини зиёрат қилди. Мартабали меҳмонга бу муборак Қуръон учинчи халифа Усмон ибн Аффон (розияллоҳу анҳу) буйруқларига асосан VII асрда кийик терисига кўчиртирилгани айтиб ўтилди. ЮНЕСКО ташкилоти 2000 йилнинг 28 августида ушбу Мусҳафнинг асл нусха эканини тасдиқловчи ҳужжат – сертификат берган. Суҳбат асносида мазкур Мусҳафнинг Ўрта Осиё заминига келтирилиши тарихи ҳақида ҳам тўхталиб ўтилди.

Шунингдек, олий мартабали меҳмонга Ўзбекистондаги Ислом цивилизацияси маркази биноси лойиҳаси, ички ва ташқи дизайни, музей экспозициялари мазмуни бўйича ҳам маълумот берилди.

Сингапур Президенти Ҳалима Яқуб мана шундай бетакрор тарихий обидаларни асраб-авайлаш, тарғиб қилиш борасида мамлакатимизда олиб борилаётган ислоҳотларни юқори баҳолади. Буларнинг барчаси мусулмон олами вакиллари учун жуда аҳамиятли ва қадрли. Бу ердаги сокинлик, мусулмонларнинг зиёрат ва ибодатларини мукаммал бажариши учун яратилган қулайлик алоҳида эътироф этилди.

Гўзал САТТОРОВА, Отабек МИРСОАТОВ(сурат), ЎзА

Аввал хабар берилганидек, давлатимиз раҳбари Шавкат Мирзиёевнинг таклифига биноан, Сингапур Президенти Ҳалима Яқуб давлат ташрифи билан мамлакатимизда бўлиб турибди.

Сингапур раҳбари бугун Тошкент шаҳрида мамлакатимиздаги диний конфессиялар раҳбарлари билан учрашди.

Мулоқот давомида Осиё юрагида жойлашган қадим Мовароуннаҳр ва ҳозирги Ўзбекистон замини, Буюк ипак йўли орқали турли минтақа, қитъалар, маданият ва илмларни боғловчи марказ бўлгани қайд этилди. Ўтмишда зардуштийлик, буддавийлик ривожланган ҳудудга ислом дини кириб келгач, бу заминдан Имом Бухорий, Абу Исо Термизий, Абу Мансур Мотуридий, Абу Райҳон Беруний, Ибн Сино, Аҳмад Фарғоний каби буюк алломалар етишиб чиққан.

Суҳбат чоғида Президентнинг жамоат ва диний ташкилотлар билан ҳамкорлик масалалари бўйича маслаҳатчиси Музаффар Комилов, Ўзбекистон мусулмонлари идораси раиси, муфтий Нуриддин Холиқназаров меҳмонларга юртимизда давлат раҳбари ташаббуси билан барча соҳалар қатори, диний-маърифий жабҳада, хусусан, дин ва эътиқод эркинлиги йўналишида турли дин вакиллари учун яратилган қатор янгилик, қулайликлар ҳақида маълумот берди. Бир неча янги масжид, черковлар қад ростлаб, илмий-тадқиқот марказлари, олий ва ўрта махсус ислом билим юртлари очилмоқда. 

Ҳозирги кунда республикада 16 диний конфессия мавжуд бўлиб, давлат рўйхатидан ўтказилган диний ташкилотлар сони 2346 тани ташкил этмоқда. Шундан 2149 таси исломий ва 197 таси турли ноисломий конфессиялар ҳисобланади. Ўзбекистон халқаро ислом академияси, Имом Бухорий, Имом Термизий ва Имом Мотуридий халқаро илмий-тадқиқот марказлари, Бухорода Мир Араб олий мадрасаси, Самарқандда эса Ҳадис илмий мактаби фаолиятини алоҳида таъкидлаш жоиз.

Ҳалима Яқуб хоним диний бағрикенглик борасида Ўзбекистоннинг илғор ташаббуслари халқаро ҳамжамият томонидан эътироф этилаётганини қайд этди. 2018 йил декабрь ойида БМТ Бош Ассамблеяси ялпи сессиясида Президент Шавкат Мирзиёев таклиф этган “Маърифат ва диний бағрикенглик” махсус резолюцияси қабул қилингани фикримизни исботлайди.

Ўзбекистоннинг ушбу ташаббуси дунёда тинчлик-осойишталикни сақлаш, диний бағрикенгликни таъминлашда нақадар катта аҳамиятга эгалиги бугунги мураккаб даврда яққол намоён бўлмоқда.

Шунингдек, мамлакатимизда виждон эркинлигини таъминлаш йўлида олиб борилаётган саъй-ҳаракатлар халқаро майдонда ҳам юқори даражада эътироф этилмоқда. Бунга 2020 йил декабрда АҚШ Давлат департаменти томонидан Ўзбекистон диний эркинлик бўйича “Махсус кузатувдаги давлатлар рўйхати”дан чиқарилганини мисол қилиб келтириш мумкин.

Учрашувда диний конфессия раҳбарлари ҳам сўзга чиқиб, яратилган қулайликлар, эътиқод эркинлиги борасида олиб борилаётган ислоҳотлар самарасини таъкидладилар.

Гўзал Сатторова,

Носиржон Ҳайдаров (сурат),

манба: ЎзА